Efitwain Mabe Yesus Wfe Fle Kohok
20:1-8
(Mat. 21:23-27; Mrk. 11:27-33)
20
Tali mre fo Yesus wkakniet ni wak Bol sikafit Nago wfem mabri mde na imam-imam yifle yidien na hra ysaeti ojin Taurat na sa Yahudi yfem, yidien fot na trar-trar yka yse ei yik. 2 Mde ei yto man Yesus: “Nrana la man mam fle kohok man sio ma nen nsiok ni owuok hra ke, madien na sio ma yhnak fle kohok kom man nen!” 3 Yesus wrana man ei: “Tet fot tefitwain ni mre yin nan. Nrana fot yin tet: 4 Yohanes ou, wsrik kat kla fe na, ni kom mahin sorga afe, mahin na tkoin yik?” 5 Na mna ei ynok sas, mde yto: “Bo faf fto: ‘Mahin sorga,’ ofo ou wrana man faf wto: ‘Hra nan naha kat ou wabe?’ 6 Yo, faf frana fto: ‘Mahin na tkoin yik,’ ofo na kadio ykaflet yba faf fidien amak, fe hra ei ynok toron kat mabe, Yohanes ou le ma wabe nabi.” 7 Mde ei yto: “Hra mam mnok dait kla srik okom mahin sio.” 8 O le ma Yesus wrana man ei wto: “Mto mde eke ofo, tet trana tahak fot dait man nan mabe fle kohok mit ma hra tet tsiok ni owuok eke.”Flet Mabe Na Hra Yogo Biele Anggur
20:9-19
(Mat. 21:33-46; Mrk. 12:1-12)
9 Mde Yesus wrana oli flet mre wan na marok wto: “Na mre wago biele anggur, ofo wlaktoin??? man na wat mre yiheit ysiok kein ni yik biele oko, ha, ou wain watsewa wse fobi wat. 10 Mde mtatol mabe biele ou wkanas, ofo ou wbahe wfe wedla dihan mre waka wse na hra yogo biele ei yik, se bo ei ykoriet wat anggur ykan mre yin ou. Mahin ei yba wedla dihan ou, mde ybahe kat wain slok wsalit. 11 Oko wale ofo wbahe oli wedla dihan wat man ou, mahin wedla dihan oko ei yba fot yasak klo, mde ybahe kat wsalit slok oli. 12 Oli kdie fo wbahe wedla dihan matolik fe, mahin na oko ei yala klis, ybir kat wse kladfan. 13 Mde tuan hra wkain biele anggur ou wto: ‘Bo ni mit ma tet tsiok oli om? Tet tbahe deri tet tfe wet hra tmro fe; bo ei yoso kmiet ou.’ 14 Mahin hra oko fo na hra ysiok dieres eke yhot afat wet oko waka, mde yto: ‘Ou ke le ma basak wkain biele ko. Nan nka faf fska ou, se bo biele ko wan deri faf.’ 15 Mde ei yklat kat wse tlein yska kat wkak. Hra ko fo ni mit ma tuan biele anggur wsiok man ei ? 16 Ou waka wska kayi na yiyaka eke, mfot fo biele om wlaktoin biele om mse na wat kdie oli.” Nai yoso ni eke mde ei yto: “Mde wanik deri mahin mdain!” 17 Mahin Yesus wsmit ei, mde wto: “Mto mde eke ofo nas ko wabe:
‘Amak hra na yisiok bol yaha kat, yklat kat wse tlein,
O le ma Nago wlouk oli, worik wabe amak sniyiti hra mahron om.’
18 Na man sio wti wba wak amak om masa ago, ofo ou wsat-sat kat, mde fot le amak om mlilik mba na man ou bo ou wtra.”
19 Mde na hra ysae ojin Taurat yidien imam-imam yifle yhilis wain ou wadien hra oko fot, fe hra ei ynok, mabe flet ou wtatol wan ei, mahin ei yelieksi na marok okom.
Mabe Na Yklat Blasten Mse Kaisar Wak
20:20-26
(Mat. 22:15-22; Mrk. 12:13-17)
20 Na hra ysae ojin Taurat yidien imam yifle ei ybaret lolot Yesus. Ei ybahe na ykelek Yesus, ylolot dienen yibe na yibot, yefitwain gebra-bra ni, ybahe na yslon yotik wse gubernur ou wak. 21 Na eke yefitwain dienen man ou yto: “Guru, mam mnok mabe ni kadio hra nen nrana nkakniet ei ytatol, madien fot nen nlolot dienen dait na, ha, nhares nkakniet fan maron mse Nago wak. 22 Mto mde eke fo, mam mklat fot pitis blasten mse Kaisar wak afe, mdain?” 23 Mde Yesus wnok wale yibri hra masgia om, mde wrana man ei wto: 24 “Nwien la man tet pitis dinar mrem. Na ybatbak ysroin na man sio ma hra ko?” Mde ei yto: “Na ybatbak ysroin Kaisar.” 25 Mde Yesus wto man ei wto: “Mto mde eke fo, nhnak wata mse Kaisar kayi mabe Kaisar ou wam, mde fot le Nago ni mit nhnak man Nago!” 26 Ei yto yho Yesus wak mayiye na marok, mahin wdain. Ha, ei ytmayes kat deri fe ni hra ou wrana, mde ysatmor kadio.
Na Saduki Yefitwain Mabe Ron
20:27-40
(Mat. 22:23-33; Mrk. 12:18-27)
27 O le ma na Saduki, hra yto na yiegi ysidik yron oli dait, ei yka yse Yesus wak, yefitwain man ou yto, 28 “Guru, Musa wsroin ni bahe kom man faf: Na mre wto waigi wahinti kat wsmian om, mahin wkafe dait latiot wet, ofo waliwet waheit wsmian oli wkobon om se bo mkafe wet oli, mre yka, yloit yse wamon wak. 29 Mde le na mre waliwet mtalak. Waflesa wsmian wale mde waigi omuok, wkafe dait latiot wet. 30 Mde na dli okom maheit msmian oli mkobon wabri, 31 mde fot le mkobon man kdie ou kein-kein kayi de yikan mtalak ei, mde ei yeigi kadio kat ykafe dait wet mre yiheit. 32 Makahlia kat ofo na dli okom maigi. 33 Madien hra ko ofo na dli okom mde le sie, bo basak na yiegi ysidik oli ofo na sio ma wsmian om? Fe hra na dla mtalak ei ysmian sisi wale om.” 34 Yesus wrana man ei: “Na hra yik fobi ke ysmian kein-kein, 35 mahin na man hra yibot yibe basak yese yik fobi maifi om basak ysidik yron oli yehin wi maegi om, ysmian oli dait kawuak. 36 Fe hra ei yeigi oli dait; ei yde le malaikat-malaikat, yibe kayi Nago wfe wet, fe hra ei ysidik yron kawuak. 37 Mabe na yiegi ysidik oli, Musa wrana fe krek wale mak nas mabe klifaka se bo na ywit Tuhan wabe Nago Abraham wfe, Nago Ishak wfe, wabe fot Nago Yakub wfe. 38 Ou wabe dait Nago na waegi, ha, wabe kayi Nago na yiron yfe, fe hra mak ou wbariomo na marok mron lis.” 39 Yoso ni eke mde na yisae ojin Taurat yto: “Guru nen nrana ni eke ytatol karmiak kat.” 40 Fe hra ei yelieksi yefitwain oli dait ni mre yin Yesus.
Raja Wasigi Kat Na
20:41-44
(Mat. 22:41-46; Mrk. 12:35-37)
41 Mahin Yesus wrana man ei: “Mde le sie ma na yrana yto Mesias ou le ma Daud wfe wet? 42 Fe hra Daud ou wmres wrana mak katik fari Mazmur wto:
‘Tuhan wrana giet man tet tfe Tuhan wto:
“Nleli la nak tna wait
43 kawuak de Tet tsiok kaisin ei se bo nkait flie kat.” ’
44 Oko le ma Daud wwit ou wabe wfe Tuhan; Mde sie ma ou wabe fot Daud wtakein ou?”
Yesus Wkait Wain Wto Homo-Homo Mabe Guru-Guru Agama Ei
20:45-47
(Mat. 23:5-7; Mrk. 12:38-40)
45 Mde na kadio marok yoso kmiet, Yesus wrana ni yin wedla ei wto: 46 “Nhomo-homo kayi nan ke mabe guru-guru agama. Ei yeisi ytrik not jubah yilis yein fan hoin, yeisi yto na ysaesik sawuan man ei yik pasar; yeisi yleli yik gereja na ybariomo, yik fot wi sahin, se bo na yhot ei, yik fot wi eit konon fle, se bo na yto ei sok. 47 Ei yrana ni ygebra na semit, ei ykaf kesik yfe bol yin ei. Mabe ylak diaman yfe satian ei ysikafit lis. Nan noso dait yibe basak Nago whirit yidien kafir maflem.”