Yesus Wtfoi Zakheus
19:1-10
19
Yesus whok wak Yerikho, ou wain kohli kota oko. 2 Mak kota oko na mre wkedi le ma Zakheus ou wabe na wafle waslonti blasten, ou wabe fot na wakohok. 3 Ou waisi wto whot na man sio ma Yesus ou, mahin na mrok karmiak kat mde ou whot dait fe hra ou wkan om mkatben. 4 Mde ou wsese walin kein na marok oko mde warin wak wkoit ara wgatan ago se bo whot tnes Yesus, 5 mde Yesus whok wak wkoit oko wolo, wgiele mse ago mde wto: “Zakheus, nais tamli, fe hra bot kei tet tleli kayi tak nen nfe bol.” 6 Mde Zakheus wais tamli wahin wkoit om wkashok wbon Yesus ofo yein yse bol. 7 Mahin na marok hra yhot ni eke mde ykahdin yto: “Ou wleli kdie wak na wasiok sawuan satian wfe bol fe me?” 8 Mde Zakheus wsidik wkro, wrana man Tuhan wto: “Tuhan, tkoriet hrien hra tet tfe ke thnak mre yin na yisgia, yidien fot man hra tkein yewer yehin na yfe tet tsalit bo tet tsalit yidien tdan fali oli mahat fe.” 9 Mde Yesus wto: “Ron lis om mhok kayi man nan nik bol kom. fe hra na ko Abraham wtakein. 10 Fe hra Na Tkoin Yfe Wet Tet taka tdihar teren kaka na man hra yein sak-sak.”Flet Mabe Pitis Kdois
19:11-27
(Mat. 25:14-30)
11 Hra oko ofo na yoso kmiet Yesus wrana fe flet wabe wataren wale wse Yerusalem, fe hra na ynok yto Nago wbahe ou wabe raja wak fobi kom. 12 Mde ou wrana wto: “Wet flesa mre wain wse fobi wat mabe na yebet wabe raja, ofo wsalit oli. 13 Ou wwit fien na dihan yikan yahar ei yaka ou whnak pitis kdois perak yin ei wat-wat, mde wto: “Niheit, nsafo ni kayi de tet taka oli.” 14 Mahin na eke ykrek ou, mde yteye kaisin yein ybakorwain ou, mde yto: “Mam maha kat na ko wabe raja wan mam.” 15 Mde wet flesa ou na ybetok kayi wabe raja, ofo wsalit oli wwit fien na dihan ei yka tamli yse ou wak, yrana hatot fe pitis hra ou wlaktoin yin ei, bo yala magiet om madien ydan fali mtatol afe mdain. 16 Na dihan man ou waka wrana hatot wto: “Tuan, pitis kdois mres hra nen nlaktoin ou wtakein wale pitis kdois yahar.” 17 Mde Tuan ou wto: “Mabot karmiak kat man tfe na dla dihan nen, nabe tet thnak dieres masayen nan ntrein, bo tet thnak tnes ni siok nen nslonti kota yahar kom.” 18 Wedla dihan man kdie waka wrana wto: “Tuan, pitis kdois hra nen nlaktoin man tet, om mata oli pitis kdois mahot o le mke.” 19 Mde Tuan wto man na dihan wto: “Nen nabe na wafle, nslonti kota mahot.” 20 Mde na dihan man oli kdie waka wrana Tuan ou wto: “Nen nfe pitis kdois tet tkaka kat mak kmodikma, 21 fe hra tet taliak Tuan nen nabe nen nyaka sawuan, mabe Tuan nen nhnak ni hra nen nkain dait ei, nen nwien fien ni hra nen norik dait ei.” 22 Raja ou wrana man na dihan wto: “Na dihan hra wayaka nen, bo tet thnak kafir mtatol madien ni hra nen nsiok ei. Nen nnok wale tet na wayaka, tet twien fien ni hra tet tlak dait ei, madien tlos fien ni hra tet torik dait ei? 23 Mto mde eke ofo, nen nlak wata pitis ei yse hate bank, se bo tet tsalit oli ofo twien fien oli magiet om madien ydan fali mtatol.” 24 Mde raja wrana man na hra ykro yik oko wto: “Nlouk kat pitis ei yehin ou wak, nhnak yin na dihan hra wsablis, wkain pitis kdois yahar ou.” 25 Mde na yrana yto: “Ou wkain wala??? pitis kdois yahar wale.” 26 Raja ou wrana wto: “Nan nnok na hra ykain wale wrok, na yhnak sba oli ybalili yin ou. Yo, man hra ykain dait, na ylouk kat oli ni hra ei yfe ei. 27 Hra ko ofo notik la kaisin hra yto yaha kat tet tabe dait raja ofo na yska kat ei yik tbariomo.
Ylia Kein Yesus Wloit Wse Yerusalem
19:28-44
(Mat. 21:1-9; 12:12-15)
28 Yesus wrana kadio wala ni eke ofo wain walin kein wse Yerusalem.
29 Hra oko fo wataren wale wse Betfage madien Betania wak Riere Zaitun, wbahe wedla lak hra yidien yein, ei la yelin kein. 30 Mde wtik man ei wto: “Nein nse kampung hra mak nbariomo koit, nloit. Nto nhot na ykaitti keledai wamor mre wak oko, ofo ntli kat wata, notik waka. 31 Mde hra nai yto yefitwain man nan: ‘Hra nan ntli kat keledai ou wabe?’ ofo la nan nto man ei nto: ‘Tuhan o le ma wbahe.’ ”
32 Mde wedla ei la yein ysiok kayi mtatol mde le hra ou wrana om. 33 Wedla ei yto ytli kat kmo latiot keledai ou, mde na hra wkain keledai ou wefitwain wto: Hra nan ntli kat tet tfe keledai ou wabe?” 34 Mde la yto: “Tuhan le ma wbahe mam.” 35 Ei yotik keledai wse Yesus wak, mde ei ysni barere yfe not trik ei yik fan bri aiti se bo ykaka Yesus warin wleli wak keledai wsbiele ago. 36 Yesus warin wata keledai ou wain, ofo na marok mtli kat yfe not trik jubah ei ylak ysni ybarere yik fan mabri. 37 Mde wataren wale wse Yerusalem, wak fan masiolok mahin riere Zaitun, na marok hra yidien yein ei yilia kein ou, ykashok mabe ni owuok hra ei yhot ou wsiok ei. 38 Na marok oko msalo kahradan yto:
“Kohok fle man raja hra wakafe Tuhan wkedim.”
“Mabot mahin sorga mlia kein Nago.”
39 Na Farisi hra yidien sisi na marok okom yrana fot ni yin Yesus, yto: “Guru, nkaboti la nfe wedla kei se bo ysatmor.” 40 Yesus wto: “Tet trana man nan: Ei yto ysatmor ofo, amak anke yrana ni.”
41 Oko fo Yesus wataren wale wse Yerusalem, whot kota oko, mde wawo fem. 42 Wto: “Tbakoko fem, mabot ma tali man ko nan nnok ni mit ma mabe hares bot man nan. Mahin mabe ni okom mlak diaman sonat mak nan nsifuon. 43 Fe hra basak tali wtatol ou, kaisin ei ykelek nen, ykohli kayi de yfit nen. 44 Mde ei ysiok sgia nen nadien nfe na ei yidien fot tembok kdawhi, amak mrem maheit mbries / mtodo dait, fe hra nan nnok dait hene hra, basak Nago waha kat nen.”
Yesus Wloit Wse Nago Wfe Bol Kohok
19:45-48
(Mat. 21:12-13; Mrk. 11:15-18; Yoh. 2:13-16)
45 Mde Yesus wloit wse Nago wfe bol kohok mabri, wwan kat na hra ysafo ni yik eke. 46 Wrana man ei wto: “Na ysroin yto: ‘Bol tet tfe om mabe bol sikafit.’ Mahin nan nsiok mabe klebet ykayem.”