Flet Mabe Hakim Hra Ybot Dait
18:1-8
18
Yesus wrana fe flet mabe ni kakniet man wfe wedla ei se bo ei ysikafit homo-homo deri yo, yleli kertek dait. 2 Ou wto: “Mak kota mrem na hakim hra waliak dait Nago, madien wkan bren kat sawuan na. 3 Mak fot kota oko na dli semit mrem main ta-ta mse na hakim ou wak mwaini ou wsadir kerek om mfe satian ei, mto nkaka la tet nsadir wanik fe satian kom.4 Na hakim ou wnaba kat ta-ta kawuak na semit om mfe giet hra marin fali yse ou wak ei. ??? Fe hra ou wnok wto: ‘Tet taliak dait sok la Nago, ofo tbakoko fe na tkoin ei yibe? 5 Mahin semit om maka ta-ta lis, walbat om molot fe kafir man tet. Mabot ma tkosia kat om mahin satian ei.’ ”
6 Mde Tuhan wto: “Noso kmiet la hakim hra wrek oko wala. 7 Nago bo woso kmiet dait sadik wfe na hra wlouk helwain wale, fe hra ywit mse ou wak tali man amuk man afe? Afe wskatdin sawuan hene man ei? 8 Tet trana man nan: Ou wsigi kat tamli ei. Bo wet na tkoin yfe waka oli, ofo whot na mre ynok sadik oli ou?”
Flet Mabe Na Farisi Wadien Na Wakein Blasten
18:9-14
9 Yesus wrana flet wtatol wan na hra wba wkmuon wto ou le ma wbot sok ha, na marok msgia. Ou wto: 10 “Na lak ei la yein yse Nago wfe bol makohok yibe ysikafit, na Farisi wadien na wakein blasten. 11 Mde na Farisi ou wkro ofo wsikafit wrana wto: ‘Nago, tet tkashok man nen, mabe tet tde dait na marok anke. Tasliak dait, tgebra dait, tsiok dait sebe, tde dait na hra wakein blasten anko. 12 Tet tleli ni eit mao lak minggu mres. Tet thnak sawuan ni sanfe yehin ni siok tet tfe hra ysres ei.’
13 Ha, na wakein blasten ou wkro wyesma kat wakoit, webet dait wsifuon ei, wsamorik wbatok wkan om mde wto: ‘Nai yfe na Nago, nbakoko fe na wasiok satian tet.’
14 Tet trana man nen: Na ko wsalit wse bol ou wa, wabe kayi na hra Nago wware kat satian mdain. Yo, na man ei ydain, fe hra na man sio wto ou le ma wbot wale, bo basak wabe na wasgia. Yo, na man sio wabe na wawet, bo basak wabe na wafle.”
Yesus Wlak Wna Whnak Fle Fe Wet Sdeik
18:15-17
(Mat. 19:13-15; Mrk. 10:13-16)
15 Hra oko fo na yidien twa yfe wet sdeik yse Yesus wak se bo ou wlak wna whnak fle fe ei. Mde Yesus wfe wedla ei yhot ni eke, mde ytrere na eke. 16 Mde Yesus wwit fien wet sdeik eke, mde wrana man wfe wedla eke wto: “Nliokeit wata wet sdeik eke yka yse tet tak! Ntoji amot ei yila! Fe hra na yde le ke o le ma ykain fot Nago wfe kerajaan om. 17 Tet trana man nan: matoron kat na man sio wwien fien dait kerajaan Nago wfem mde le wet sdeik ko, ofo basak ou wloit dait wse mabri.”
Mkahiowain Kat Mabe Na Wakohok Wloit Wse Kerajaan Nago Wfe
18:18-27
(Mat. 19:16-26; Mrk. 10:17-27)
18 Na waslonti na sa Yahudi wefitwain man Yesus, wto: “Guru wabot nen, ni mit ma tet tsiok kayi se bo tkain fot ron lis om?”
19 Mde Yesus wto: “Hra nen nrana nto tet tbot fe me? Na mre wbot dait kat, ha, Nago ou sok. 20 Nen nnok wale ni bahe hra Nago wrana ei: Namir kat dait, nska dait na yila, nasliak dait mala, nadon amot na yila, nsaesik man nono wadien nemem.”
21 Mde na oko wto: “Ni hra eke tet tsiok wale yidien twet.”
22 Yesus woso ni eke mde, wto: “Ni mres latiot hra nen nsiok dait sonat. Bo nen nsiok kayi o le ma nsafo kat nfe hrien ei, pitis ei yka fo, nkoriet mre yin na yisgia, ofo nen nkain hrien yibot yik sorga, ofo naka nadien tet la fein.”
23 Mde na oko woso ni eke mde wtmayes kat, [very sad???] fe hra ou wabe na wakohok. 24 Mde Yesus whot na oko wrwe mabe wfe hrien ei, ofo wrana wto: “Mkahiowain kat mabe na wakohok wloit wse wi ron Nago wfe. 25 Mabot ma unta wloit wsa egien wtayi, mewer kat mahin na wakohok wloit wse kerajaan Nago wfe.”
26 Na marok yoso ni hra Yesus wrana ei, mde yefitwain yto: “Mto mde eke, ofo bo na sio ma yron ei?
27 Yesus wto: “Mde hra na tkoin yfe giet, ofo bo mdain, ha, Nago wfe giet kayim.”
Na Dihan Yidien Yesus
18:28-30
(Mat. 19:27-30; Mrk. 10:28-31)
28 Mde Petrus wto: “Nhot la, mam mehinti kat wale ni mam mi ei, mka midien nen fein.”
29 Mde Yesus wto man ei: “Nan nnok mabe kerajaan Nago wfem molot fe nan nehinti kat nan nfe bol ei, nan nsmian ei, afe niliwet ei, nfe na trar ei, afe nfe wet ei, 30 ofo na oko basak na yhnak ni tasa mewer kat man ou madien hra oko mabe ron lis kawuak.”
Yesus Wrana Tahak Man Wfe Wedla Ei Wabe Bo Wkak Ofo Wsidik Oli
18:31-34
(Mat. 20:17-19; Mrk. 10:32-34)
31 Tali man kdie oli fo, Yesus wwit fien wfe wedla yikan yahar teit lak yka ykro yife mres. Ofo wrana wto: “Noso kmiet la! Bot ke faf fein fhri fse Yerusalem. Fik ana ofo, ni kadio hra nabi ysroin wale yibe Na Tkoin Yfe Wet tet, bo yhok ytatol kadio kat. 32 Ou eke bo nai yaha kat, yteit ber wan na sa wat hra yibe dait na sa Yahudi. Ofo ei yotik ytbekein, ymset, ykatfie kat ou, 33 kayi de ybau yska wkak. Mahin wkak wase deri tali tolik, ofo wahin wsidik oli.”
34 Ni kadio hra Yesus wrana eke, wfe wedla ei ynok dait kat kayi ni mre. Ei yrana sas yto: “Ou wrana ni eke yibe mit ma ei?” Fe hra ni rana ei ydiaman yidien ei.
Yesus Wweyen Na Wasibra Wataren Wse Yerikho
18:35-43
(Mat. 20:29-34; Mrk. 10:46-52)
35 Hra oko ofo Yesus wataren wale wse Yerikho, whot na sibra ou wleli wak fan tefit wwaini ni. 36 Mde na oko woso na marok mrewer yka yein fe wbariomo, ofo wefitwain wto: “Na sio ma oko?” 37 Mde yto: “Yesus na Nazaret ou le ma wewer kat nen oko.”
38 Mde na sibra ou wto: “Yesus, Daud wfe wet, nbakoko fe tet!”
39 Oko fo na man hra yelin ei ytrere ykaboti yto: “Nsatmor kat!” Mahin ou wsalo katrein karmiak kat wto: “Daud wfe wet nen, nbakoko fe tet!”
40 Yesus wkro wbahe wto: “Nidien twa na oko waka wse tet tak.” Mde ykamti tar-tar wse Yesus wak. Ou wefitwain wto: 41 “Ni mit ma nen naisi tet tsiok man nen?”
Mde na sibra wto: “Tuhan, tet taisi thot oli ni.”