Ojin Wat Man Ei
17:1-6
17
Yesus wrana man wfe wedla ei wto: “Ni hra yolot fe na ysiok satian bo yhok kayi, mahin bo kafir man na hra yolot fe satian ei. 2 Mabot ma amak sakro nai ykait mak yidioro, ofo yti kat wata ei yse siwan wabri ale. Walbo yiheit ysiok sgia kdie na mre yehin wet sdeik ekei ysiok satian. 3 O le ma nsiton-ton, ntiek nehin ni ysgia ei.Nto nable mreu wsiok satian, ofo nhar kat ou. Ou wto wket, ofo nbaret keben ou. 4 Mde hra ou wto wsiok ta-ta satian yitatol yin nen, tali mres mao mtalak, ofo ou wsalit oli waka wse nen nak mao mtalak kdie oli wrana hatot wto: ‘Tet tket fe hra tsiok sgia wale ni yin nen.’ Mto mde ke fo, nen nbaret keben oli wata ou “.
5 Wedla rasul ei yrana man Tuhan Yesus yto: “Tuhan, nhnak hron fe mam se bo mam mten mkaso mkanas kat mse nen nak!” 6 Mde Tuhan wto: “Nan nto nsablit nnok kaf kat, mwet deri mde le sesawi mfuon, ofo nrana man wkoit murbei / ara oko nto: ‘Nen nkatrie kat, nain norik oli nse siwan ale,’ ofo wkoit oko bo woso nen nbahe.
Na Dihan Ou Wsiok Kayi Ni Siok.
17:7-10
7 “Mde hra na mre wahin nan nik wto wkain na dihan mreu, wala biele afe, whnak ni eit fe ni ror kayi de siwit kat, ofo wsalit oli wse bol nen na, ofo nto de sie? Bo nen nhakan ou nto: ‘Naka tanak, nleli la, wa tet toyo itasa ni eit mre yin nen nat? Mdain!’ 8 Ha, nen nbahe oli ou nto: ‘Noyo tasa kein ni eit yin tet sok, mfot fo ntrik homo-homo not trik yibot, se bo nen ndihan ni eit man tet tat talin sba, ofo nen nat ni eit nain heles.’ 9 Bo nen ntiksi nfe na dihan ou wabe wtrein wsiok ni hra nen nbahe ei? Mdain! 10 Mde fot le nan. Nan nto nsiok wale kadio kat ni hra tet tbahe man nan, ofo nrana deri nto: ‘Mam ke mibe deri na dihan tkoin deri, msiok ni eke deri.’ ”
17:11-19
11 Yesus wain wse Yerusalem, wain kat fe fobi biyalok Samaria madien Galilea. 12 Hra oko ofo whok wak krotia oko, mde na yahar hra ykain ni kaini obo yka yse Yesus wak ykro afat yik koit, 13 mde ykader kohok yto: “Yesus, Guru, nbakoko fe mam!”
14 Mde Yesus whot ei mde wto: “Nan nein la nse imam ei yik, nyen nkan yin ei yhot.” Mde ei yein wata yik fan kedi mde, ni kaini obo ydain wale yehin ykan ei.
15 Hra oko ofo na obo mre whot ro kat ni kaini ei ydain wale, mde wsalit oli, whdin man Nago wadien wsalo fle. 16 Whok waka fo, wti baloyok, wsaesik wak Yesus wteit olo aiti, whdin ou. Na oko wabe na Samaria. 17 Mde Yesus wto: “Waa? Hra na yahar deri le ma ykaini ydain ei? Hra na mtanhat man kdie ei la mi sie ? 18 Hra ei ysalit dait fe me? Hra ei yhdin dait man Nago fe me? Hra na sa wat man ko wsalit oli whdin sok man Nago wabe?” 19 Mde Yesus wrana man na oko wto: “Mko, nsidik nain. Nen nkaini om mdain wale fe hra nen nten nkaso man tet.”
Basak Nago Waka Wslonti Kerajaan Om
17:20-37
(Mat. 24:23-28, 36-41)
20 Na Farisi mre yefitwain man Yesus yto: “Waka ma Nago waka wabe wslonti fobi kom?” Mde Yesus wrana wto: “ Kerajaan Nago wfem maka madien dait kyat mre yibe na yhot, 21 se bo nai yto: ‘Nka, nhot o le wko,’ afe yto: ‘O le hra koit,’ fe hra Nago ou le wabe na wafle wan na, wsiokti wale nan nik nbariomo.”
22 Oko sba mde Yesus wrana man wfe wedla eke wto: “Mataren mabe ou waka ofo nan neisi nhot wet na tkoin yfe wadien ta-ta sisi sadik nan, mahin nan nhot dait. 23 Basak na yrana man nen yto: ‘Nhot la, ou le mke!’ afe ‘Ou le wana!,’ ofo nan nein nsidihar amot mala. 24 Mde kayi le felek bra wtweit wahin yik watato wlolok wse yik watato, mde le basak wet na tkoin yfe waka oli. 25 Mahin ou whlet ni malmias man ou malin sba madien fot na sa-sa man kom yaha ou, 26 Basak na tkoin yfe wet ou wyen hata ron om, basak fobi kom mde kayi le kamuolo fobi Nuh wase om. 27 Ei yeit ni, yoko twok, ysmian frit-frat, kawuak de Nuh wloit wse bahtera mabri, sba ofo smas fle watsi fobi katak om. 28 Mde fot le kafir hra mhok madien kamuolo Lot. Ei yeit ni, yoko twok, yfelit kerek ni, ysafo ni, yorik ni, ysiok bol. 29 Mahin tali man hra Lot whok wse tlein, wahinti kat Sodom, mde sala kyen mais mde le belerang mais mahin yik ago, mal kowa na kadio kat mtinik. 30 Mde le basak tali, wet na tkoin wyen hata wkan om. 31 Hra oko ofo na mre wak bol kbogiet msbiele ago, wfe hrien yik bol mabri wais wlouk oli dait. Mde fot le na man hra wak biele, wsalit oli dait wabe wlouk ni mre. 32 Nnok kayi mde le Lot wsmian! 33 Na man sio ma waliaksi wawua om, ofo basak wawua om masak, yo na man sio wawua om masak, ofo basak wtatiere fem. 34 Tet trana man nan, amuk hra oko na lak yese sisi yik wi ma ese om, ofo na yotik mre wadien yein, ha mre waheit kayi. 35 Mde fot le na dli lak mre ysiok roti, ofo mrem madien ei yein, mre maheit kayi.”