Flet mabe Na Watik Katik Kbo Hra Wsliak Sawuan Ou
16:1-9
16
Mde Yesus wrana man wedla ei wto: “Na wakohok mre wfe na walak katik kbo. Wabe nai yadon, yto ou whnak sawuan deri hrien ei yin na hra yka yse ou wak. 2 Mde ou wwit fien na walak katik kbo ou waka wefitwain wto: “Tet toso ni rana mre yibe nen? Nrana hatot la ni eke yde le sie, fe hra bo nen nabe oli dait na walak katik kbo.3 Mde ou wrana mak wabri ra wto: “Bo ni mit ma tet tsiok? Tet tfe na kohok wbahe tleli kat tahin ni siok okom, tabe oli dait tlak katik kbo, ofo tet tago biele mdain, tabe na sgia twaini ni eit, ofo tyesma. 4 Tet tnok mabe ni mit ma bo tet tsiok se bo tet tto thok tahin ni siok tlak oli dait pitis, se bo na mre ybahe mese mik yfe bol.
5 Mde ou wwit fien na hra yibe na omuok yin na kohok ou. Mde wefitwain man ei wto: ‘Nen nkafe na omuok fe tet fe na kohok ou pitis waka?’
6 Mde na omuok ou wto: ‘100 tempayan minyak.’
Mde wrana oli man ou wto: ‘Katik fari mahin na kohok ou mabe na omuok o le mkom. Nleli nak ko nsroin katik fari mabe 50 tempayan hra nkafe na omuok yehin na wat.’
7 Mde wrana oli man na omuok man kdie wto: ‘Nen nfe na omuok waka?’
Mde wto: ‘100 safok gandum.’
Wrana man na oko wto: ‘Nfe katik fari le mkom mabe nsroin wat na omuok man ei yibe 80 safok gandum.’ 8 Mde na kohok ou wtiksi na walak katik kbo hra whares dait ou fe hra wsiok ni eke wsablit lis fali mre yde le na ysiok satian basak yibe dait wet hra yik wi mhak mabot om.
9 Mde tet trana man nan: Nkaitti la nife mres ofo nsiok mamon??? hra mabot dait om mala, se bo na ylia kein nik wi mabot.”
Ojin Mabe Ntrein Fot Nik Ni Siok Man Yiwet
16:10-18
10 “Na man sio ma wtrein waisi wsiok ni siok hra yiwet, ofo ou waisi wtrein wsiok fot ni siok yifle. Mde fot le na man sio ma yten ykaso fe dait wabe ni siok yiwet, ofo nai yten ykaso fe dait wan ni siok yifle. 11 Ofo, mde fot le nan ntrein fe dait nsiok ni ybot dait, ofo bo mde le sie ma nai yten ykaso fe hrien yibot yin nen nlak hao? 12 Mde fot le nto nlak hao homo-homo dait na wat yfe hrien ei, ofo bo mde le sie ma na mre yhnak hrien yin nen nkain yin nen?
13 Na dihan mre wtrein wsiok dait ni siok wan na kohok lak mdain, fe hra mto mde ke ofo ou waha kat mre, ha, waisi fe wtrein wan na kohok mre. Mde fot le nan nsaesik sisi dait man Nago, man fot Pitis.”
14 Na Farisi ei yoso kadio ni eke, na hra ysifuon fle sawuan fe pitis, ei ytbekein Ou. 15 Mde ou wrana man ei wto: “Na mna nan nto nbot nik nai ybariomo, mahin Nago wnok wale nan nibri ei. Fe hra ni hra na tkoin ysamenie fe yto ni eke ybot, mahin Nago waisi fe dait.
16 Ojin Taurat hra kamuolo Musa wsroin madien nabi ykakniet ni ei yna todo kayi de mharfe Yohanes wasrik kat kla fe na. Mde hra oko fo nai ykakniet mabe kerajaan Nago wfe hra basak na marok ykanas /yhorot / yketik*** (berusaha terus) yibe yto yloit yse wi maron. 17 *Mabot ma yik wadien fobim ma nyan kat mahin ojin Taurat giet mre masak.
18 *Na man hra waha kat wsmian om, ofo wsmian wat oli na dli mrem, ofo ou wsiok satian. Mde fot le na man sio ma wsmian oli ou wsmian hra ou waha kat wale om, ofo ou eke wsiok fot satian.”
Na Wakohok Wadien Lazarus Na Wasandior
16:19-31
19 Na wakohok mre wtrik sawuan not jubah hra mabot mgien hmes, madien fot wat ni eit wase mbot ta-ta deri. 20 Ha, na wasgia mre wkedi mabe Lazarus ylak wase sawuan wak hrede na wakohok wfe bol magiet, wkan om mgit kat, woho ei yban, wkatot. 21 Wbahoin wto wlouk wain ni eit hra na wakohok wat ei, man hra yfrok yti yse kabi aiti yin wat wain wata. Mde mkan ei ylet wkan maoho om.
22 Mde na wasgia ou waigi walin, ofo malaikat yidien twa wleli wak wi mayehet Abraham wklik hra mak wi maron om. Ofo na wakohok ou waigi kdie oli ofo na ykali wbakorwain. 23 Mahin wak wi maegi om whlet ni msamsa kat, mde whot Abraham wleli wadien Lazarus la yik wi mayehet maron om. 24 Mde wto: “Tono Abraham, nbakoko fe la tet. Nbahe la Lazarus wlo wna mak kla, wtonon mak tadel kom, fe hra tet thlet tadel om mtbat msmeren kat mak sala madhen kom.”
25 Mahin Abraham wto: “Tawet, nnok sas la kamuolo nen nron nbot karmiak kat ha, Lazarus ko wsgia, wban-ban. Yo, madien hra ko ofo ou wyenes wbot ha, nen nsgia nhlet ni malmias msamsa kat mala man nen. 26 Mde kayi le eke fe hra na ysiok wale lolik hra madien kdier yleliti wale nen nak oko, mam mik wat ko. Na mre wfoto waka oli dait wse nen nak; nen fot naka oli dait nse mam mik.”
27 Mde na wakohok ou wrana oli wto: “Mto mde eke ofo, Tono nen nbahe wata ou wain wse tet tono wfe bol, 28 fe hra tet taliwet yikan mahot sonat, ou wrana wkait wain krek man ei ysiok ni ybot, se bo basak yloit dait yse wi kafir mahlet kom.
29 Mahin Abraham wto: “Ei yoso wale giet hra Musa wadien nabi ei yrana fe walem.”
30 Mde ou wada oli wto: “Hau, Tono Abraham, mto mde eke ofo na waegi klebet mre wain wse ei yik, wrana man ei, se bo ei yket yehin satian ei.”
31 Abraham wrana man ou wto: “Ei yto yoso dait giet hra na ysroin mak katik fari ojin Musa madien nabi ei, ofo yten ykaso fe dait, mde fot le na waigi wsidik wron oli fot, mdain kayi.”