Flet mabe Ni Ror Domba hra wasak
15:1-7
(Mat. 18:12-14)
15
Tali mre ofo nai yikein blasten yidien nai ysiok sawuan satian yka yse Yesus wak yoso kmiet wkakniet ni. 2 Mde na Farisi yidien nai yinok ojin Taurat ei ykahdin yto: “Ou wadien sok nai yisiok sawuan satian ei, wat sisi ni eit wadien ei.”3 Mde ou wrana flet kou wan ei wto: 4 “Nan nke ofo na sio ma wkain erwas domba na mahot yeigi (100), ofo erwas mres wasak. Mto mde eke ofo wahinti kat kayi man eke yik wi samdi yiheit, ha, wain wdihar fien mres man hra wasak oko, kayi de wtatiere fe? 5 Mde wadien oli erwas oko ei ysalit oli yse bol. 6 Yhok wale yik bol, ofo wwit fien wanak ei wable wa mre wto: ‘Nan nka, faf fsiok konon, fkashok, mabe tfe erwas domba hra wasak, tet tkamie fien wale o le wko!’ 7 [1] Tet trana man nan mabe kerajaan surga mkashok fe na wa siok satian ou wket, wewer wahin man hra 99 yik wale bol ei.” [2] Ofo Yesus wrana oli wto, “Mde fot le oko, man hra yik wi mayehet ago ei ykashok kayi kamyi kat fe hra na wasiok satian mres ou wto wket! Yewer yehin man hra 99 yibri yibot wale, yket wale.” [3] “Mde fot le oko, Allah wadien malaikat ei ykashok yik wi mayehet ago fe hra na marok 99 man hra yket wale. Yo ykashok yewer kayi kamyi kat yik wi maheyet ago fe hra na mres wsiok satian ou wket.” [4] “Mde fot le oko, yikan hra yik wi mayehet ago ykashok kayi kamyi kat fe hra na wasiok satian mres ou wto wket! Ykashok yewer yehin fe man hra 99 hra yibri ybot wale, yto bosi yket kayi dait.”
Flet Mabe Pitis Kdois Perak Hra Wasak
15:8-10
8 Na dli mrem mfe pitis kdois perak yahar, mahin mres wasak. Mde mbet sitin yidien amuk ofo mais mse kabi aiti mdihar homo-homo kat kayi de mtatiere fem? 9 Mde mto mhot wale ofo, mwit fien manak mfe na ei yka, mde mto: ‘Nan nka, faf fsrar heyit Nago, wabe tet ttatiere fe tfe pitis kdois perak hra wasak.’ 10 Tet trana hatot man nan mabe: mde fot malaikat yik sorga ykashok mabe na mre wket wahin satian.”
Flet Mabe Wet Hra Wasak Ou
15:11-32
11 Yesus wrana oli kdie wto: “Na mre wfe wet yidla lak. 12 Wet wakya wrana man wono wto: ‘Tono, nkoriet krek hrien hra faf fi ei, nhanak krek tet ta ei yin tlak wat.’ Mde wono wkoriet yin la yikan lak ei wat-wat.
13 Mde tali man kdie ofo wet wakya ou wsafo kadio kat wfe hrien, yfot ofo wsidik wain watsewa wse fobi wat, mde wak ana wadien wanak ei yeit ni, yoko twok, ymdo yidien na dli. 14 Hrien ei yfot kadio kat wale ofo katot fle whok wat si na kadio yik oko mde ou wdain fot ni warok kadio kat. 15 Mde ou wain wdihar ni siok wse na wakohok mre wak. Mde na wakohok wbahe whnak ni eit fe korik yik biele. 16 Mahin ou wat sisi fot ni eit krados hra ni ror yfe eke, fe hra na mre yhot dait ou, yhnak dait ni eit fe.
17 Mahin ou wnok sas oli ni eke mde wto: ‘Hyee, na dihan marok msiok sok ni yik tono wfe bol mabe na kohok madien ni eit warok, yo, tet tako tkatot taigi fe ni eit. 18 Bo tet tsidik tsalit oli tse tono wak, trana tto: Tono tet tsiok satian mtatol man Nago, mtatol man fot tono nen. 19 Tet tbot oli dait tabe wet tan tono nen. Nbahe deri tet tabe na dihan tan tono nen.’ 20 Mde wsidik wain wsalit oli wse wono wak.
Whok wak sonat fan ta koit, mde wono whana wto tet tfe wet le ma waka wsalit oli koit, mde wbakoko fe, wsidik wkmois wfe wet ou.
21 Wet ou wrana man wono wto: ‘Tono, tet tsiok satian mtatol man sorga, man fot tono nen, tet tabe oli dait nen nfe wet.’
22 Mahin wono wrana man wfe na dihan ei wto: ‘Habi! Nsia fien not trik jubah mabot man wtrik. Nwien fien slak man ndan man wna tofo klili, sandal ndan teit katak yin wteit. 23 Madien ntli fien erwas sapi wamor ou, wan nkeren, nfosik wan faf feit konon sigi mabe ou. 24 Fe hra wet tet tfe waigi wale, mahin wron oli, wasak wale, mahin waka oli. O le ma nan nka faf fkashok man Nago.’
25 Mahin wet wafleu wak sonat biele wto wsalit oli wse bol wain kayi de wataren wale, mde woso nai yfrio sool ysalo, yba tambur, ysrar ykawu kat. 26 Mde wefitwain man na dihan mre wto: ‘Hra nai ysiok ni mit ma ykawu bol mabri ra?’ 27 Mde na dihan ou wto: ‘Naliwet o le waka wale, mde nono wkerek erwas sapi wamor mre wan nai ysiok konon fe hra wsalit oli, wbot deri.’
28 Mde wet wafle ou wtrere karmiak kat, waha wloit wse bol. Mahin wono whok wrana ni fe ou, mahin ou waha kat deri. 29 Mahin ou wrana man wono, wto: ‘Tet tdihan sadik tono nen tase der wrok, tsiok ni ybot kadio, tsiok dait ni mrem msgia, Tono nen nkerek dait latiot sapi wafle mre wan tet tadien tanak kei meit konon mkashok man Nago mdain. 30 Yo, nen nfe wet hra waka kmo deri hra watik kat hrien warok wak ale wadien na dli mdo sawuan kayi de ni ekei yfot ofo waka kmo deri mde nen nkerek erwas sapi yin nsiok konon fe ou, mahin tet tdain.’