Oli Kdie Ofo Wweyen Madien Tali Sabat
14:1-6
14
Tali Sabat mre kdie ofo Yesus waka wse bol na waslonti na Farisi yibe wat sisi ni eit wadien ei. Na kadio hra yik eke ei ysmit lien homo-homo ou walbat ou wkakniet ni ysgia mre ytatol dait yidien ojin Taurat. 2 Na mre hra wkain obo waka wkro ro kat wak wbariomo ra. 3 Mde Yesus wefitwain man guru agama yidien na Farisi wto: “Ojin Taurat mkakniet mde le sie? Nai yweyen wata ni kaini yidien tali Sabat afe, mdain?” 4 Mde guru agama yidien na Farisi ei ysatmor deri. Mde Yesus wwit fien na wakaini ou waka, wslonti wna om, wweyen ni kaini om, mde mdain ro kat, ofo wbahe wsalit oli.5 Mde Yesus wrana man ei wto: “Na man sio ma wahin nan nik wfe wet afe wfe sapi mre wti wadien tali Sabat wse se kak mabri, ofo webet fien tamli wahin se kak mabri aiti, afe wliokeit wata waheit tali man kdie oli?” 6 Mahin na mre yada oli dait ni hra Yesus wrana ei.
Nibri bot madien Nhares
14:7-11
7 Yesus whot na kadoin ei yka yleli krek wale wi leli hra yin nai yifle yleli ei, mde ou wrana flet ko wan ei: 8 Wrana wto: “Na yto ykadoin nen nse bol eit konon smian, ofo nleli amot nak wi leli nai yifle yfe mala, mabe bo nai ybahe kat nsidik nse kales. Walbat na okou wkadoin na hra wfle wewer wahin nen whok waka, 9 ofo na hra wkadoin nen oko waka wrana wto: ‘Nen nsidikti kat wi okom, nhnak man na oko wlelim. Ofo nen nyesma nsidik nleli nse kales koit. 10 Yo, nto nai ykadoin nen naka nse wi eit konon ofo nleli nak kales. se bo na hra wakain bol oko waka wbahe wto: ‘Nai yfe na, nen nsidik nleli nse wi leli mabot hra matamli koit.’ Mde le ke na kadoin marok yihot nen nabe na wabot, nleli nak wi matamli koit / wi topi makohon. 11 Fe hra na man sio ma wto wfle, bo basak nai yske wak wi mahon, yo na man sio ma wto wyesma sawuan, basak nai yebet wabe na wafle, ylia kein ou wkedi mririn.”
Na Man Sio Ma Nai Ykadoin Kayi
14:12-14
12 Mde Yesus wrana kdie oli man na hra ykadoin ou ei wto: “Nen nto nsiok konon madien tali afe madien amuk afe, ofo nen nkadoin amot nanak ei yila, afe naliwet afe nahano ei yila, afe nen nfe na ei yila, afe nai yikohok amot yila. Fe hra basak ei ykadoin oli nen naka nse ei yik, neit konon oli. 13 Yo, nto nsiok konon, ofo nkadoin deri nai yisgia, na yikarat, nai yisibra. 14 Ofo basak nen nbot nkohok, fe hra ei ykain dait ni mre yibe bo yka ysiok de oli yin nen, mabe basak nen nkain ni tasa nanak wi maron.”
Ni Flet Yibe Basak Konon Flem
14:15-24
(Mat. 22:1-10)
15 Yoso kmiet ni eke mde na kadoin ei yrana man Yesus yto: “Hares man na hra yeit sisi ni eit yidien Nago yik wi maron.”
16 Mahin Yesus wrana man ei wto: “Na mre wsiok konon fle mrem mde wkadoin fien na marok. 17 Mfe mabe konon om nai ysiok, mde na wasiok konon ou wbahe na dihan ei yrana hatot man ei yto: ‘Nan nka, faf feit ni mabe ni kei ylek wale.’
18 Mahin ei yikan kadio ei yto skalili kat. Mreu wrana wto: “Tet tkain firi sala ogo maifiu, bo tet tain tahenek fien. O le ma thros man nan.
19 Man kdie wrana hros wto: ‘Nai yfe na, tet tfe ni ror sapi yehet ymres, mde bo tet taisi tahenek fien, mde bo tet thros man nan.’
20 Man kdie wrana wto: ‘Tet tsmian kmo latiot, bo tet taka dait.’
21 Mde na dihan wsalit oli mde wrana hatot fe man ou wfe na kohok. Mde na kohok ou wtrere karmiak kat, wrana man wfe na dihan ou wto: ‘Nain nse kota mabri, nhot na yisgia, na yikarat, na yisibra, nadien yka.
22 Mde na dihan wrana hatot man na kohok ou wto: ‘Na kohok nen, nrana wata mde eke ha, wi leli mre sonat.’
23 Mde na kohok ou wrana oli man na dihan ou wto: ‘Nein wata nse fan kedi, nhot na eke, ofo nbahe sanini wata ei yka, kayi de bol kom mhon. 24 Tet trana tkoin kat man nen: Na hra tet tkadoin sayen ei, yto yka, ofo tet thnak dait kayi ei yeit kek ni eit mre hra tet tlak kein wale ei.”
Nehinti Kat Kadio Satian Ei Se Bo Nidien Yesus Nein
14:25-35
25 Tali mre ofo na marok mkafreyit-yat, yidien Yesus yein. Yik wale fan kedi mde, Yesus wbakoko fe ei, mde wrana wto: 26 “Na hra wto waka wse tet tak, mahin ou wtadrot / what dait wono, wemem, wsmian, wfe wet ei, wamon wai, waliwet wai, wahano mai, what dait fot wkan wawua om, ofo na oko wabe dait wedla wan tet. 27 Mde fot le na man sie ma wkafe dait wfe wkoit skarok wadien tet faf fein, ofo bo wabe dait wedla yin tet.
28 Mde le hra nan nke mre wto wsiok hodyo, mahin wleli wrana fe dait latiot mfe pitis om, ofo bo mde le sie, mde hra pitis om mtatol wale mabe ni siok oko sok? 29 Se bo wto wlak sniyiti mahin wto wsiok dait mfot ofo, na hra yhot wale ni siok okom maheit momuok, ofo ei yasak klo na oko. 30 Yto: ‘Na oko wharfe dait, wsiok deri ni oko, mahin mfot dait, maheit msgia kawuak.’
31 Afe, raja man sio ma wrana wto wain wkhan wadien raja man ou, mahin wleli wsin fe dait wadien wfe kaisin, ofo bo mde le sie, afe kaisin na yahar ribu (10.000) ytatol wale yibe ykhan yidien kaisin na mre waigi ribu (20.000) ei? 32 Mto mdain ofo, ou wteye wfe wedla mre ykait saswain oli yidien raja wan ou, yefitwain yto bo whnak ni mit ma se bo ylifis oli, ykhan oli dait. 33 Mde fot le mahin nan nik na mres-mres, nto nahinti kat dait nfe nai, nfe ni kadio kat ei, ofo thnak dait nen nabe wedla nan tet.
34 * Sira mwas mbot, mahin mto mak wi madomri ofo msgia, bo mde le sie mwas oli? 35 Molot fe ktan yidien biele ysgia kadio kat, mre ybot dait, na ybir kat kadio kat deri.
Na man sio wtefit, ofo noso kmiet tet, noso kmiet homo-homo kat!”