Satian Madien Hlet
13:1-5
13
Hra oko ofo na mre yka yse Yesus wak yrana hatot mabe na Galilea, yfe hen om Pilatus wska mpaek madien sisi hen erwas sanfe. 2 Yesus wrana man ei wto: “Hra nan nto na Galilea ei yfe satian ei yfle yewer kat yehin satian na Galilea man ei, fe hra ei yeigi yde le eke? 3 Mdain! Tet trana man nan, mahin nan nto nlelek dait nehin satian ei. Nan kadio nkain kafir mde kayi le eke. 4 Afe nan nnok nto eigi yahar teit mtadolik (18) hra hodyo mti mbatbirit fali ei ytaren yik Siloam ei, ykak fe hra ei yfe satian yfle yewer kat yehin na wat kadio hra yese yik Yerusalem ei? 5 Mdain! Mahin tet trana tkoin man nan, nto nlelek dait nehin satian ei, ofo nan nkain kafir kadio nde kayi le eke.”Flet Mabe Wkoit Ara Hra Wkan Dait Ou
13:6-9
6 Oli kdie ofo Yesus wrana flet man hra ko: “Na mre wfe wkoit ara worik wak biele anggur wabri, mde na ou wto waka wlos wkoit wkan ei, mahin ou wtatiere fe wkoit ou wkan dait. 7 Mde ou wrana man na waogo biele anggur ou wto: ‘Nhot la, der tolik wale tet taka ta-ta deri twasin wkoit ko, mahin ttatiere fe dait wkan mre. Mto mde eke ofo nala kat wata wkoit ko! Waheit wfori samya samak deri wak fobi man ko mabe!’
8 Mde na ou wto: ‘Na yfe na kohok nen, nliokeit wata waheit wfori oli kdie der man kou. Tet taheit tala bet ofo tklat sidiorok ktan, tteden eye mse molo. 9 Walbat der man ale waheit wkan. Yo, wto wkan dait, ofo nala kat wata!”
Wweyen Na Ykaini Yidien Tali Sabat
13:10-17
10 Tali mre ofo Yesus wkakniet ni wak bol sikafit wadien tali Sabat. 11 Mak oko na dli mrem klebet ysiok, mase wale der yahar teit mtadolik, mde msbiele ou wwok mkatawok mkro oli dait. 12 Hra oko mde Yesus whot ro kat om, mde wwit fien maka mde wrana man om wto: “Woi na dli nen nkaini om mdain wale!” 13 Mde wlak wna man na dli okom, mde msidik mtrot mkro oli, mde om mhdin msaesik man Nago.
14 Mahin na waslonti bol sikafit ou wtrere karmiak kat fe hra whot Yesus wweyen nai yikaini yidien tali Sabat, mde ou wrana man na marok okom wto: “Amuk mtamre yibe nsiok dieres. O le ma tali man bot ko wabe nai yweyen ni kaini yo, madien dait tali Sabat.”
15 Mahin Tuhan wrana man ou wto: “Hai nai yisamodor nan, mde kayi le hra na mre wtli kat wfe ni ror sapi afe keledai wadien tali Sabat watik wse wi ma oko kla? 16 Na dli kom mate kokos o le ma Abraham om, klebet yhirit mase wale der yahar teit mtadolik (18), ofo bo nai ytli kat mahin klebet ou wak?”
17 Ou wrana wale mde le ke, na kadio kat hra yibe kaisin ei yyesma madien na marok kadio kat ei ykashok fe ni kadio yibot hra Nago wsiok eke.
Flet Mabe Sesawi Yfuon Yidien Fot Ragi
13:18-21
(Mat. 13:31-33; Mrk. 4:30-32)
18 Mde Yesus wrana wto: “Flet mabe kerajaan Nago wfe om mabe ni mit ma se bo Tet trana flet fe kdiem? 19 Kerajaan om mde le sesawi yfuon hra nai ybatet yik biele. Yfuon ei yfori kayi de yibe wkoit, ofo klen ei yhri yka ykaye yik yma ygatan ei.”
20 Ou wrana oli kdie ni mre wto: “Mde le sie ma Tet trana oli flet mabe kerajaan Nago wfem? 21 Kerajaan om mde le na dlim mska mpaek ragi madien tepung kayi de mhon mal kayi na lak yeigi (40) kniet, kayi de mkafriak mfle kadio.”
Na Sio Ma Hra Na Yeren Kaka
13:22-30
22 Oli kdie ofo Yesus wain kohli wahin kota-kota kayi de wse desa-desa, wkakniet tiwain ni kayi de whok wak Yerusalem.
23 Mde na mre wrana man ou wto: “Tuhan, bo na kyamre deri le ma nai yeren kaka kat?” 24 Mde Yesus wada man na hra yik eke, wto: “Nhorot fe kat homo-homo nloit fe hrede ma giet hrotot okom! O le ma Tet trana hatot man nan mabe na marok mhorot homo-homo kat, mahin ei yloit dait. 25 Bo na hra wkain bol okom wsidik wkdati kat hrede okom, ofo bo nan nkro deri nik tlein ra, nbatok-tok sgiet okom nto: ‘Na Kohok, ntdak la hrede man mam.’
Mde ou wrana oli wto: ‘Hau, tet tnok dait na man sie ma nan. Nan nehin sio ma nka kmo?’
26 Mde nan nto: ‘Mam hra meit ni moko kla mik nen nbariomo ei madien nen nkakniet ni sawuan nak mam fe kota ei.’
27 Mde bo ou wrana oli man nan wto: ‘Tet tnok dait kat nan hra nan nehin sio ma nka ke! Nehinti kat tbariomo, Hei nai yisiok ni sgia nan nehinti kat tbariomo kom!’
28 Nik ale basak nai yseli kat nan nhlet, nhek desek, hra oko fo nhot Abraham, Ishak, Yakub yidien nabi kadio yik kerajaan Nago wfe wi maron, mahin na mres nan nai yklat kat nse tlein. 29 Nai yehin tali whok, tasik amak, tasik blen, tali wti, yka yleli, yeit ni eit yik kerajaan Nago wfem. 30 Toron kat mabe na man hra yein heles ei yibe oli nai yelin, ha nai yelin yibe oli nai yein heles kahlia kat.”
Yesus Waigi Kayi Wak Yerusalem – Na Ysadir Trar Fe Yerusalem
13:31-35
(Mat. 23:37-39)
31 Hra oko fo na Farisi yka yse Yesus wak, mde yto: “Nain la, nahinti kat la wi kom, fe hra Herodes wsin wto wska nen.”
32 Yesus wrana man ei wto: “Nein kat, nrana man na khan ou nto: ‘Tet twain kat klebet yidien tweyen nai ykaini, yidien bot ke kayi de klen sawok, kayi de tali tolik fe sba ofo mdain. 33 Mahin bot ke, klen sawok, welis, sba ofo tet tain kein kdie, fe hra na nabi ou nai yska wkak dait wak tlein ha, wkak kayi wak Yerusalem mabri ra.
34 Yerusalem, Yerusalem. Nen le ma nska nabi-nabi, yidien nska amak fe na hra Nago wbahe yka yse nan nik! Tet tadien ta-ta tfe wedla ei mam mbalifis, mde le klen kokok matrar, msieren keben mfe wet ei yse moli, mahin nan naha kat. 35 Tto tkoin mabe bol nan nfe kom nan nehinti kat, mahin tet trana man nan: Nan nhot oli dait tet kayi de nan nrana fe:
Mhdin ou hra waka wadien Tuhan wkedim!’ ”