12:1-12
(Mat. 10:26-33, 19-20)
12
Hra oko fo na marok-rak ribu-ribu kat ykafreyit-yat ybalifis, ysatatik yadrat kat, yka yse Yesus wak, kayi de ykait sele-sala kat yteit. Mde Yesus wrana sayen man fe wedla ei wto: “Ye! Nhomo-homo nnok deri wa na Farisi yfe bibit roti ragi om mbet yse nan nik. Fe hra ei yadel sagatan lak. Ei ykakniet ni ybot amo, mahin ysiok wat ni yisgia. 2 Ni hra nai ylak diaman yidien hra ko, basak fo yhok yhakta kadio kat. Yo, ni hra na salo waha yidien hra ko nai yrana diaman yibe khan, basak fo ytahak kadio kat. 3 O le ma ni hra nan nrana hlok yidien amuk, bo yoso ytahak yhakta kadio kat, yidien ni hra nsalo waha hlok man ou wtefit mak sit mabri basak fo nai ysalo fle ykakrok fali yik bol masa.4 Tet trana man table wa nan, ye nan neliek amot ei yila hra yto yska nkan tkoin kom ofo ysiok oli dait ni mrem. 5 Bo tet trana hatot ni mre yin nan, na sie ma nan neliek toron Ou. Neliek le Allah ou, fe hra wkain fle kohok mabe wska fot na, mfot fo wkain fle kohok fot wabe wklat kat fot na yse sala hra mdhen lis kawuak. Tet trana toron kat man nan, neliek le Ou! 6 Klen skeit mahot ei, nai ysafo yeit pitis kdois ywet lak. Klen ekei ywet kat wata mahin, Allah wdieme dait kat. 7 Nto tkoin, Allah wnok fot wale, waher wale nan nsagien mak nsa ago ei. O le ma nan neliek amot, Ou wto nan nfle newer kat nehin klen skeit yirok-rak! 8 Tet trana man nan: Na man sie ma ysamenie fe yto ei yidien Tet tak na marok ybariomo ofo, basak Na Tkoin Yfe Wet Tet tsamenie fe fot ei yik Allah wfe malaikat ei ybariomo. 9 Mahin na man sie ma wto wkesi dienen fe Tet tak na tkoin ybariomo, bo ou ekei basak Tet tkesi dienen fe fot ou wak Allah wfe malaikat ybariomo. 10 Mde hra na man ou whar kat Na tkoin yfe Wet Tet ofo bo Allah ou wbakeben yfe satian kom, yo na man sie ma yrana sgia yhar kat Nago Ou Wawua Makohok om, ofo bo Allah wbakeben dait kat yfe satian okom. 11 Basak na yto yorin fali nan nse na tmak hra ysiokti bol sikafit ei yik afe, nse na yifle hra ysiokti fobi afe, yto ysarife nan fe hra nan nidien Tet, ofo nkahiowain neliek amot fe ni hra bo nan nrana ei yibe nnok nkan ni om. 12 Fe hra nidien mayi fe hra oko Nago Ou Wawua Makohok mkakniet ni hra bo nan nrana ei.
Flet Fe Na Hra Wkohok Fe Wkain Hrien Wrok Wsitie
12:13-21
13 Na mre wahin yikan hra yirok ekei wrana man Yesus wto: “Nai fe na na tmak, nbahe man tamon kou se bo wsan hrien hra mam mono waigiti kat ei mre yin tet.” 14 Mahin Yesus wrana man ou wto: “ Hyee table! Na sie ma ykosia Tet tabe na wafle wakerek sadir fe tan la nan, mabe ni mde le kei?” 15 Ou wrana oli kdie man na marok ei wto: “Nnok deri! Nabin kesik fe amot pitis hrien hra na wat yfe yila. Nan nkohok fe nkain pitis warok wata ei mahin, na tkoin yron fe dait pitis hrien warok ei.
16 Ofo Yesus wrana flet mre wan ei, wto: “Na wakohok mreu wfe bet om mhlio mbot mde, wfe biele gandum yrok ylibi kat. 17 Na oko wnok tmol kat wak wabri wto: “Tfe hate yibe ttowasi gandum yrok kei ywet kamyi, ytatol dait. Bo tet tsiok de sie?” 18 Mde ou wto: “Bo tet tsiok mde le ke: Tbatdak kadio kat hate hra kei tsiok oli hra yisamsa kat se bo tyo kadio kat ni eit gandum olo ekei yidien hrien warok kou.” 19 Sba fo bo na mna ou wrana oli man na mna ou wto: “Tet tke tmnet kat! Fe tet tkain wale ni eit yidien hrien ou wrok yibe der warok ko. Mde bo tleli bhas, tat tako samne tkashok-shak fali wata.” 20 Mahin Nago wrana man ou main Ou wfe giet wto: “Hyee! Nen nke nsanet kat! Amuk hra ko fo bo nen naigi, ofo bo na man sie ma yiheit ykain hrien hra kei? Hra nen ntowasi man deri na mna nen.” 21 Yesus wrana wale flet om mfot fo wto: “Mde kayi le eke na hra yswin fe deri yyo pitis hrien yin na mna ei ykohok ha, yswin fe dait ykohok yin Allah, ysiok dait ni hra Ou waisi fe.”
Nhewi-wa Amot Yila
12:22-34
(Mat. 6:25-34, 19-21)
22 Yesus wto man Ou wfe wedla ei: “O le ma Tet trana man, nhalie fe dait ni eit amot! Nhalie fe fot not trik ei yila! 23 Na mna nkan om mewer kayi ni eit, not trik. 24 Yo ma nhot la klen oweri om. Yoko dait biele mre, ylak dait ni mre yse hate. Mahin Allah deri le ma whnak ni eit man ei. Nnok homo mabe, Allah wmro fe nan newer kayi nehin klen ei! 25 Hra nan nhalie fe buon ni eke yibe? Oko molot fe dait nan nfori lis wain kyamre oli./ nron tali mkedi mres oli. Mdain. 26 Nan nkanas nsiok dait sok la ni hra yiwet ei, ofo nan nhalie fe oli ni yifle yibe? Norsfe deri yse Allah wak.
27 Nhot ni ykanwak ana ke. Ei ytalo dait ni, ysor dait not. Mahin raja Solomo hra wkohok karmiak kat wkain dait not trik mre yibot yewer yehin ykanwak ei yfe ei. 28 Klawleis ykanwak yfori tamli, yslo tamli, klen sawok fo na ytatik kat ydain. Mahin Allah whriet ni ykanwak ei ybot. Ou wmro fe kayi nan newer kat ni ykanwak ei. Mto mde ke fo, bo hra nan nnok nto Allah whriet dait not trik yibot yin nan? Hra nan nke nnok dait mabe Allah wsitodo nan.
29 O le ma nan nnok wa neliek si amot nto, mam meit ni mit mei? mam moko mik sio? Nhalie amot fe ni ekei. 30 Na sa marok mak fobi katak hra ynok dait Allah ei ydihar kadio ni ekei, ykahiowain fe kat. Ha nan Nono wak wi mayehet ago wnok mabe nan nwaini ni ekei. 31 Mahin nsidihar sba Nono Ou wfe kerajaan om malin, neisi ma Ou wkashok wslonti nan. Nto nde ke fo, Ou whnak kayi fot ni warok ekei yein heles yin nan.
32 Tfe na kya deri le nan, neliek amot! Fe hra bo Nono Nago waisi whnak fle fe nan se bo basak nan nidien Ou nslonti sisi ni nik wi maron.
33 Nsafo kat nfe hrien ei. Pitis yka fo nan nhnak yse na hra ybhait ysgia ei, se bo basak nan nkohok nik wi maron. Mak ana fo nfe kmodikma om msalolo dait, nai ysliak dait, deni yeit dait. 34 Nto nbahoin fe ni mrem ofo nabri mak deri le wkom.
Na Dihan Hra Wabot
12:35-48
(Mat. 24:43-51)
35 Neisi ma nkein sroin kedi om mtodo nidien pelita ou wdhen kawuak, 36 nidien nan kei nsadiak nde le na hra wa wade kein wfe na fle ou wsalit wahin na yeit ni tasa na ysmian kmo. Ofo wto wbatok hrede ofo nkosieke tamli hrede man ou. 37 Mabot karmiak kat man na dihan hra wfe tuan ou waka fo whot wleli kein mlak sonat. Tet trana man nan: Tto toron kat Bo ou waka wkait sroin kedi om mtodo ofo wbahe faf yleli basak ou waka wdihan ei. 38 Mde hra ou waka wadien amuk amri afe wadien tali uwade wtatiere fe ei yleli kein sonat, mde mabot karmiak kat man ei. 39 Nnok la ni ko! Mde hra na wa kain bol om wnok homo-homo tali wkedi hra na wasliak ni ou waka wbatdak bol om ofo bo ou wliokeit dait na ybatdak bol ou wa om. 40 Neisi ma nan kei fot nhron-hron homo fe hra Na tkoin yfe Wet waka wadien mayi fe hra nan nnok dait. (nkahiowain fe latiot)
41 Mde Petrus wefitwain wto: “Tuhan de sie, flet ko Nen nrana fe deri wtatol wan mam kei, afe wan fot na marok kadio kat?” 42 Tuhan wada wto: “Na sie ma wabe na dihan hra wa bot kat wsiafolo mde wfe na fle ou wto wain latiot fo, wkosia wabe na wafle wdihan whnak ni eit yin wable na dihan man ei ytatol mayi fe yibe yeit ni eit. 43 Mde hra ou wfe na fle ou waka wsalit oli whok ro kat. 44 Ni hra Tet trana fe tto tkoin: Wfe na fle okou worsfe kadio kat hrien warok okou yin nfe na dihan hra wa siafolo karmiak kat ou. 45 Mahin na dihan oko wnok mak wabri wto, tfe na fle wa kou waka sonat, mde ou wtek wba na dihan yidla yidien yidli kadio kat, yidien fot wat ni eit wako twok kawuak de wmsit, 46 Mde wfe na fle waka ro kat wadien mayi fe hra kadoin fe dait. Mde wadien hra oko hra faf fnok dait Ou waka ro kat de wska na dihan ou, ofo wsiok ou wsadiak wain na hra nkan bren kat Nago.
47 Mde fot le na dihan ou wnok wale ni hra bo wfe na fle Ou waisi fe ei mahin na dihan ou wsiok kein dait ni hra wfe na fle ou waisi fe ei wyo kein dait ni ekei ofo bo wfe na fle oko wba ta-ta kawuak ou. 48 Mahin na man sie ma wnok dait ni hra wfe na fle ou waisi fe ei se wto wsiok sele samhak ofo, wfe na fle ou wtrere wba senfe dait. Fe hra na man ou yhnak mrok bo ytok fe mrok fot, yo mde fot le na man hra na yorsfe man ou, bo na ytok fe fot mrok man ou.
Yesus Waka Fe Wberiet
12:49-53
(Mat. 10:34-36)
49 Tet taka tse fobi ko thnak kakniet tsadiak tde le sala om - o le ma sala hra bo mtbat ofo mdhen mat fobi kom. 50 Mahin ni ekei yhok latiot fo, ybetok wale Tet tabe thlet ni samsa kat. 51 Nan nto bosi nto Tet taka tse fobi ko tabe tatik mabot? Mdain, mbot dait, tadien salo frit. 52 Mteik madien hra ko yik bol magiet man om, ysidik yheden mawain ykafa frit, yikan mahot man ei yheden ykafa frit, yikan tolik ykafa yidien la yikan lak man ei, yikan lak man ei ysidik ykafa yidien yikan tolik man ei. 53 Yono ou wsidik wheden wkafa wadien wfe wet yi dla ei, wfe wet yidla ei ysidik, yheden ykafa yidien yono ou, yeme msidik mheden madien mfe wet yidli ei, mfe wet yidli ei ysidik yheden ykafa yidien yeme om, wet madli om msidik mheden mkafa madien mrono om.”
Badian Anggait
12:54-59
54 Yesus wrana fot yin na marok kadio kat: “Mde hra nan nhot yik mkaka ogin marin mahin tali msrik, ofo nan nto sros nto: ‘Ee! Bo kyen,’ ofo mde kayi le eke kyen wais. 55 Mde hra nan nbasan foron wahin tasik blen, ofo nto: ‘Bo melin,’ mde kayi le eke melin. 56 Nan nikan kadio kat hra kei nsadir siwain-wan sawuan ni! Nan kei nsadir sas sawuan fe na, nsmit lien yik ago wadien fobi kom mo? Mko nkahiowain nsadir sas fe fot na mayi fe der tolo hra ko.
57 Hra na mna nan nkerek sadir dait fe ni hra yibot ei yin na mna nan. 58 Mde hra na yto yorin fali nen nain nse na wafle hra wkerek sadir ou wak, ofo nlifis tamli nadien nfe na khan, la nan nkaitti oli sadir mabot om. Mto mdain fo ou wkein krit nen nse na wakerek sadir wak. Nak ana fo, na wakerek sadir ou whnak satian man nen, ofo wnahla kat nen nse ou wfe na sae kahat hra walolowain ou, ofo wklat kat nen nse bui mabri. 59 Tet trana man nen: Nen nhok dait kat nahin ana, mde hra nklat afe nala sba na omuok oko sok.”