Yesus Wkakniet Wabe Na Ysikafit
11:1-13
(Mat. 6:9-13, 7:7-11)
11
Tali mre fo, Yesus wsikafit wak wi mrem. Kayi de wsikafit wdain fo, wfe wedla mreu wefitwain man ou wto: “Nai fe na Sma, kaman Yohanes wkakniet ou wfe wedla ei se bo ynok ysikafit. Mam meisi fot nen nkakniet man mam se bo mam mnok fot msikafit.” 2 Mde Yesus wada man wfe wedla ei wto: “Mde hra nan nto nsikafit, nto la mde ke:Mam Mono Nen, nkedi om mkohok mlais kat. [Mabot ma na marok ei yeisi ysaesik man Nen.]
Mam mwaini Na Wafle Raja Nen naka nslonti na kadio kat.
3 Tali man tali man nhnak kawuak ni eit ytatol yin mam.
4 Nyan kat la mam mfe satian ei.
fe hra mam myan kat fot satian hra na man ei ysiok ytatol yin mam ei. {{OR: Nyan kat la mam mfe satian ei, nwien fien oli mam mse nen nak, mde le hra mam mnok dait oli ni hra na ysiok yisgia yin mam ei, mwien fien wata ei yse mam mik.}}
Nkororo la mam msablit se bo mam mbahoin msiok oli dait ni hra ysgia ei.”
5 Ofo Yesus wrana oli man wfe wedla ei wto: “Mde hra na mres nahin nan nikan kei, nen nain nadien amuk amri nse nanak man ou wfe bol. Ofo nen nto: ‘Table, twaini la roti ysa tolik, 6 fe hra tanak mreu waka whok kmo wahin wi malis, warin bol tet tam. Tet tdain ni eit mre yibe thnak yin ou wat.’ 7 Mde na hra wak bol ou wto: ‘Ntabe amot tet tala! Hrede kom tdanti taworti walem, tadien tfe wet kei mam mese. Tet tsidik oli dait yibe thnak ni mrei yin nen.’” 8 Mde Yesus wto skatiokot oli wto: “Se mde sie? Ya! Nen nanak wanik ou mahin, ou waha wsidik whnak ni mrem man nen. Mahin mde wanik eke, fe hra nen nhes fe dait nwaini skayit-yit man ou, mde ou wsidik whnak ni hra nen naisi fem.”
9 “O le ma tet trana man nan: Nwaini wata ni yehin Allah ou wak, bo Ou whnak man nan. Ndihar wata, bo nkain. Nbatok wata hrede, bo Allah wkotdak hrede man nan. 10 Fe na kadio hra ywaini ni yehin Allah ou wak, bo Ou whnak yin ei. Na hra ydihar ofo bo ykain. Na hra ybatok hrede ofo, Allah bo wkotgie hrede man ei.”
11 “Na trar yidla nan, nto nfe wet ou wwaini eren ofo, bo nen nhnak sadik lua soko afe? Mdain! 12 Afe mde hra wet ou wwaini klen mesien, ofo bo nhnak sadik aflie tmak afe? Mdain! 13 Na yisgia nan nhnak sok ni yibot yin nan nfe wet ei. Mto mde ke fo, Nono wak wi mayehet ago bo whnak kayi Ou Wawua Makohok om man na kadio kat hra ywaini mahin ou wak.”
Yesus Wadien Beelzebul
11:14-23
(Mat. 12:22-30; Mrk. 3:22-27)
14 Tali mre fo Yesus wtatiere fe na mreu hra klebet wasgia wfla ou wolot fe ou wsami. Mde Yesus wwain kat klebet ou whokti kat na ou mde wrana ro kat ni. Ofo na marok om ykan tmayes kat. 15 Mahin na mre yik ana yrana wain Yesus yto: “Haa! Yesus okou wwain kat klebet main fe deri Beelzebul wkedi om. Beelzebul, o le ma klebet wafle hra wslonti klebet yisgia kadio kat ei, ou le whnak wfe fle kohok om man Yesus, se bo ou wkanas wwain kat klebet.” 16 Na wat mre kdie yik ana ywien kein Yesus, ybahe dienen Ou yto, “Yo oma! Nsiok [hewain] ni owuok wat mrem mahin wi mayehet ago, se bo mam mnok tnes mto nen nke nahin Allah wak afe, ndain.”
17 Mahin Yesus wnok afat wale ni yisgia hra ei ynok mak ysablit om. Mde Ou wrana man ei wto: “Na sa na sa hra yese yik negara man om, yto ykhan frit ofo, negara okom mkanas oli dait, mkofla kayi de msirik kat. Afe mde hra na dla mre wadien wsmian yto ytadrot frit-frat, yheden mawain-wan, ofo ybot oli dait, bo yfla, ysirik kawuak. 18 Mde fot le klebet wafle hra wslonti klebet yisgia kadio kat ei. Klebet wafle ou wto bo wwain kat ou wfe wedla klebet ywet ei yhokti kat yehin na tkoin, ofo klebet wafleu waheit wkanas oli dait, wsirik wale. Tet trana mde le ke fe hra nan nrana wain tet nto, klebet wafle le hra whnak wfe fle kohok man tet twain kat klebet ei. Mdain! Hmpai! 19 Hra nan nrana wain tet nto, tet twain kat klebet yisgia tsiok fle kohok mahin Beelzebul ou wak. Se nan nfe wedla ei, yde sie? Ei ywain kat klebet ysiok fle kohok yehin klebet wafleu afe, yehin Allah wak? Mto yehin Allah wak ofo nan nrana siorok tet tabe? Bo na mna nan nfe wedla ei le bo yhar kat ofo yhirit nan. 20 Mahin tet tke tsiok Allah wfe na tofo ei tftok kat klebet ei yhok yehin nai yiheit ybot. Nnok deri, Allah wfe fle kohok om mhok maka wale, mak toron kat wale nan nbariomo.
21 “Klebet wafle ou wde le na wakanas kat hra wslonti wfe kahat om, wto wsitodo homo-homo bol ou wam, se bo wfe hrien ei ybot-bot deri, na mre yisliak dait. 22 Kayi de tet taka. Tet tke tkanas mewer. Mde tet thok taka, tarin fit klebet wafleu, tkait flie ou, tkafreko ou wfe kahat hra ou wsdier fe ekei. Mde tet taheit tblan samne wata wfe hrien kadio kat, tberiet wat-wat yin tanak man ei.
23 “Na man sie ma yloit dait yse tet tak, ei eke yhar kat tet. Na man sie ma ykohliowo dait na se ybalifis yidien tet, ei le yolot fe na ysiar yehinti kat tet.”
Klebet Yisgia Ysalit Oli
11:24-26
(Mat. 12:43-45)
24 Yesus wrana oli wto: “Mde hra klebet wayaka whok wahinti kat na man ou, klebet oko wain kohli-hla wse wi masahen sadrot hra mdain kat kla, wdihar wi man wase, mahin wtatiere fe dait. Mde ou wto: ‘Hyee! Wi man kom msgia! Bo tet tsalit oli tse bol hra tahinti kat om.’ 25 Wto wsalit oli wak ana, ou whot fo bol om mfalek. Nai ysre wale, yyo rorwain mbot-mbot oli mahin. 26 Mde ou wain wwiehla fien klebet mtalak wat kdie man ei hra yiyaka yewer yehin ou yka, ofo yloit yese yik na okou. Mde na okou wsgia karmiak kat wewer wahin masayen om.”
Na Man Sio Ma Hra Allah Watsiofo
11:27-28
27 Yesus wrana samne wata ni, mde na dli mrem mahin yikan marok ekei mrohok msalo kaf kat mto: “Mabot toron kat man na dli hra kamuolo msois nen, msio nen!” 28 Mahin Yesus wada wto: “Haa! Mabot mewer kat man deri na hra yoso kmiet Allah wfe giet kei, ofo yiheit ysiwain kawuak.”
Yesus Wfle Wewer Wahin Raja Salomo Wadien Nabi Yunus
11:29-32
(Mat. 12:38-42)
29 Hra oko fo na marok yka ykro ykohli kat ou. Mde Yesus whlein wto: “Hyie! Na sa yiyaka nan! Hra nan nbahe sawuan tet tsiok ni kyat maowuok ofo se bo nan nnok tnes mabe tet tahin Allah ou wak! Mdain, tet tsiok dait kyat mre man nan, ha tkakniet tiwain sok deri ni kyat man hra kamuolo mhok mtatol man na tmak nabi Yunus. 30 Mde kayi le hra kamuolo Allah wsiok wale ni owuok wan Yunus se bo ou wabe kyat wan na kota Niniwe, mde fot le basak Allah bo wsiok ni owuok man Na Tkoin Yfe Wet se bo tet tabe fot kyat tan na sa nan kadio kat. 31 Madien kamuolo kat, Raja Salomo wslonti sonat na sa Israel ei ofo, na mafle mrem mhok maka. Na mafle okom mslonti fobi mak tasik blen om maka mhot Raja Salomo hra wsablit lis ou. Om maka main fe fan malis, mahin fobi mta kahlia kat, mabe moso [kmiet] Salomo wrana ni yirok hra ysiafolo ei, yewer yehin na marok kadio kat yrana ei.
Basak fobi makahlia kat, mayi fe na yeigi ysidik oli se Allah wkerek sadir fe na tkoin kadio kat ofo, na mafle okom mahin tasik blen bo marin fali nan nke nse Allah wak, mto nan nkain satian maflem. Om bo mrana mde le ke fe hra Na Tkoin Yfe Wet Tet le mke, tet tsiafolo tfle tewer tahin Salomo ou wak mahin, trana ni fo nan noso dait Tet. 32 Madien kamuolo Yunus wto ni fe na sa wat Niniwe ofo ei yoso yket pra-pra yehin yfe satian kadio kat ei, ylelek oli yse Allah wak. Mde basak Allah wkerek sadir kahlia kat fo, na Niniwe bo yorin fali nan nse Allah wak, yto nan nke nkain satian yifle. Fe hra Na Tkoin Yfe Wet Tet le mke, tet tfle tewer tahin Yunus ou, mahin nan noso dait tet.”
Flet Mabe Na Man Hra Yhak Yidien Na Man Hra Ymian
11:33-36
33 Yesus wrana oli ni wto: “Na yrit dait pelita mreu waka, ofo ylak diaman afe, ykofit eye madien kempir. Ha, nai ylak wkakrok deri wak wi mayiye, se bo wdhen whanak wse na hra yloit yse bol mabri, yhot kadio kat ni. 34 Nsifuon ei yibe pelita yin nkan om. Nsifuon ei yto ybot, ofo nkan om mhak kadio kat. Yo, nsifuon ei yto ymian, ofo nkan om mmian kadio kat. 35 Ye, nnok deri mahak hra mak nen na kom! Walbat nen nto bosi nto nen nhak wale ha, nen nmian sonat. 36 O le ma tet tkait wain man nan tto: ‘Nnok deri nkan kom mhak kawuak, ni mre ymian oli dait.’ Mto mde ke fo, nkan om mhak matoron kat, mde le pelita whanak nen.”
Kafir Mtamre
11:37-54
(Mat. 23:1-36; Mrk. 12:38-40; Luk. 20:45-47)
37 Yesus wrana wkakniet ni yfot sba fo, na Farisi mreu whakan la yeit sisi ni yik bol ou wa. Wde ou wtrik bol, ofo wto wadien sisi yeit ni. 38 Mahin na Farisi ou wsmit lien Yesus mde wtmayes kat, fe hra ou wware dait latiot wna ei ytatol ojin na Farisi ei yi lokdi.
39 Mahin Sma ou wrana man ou wto: “Hra na Farisi nan nware sawuan nan nfe met yidien finggien ei yibri ysbiele ha, na mna nan nibri om maheit mdahan latiot, mhon sonat fe nbahoin ni, nkesik yaka ni, nto nsiok ni ysgia. 40 Woi, na sitie nan! Allah hra wsiok wale nan nkan ei, ou le ma wsiok fot nan nibri om. 41 Nware nibri om malin main fe nhares nhnak ni yin na hra ybhait. Mde le ke se bo nan nbot tnes, ndahan oli dait.
42 Kafir man na Farisi nan! Ni ywet yrnoin hra yfori yik nan nfe biele, nan ntrein nsanfe sepuluh persen yin Allah yo, ni sariomon nan nkan bren kat wale. Nsiok wata ni ybot man na man ei, ni ysgia yila, nhnak wata nkan mowuo mse Allah ou wak, ni eke nan nkan bren kat wale. Nlelek, nsiok kayi ni eke kadio kat. 43 Kafir man na Farisi nan! Fe hra nto nloit nse bol sikafit, ofo nan nkesik yaka nto nleli nik deri wi mata mayiye se bo na yhdin nan. Nan nbahoin fot nto nai ykohon-kohon fe nan, yhdin fot nan nik wi nai yfrihene ysafo ni ei. 44 Kafir man nan, fe hra nan nde le hin hra nai yskati dait ofo, nai yein ykait eye samhak, ynok dait ni yban yik ati ko.”
45 Mde na guru agama mreu whar kat man Yesus wto: “Hyee! Na tmak, hra nen nrana ni nde ke man mam manak na Farisi ei. Nto mde ke fo nen ntbekein fot na guru agama mam.” 46 Mde Yesus wada wto: “Ee, kafir man fot na guru agama nan! Fe hra ni hra nan nkakniet ei yhnak bayidi agi tian man na hra ysiok ei. Mahin na mna nan nkaka nsiayit wanik dait madien nna tofo mrem. 47 Kafir man nan! Fe hra nan nsiok hao, nhriet wanik hin na tmak nabi ei yfe ha, kamuolo nan nate kokos le ma yska nabi ei. 48 Mde le ke na mna nan nkashok-shak, nsamenie fe ni hra kamuolo nate kokos ysiok. Madien kamuolo ei le ma yska wale na tmak nabi ei ha, madien hra ko nan le nsiok oli ei yfe hin ei. Bo nan nsiok oli mde hra nate kokos ei ysiok wale. 49 O le ma wadien kamuolo Allah, hra wsablit lis, Ou wsewet krek fe wale nan wto: ‘Basak tet tbahe tfe na tmak nabi yidien fot tfe wedla bahe rasul ei yka, yrana ni yin nan nke. Mre bo nan nska ykak, mre oli fo nan nsiok sgia ei, nhirit ei.’ Allah wto mde le ke. 50 Oko le ma basak Allah wtok lis na tmak nabi yfe hen man tiktol deri nan nke, nabi kadio kat hra nai yska wale yidien kamuolo fobi sayen kawuak de hra ko. 51 Msidik mahin molo Habel wfe hen om, kawuak mde masa nabi Zakharia, hra nai yska wak flalie bri, Allah wfe Bol Kohok mse ta, sala batalok makohok mse ta. Tto tkoin, basak Allah wtok hen kadio kat eke yin na sa man nan nke, na sa Israel nan kadio kat. 52 Kafir man na guru agama nan! Nan nke nkda ti fan hra nai ynok mse Allah wak. Na mna nan nkan bren kat wale, nloit dait ha, nan nwewisti sawuan na hra yeisi yto yloit.”
53 Yesus wrana wale ni mfot fo, wahinti kat na Farisi yidien na guru agama ei yik. Ofo ei yiheit ytadrot karmiak kat man ou. Mteik mahin oko, na Farisi yidien guru agama ei ykanas yhar kat ou, yefitwain dienen-danan skayit-yit ni warok yin ou. 54 Se bo wto wrana sele ni mre ysgia fo, yslon yhirit ou wkak.