Yesus Wbahe Wfe Wedla Na Tolik Yeigi Whri Na Wna Yahar (70) Yein Yrana Fe Giet Ou Wfem
10:1-12
10
Sba oko fo Nago wtrie helwain wfe wedla wat kdie yikan na tolik yeigi whri na wna yahar (70) ofo wtrie ei fe lak-lak, yelin kein yse kota wat-wat yidien wi hra bo Ou wain ei. 2 Yesus wrana man ei wto: “Wedla nan, tet taisi nan nein nrana man na marok, fe hra ei yoso dait latiot mabe Allah wmro fe ei, Allah waisi wslonti ei yibri. Na hra yoso latiot giet om yde le ni hra yik biele yrok ysamsa kat yrefe wale mahin, na tkoin hra ylos yikan kyamre deri. Yikan hra ylos ei le ma, na hra yrana Allah wfe giet om. Mto mde ke fo, nwaini man Na Wafle hra wkain biele ou, se bo wsol na mrei oli yka, ytowasi fien yidien sisi nan. 3 O le ma tet tbahe nan nein wata nse ei yik, nrana Tet tfe giet mabot om.Ye! wedla nan nsiton-ton wa mkan yiyaka le mke, tet tbahe nan nein, mahin bo na ysgia yhat nan. Nan nde le domba yiwet hra ykanas dait. [Bo nan nik flasak sisi mkan yisikol hra yiyaka, hra yatan sawuan domba.] 4 Nan nein wata, notik krek dait kmodikma afe, kya mrem man nlak ni eit dianan afe, notik sendal fe lak dait. Ye, nkamie nhros dait na mre wak fan kedi.
5 Mde hra nto trik nik bol magiet man om ofo nto: ‘Tali wabot, Nago Allah watsiofo nan.’ 6 Mto nai ywien fien dait nan ofo, bo Nago watsiofo dait ei. Mahin mto na yik bol okom yible-ble bot deri yto ywien fien nan, ofo bo Allah watsiofo kayi ei. 7 Nese wata nik deri bol okom, nan nhes dait fe neit ni eit yidien noko kla hra na ekei yhnak yin nan ei, fe hra nan nke nde le na hra nai ysol. Nan neit wata ni tasa hra ei yhnak ei. Nan nhes dait. Ye! Nnok deri nan nese kahri-hra dait bol ou.
8 Mde hra nan nto ntrik nse kota mrem ofo, nai yto ywien fien nan nik oko ofo, nan neit wata ni eit hra yhnak yin nan ekei. 9 Nweyen neren na hra yikaini yik ekei. Nrana fot man ei nto: ‘Magiet mayi fe Allah wto wslonti kadio na hra Ou wfe, mataren wale [mabe Ou waka].’ 10 Mahin mde hra nan nto ntrik nse kota mrem mde, na ekei ywien fien dait nan nik oko ofo, nein wata fe fan hoin soro kota oko mabrim ofo nfruo kat ei nto: 11 ‘Kbiak hra mam mteit katak kei mam mbawas kat mabe kyat man nan. Mahin nnok kayi ni kei: Magiet mayi fe Allah wto wslonti kadio na hra Ou wfe, mataren wale.’” 12 Yesus wrana oli man wfe wedla ei wto: “Nto tkoin, basak dian kat, tali man hra Allah whirit kat na tkoin kadio kat ofo, na hra yik kota okom, na hra ywien fien dait nan ei, bo ykain kafir. Bo ykain kafir satian mitian mewer oli kat mahin na hra kamuolo yese yik kota Sodom ykain om.”
Kafir Man Kota Hra Yten Dait Ykaso Man Yesus
10:13-16
(Mat. 11:20-24)
13 Mde Yesus wrana oli wto: “Nakai, na kota Khorazim nan, tmro fe deri nan nibe basak bo nan nila! Nakai, na kota Betsaida nan tmro fe deri nan nibe basak bo nila! Hra nan nnok nto nan nbot-bot deri fe hra nan nibe na sa Israel mahin, basak kafir mbawas kayi nan. Tet tsiok wale ni owuok-awak yirok yik nan nhot mahin, nan nket dait nehin ni sgia hra nan nsiok ei. Tet tain dait latiot tse na sa wat hra yese yik kota Tirus madien kota Sidon ei mahin, mde hra tet tain tse ana, mto tsiok ni owuok-awak ekei yik ei ybaromo, mde ke fo, na sa wat ekei yibri mtra yket wale yehin satian hra ysiok ei. Yket yidien yrwe ysiwit not ylak kbiak yik ysa masa. 14 Mahin tet tsiok dait ni owuok-awak mrem mak kota Sidon afe kota Tirus. O le ma basak fobi mkahlia kat fo, Allah bo whirit na Tirus yidien na Sidon ei mlan-mlan deri, mahin nan nke, na kota Khorazim nidien na kota Betsaida nan, bo whnak kafir man nan mfle mitian msamsa kat.
15 Nakai na kota Kapernaum nan, tmro fe deri nan nibe basak nan nila! Hra nan nnok nto basak Allah wkosia nan nse wi mayehet ago yibe? Mdain kat. Ha basak Ou wklat kat nan nse sala madhen lis kawuak!”
16 Mde Yesus wrana oli man wfe wedla yikan na tolik yeigi whri na wna yahar (70) wto: “Na sie ma yoso nan, yoso fot Tet. Na sie ma ynaba kat nan, ofo ynaba kat fot Tet. Na hra ynaba kat Tet, ofo ynaba kat fot Tono hra wbahe Tet.”
Wedla Na Tolik Yeigi Whri Na Wna Yahar (70) Ei Ysalit Oli Yse Yesus Wak
10:17-20
17 Mde Yesus wfe wedla bahe na yikan na tolik yeigi whri na wna yahar (70) ei ysalit oli yse ou wak. Ei ykashok yrana hatot yto: “Nai fe na Sma, klebet kadio kat ei yoso kmiet kayi yin mam. Na hra ykaini fe klebet yisgia yfla ei, mam mwain kat klebet ei yidien Nen nkedim, ofo ei yhok sros kat yehin na hra ykaini.”
18 Yesus wada wto: “Tet thot Allah wbayas kat Klebet Wafle ou wti wahin yik mayehet ago wde felek. 19 Noso la! Tet thnak wale fle kohok fe nan se bo nkait flie Klebet Wafleu wfe kaisin ei. Wfe kaisin ei yiyaka yde le lua soko afe aflie tmak, hra nan nkait wata mahin, nan niheit nbot-bot deri. Yhnak kafir fe dait nan. 20 Nan nbahe klebet yisgia yhokti kat yehin na nde wanik eke, nkashok fe dait ei. Ha, nkashok fe tiktol deri nan nkedi om nai ysroin wale mak wi mayehet ago.”
Yesus Wkashok
10:21-24
(Mat. 11:25-27, 13:16-17)
21 Wadien hra oko fo Yesus wabri om mhon fe Allah Wawua Makohok om, ofo wkashok kamyi kat mde wto: “Tet thdin man Tono Nen, Nago hra nslonti yik wadien fobi kom, fe hra Nen nlak diaman ni ekei yidien na hra yisiafolo ei, ha Nen nyen hata yin deri wet sdeik. Oko le ma mhnak kashok fe Tono Nen.”
22 Mde Yesus wrana oli man na marok ei wto: “Tono whnak wale fle fe Tet tslonti kadio kat ni warok. Na mrei dait kat yhana rorowain ynok dait Allah Wfe Wet Tet, ha Tono deri le wnok Tet. Na mrei dait kat yhana rorowain ynok dait Tono, ha Wfe Wet Tet deri le tnok Ou. Tet deri tadien fot na hra tet taisi thnak ei ynok fot Ou.”
23 Sba oko fo Yesus wlelek wsifuon wse oli wfe wedla ei ofo wto: “Mabot man nan nibe nan nhot sros wale yidien nsifuon. 24 Nto tkoin, kamuolo na tmak nabi yidien nai yfle raja yrok yeisi yto yhot ni hra wedla nan nhot wale ekei, mahin yhot dait. Nabi yidien raja yrok ei yeisi yto yoso ni hra nan noso ekei, mahin ei yoso dait.”
Na Samaria Hra Whares
10:25-37
25 Tali mre fo, na hra wsaeti kat Ojin Taurat mreu waka wsadir wwien kein Yesus. Ou wefit wain dienen ni yibe wto bo Yesus wnok ni afe wdain. Wefit wain man Yesus wto: “Na tmak, ni mit ma hra bo tet tsiok se bo Allah whnak tet tron lis om?”
26 Yesus wada man ou wto: “Ni mit ma na ysroin yik Ojin Taurat mabri ei? Se nen nbaca ofo nen nnok nde le sie?” 27 Mde na hra wsaeti Ojin Taurat ou wada wto: “Otin Taurat om mrana mto: ‘Nmro fe nan nfe Nago Allah nadien nhnak nabri, nsablit, nkan om mowuo kat mse Ou wak. Nmro fe fot nable man ei mde fot le nmro fe na mna nen.’ Mde le ke.”
28 Yesus wto man ou wto: “Esree, ni hra nen nrana ei nto tkoin. Nsiok wata nde le eke, se bo nen nron lis.” 29 Mahin na oko waisi Yesus wsamenie fe wto ou wbot wale. Ofo ou wefit wain oli wto, “Na sie ma tet table wa ei?”
30 Yesus wada wto: “Noso trana la ni se. Tali mre fo, na dla mreu wsiolok wahin Yerusalem wse Yerikho. Wak fan kedi na yiyaka yba ou, bhait ma wkak, yblan wfe hrien ekei, yehinti kat waheit wase baran fali klis ekei wak fan kedi. 31 Na imam mreu wsiolok fot, wain fe fan okom. Whot ro kat na oko wbries, wde wkadin wain ayek fe fan mtefit, wain sros kat. 32 Man bri oli fo na mreu wahin na sa Lewi wain fot fe fan okom. Whok wak wi okom, whot ro kat na okou, ou wain kanini fe fan mtefit, wain sros kat fot. 33 Kdie fo na Samaria mreu waka wain kat fot fe le wi okom, whot ro kat na okou, mde wsablit mkoko wmro fe. 34 Ou wain wse ou wak ofo wware wfe klis ei yidien anggur mklam, mde wolio kla minyak zaitun. Sba fo, wkait fabit fe wklis ei, wkosia wlak wak ou wa keledai ou wa wkedi ago. Mde wain fali wse bol dihan mre, ofo wkomik wdihan wak oko. 35 Uwade fo ou whnak pitis ykdois lak yin na hra wkain bol dihan okom, mde wto: ‘Naheit nkomik ndihan wata ou, nkain wata ni yewer yehin ko, la bo tet taka oli ofo tdanhok ni hra nen nfe ei.’ Mharfe le wko.”
36 Mde Yesus wefitwain oli man na hra wsaeti Ojin Taurat om wto: “Nen nnok nto de sie? Mak ni rana wain kom, na dla yikan tolik hra ytatiere fe na hra yba wak fan om, ofo na sie ma wable fe wou?” 37 Mde na hra wsaeti kat Ojin Taurat wada wto: “Na hra wbakoko fe ou.”
Mde Yesus wto: “Esree! Nain la, nsiok kayi nde le eke.”
Maria Madien Marta
10:38-42
38 Mde Yesus wadien wfe wedla ei yein kein kawuak de, yhok yik krotia mrem. Yik oko ofo na dli mrem mkedi le Marta, mwit fien yse om mfe bol. 39 Marta maliwet mrem mkedi le ma Maria. Maria kom mleli mataren Yesus moso kmiet ni hra Ou wkakniet ei. 40 Mahin Marta mswin kat fe moyo ni eit. Om main mse Yesus wak mde mto: “Nai fe na Sma, taliwet om mkan bren kat tmres tsiok deri ni! Nen nbahe om maka la moyo sisi ni! Hra nen norsfe deri tet a?” 41 Mahin Nago wada wto: “Marta, Marta! Nen nkahiowain nadien nswin fe nnok tmol mse koguo mse angko. 42 Ha, ni mres deri le hra mbot mewer kat. Maria mlouk helwain wale hra mabot om, hra na ywien dait mahin om mak.”