Yesus Wbahe Wfe Wedla Yahar Teit Lak
9:1-6
(Mat. 10:5-15; Mrk. 6:7-13)
9
Mde Yesus wwit fien wfe wedla yahar teit lak ekei, whnak fle kohok man ei yibe ywain kat klebet yiyaka yhok yehin na yik, mabe fot yweyen na hra ykain ni kaini de ydain. 2 Ou wbahe ei yein yrana siar man na kadio kat yto: “Mayi fe hra ko, Allah wabe na hra wafle wsiokti fobi katak. Ou waisi nan nhnak nkan om mowuo kat main mse Ou wak.” Yesus wbahe ei yein yrana fot ni, yweyen yeren fot na kaini ei ydain. 3 Ou wkait wain man ei wto: “Notik dait ni mre mabe mak fan kedi, notik dait tiyen afe, kya man nlak ni eit dianan afe, roti afe, pitis afe, not trik fe lak yila, nidien not hra nan ntrik lokdi yik nkan ei deri. 4 Mde hra nan nik krotia mrem, mto na mre ywit fien nan nese nik bol ei yi, ofo nan niheit nese kawuak nik deri bol mres okom kayi de, nan nhok nein oli nehinti kat krotia okom. 5 Mde hra nai yto yaha kat nan, yoso dait nan ofo, nto nhok nehinti kat krotia okom, ofo nbawas kat nteit smuot yehin nteit katak yibe ni kait wain yin ei.” 6 Yesus wrana wale ni mfot ofo, wedla yaher teit lak ei yein ykohli desa kadio kat, yrana Giet Mabot, yidien yweyen yeren fot na ykaini yik wi ekei kadio kat.
Herodes Wkahiowain fe Yesus
9:7-9
(Mat. 14:1-12; Mrk. 6:14-29)
7 Raja Herodes, na wafle hra wslonti fobi Galilea, woso giet nai yrana fe ni hra Yesus wsiok ei, mde ou wkan om mkahiowain kat. Na mre yrana sak-sak yto, Yohanes wsidik wahin wi maegi, ou le wron oli. 8 Mre kdie yrana yto, hau, nabi Elia wahin kamuolo kat le ma whok oli waka kou. Mre yrana kdie yto, mdain, nabi hra yidien kamuolo mre le wsidik oli wale ou. 9 Mahin Herodes wto: “Tet tnok Yohanes hra kaman tet tbahe wale na yehir kat wdioro om. Bo wsidik oli wde le sie? Mdain, wkak wale. Mahin na man sie ma whok firi okou? Ni warok kadio kat hra tet toso wale yibe na ou.” Mde Herodes wskahilis wain wabe wto whot sros Yesus.
Yesus Whnak Ni Eit Fe Na Mahot Ribu
9:10-17
(Mat. 14:13-21; Mrk. 6:30-44; Yoh. 6:1-14)
10 Rasul ekei ysalit yrana wain oli ni hra ei ysiok kadio kat wale ekei yin Yesus. Oko fo Yesus wkri kein ei yein yse wi mahlok mrem mataren mse krotia mre mkedi le ma Betsaida, se bo ymres deri yidien Ou. 11 Yto ymres yein yhlok kat deri nai mahin, na marok ekei ynok wale mde, ei yein ybakorwain. Mahin Yesus wwien fien wata ei yidien wrana wain-wan wto: “Allah ou wabe na hra wafle wsiokti fobi katak. Ou waisi nan nhnak nkan om mowuo kat main mse Ou wak.” Yesus wweyen weren na marok hra ykaini ei ydain.
12 Mkdia mabe tali msrik ofo, Yesus wfe wedla yahar teit lak ei yka yse Ou wak mde yto: “Nai fe na Sma, wi kom mdomri deri. Mabot ma nen nbahe na marok kom yein yse krotia hra yitaren ke, yidihar wat-wat ni eit yidien bol ese mre yin ei.”
13 Mahin Yesus wada man ei wto: “Hau, nan kayi le ma nhnak ni eit fe ei!”
Mde ei yada yto: “Hyie, hra yik mam mik ko roti mahot deri yidien eren lak. Mde hra mam mein mkain ni eit fe na kadio kat hra marok kom. Se nen nto de sie?”
14 Mahin na marok okom, na dla deri le ma na mahot ribu. Yo na dli yidien wet sdeik ei na yaher dait sonat. Ofo Yesus wbahe wfe wedla yein yrana ni fe nai yto: “Nan nleli satatik-tatak na lak yeigi whri na wna yahar (50) satatik mres.” 15 Mde Yesus wfe wedla ei ysiok kat ni hra Ou wbahe fe ei. 16 Na yleli wale ofo, Yesus wwien fien roti mahot ekei yidien eren lak ekei yka wsiokti yik wna, wgiele mse yik ago wsikafit whdin man Allah fe ni eit om. Mde wkofla-fla eren yidien werek-arak roti, whnak yin wedla yberiet wat-wat yin na marok ekei yeit. 17 Yeit kadio kat kayi de ykesit. Sba fo wedla ei yyowain oli roti yidien eren yita-ta hra nai ykesitti kat ei kayi de kantar yahar teit lak ei yhon.
Petrus Wsamenie fe Yesus Wabe Kristus, [Na Waeren kaka Na Tkoin, Hra Allah Wkadoin Krek Fe Wale]
9:18-21 SGM 18-21 but changed
(Mat. 16:13-20; Mrk. 8:27-30)
18 Tali mre fo, Yesus wain wsikafit. Ou wfe wedla deri yik fot oko, na marok dait. Wsikafit mfot fo, ou wefitwain man ei wto: “Na marok ei yrana yto na sio ma tet tke?” 19 Mde yto: “Na mre yrana yto nen nabe Yohanes Hra Wsrik Kat Kla fe Nai, hra kwan firi nen nagi, mahin nsidik oli. Mre kdie yrana oli yto nen nabe nabi Elia hra kamuolo naigi dait ha, narin saron deri nse Wi Sahin Mayehet ago de hra naka oli ke. Mre kdie oli yto nen nabe Allah wfe na dla bahe nabia wat kdie nadien kamuolo, mahin nsidik, nron oli.” 20 Mde Yesus wefitwain oli man ei wto: “Mahin nan nke nnok nto na sie ma tet?” Ofo Petrus wada wto: “Nen nke nabe Mesias, na wafle hra Allah wbetok wale wabe wslonti na kadio kat.” 21 Mahin Yesus wtoji wkanas kat man ei wto: “Ye! Nrana amot kat mabe tet le tabe kayi Mesias man na wat ei yila.”
Sewet Fe Wasayen Wabe Yesus Whlet Ni Yalmias Wadien Ni Hra Yhnak Kakniet Fe Na Siwain Ou
9:22-27
(Mat. 16:21-28; Mrk. 8:31–9:1)
22 Mde Yesus wto: “Basak sba, na Yahudi yfe na tmak ei yidien imam yifle, yidien fot na hra ysae ojin Taurat ei ysiok sgia Na Tkoin Yfe Wet Tet. Kayi de tet thlet ni yalmias yirok. Bo ynaba kat, yaha tet, ofo yska tkak. Bo tase amuk tolik ofo, tsidik oli. Ytatol mde hra Katik Fari mrana krek fe wale.”
23 Mde Yesus wrana man na kadio kat hra yik ekei, wto: “Na hra yto ysiwain Tet, ofo bo ynok tmol oli dait kat kayi ni man hra ei yi ei. Ha, na man sie ma yeisi yidien tet, ofo ykafe ta-ta kawuak wat-wat ei yfe wkoit skarok ei yi, mde ei yeisi yhlet ykain ni ykoko, yeigi yidien sisi Tet. 24 Na man sie ma yelieksi yeigi fe hra yidien Tet, ytek fe yhalie om, basak ei yeigi kayi. Yo, na man hra yeigi yibe ynok tmol tet, basak tet terenta*** ei yron lis kawuak. 25 Nto nen nkain ni kadio kat yik fobi kom, nkohok karmiak kat wata mahin, naha wale Tet fo, basak nen naigi ofo nen nde le sie? Nen nawua om masak kawuak. 26 Na man sie ma yhes ywien dait Tet, afe yaha ywien fien ysiok ni hra tet trana ei, mde basak tet thes twien fien dait ya ei, madien hra basak tet taka ei, Na Tkoin Yfe Wet Tet taka tdhen tadien tfe fle kohok wnarak wtfelek kat om, tadien fot fle kohok mahin Tono wak, tadien fot tfe malaikat hra ykohok ei. 27 Tet tto tkoin kat man nan kadio, bo mrei yehin nan nik yhot sba Nago Allah wslonti na yidien wfe fle kohok om, se yeigi.”
Allah Wbatok Yesus Wabe Ou Wfe Wet
9:28-36 SGM v. 28-35
(Mat. 17:1-8; Mrk. 9:2-8)
28 Bo mal kayi amuk mtadolik, Yesus wkakniet wale ni warok, ofo ou wti kein Petrus, Yohanes yidien Yakobus ei yein yorin yse sfa wsa ago mabe Yesus wto wsikafit man wono Allah. 29 Yik oko fo, wedla ei ysirobo, mahin Yesus waheit wsikafit man wono. Hra oko fo, Yesus wsifuon ei ylelek ywat, wfe not trik ei yelek tfel ytweit kat. 30-31 Mde na dla lak, o le ma Musa wadien Elia, ei yhok ro kat, yyen hata ykan yidien fle kohok mahin wi mayehet ago mnarak mhanak man ei. Ei yrana ni yidien Yesus wabe bo wkak omuok wak Yerusalem, wbatirik ni hra Katik Fari mrana fe om. 32 Madien oko fo Petrus wadien wanak wai ysirobo kat samne, mahin ei yehin, yrioro fe ro kat fo, yhot Yesus wfe fle kohok om mnarak, ofo yhot na lak ei ykro sisi yidien ou, ysadir kahlia kat mabe yto yein, yhenti kat ou. 33 Mde Petrus wrana man Yesus wto: “Na Kohok, mbot kamyi kat faf fik ko! Nto nde ke fo, mam msiok bol dik tolik, de mre man nen, mre man Musa, mre kdie oli man Elia!” (Petrus wrana sak-sak deri mde ke, mahin wnok dait mata kein hra wrana om.) 34 Petrus wrana samne sonat ni ofo, yik sakait om maka, mhoborti ei, ofo ei yeliek. 35 Mde, yoso ro kat salo mhok mahin yik sakait mabri ra, mrana mto: “Tfe wet hra tet tlouk helwain, o le wko! Nan noso kmiet ou.” 36 Salo okom mdain sba fo, yhot Yesus waheit mres deri. Mde wfe wedla ekei ylak diaman ni ekei, yrana dait kat.
Yesus Wweyen Wet Hra Klebet Wayaka Wflau Wdain
9:37-43a
(Mat. 17:14-21; Mrk. 9:14-29)
37 Uwade fo, Yesus wadien wfe wedla tolik ekei ysiolok yehin sfa oko mde, na marok om yka kafreyit-yat yse Yesus wak. 38 Na mres ou wkader kohok man Yesus wto: “Na tmak, nkaka la tet! Naka nsmit lien la tfe wet kou, fe hra wet tomi kat deri mres. 39 Klebet wayaka mreu wfla ou. Mde hra mayi fe klebet wto wflau, wkowirit-warat ou kayi de wgiet fis-fas. Klebet okou wahinti kat dait tfe wet ou, wsiok sgia kawuak ou. 40 Tet twaini lon-lon wale man nfe wedla kei ywain kat klebet wayaka kou mahin ei yharfe dait oko.”
41 Yesus woso ni hra wet ou wono wto ofo whlein wrana man na kadio kat wto: “Woi, nan nikan kadio kat hra ke fo, na yiyaka nan! Hra nan nten dait nkaso mse Allah wak yibe! Hra nan nto Allah wkanas dait weren wet kou! Amuk waka ma Tet taheit sisi tadien nan! Kya mre fo, tet tbresek kat tadien nan.”
Mde Yesus wto man wet ou wono wto: “Natik la wet ou waka.”
42 Madien hra oko wet ou wto wataren wse Yesus wak, klebet wayaka wlak basadit ro kat wak Yesus wbariomo fobi aiti, wkowirit-warat ou. Mde Yesus whar kat klebet wadien salo mkanas wto: “Tet tbahe nen nhok kat, nahinti kat wet kou!” Mde wet ou wdain ro kat, ofo Yesus wsalit oli ou wse wono wak. 43a Mde na marok okom ykan tmayes kat yiwa main kat fe yto: “Allah wfe fle kohok sok le mkom.”
Yesus Wsewet Mau Lak Fe Wabe Bo Ou Waigi.
9:43-45
(Mat. 17:22-23; Mrk. 9:30-32)
43b Na marok ei yrana sonat ni, ytalan fe ni hra Yesus wsiok wale mde, Yesus wbafelek wrana ni wadien wfe wedla ei. Ou wto: 44 “Nan noso homo-homo rorowain tet trana krek ni: Basak sba bo nai ybaret lolot Na Tkoin Yfe Wet Tet, yhnak tse na khan na yiyaka ei yik yibe yidien sgia tet.” 45 Mahin Yesus wfe wedla ei yoso mahin, ynok dait ni hra wrana om. Ydiaman sonat yidien ei. Ei yrana sas yto: “Ou wrana ni eke yibe mit ma ei?” Mahin ei yeliek yefitwain oli man Ou.
Na Sie Ma Wabe Na Wafle?
9:46-48
(Mat. 18:1-5; Mrk. 9:33-37)
46 Yesus wfe wedla ykaf kesik yto na man sie ma wabe fle wahin ei yikan ekei. 47 Mahin Yesus wnok wale ei ysablit om mde, Ou wwien fien wet sdeik mreu waka, wlak wkro lolowain wak wklik. 48 Ofo Ou wto man wfe wedla ei wto: “Mde le hra na yhot wata wet mahin ydiewain deri. Mahin Tet tto, na man sie ma wto wwien fien wkohon-kohon wet wawet kou fe hra Tet, ofo wkohon wwien fien fot Tet wale le mke. Na hra wwien fien Tet, ofo wkohon wwien fien fot Allah hra wbahe Tet. Mde hra nan nikan kei, na man sie ma wto wabe na wawet, oko le wfle wewer wahin nan nikan kadio kat.
Na Hra Whar Kat Dait Nan Ofo Wti Wse Nan Nik
9:49-50
(Mrk. 9:38-40)
49 Yohanes wrana hatot wto: “Nai fe na Sma, mam mhot na mres wwain kat klebet ei wrana Nen nkedim. Mde mam mhar kat ou, fe hra faf fikan fi dait ou, wahin dait faf fik.” 50 Mahin Yesus wrana man ou wto: “Nan nhar kat amo wala, wak wati, fe hra na hra yto yhar kat dait nan, ofo na yti yse nan nik le mke.”
Yesus Wadien Na Samaria
9:51-56
51 Madien hra oko mkdia mataren wale wabe Yesus warin wse wi mayehet ago, Ou waliak dait ha, wbren kat wabe wain wse Yerusalem. 52 Ou wbahe na mre yelin kein mde, yein kayi de yhok yik na Samaria yfe krotia mrem. Yik oko fo, yto yyowain krek wi mabe yleli kein Yesus waka. 53 Mahin na Samaria ekei yaha ywien fien Ou, fe hra ei ynok wale wabe Ou wsin wse Yerusalem. (Na Samaria ei yaha nai ysikafit yik Yerusalem. Yto ysikafit yik deri sfa ei yi mrem mak Samaria.) 54 Yidien hra oko wfe wedla lak o le ma Yakobus wadien Yohanes, la yhot ni yde ke de, yto: “Nai fe na Sma, nto naisi ofo mam mwaini salam mais mahin yik ago malkowas kat na kadio kat hra kei?” 55 Mahin Yesus wlelek whar kat ei. 56 Sba oko fo ei yein kein kdie yse krotia wat mrem.
Na Tolik Yidien Yesus Yein Mahin Ei Ykahiowain
9:57-62
(Mat. 8:19-22)
57 Yesus wadien wfe wedla ei yik fan kedi, yein samne wata fo, na mreu whok wwayen ou mde wrana man Yesus wto: “Tet kei tadien Nen la faf fein kayi de fik wi man sio.” 58 Mahin Yesus wada wto: “Mkan yisikol yese yik ytai ei yi, klen hra yihri-hra anke ei yese yik ykaye ei yi. Yo, Wet Na Tkoin Yfe Wet Tet tkain tmo-tmo dait wi mrem matatol man tet tase.
59 Mde Yesus wto man na wat kdie man ou wto: “Naka la fein.” Mahin na oko wto: “Na Wafle, naisi ma tet tain tsalit oli tkali la tono ou.” 60 Mahin Yesus wto oli man ou wto: “Nliokeit wata na yi eigi ei ykali eigi ei. Yo nen nain wata nrana siar mabe Allah waisi wslonti nai yibri.”
61 Na wat kdie mre wto: “Na Wafle, tet tain tadien Nen le mkei yo, naisi ma tet tain thros tfe nai.” 62 Mahin Yesus wada oli wto: “Na man hra wsin tlo wto wsiok ni, se wsalit wsmit wse wsbiele, ofo ou eke wtatol dait wabe Allah wfe wedla wsiok ni yin Ou.”