Na Dli Hra Ydihan Yesus
8:1-3
8
Kyamre sba mde, Yesus wain wse kota man, wse kota man, wahin krotia man wse krotia man, wrana siar fe Giet Mabot om, o le ma Allah waisi wslonti nai yibri. Wfe wedla yahar teit lak ei yidien sisi yein. 2 Na dli marok fot yidien yein sisi. Yesus weren wale na dli mrei yehin ni kaini ei yi, na dli mrei oli Yesus wwain kat wale klebet yiyaka yhok yehin ei yibri. Mde yidien sisi ou yein. Mres mabe Maria, hra mahin kota Magdalena, hra Yesus ou wwain kat klebet ysa mtalak yehinti kat wale om. 3 Mres oli mabe Yohana hra msmian Khuza wabe pegawai ysa wak istana Herodes. Mres oli mabe Susana. Ei yidien na dli wat marok. Na dli ekei ydihan lokdi sawuan Yesus wadien wfe wedla ei, yidien na dli yfe pitis ei yi.Flet Wabe Na Wklat Har Gandum Yfuon
8:4-15
(Mat. 13:1-23; Mrk. 4:1-20)
4 Mde na marok karmiak kat ykafreyit-yat o le ma na yehin kota man ei kota man ei ybalifis yse Yesus wak. Mde, ou wrana fe flet mreu. 5 Wrana wto:
“Na mre wse sala yfi wabe wklat har gandum yfuon. Wklat har samne wata fo, mre yti yse fan tefit. Yik fan de na ykait eye mrei, mre klen yeit kayi de yfot. 6 Yfuon mre yti fot yse bet sa heter, yfori ysafla*** mahin yklio, bet om mslo fe kla dait. 7 Yfuon mre kdie yti yse klifaka mde yfori sisi mde klifaka yflie ysiokti rat kat. 8 Yfuon mre kdie yti yse bet om mhlio mbot, mde yfori ykan ei na mahot yeigi yewer hra yklat har wale.” Mde Yesus wsalo kaf kat wto, “Na sio ma yto ytefit, ofo yoso kmiet ni hra tet trana kei.”
9 Yesus wrana ni mfot fo, wfe wedla ei yefitwain man ou yto: “Se flet oko wabe mit ma ei?” 10 Ofo Ou wada wto: “Man deri tfe wedla nan, Tet trana tahak fe ni ekei. Ni ekei kaman yhlok, na ynok dait latiot, yibe Allah waisi wslonti na tkoin ei yibri. Mahin man na wat ei, tet trana tahak dait, trana fe ni yihlok ei main fe deri flet. Trana tadien tflet deri ni se bo:
‘ei ytatol wanik deri mahin yhot dait,
ei yoso wanik deri mahin ynok dait.’
11 Mde flet ko o le ma hra ko: Ni yifuon olo, ei le ma Allah wfe giet mabot om. 12 Bet man hra mak fan mtefit le ma na hra yoso walem mahin fo, Klebet Wafleu whok waka, wkosia kat Giet okom mahin ei yibri. Klebet ou waliak si ei ynok Allah ofo weren kaka ei. 13 Ni yifuon hra yti yik bet sa heter le ma na hra, yoso wale Giet okom mde ykashok fem. Mahin yfori yteit dait. Mde ni sgia afe ni ykahiowain mre yhok ykosirik ei ofo, yehinti kat Giet Mabot om. 14 Ni yifuon olo man hra yti yik wi klifaka hra yflie ni yifuon ei, o le ma na hra yoso wale Giet okom mahin, ni warok ei ykokdio, ywewisti-ta ei. Afe yoso wale Giet om mahin ei ybahoin yto yibe na kohok. Afe yoso wale Giet om mahin ei ysiok deri ni hra yeisi fe kayi de ei ysiwain dait Allah wfe Giet om. 15 Mahin, ni yfuon man hra yti yse bet mahliom, bet o le ma na tkoin hra yibri ybot toron kat. Yoso Giet okom ofo, ysaeti mak yibri ra, ni masgiam mhok wanik deri, yhron kein kawuak, ysiok ni hra Allah ou waisi fe.”
Flet Wabe Sitin
8:16-18
(Mrk. 4:21-25)
16 Yesus wflet mre oli wto: “Na mre dait kat ybet sitin mawet om mdhen mahin fo ylak mse wi ese mlale afe ykaborti. Hau, bo ylak kayi mak wi mayiye se bo wi mhak ofo, na hra ytrik yse bol yhot ni. 17 Fe hra ni yilak diaman ei basak fo yyen hata kat, yidien fot ni hra yihlok ei bo ytahak kadio kat. 18 Mto mde ke fo, noso rorowain la ni hra tet trana fe. Na hra yoso rorwain homo-homo ni hra tet trana fe, ofo bo Allah whnak man ei ynok ni yewer kat. Mahin na hra yoso kmiet dait ni hra tet trana ei, yto deri yto ynok wale ni mahin, yorsfe deri. Allah bo wlok kat ni ekei yehin ysablit ei.”
Yesus wadien waliwet wai
8:19-21
(Mat. 12:46-50; Mrk. 3:31-35)
19 Yesus wemem madien waliwet wai yto yka yse Ou wak mahin, ei yhok dait yik Ou wak fe na marok karmiak kat. 20 Mde na yrana ni fe Ou yto: “Neme madien naliwet wai ei le ma yife tlein ra, ydihar nen, yeisi yhot nen.” 21 Mahin Yesus wada ei wto: “Teme madien taliwet wai, ei le ma na hra yoso Giet mahin Allah wak, ofo ysiok.”
Yesus Wkaboti Safar
8:22-25
(Mat. 8:23-27; Mrk. 4:35-41)
22 Tali wagiet kdie mre fo Yesus wadien sisi wfe wedla ei yorin kma, mde Ou wrana man ei wto: “Nan nka faf fska kat foto fse siwan sabarak wtato ana.” Mde ei yorin, yska kat kma rar om yein. 23 Mde ei yein samne wata, fo Yesus wase. Mde foron wadien alwkafe yhok ro kat, hidi wasamsa wba yik siwan wabri ale, alwkafe yklat kma okom kayi de bhait ma kma mako. 24 Mde wfe wedla ei yka ytabe Ou, yto: “Tfe na fle, tfe na fle, faf fila le mkei!” Mde Ou wsidik wahin, ofo wkaboti safar wadien alwkafe okou. Mde foron wadien kla oko yluwa ofo siwan oko wtono. 25 Mde Yesus wto man wfe wedla ei wto: “Hra nan nten dait nkaso nin Tet tabe?” Mde ei yiwa main kat, yteit yrioro yeliek. Mde yrana saswain frit-frat yto: “Na toron, na man sio wko? Ou wbahe foron wadien alwkafe yoso man Ou!”
Yesus Wwain Kat Klebet Yiyaka Yehinti Kat Na Wahin Gerasa
8:26-39
(Mat. 8:28-34; Mrk. 5:1-20)
26 Yesus wadien wfe wedla ei yorin kma rar kayi de yhok yik wi kota Gerasa, hra mak siwan sabarak Galilea wtato ana. 27-29 Wak oko fo, na dla koli klebet yiyaka yfla mreu wase. Na oko wahin kota hra mataren okom. Kaman tali man tali man klebet yfla wale ou mde na yik kota ei yhirit wna wteit wanik deri wadien omos rantai feu, ysitodo kat fot mahin, ou wkein kerek kadio kat omos hirit ekei. Mde klebet yidien kat ytain fali wain wse wi domri. Wadien wlis kat wale wtrik dait fot not trik, wase dait wak bol ha, wase deri wak hin knawato yibri, wi hra na ykali sawuan eigi. Hra oko fo, Yesus whri wse tlein ofo, na wakoli ou whok waka wse ou wak. Whot wale Yesus mde wsalo fle kat mde waka wti basadit wak wteit olo aiti. Yesus wbahe kat klebet yiyaka ekei yhokti kat ou. Mahin wkader wtrere wsalo kaf kat wto: “Yesus, Allah hra Wfle Wewer kat Wfe wet Nen, hra nen naka fe me? Nen naka nsiok ni mit ma man tet ou? Nhentigat kat tet. Tet twaini man Nen nsiok sgia amot tet tala. ” 30 Mahin Yesus wefitwain man ou wto: “Nkedi mabe sio?” Mde na ou wada wto: “Kaisin Sfa Dla mam,” fe hra klebet yiyaka yrok kat yfla ou. 31 Mde klebet yiyaka yirok ekei ywaini tata man Yesus yto: “Mto mam mhok kat na oko mde, nbahe kat dait mam mti mse kmain syo let kafir amo mila.”
32 Yik oko fo, korik kda warok kat ynek samne ydihar ni eit yik den wkedi. Klebet yiyaka hra yrok ekei ywaini man Yesus yto: “Nen naisi mam mtrik mse korik hra yrok angkei.” Mde Yesus wsamenie fe. 33 Mde klebet yiyaka ekei yhokti kat yehin na okou ofo ytrik yse korik kda fle ekei ysese yslili kdier oko yti kadio kat yse siwan sabarak wabri ale mde ysio kla, ykak kadio kat.
34 Na hra yiror korik ekei yhot ro kat ni hra yhok mde, ysese ykapra-pra fe ni ekei yein yse kota yidien krotia hra ytaren ei. 35 Ofo na yehin kota yidien krotia ei ysese yka yhot ni hra yde ekei. Yik Yesus wak yhot ytiere fe na hra klebet yiyaka yehinti kat wale ou wleli wataren wak Yesus wteit. Ou wtrik wale not trik wadien wnok sas rorwain ni. Mde ei yeliek kat. 36 Na hra yhot ni hra mhok wale man ysifuon mde, yrana siar kein kdie mabe Yesus ou weren wale na hra klebet yiyaka yfla ou, wsalit wbot oli. 37 Ofo na kadio kat hra yese yik fobi Gerasa om ei yeliek karmiak kat. Mde ywaini lon-lon man Yesus wahinti kat wi ei yi. Mde Yesus warin wse kma mabri ale wto wsalit oli ofo, 38 na hra klebet yfla okou wwaini wto wadien sisi Yesus ei yein. Mahin Yesus wbahe kat ou wsalit deri, wto: 39 “Nsalit oli nse bol nen na nrana hatot man na marok ni kadio kat ni hra Allah wsiok wale yin nen ei.” Mde na okou wain oli, wak wfe kota fo wrana siar fe ni hra Yesus wsiok yin ou ekei.
Yesus Weren Wet Yairus Wfem Msidik Oli Wadien Wweyen Na Dli Mrem Hra Mkakhen Lis
8:40-56
(Mat. 9:18-26; Mrk. 5:21-43)
40 Mde Yesus wsalit oli wahin siwan watato ana ofo, na marok hra ywade kein Ou ekei ykashok ylia kein Ou. 41 Hra oko fo na wafle hra wslonti bol sikafit wak okou, wkedi le ma Yairus. Ou whok waka wti wbaloyok, wbatoko wse Yesus wteit olo aiti, ofo wwaini lon-lon kat man Yesus wabe waka wse bol ou wam. 42 Fe hra wfe wet madli mres tomi kat, mfori kmo mase der yahar teit lak, biarak wa maigi.
Yesus wak sonat fan bri wain samne wata wse Yairus wfe bol fo, na marok ykdio yit-yat Ou. 43 Na dli mrem mak fot oko mkain wale kakhen lis, mase der yahar teit lak (12). Na yweyen sin yfasa, mdain dait. 44 Om main mataren Yesus wak wsbiele mde mna okot Ou wfe not trik malis okom. Madien hra oko om mfe kakhen ou wdain ro kat. 45 Ofo Yesus wefitwain wto: “Na sio ma wna okot Tet kou?” Mahin ykan hei-hai kadio kat, mde Petrus wrana wto: “Tfe na tmak, na marok yskawaloti yokot Nen.” 46 Mahin Yesus wto: “Hau, na mre yna okot Tet, fe hra Tet tbasan tkan makohok mrem mhok mahin tkan kom.” 47 Hra oko fo na dli om mhot fo, Yesus wnok wale ni hra om msiok mde, maliak mkan yrioro. Mahin maka mti mbaloyok mak wbariomo aiti. Mrana hatot ni fe na marok kadio kat, ni mit ma mfe he om mna okot Ou wde ni kaini om mdain, mdimies sros kat. 48 Mde Yesus wto man om wto: “Tfe wet nen, nen nkaini om mdain wale fe hra nen nten nkaso deri man Tet. Nahin nain wata nadien nbot-bot deri.”
49 Yesus wrana samne ni wata fo, na bahe mreu waka wahin bol Yairus wfem. Ou wto man Yairus wto: “Nfe wet om maigi wale. Nhnak siwisi fe amot na tmak oko wala.” 50 Hra oko fo Yesus woso ro kat ni okom, mde wto man Yairus: “Naliak amot. Nten nkaso wata, bo nfe wet om mbot oli.” 51 Yhok yik bol Yairus wfem mde, Yesus waisi dait na wat-wat ei ytrik ha, Petrus, Yohanes, Yakobus yidien wet om mono meme deri. 52 Na marok yowa ytiri madien ysalo fle fe wet hra ma eigi okom. Mahin Yesus wto: “Nan nowa amot; om maigi dait, mase deri!” 53 Ei yasak klo fe Yesus, wabe ynok wet om maigi wale. 54 Hra oko fo Yesus wsiokti wet mna okom mde wto: “Tfe wet, nsidik la!” 55 Mde wet mawua om mtrik oli mse mkan okom, mde msidik mkro, mron oli. Ofo Yesus wbahe ei yhnak ni eit yin wet okom mat. 56 Wet om mfe na trar ei yteit yrioro, yiwa main kat, mahin Yesus wtoji ei yein yrana kein dait ni hra yhok ekei yin na wat ei yila.