Yesus Wweyen Na Sae Kahat Wafle Wfe Wedla Bahe Mre Wak Kapernaum
7:1-10
(Mat. 8:5-13; Yoh. 4:46-53)
7
Yesus wrana ni ekei yik na marok ybariomo yfot fo, wain wloit wse kota Kapernaum. 2 Wak ana fo, na sa Roma mreu wabe na sae kahat wafleu wase lokdi wale. Hra oko fo wfe wedla bahe mreu wkaini kamyi kat, biarak ma waigi. Na wafle okou wmro fe kamyi kat wfe na dla ou. 3 Na sae kahat wafle ou woso ro kat fe Yesus, mde ou wtik giet main fe na sa Yahudi yfe na tmak mrei yein yse Yesus wak, ywaini fien Ou waka wweyen ou wfe na dla oko. 4 Kayi de na tmak yhok yik Yesus wak, ykader kohok man Ou waka weren na dla bahe oko. Yto: “Neren bakoko ou, fe hra na sae kahat oko wbot deri. 5 Ou wmro fe na sa Yahudi faf, wsiok wanik wale bol sikafit man mam mi kom.” 6 Mde Yesus wadien sisi ei yein.Kayi de yitaren wale yse bol ofo, na sae kahat wafle oko wbahe kdie wanak wa mre yein ywayen Yesus yibe yrana yto: “Nai yfe na, nbahe nbakya kliowo deri naka nse bol tet ta. Tet kei tbot dait twien fien naka ntrik nse bol tet ta. 7 Oko le ma molot fe tet tbren kat dait taka tse Tono nen nak. Ofo nbahe deri se bo tet tfe na dla ko wdain. 8 Tet trana mde le ke fe hra, [Tet tnok kayi mabe nen nkanas nsiok ni.] tet tabe fot na bahe msadiak sisi mde le nen. Tet toso kmiet man tfe na wafle hra wslonti tet. Tet tslonti fot kasin man ei, ofo ei yoso kmiet man tet. Mde hra tet tbahe tfe wedla mreu tto, ‘Nen nain,’ ofo ou wain. Mde hra tet twit fien mreu tto, ‘Naka se!’ ofo ou waka. Tto tbahe tfe na dla kou wsiok ni, ofo ou wsiok ni. [Tet tnok kayi mabe nen nslonti kadio kat ni.] Nbahe wata deri ofo tfe na dla ko wkaini mdain.
9 Yesus wteit yrioro kat fe woso ro kat ni ekei. Mde Ou wlelek wsifuon wse wsbiele ofo wrana ni fe na marok kadio kat hra yidien ou yein ekei wto: “Hmpai na ko! Ou wten wkaso mewer kat mse Allah wak. Mahin na sa Israel kadio kat hra kei, ttatiere fe dait latiot mre wten wkaso wnok mse Allah wak mfle wewer kat mde hra na sa wat ko.” 10 Yesus wrana ni mfot fo, na tmak hra na sae kahat wafle ou wbahe wale ekei ysalit oli yse bol ou wa mde, yhot fo na dla bahe ou wdain wale.
Yesus Wkosia Wet Fori Mreu Wsidik Oli Wak Nain
7:11-17
11 Sba fo Yesus wain wse kota mrem mkedi le ma Nain. Wfe wedla ei yidien sisi Ou yein, yidien na marok karmiak kat ykafisin-fasan*** yidien fot Ou yein. 12 Yesus whok wataren fan ta matrik kota okom, ofo na ykafe eigi mreu yhok fali yehin kota. Hra waigi okou wet wadlau, na semit om mfe wet wmres kat. Na marok yehin kota okom yidien sisi semit yein. 13 Hra oko fo Sma Yesus whot semit sabir okom, mde Ou wsablit mrohok mmro fe om, ofo wto man om wto: “Nawo amot!”
14 Ykafeti wata ofo ou wkasiowo*** wataren eigi okom ofo ou wokot ater eigi om. Mde na yikafe ekei ykro fali. Yesus wto: “Woi wedla fori, tet tbahe nen nsidik la!” 15 Wedla fori hra waigi wale okou, wsidik oli wrana ni. Mde Yesus whnak oli wse weme mak. 16 Na marok om yeliek karmiak kat yhdin Allah. Mde ei yto: “Na nabia wafle mre le whok wak faf fik ko! Allah Ou le waka wale wkaka Ou wfe na faf fkei.” 17 Yrana tar-tar kat fe Yesus kayi de giet okom main kohli fe fobi Yudea yidien fot fobi wat hra ykdein yitaren.
Yesus Wadien Yohanes Hra Wsrik Kat Kla fe Nai
7:18-35
(Mat. 11:2-19)
18 Yohanes wfe wedla ei yrana ni owuok [hra Yesus wsiok] kadio kat ekei yin Yohanes. Mahin ou wkahiowain sonat, mde ou wwit fien wfe wedla lak ei yka, 19 ofo wbahe la yein yse Nago Yesus wak yefitwain yto: “Nen kei le ma na toron hra Allah wkadoin fe nabe basak naka ei, afe mam mleli kein sonat na wat kdie mreu?”
20 Ofo na lak hra Yohanes wbahe ei yein yse Yesus wak mde ei yrana yto: “Yohanes hra wsrik kat kla fe na, wbahe mam mka mse nen nak, mefitwain man nen mto: ‘Nen kei le ma na toron hra Allah wkadoin fe nabe basak naka ei, afe mam mwade kein sonat na wat kdie mreu?’ ”
21 Wadien hra oko fo Yesus wweyen weren na marok hra ykaini ofo ei ydain kadio kat. Ou wwain kat klebet hra ytrik sisik yfla na ei. Wweyen fot na hra ysibra se yhot oli ni. 22 Mde Yesus wada wto: “Nsalit oli nse Yohanes wak, nrana hatot fe ni kadio kat hra nan nhot wale ei yidien ni hra nan noso ei: Na yisibra yhot sros ni. Na yikarat ei yein. Na ykain ni kaini ykan obo ydain wale. Na ytefit dik yoso ni, na yeigi ysidik yron oli, yidien fot Giet Mabot hra mahin Allah wak tet trana tahak kat man na hra ybhait ei. 23 Mde, nrana kdie oli man Yohanes nto, mabot karmiak kat man na hra wkahiowain dait fe Tet, ni mrem mwewisti dait ou se bo waha kat dait Tet.”
24 Na hra Yohanes wbahe ei ysalit yein oli ofo, Yesus wrana ni fe na marok ekei wabe Yohanes. Wto: “Kwan firi wa ko, nan nein nse Yohanes wak wi ma domri, kla Yordan wtefit fe me? Yibe nhot ni mit ma ei? Nnok tmol homo-homo, mit ma hra molot fe nan nein nse kla Yordan wtefit ana? Bo nan neisi nhot na hra wsablit mhron dait, mde le dowas le foron wfrio wafe? Mdain. 25 Se nan nein nhot ni mit ma ei? Na mre hra wtrik not ybot kat afe? Mdain fot. Na hra ytrik not ybot yese dait yik wi domri ha, ei yese yik deri bol yifle! 26 Se mit ma molot fe na nein nse ana? Yibe nhot na tmak nabi mre hra wrana sros kat ni yehin Allah wak, ou le wkou. Nto tkoin, na okou wfle wewer kat wahin na tmak nabi. 27 Katik fari makohok mrana krek wale fe Yohanes mto ou wabe na hra wsat kein fan man Mesias. Katik fari mto:
‘Allah Tet tfe na bahe ou le wko.
Bo Tet tbahe ou walin kein nen,
se bo wsiok kein fan man nen!’ ”
28 Yesus wto oli wto: “Yik fobi ko, na mre wfle wewer dait wahin Yohanes. Mahin Allah wto na kadio kat hra Ou wslonti ei yifle yewer kat Yohanes. Ywet wanik wata, ybhait wanik wata, yewer wale ou.”
29 Madien hra ko na marok yidien fot na yisbal fe blasten ei yoso Yesus wrana ni mde, ysamenie fe Allah wfe giet om mto tkoin, fe hra kaman ei yhnak wale ykan yse Yohanes wsrik kat kla fei. 30 Mahin na Farisi yidien fot guru agama ei ynahla kat ni ybot hra Allah wsin fe yin ei, fe hra kaman yaha kat lalie wale Yohanes wsrik kat kla fe ei.
31 Mde Yesus wrana oli ni wto: “Bo tet thnak flet fe nan. Nan hra nnok dait tet madien hra ke ko, bo nan nde le sie? 32 Ei yde kayi weka hra yleli-lala yik wi frihene. Yikan satatik man ei yrana man ei yto:
‘Mam mto mfrio sool man nan, mahin nan nsrar dait.
Mam mtrie kadie heyit rwe, mahin nan nowa daitb.’
33 [Mde fot le ekei, nan naha kat wale Yohanes fot Tet fot.] Fe hra Yohanes hra wsrik kat kla fe nai waka fo, nan naha wale ou. Wat dait ni eit tkoin roti ei, wako dait kla tkoin hra anggur mrem, ofo nan nto: ‘Ou ekei klebet ysisik yfla ou!’ 34 Sba fo Na Tkoin Yfe Wet Tet taka fo, nan naha fot tet. Tet tat ni eit roti yidien tako kla anggur mde le na tkoin. Ofo nan nto: ‘Nhot la, na hra anau! Wat sborin wbakrek, wmsit sawuan, wadien lok-lok na ysbal fe blasten yidien na hra ysiok sawuan satian.’ 35 Mahin na hra yibe Allah wfe wet ytoron kat yhot ni hra Tet tadien Yohanes lam msiok ei, ysamenie fe yto mam msablit lis, msiok deri ni hra Allah waisi fe.
Yesus Wak Bol Simon Wfe
7:36-50
36 Na Farisi mreu wkedi le ma Simon, wwit fien Yesus la yein yse ou wfe bol, yeit sisi ni eitc. 37 Kota okom na dli mrem mase hra kaman msiok sawuan lokdi satian. Mde hra oko fo om moso ro kat Yesus wat ni eit wak Simon ou wfe bol mde, om maka matik botol mrem mhon fe minyak hra wrnoin wrofof-fof kat. 38 Na yeit sonat ni ofo om maka mkro lolowain mak tlein, mataren Yesus wteit olo ei, ofo mawo. Msiklia ei yti yware sret-srat yin Yesus wteit tofo ei, ofo mleli mkeit-kat*** yidien msagien ei, mkmois wteit ei ofo myan minyak hra wrnoin fei.
39 Na Farisi hra wwit fien wale Yesus whot ro kat ni ekei de wnok tmol deri mak wabri: “Ou kei wto wabe toron na tmak nabi hra woso sros kat ni yehin Allah wak ofo, bo wnok kayi na dli na sie ma mokot ou ekei; fe hra na dli okom o le hra msiok sawuan satian. Mde mahin tet tak, bo ou wabe dait nabi.”
40 Mde Yesus wrana man ou wto: “Simon, tet trana ni mre wan nen.”
Ofo Simon wada wto: “Yo, na tmak, nrana wata.”
41 Yesus wto: “Na lak ei ykain sisi na omuok fe na mres ou wabe wkaka ei. Man ou wkain wat pitis kdois perak lima ratus, man ou wkain wat pitis kdois perak lima puluhd. 42 Mde la yikan lak ekei ykain dait pitis mre yibe yala ysalit oli yse na omuok ou wak, ofo wto: “Yik wata yko, nfe na omuok tet tsbal oli dait.” Yo, mto mde ke fo, mahin la yikan lak ekei na sie ma wkashok fe na omuok okou wewer kat?”
43 Mde Simon wto: “Bo tet tnok tto hra wkain na omuok wfe pitis yrok ekei yila deri.”
Yesus wada wto: “Ni hra nnok okou nto tkoin.”
44 Mde Yesus wlelek wsifuon wsmit sas-sas na dli okom ofo wrana ni fe Simon wto: “Nhot na dli kom. Tet tto ttrik tak nen nfe bol ko fo, nhnak dait kla mrem man tware tteit ei. Ha na dli kom mware wale tet tteit yidien om msiklia ei, ofo myan kat yidien msagien. 45 Tet thok sayen ekei, nen nbone dait tet, ha na dli kom sok ma mkmois kayit-yit kawuak tteit ei tadien thok sayen tak ko ei. 46 Nen nhdin dait tet tadien nolio dait kla minyak yrnoinf mre yin tet tsa masa ago, mahin na dli ko sok ma molio kat mfe kla minyak wrnoin yin tteit. 47 Tto tkoin kat man nen, Allah whnak hares maflem man wale na dli kom. Mfe satian hra yrok ei Ou wyan kat yelin wale. O le ma om maka mhnak hares msamsa kat man ya tet. Mahin na man sie ma yto ykain satian kyamre deri, ei le ma ybasan Allah whares kyamre deri man ei, ofo ei yhares kyamre deri man ya Ou."
48 Ofo Yesus wto man na dli okom wto: “Satian hra nen nfe ei ydain wale.”
49 Mde na rin wat man hra yidien ou yeit sisi ni eit ekei ynok sas mak yibri yto: “Hyee! hra na ko wto wyan kat nai yfe satian mde sie? Allah sok ma wyan nai yfe satian, na oko wdain."
50 Mahin Yesus wrana wata man na dli om wto: “Allah weren kaka wale nen, fe hra nen nten nkaso mse tet tak. Nain wata nadien nbot deri!”