Yesus Wfe Wedla Ylos Gandum Yidien Tali Sabat
6:1-5
(Mat. 12:1-8; Mrk. 2:23-28)
6
Tali Sabat man kdie ou fo, Yesus wadien wfe wedla ei yein kat fe biele gandum wabri. Yein fe biele gandum wabri mde, wfe wedla ei ylos gandum yfuon ei yka ykowa ybadiak yik yna katak ofo yeit. 2 Mahin na Farisi mre yik fot ana, yhot wedla ei ylos gandum. Yhot yde yto: “Hra nan nsiok hriok ni yewer kat tali Sabat ko fe me? Nan nnok dait ojin om?”3-4 Ofo Yesus wrana man ei, wrana fe mabe ojin ei yewer dait ni mde le nai ykatot. Mde wto, “Hra nan nbaca dait mabe Daud ou wadien wfe wedla ei? Kamuolo nai fe na wkatot kat, wtrik wata wse wi mataren bol dik tenda kohok Nago Allah wfem. Wtrik mde, imam whnak wata roti hra ysanfe wale man Nago Allah om maka, wat hriok. Wat mde whnak man wfe wedla ei yeit sero fot, ha roti oko na yeit sayi dait, imam sok ma yeit. Mahin Nago wtrere dait Daud. 5 Tet trana ni ke se bo nan nnok, Na Tkoin Yfe Wet Tet le mke, tet le ma tabe Na Wafle tan tali Sabat. Tet le tkain fle mabe trana ni hra ybot afe ni hra ysgia yin tali Sabat.”
Yesus Weren Na Wadien Tali Sabat
6:6-11
(Mat. 12:9-14; Mrk. 3:1-6)
6 Tali Sabat wat kdie oli man ou fo, Yesus wloit wak bol sikafit, wkakniet ni. Yik oko fo, na mre wna mtato maigi mfgi. 7 Guru agama mrei yidien na Farisi mrei yik fot ana. Naflei ysitodo kawuak Yesus, mde hra yto wweyen weren na wadien tali Sabat oko, se bo mabe kakniet fe wabe yto ou wsiok sele ni sgia yidien tali Sabat. 8 Mahin nai fe nau wnok wale ni hra ei ynok yik ysablit ei, ofo wbahe man na hra wna mtato maigi oko wto: “Naka, naka nkro nak wi mayiye ko!” Ofo na oko wsidik wkro.
9 Sba fo Yesus wefitwain man na marok kadio kat hra yik ekei wto: “Mtatol madien agama faf fi, faf fsiok wata ni mit ma madien tali Sabat? Fsiok ni ybot afe, fsiok ni yiyaka? Fkaka na afe, fsiok sgia ou?”
10 Yesus wsmit lien kohli ei kadio kat, ofo wto man na okou: “Nkotrot la nna okom.” Mde na oko wkotrot wnam, ofo mdain ro kat. 11 Mahin na Farisi yidien guru agama kadio ytrere karmiak kat, yidien yteik ysadir trar mabe ni mit ma bo ei ysiok mtatol man Yesus.
Yesus Wlouk Helwain Rasul Yikan Yahar Teit Lak
6:12-16
(Mat. 10:1-4; Mrk. 3:13-19)
12 Tali mre fo, Yesus warin wse sawo mre wabe wsikafit. Wsikafit wadien amuk lis kawuak de wade wan Nago Allah. 13 Kayi de tali om mhak, ofo Ou wwit fien wfe wedla kadio kat ekei, yka fo wlouk helwain wedla bahe na yikan yahar teit lak yehin ei yik, yibe wedla bahe afe rasul yin ou. 14 Ei le ma Simon, (o le hra Yesus wwak wale wabe Petrus. Petrus ofo wabe Amak), wadien fot waliwet Andreas, ofo Yakobus wadien Yohanes, Filipus wadien Bartolomeus, 15 Matius wadien Tomas, Yakobus (o le ma wono Alfius), wadien Simon hra wkesik wadien na Israel ykro wat, 16 mde Yudas (o le hra wono Yakobus), wadien fot Yudas Iskariot ou le hra basak wbaret lolot Yesus.
Yesus Wkakniet Ni, Weren Na Marok
6:17-19
(Mat. 4:23-25)
17 Sba oko fo Yesus wadien sisi wfe wedla hra wlouk helwain wale, yeis yehin sawo ra ysiolok yik lolik ale. Yik oko fo, wfe wedla wat ei marok ybalifis, na yaher dait. Wfe wedla yirok wat ei yidien fot na marok wat ybalifis. Mre yehin fobi Yudea, mre yehin kota Yerusalem, mre yehin kota Tirus wadien kota Sidon, kota hra yik kla ompit wtefit. 18 Na marok ei yka se bo yoso Ou wrana ni. Yka fot se bo Ou wweyen ei yehin yfe ni kaini heit-hat ei. Na hra klebet yfla ei, Ou wweyen kadio kat. 19 Mde na marok kadio kat ykafreyit yto yokot Ou. Fe hra whon wadien fle mahin Nago wak, mde na hra ykaini kadio kat ei ydain oli.
Wojin man Wfe Wedla ei
6:20-26
(Mat. 5:1-12)
20 Mde Yesus wsmit saswain wfe wedla ei de wto:
“Mabot karmiak kat man nan nikan hra nkain dait hrien,
fe hra Nago Allah wslonti nan nibri wsitodo nan.
21 Mabot karmiak kat man nan nikan hra nkatot nidien hra ke ko,
bo basak nan nkesit.
Mabot karmiak kat man nan hra nowa nidien hra ke ko,
bo basak nan nasak nkashok.
22 Mabot karmiak kat man nan mabe mto nai ykrek nan, ykamuon ytbekein nan, ynaba kat nan,
fe hra nten wale nkaso mse Na Tkoin Yfe Wet Tet tak.”
23 “Nai ysiok sgia wata nan fo, nkashok deri. Kamuolo anggait yate kokos ykrek ysiok sgia fot Nago Allah wfe nabi ei. Mto nai ysiok sgia nan fo, nkashok deri! Nsrar deri. Bo ni tasa nan nfe om mfle mleli kein wale mak wi hra Nago wak wi mayehet ago.
24 Mahin masgia man nan nikan hra nfle nkohok nidien hra ke ko,
fe nan nkain wale hrien warok yhnak kashok fe nan nik fobi kom, basak ofo ndain deri.
25 Masgia man nan nikan hra nidien hra ko nkesit karmiak kat,
fe hra basak nan ntiblie.
Masgia kat man nan nikan hra ke nasak,
fe hra bo basak nan nasak ei ydain, nkan om mrwe nidien nowa deri.
26 Masgia kat man nan nikan hra na marok om yhdin nan, ytalan fe nan.
Mabe, nan nnok la: nabi hra ygebra, ylolot dienen nai yidien kamuolo anggait, nai yhdin ytalan ytiksi fot ei. Na hra kamuolo ytiksi nabi hra ylolot dienen ei, yate kokos le ma ytalan ytiksi nan ke. Mde msgia.”
Nmro Fe Na Khan Ou
6:27-36
(Mat. 5:38-48)
27 “Mahin man nan nkei, noso la mse Tet tak ko, Tet tojin ni kei yin nan: Nhot na hra wkhan wadien nen, ofo nmro fe ou. Nhot na hra wtrere nen, ofo nsiok wata mabot man ou. 28 Na man hra wfruo kat nen ofo, nwaini Nago watsiofo wata ou. Na man hra what nen afe, wsiok ni sgia wadien nen ofo, nsikafit deri man ou. 29 Na man ou wba ktak nkamit matato ofo, nhnak fot nkamit mtatom. Mto na man ou wkaf kesik nfe not trik malis (jubah) om, ofo nliokeit wata wwien fien fot nfe not trik tkoin om. 30 Mde hra na man ou wwaini ni mre man nen, ofo nhnak wata ni man ou. Mto na man ou wlok kat nfe ni mrem, ofo nwaini oli dait. 31 Tet tojin man nan: Nsiok mabot man na wat, nsiok nalin sba man ei se bo ysiok mabot man nen.
32 Na hra ysiok wata ni yisgia ytatol dait yin nen, ofo nmro fe watai. Mde hra nto nmro fe man deri na hra ymro fe man nen, man na wat ei yila, ofo bo Nago whdin nen afe, wdain? Na ysgia ymro fe tiktol deri man na hra ymro fe wale man ei. 33 Mde hra nto nsiok mabot man deri na hra wsiok mabot man nen, ofo bo Nago whdin nen afe, wdain? Na ysgia yhares tiktol deri man na hra yhares man ei. 34 Mde hra nto nsiofo ni man deri na hra bo yala oli ni man nen, ofo bo Nago whdin nen afe, wdain? Na ysgia ysiofo tiktol deri man na hra bo yala oli ni man ei. Ei yorsfe yto bo ydan fali. 35 Mahin nan nkei, Tet tojin man nan nmro fe wata na hra ysiok ni sgia ei yin nan. Nsiok ni mabot deri man ei. Nsiofo wata man na ei, norsfe dait nto bo ydanhok mala. Mto mde ke fo, bo Nago whnak wata ni tasa mafle man nan. Bo nan nibe wet yitoron yin Nago hra Wafle Wewer Kat Ou. Nago Allah ou whares wata man na hra ynok dait yhdin [dait] man Ou, whares wata man na hra yisgia yiyaka ei. 36 Mde nan nke, nbakoko fe wata na man ei, yde fot le kayi nan Nono wbakoko fe kadio kat na.”
Ni Adon
6:37-42
(Mat. 7:1-5)
37 “Nan nadon sak-sak amot na, se bo basak Nago Allah wadon dait nan. Nnok deri nan nhirit sak-sak na amot, se bo basak Nago whirit dait nan. Nwien fien nanak man ei hra ysiok sgia wale ni man nan, se bo Nago wwien fien fot nan. 38 Nhnak wata ni fe na man ei, se bo Nago whnak fot ni fe nan. Nhnak ni madien nabri mowuo kat man nanak man ou, se bo Nago whnak fot wfe hares mowuo kat mliehet-hat kat man nan. Mabe bo kniet hra nan nkniet man nanak man ei, kniet okou le ma Nago wkniet oli man nan.”
39 Yesus wrana fot kdie flet mre wan ei, wto: “Na wa sibra mre wsria sadik na wa sibra mreu afe? Ofo bo la yikan lak ekei yti yse kmain.
40 Wet sekolah mre wfle wewer dait wfe guru okou. Mahin basak wet wsekolah sba whok wale wahin sekolah, ofo bo ou wsadiak wde le wfe guru okou.
41 Hra nan nhot sidiorok wawet yik nanak man ou wsifuon ou wa feme, yo wkoit mafle hra mabakredi mak nsifuon na okom nliokeit wata? 42 Hra mde sie ma nan nrana ni fe nable ou nto: ‘Naka la, table, tet tkosia kat sidiorok mahin nsifuon okom.’ Ha mafle la mak nsifuon na okom hra nan nhot dait? Woi ysitie! Nkothok lalie kat la wkoit mfan mafle hra mak nsifuon na okom mhak sba ofo, se bo nan nkosia kat tnes sidiorok man hra mak nanak man ou wsifuon ou wam.”
Wkoit yidien Ykan
6:43-45
(Mat. 12:33-35)
43 “Wkoit yibot mrei yto ykan ei, ykan yisgia dait, ybot deri. Yde fot le wkoit yisgia ykan ei ybot dait, yisgia deri. 44 Wkoit molo man om na yhana mahin le mkan om. Nan nlos ara mkan mrei yehin wi sari kla doin afe? Nlos anggur mkan yehin wi sari okom afe? 45 Na hra yibri yibot ei ysadir ybot deri yehin yibri yi aiti. Na hra yitrere-trara ysadir mdrot ofo yrana ni sgia yhok yehin yibri yi aiti.”
Flet Fe Bol Lak
6:46-49
(Mat. 7:24-27)
46 Yesus wrana oli wto: “Hra nan nwit tet nto: ‘Tfe Sma Na Wafle!’ Mahin nan nsiok dait ni hra tet tbahe yin nan ei yibe? 47 Na hra waka wse tet tak, woso kmiet ni hra tet trana ei ofo, wsiok siwain fot: ofo bo wde sie? Nka, tet trana flet mre man nan. 48 Ou eke wde le na hra wto wsiok bol amak. Wkak bet om mkakolo, mskatias man amak, ofo wsiok pondasi om. Basak kyen, kaye wfle whok waka, wflie wata bol okom, mahin mhron, mti dait, mabe ou wsiok bol om mak pondasi hra mkanas. 49 Yo, na hra yoso kmiet wale ni hra tet trana, mahin yto ysiok mtatol dait, ofo ei yde le sie? Yde le na hra wsiok bol mahin, wsiok dait pondasi mrem, mak deri bet. Kyen, kaye wafle whok waka fo, bol okom mkarian, mti, mtwak-twak kat!”