Yesus Wlouk Helwain Wfe Wedla Yisayen
5:1-11
(Mat. 4:18-22; Mrk. 1:16-20)
5
Mde tali man kdie ou, Yesus wkro wrana ni wak siwan sabarak hra wkedi le ma Genesaret wtefit om, na marok ei ykro samne ykohli kat ou, yeisi yoso Allah wfe giet om. 2 Ou wsmit fo kma lak ybries yik kla wtefit ale. Na yisiok eren ekei ylak wale kma yik tefit ale, yware samne yfe swelet. Kma mres na wasiok eren Simon ou wkain. 3 Yesus warin wse kma hra Simon wfe mabri ale, ofo wbahe wna kat kma okom mkariet fali Ou wse kla wtefit ale. Ofo Ou wleli wak kma mabri, wkakniet ni fe na marok.4 Wrana kayi ni yfot, ofo Ou wbahe Simon: “Nska kat la nse kla wabri ale se nklat la swelet okom mabe nsiok eren.”
5 Simon wada wto: “Nai fe nau, amuk lis wa ko mam mkmuok wale kayi de mfasa, msiok dait kat ni mrem, mahin fe hra nai fe na Nen nbahe oli, tet tklat wata swelet kom.”
6 Mde ei ysiok kayi mde le ekei ofo, ysiok karmiak kat eren wrok, kayi de yfe swelet om biarak wa msadak. 7 Ofo ei yna elit fien yanak man hra yik kma wat man ei, yka ykaka ylak sisi eren yik kma kayi de biarak wa yoko.
8 Hra oko fo Simon Petrus whot ro kat ni ekei, de wti wbaloyok wak Yesus wkmuon olo aiti mde wto: “Na Wafle, nahinti kat tet, fe hra na wasiok satian le tet tke.” 9 Fe hra ou wadien wanak wai kadio kat yiwua main kat fe eren warok hra ei ysiok uwade okou. 10 Mde kayi eke Simon wadien wanak lak ei Yakobus wadien Yohanes, yiwua main kat. Yakobus wadien Yohanes la yono le Zebedeus.
Mde Yesus wrana man Simon wto: “Naliak amot. Bot ke, nen nain ndihar kawuak ya na tkoina.” 11 Sba oko fo, ei ykein kat kma ekei yse tlein, yehinti kat kadio kat ni ekei, sba fo yidien Yesus yein.
Yesus Wweyen Na Wkan Obo Wdain
5:12-16
(Mat. 8:1-4; Mrk. 1:40-45)
12 Mde tali oli kdie fo Yesus wak kota mrem. Whot ro kat fo, na mre wkan obo. Hra oko fo ou whot ro kat Yesus, wbatoko wteit wse fobi aiti ofo wwaini wto: “Na Wafle, mde hra Sma nen nto naisi ofo, nweyen tet, nsiok tet tbot tlef tak Nago Allah wsifuonb.”
13 Na Yahudi yein ayak sawuan deri fe na hra ykan obo mahin Yesus wdain, nafle wkotguos wnam, wslon fien na okou, mde wto: “Tet taisi, nen ndain. Nen nbot nlef nak Nago wsifuon.” Mayi fe hra oko fo, ni kaini obo ou wdain ro kat.
14 Yesus wojin fe na oko, mde wkait wain wto: “Nen nain wata, nrana amot yin na mre yila! Nain nyene nkan kom man imam mreu wak Yerusalem. Ofo nsiok wata sanfe yde hra Musa wbahe fe wale, yibe ni kakniet fe hra ndain wale.”
15 Mahin giet mabe Yesus main siar kat wata. Mde na marok om maka mkafreyit-yit yka yse Ou wak, yoso kmiet ni hra Ou wrana ei, yidien na hra ykaini ei yka fot. Ou wweyen ei ydain kadio kat yehin ni kaini hra ei yfei. 16 Ofo whokti kat ta-ta ei, wkadin kat wabe wain wse wi hra yidomri deri se wsikafit.
Yesus Wweyen Na Wakarat
5:17-26
(Mat. 9:1-8; Mrk. 2:1-12)
17 Tali mre kdie fo, Yesus wrana samne ni man na marok. Mde, na Farisi mrei yidien guru agama mrei yleli yik fot oko yoso kmiet ni hra wrana ei. Nai yifle agama ekei yka wale yehin Yerusalem, yehin fot kampung kadio kat hra yik fobi Galilea yidien fot fobi Yudea. Mde, Nago wfe kohok om mak Yesus wak, se wweyen na hra ykaini ei ydain. 18 Mde na mre yka ykafe na wakarat mreu wak ater; ei ysin yto ylak kayi wak Yesus wbariomo. 19 Mahin yloit fali dait fe na marok ei ykroti hredem. Mde yorin fali wse bol masa ago ytdak kate okom, mde yti kat ynadrit wais wahin ago wse na marok yik aiti wtatol wak Yesus wbariomo.
20 Ofo Yesus whot ei yten ykaso man Ou, wde wto: “Woi tableu, tyan kat wale nen nfe satian ei ydain.”
21 Mahin na Farisi yidien fot guru agama ei ynok mak yibri yto: “Na hra wtbekein Nago le wko! Ha Nago Allah deri sok le wyan kat satian.”
22 Mahin Yesus wnok wale na Farisi yidien guru agama ei yibri yi om, ofo wto man ei wto: “Ni mit ma hra sgia hra nan nnok yik nan nibri ekei? 23 Nan nnok nto mseme deri na yrana-rana ni yto: ‘Satian om tet tyan kat walem.’ Ha nnok nto man na hra wakarat nai ybahe yto, ‘Nsidik, nain la,’ o le mseme dait. 24 Tet trana kayi se bo nan nnok, tet tke kayi le ma tkain fle kohok mabe tyan kat satian. Na Tkoin Yfe Wet Tet le tkain fle tak fobi katak ko mabe tyan kat satian ei.” Mde Ou wto man na wakarat okou wto: “Tet tto man nen, nsidik kat, nkosia nfe ni maese okom, nsalit oli nain nse bol nen na.” 25 Mde madien hra oko ou wsidik wahin ei ybariomo aiti, ofo wkosia wfe ni maese okom, wsalit wse bol ou wa, wkashok whdin tiwain Nago Allah. 26 Na marok om yiwua main kat yteit rioro, ofo yhdin kadio kat Nago Allah, mde ei yeliek karmiak kat, de yto: “Tali hra ke ko mam mhot kmo ni hra yiowuok ekei!”
Yesus Wwit Fien Lewi
5:27-32
(Mat. 9:9-13; Mrk. 2:13-17)
27 Sba oko fo, Yesus whok wse tlein, whot fo na wasbal fe blasten mreu wkedi le ma Lewi, wleli wak bol blasten. Yesus wto man ou wto: “Naka la nadien Tet la faf fein.” 28 Mde Lewi wsidik wahinti kat ni kadio kat ekei, ofo wadien Yesus la yein.
29 Sba oko fo Lewi wsiok konon fle mrem mak ou wfe bol mabe Yesus. Na kadio kat hra ysiokti blasten ekei yidien na marok kadio kat yka yeit sisi ni eit yidien ei. 30 Na Farisi mrei yidien na guru agama mrei, na hra ysaeti ojin Taurat ei, yka yhot Yesus wat lok ni eit yidien na hra yslonti blasten, ofo yheden. Yrana yin wfe wedla ei yto: “Hra nan neit lok ni eit nidien na ysbal fe sawuan blasten ekei yidien fot na hra ysiok sawuan satian ekei yibe?”
31 Ofo Yesus wada man ei wto: “Noso na wapros-pros o le ma wdihar na yweyen ou a? Ha na wakaini sok. 32 Tet taka fe twit fien dait na yibot ha, na hra ysiok sawuan satian, se bo ei yket.”
Flet Hat Mabe Yesus Wkakniet Ni Yifi Ekei Ywat Yehin Guru Agama Ykakniet Ni Yitrar
5:33-39
(Mat. 9:14-17; Mrk. 2:18-22)
33 Na Farisi mrei yhar kat Yesus wabe, yto ou wsiok dait ni ysadiak yde le ei ysiok. Yto: “Na Farisi mam mfe wedla ei, yleli ta-ta ni eit yidien ysikafit, yo, wedla Nen na ekei ydain. Yohanes wfe wedla fot yleli ta-ta ni eit yidien ysikafit. Hra nen nfe wedla ei yeit wata ni, yoko wata kla, yleli dait femec?”
34 Yesus wada man ei, wto: “Na yto yik konon hra nikah fo, nai ykashok mde na mre yleli dait ni eit, mdain, yeit sisi kayi ni eit. Na smian wanak ei ykashok fe hra wadien sonat ei. Tet tadien tfe wedla mam mde le ke, tde le na smian, tadien sonat tfe wedla ekei, ofo yleli dait ni eit. 35 Mahin basak mayi fe sba fo, bo nai ylouk kat na smian Tet tahinti kat ei. Ofo yleli tnes ni eit mabe ysikafit.”
36 Mde Yesus wrana oli kdie flet mre wan ei wto: “Na mre wkodihak dait kat not trik maifi mrem man yafak man not hra matrar om. Mto mde ke fo, not maifi okom mkodihak not hra matrar om. Msgia. Not maifi okom mtatol dait not mahmat om.
37 Mde fot le na mre wolio dait twok anggur mklam maifi mse kya hra mahin kambing falek matrar wale, mtrot wale, fe hra bo molot fe kya okom mkerek. Mde kya matrar okom msadak, mbakya kahet anggur okom. 38 Twok anggur maifi nolio kayi mse kya maifi.
39 Mahin na yto yaha twok anggur maifim, fe hra yoko lokdi deri twok anggur mahmat om, yto mwas. Ofo yaha yoko kla anggur maifim, mabe yto: ‘Twok anggur mahmat okom mwas mewer kat.’ ”