Klebet Wafleu Wto Wwien Kein Yesus
4:1-13
(Mat. 4:1-11; Mrk. 1:12-13)
4
Hra oko fo Yesus whon fe Nago Wawua hra Makohok om msisik mak wabri mde, wahinti kat kla Yordan. Mde Nago Wawua om mkororo wain wse samdi drot ra, wi domri. 2 Wase wak ra fo Klebet Wafleu whok waka wrana dienen adit ni se bo wlolot Yesus wsiok ni yisgia, mahin mdain. Wase amuk na lak yeigi tirik, wat dait ni eit om mrem, kayi de wkatot wtiblie.3 Mde le ke fo, Klebet Wafle ou waka wwien kein ou wto: “Nen nke nto nabe wet Allah wfe ofo, nbahe amak kom mabe roti se nat!” 4 Mahin Yesus wada wto: “Mak Katik Fari mrana mto, ‘Mabe deri ni eit om mres fo na tkoin ou wron dait.’ Mak Katik Fari Makohok om mrana mde le ko.”
5 Mde Klebet Wafleu wsria ou wse wi mayehet mrem ofo, wkakniet tamli kat ro kat na sa kadio ei yidien yfe ni warok ei yin ou. 6 Ou wrana man ou wto: “Nhot wale na sa eke yidien yfe fle kohok? Bo tet thnak yin nen nkamti kadio kat. Tet tke le ma nai yhnak wale tkain kadio kat, mde thnak kahet oli yin na man sio wkamti. 7 Yo oma, nen nto nbatoko nteit, nsaesik man tet, ofo tet thnak kadio kat yin nen nkamti.”
8 Mahin Yesus wada wto: “Mak Katik Fari makohok nai ysroin yto: ‘Nsaesik man deri nfe Sma Allah, ni wat yila, nsiswain deri le man ou.’ Mak Katik Fari makohok om mrana mde le ko.”
9 Mde Klebet Wafleu watik la yein yse Yerusalem, yse Nago wfe Bol Kohok Mres om mlie wasa ago, ofo wbahe wto: “Yo oma, nen nke nto nabe wet Nago Allah wfe ofo, nen nkahri nti nse fobi aiti! 10 Wa nai ysroin krek wale mak Katik Fari Makohok om mto: ‘Allah bo wbahe wfe wedla malaikat ei ysmit lien homo-homo nen, 11 bo yna siowo yslon wayen nen, se bo nteit yba dait yse amak.’ ” 12 Mahin Yesus whar kat wto: “Hau! Nai ysroin wale mak Katik Fari Makohok om mrana mto: ‘Nnok deri nbahe dienen amot nen nfe Sma Nago Allah ou wala! Nbahe satias amot nto Nago wsiok ni mrem, wyen hata mabe Ou wkaka nen.’ Mak Katik Fari makohok om mrana mde le ko.”
13 Klebet Wafleu wbahe lolot wwien kein adit ni warok eke yin Yesus kayi de yfot, yehin Yesus wdain, wsiok dait ni eke. Mde Klebet Wafleu wahinti kat ou, wto wleli kein oli basak kdie.
Yesus Wsalit Oli Wse Galilea
4:14-15
(Mat. 4:12-17; Mrk. 1:14-15)
14 Sba oko fo Yesus wsalit oli wse Galilea, ofo Nago Wawua hra Makohok om mkororo, mkanas mkamti ou. Nai yrana tar-tar man na marok Yesus wfe bot om main siar mse wi katak kadio kat. 15 Ou wkakniet ni wak na yfe bol sikafit wat-wat ei yik kampung wat-wat ei yrok, mde na marok ei ytalan ytiksi ou.
Na Nazaret Ywain Kat Yesus
4:16-30
(Mat. 13:53-58; Mrk. 6:1-6)
16 Mde ou wsalit oli wse kota Nazaret, wi hra wkan kya he wasem. Tali Sabat fo, (ou) wain wse bol sikafit wak oko, mde hra wsiok sawuan lokdi. Wak oko fo, ou wkro wabe wto wsmit lien wbaca ni mre mahin Katik Fari Makohok. 17 Na dihan ou whnak man ou katik fari malolok Nabi Yesaya wfem. Ou wtiot not katik fari malolok om, wdihar kayi de ayat mrei. Ofo wbaca salo fle mahin ayat man hra yrana yto:
18 “Sma Nago ou Wawua om mfla mkororo tet.
Nago Allah ou wlouk helwain wale tet tabe trana siar giet mabot om man nai yibhait.
Nago wbahe tet trana siar mabe:
19 Ou bo wkothok kat nai yehinti kat wi mahirit.
Na ysibra, Ou bo weren yhot oli ni.
Na hra na ykait eye, ysiok sgia man ei fo,
Ou weren kaka, se bo ymnet ybot oli.
Ou wbahe tet taka trana siar twa giet mabe
mayi fe der hra oko fo,
Sma Nago bo whnak hares man kamyi kat wfe nai.” a
20 Mde Yesus wkololok katik fari okom maka, whnak oli mse na dihan ou wak, ofo wleli oli mabe wrana wkakniet nib yin na marok hra yik bol sikafit okom. Yoso fo, ygiele ysmit saswain ou. 21 Mde Yesus wrana man ei wto: “Hra ke fo, ayat ei hra nan noso tet tbaca firi wale okom, yhok ytatol yin tet.”
22 Na marok ysamenie fe ou, yteit rioro fe wrana ni ybot. Mahin, wrana sonat ni mde mak kdie bri ofo, ydanhok sablit om mwat, ykan yto: “Aa, mde sie ma wet Yusuf le wrana ni ybot kei? Bo wabe na tkoin deri.”
23 Mde Yesus wto man ei wto: “Tet tnok wale nan nsablit okom. Bo nan nklat kayi flet mre wan tet, nto: ‘Woi dokter, nweyen la na mna nen!’ Mde nan nnok fot mak nibri nto, ‘Mam moso ni hra nen nsiok owuok-awak wale yik Kapernaum, ofo nsiok oli yik ko, wi nen na hra kom, se mam mhot, mten mkaso man tnes nen.’”
24 Mahin Yesus wrana wto: “Tet trana toron kat man nan mabe, na tmak nabi Nago wfe mre hra wsalit oli wse wi ou wa, ofo nai yoso rorowain dait ou, ysamenie fe dait ou, ei yorsfe-fa ykan bren kat deri ou. c 25 Kamuolo anggait, na tmak nabi mreu wkedi le Elia ou wase. Elia ou wase fo, tolo katot fle whok, watsi fobi katak. Melin fleu wase der tolik watau. Mde na dli semit marok ei yik fobi wat-wat ei, yhlet katot fe ni eit dait. d 26 Mahin tet trana toron kat man nan tto, Nago wbahe Elia wabe dait wain wse semit yrok ei yik na mna fobi Israel. Wain dait wan ei ha, Nago wbahe wain tiktol deri wse semit na sa wat mrem, hra mase mak kota Sarfat, fobi Sidon. Wain dait wse na mna na sa Israel. 27 Mde fot le kamuolo anggait, na tmak nabi Nago Allah wfe mre wat Elisa ou wase. Elisa wase ofo, na mna na sa Israel marok ykaini ni kaini obo. Ykaini kayi ni kaini obo mahin, na sa Israel marok kadio kat ekei Nago wweyen dait. Wweyen tiktol deri na sa wat mreu wkedi le Naaman, na sa wat wahin fobi Siria ou, Nago wweyen wfe ni kaini obo om.” e
28 Yoso kadio kat ni hra Yesus wrana mde le ke ofo, na hra yleli yik bol sikafit ytrere kadio kat ou. 29 Mde yto yidien sgia ou, ysidik yehin, ywain kat Yesus whokti kat wahin kota okom. Ei yotik wain wse kdier sfa wasa wtefit ana, ynok yto bo yna kaf kat wti wse kdier elek wolo aiti. 30 Mahin, Yesus wain flalie fe bri, wahinti kat wata ei.
Yesus Wwain Kat Klebet Wayaka Wahin Na Kapernaum
4:31-37
(Mrk. 1:21-28)
31 Mde Yesus wain oli wse kroja Kapernaum, kampung hra mak kota propinsi Galilea. Wadien tali Sabat fo, wrana wkakniet ni mak bol sikafit man na marok. 32 Mahin oko fo, ei yoso ou wrana ni ofo, yteit yrioro, fe hra wrana wde le na waslonti na. f
33 Wak bol sikafit oko fo, na mreu klebet wasgia wloit wale wse wabri. Na oko wkader wkanas kat. 34 Wto, “Woi Yesus, na Nazaret nen, bo nsiok ni mit ma yin mam mke? Nen naka mabe nsiok sgia kat mam afe? Tet tnok wale nen nke, nabe na wakohok hra Nago Allah wbahe nen naka nse fobi ko.”
35 Yesus wbahe sros kat klebet oko whok kat wto, “Nsatmor! Nhok nahin na ou wabri!” Ofo klebet wti fali na ou wse fobi, wak na hra marok ysifuon aiti, mde klebet whok kat wahin na ou, mahin wsiok waheit wklis dait.
36 Na marok hra yik ekei, yteit yrioro, ysalit yrana ni frit-frat yin yanak man ei yto: “Woi, ni hra Yesus wrana ei ybot kamyi kat. Wde le na waslonti na ou, mde le wabri mhon fe fle. Wbahe klebet hra yiyaka ei yhok, ofo yhok kat.”
37 Mde nai yrana tar-tar ni hra Yesus wsiok ei yik fobi oko mkohli kadio kat.
Yesus Weren Kat Simon Waris Madlim Yidien Fot Na Wat Marok Ei
4:38-41
(Mat. 8:14-17; Mrk. 1:29-34)
38 Tali Sabat man kdie oli fo, Yesus wloit wse bol sikafit, wkakniet ni Nago wfe yin na ei. Wdain fo, ou whok wahinti kat bol sikafit okom, wain wse ou wfe wedla Simon wfe bol. Hra oko fo, Simon waris om mkaini, mkan tbat kamyi kat, mde ei ywaini Yesus waka wweyen om. 39 Ofo ou wain wse wi hra Simon waris mase om, wwain kat mkan tbat om mdain. Mde om msidik sros kat, maka mdihan ei mhnak ni eit fe ei.
40 Na marok yik kota ei yleli bhas wat-wat yik bol ei yi, ysiok skakerek dait ni kayi de mkdia siwit kat, tali mto msrik, tali Sabat makohok om mewer wale. Mde ei yidien twa yanak hra ykaini ni kaini heit-hat, yka yse Yesus wak. Mde Yesus wlak wna fe mres-mres, de weren kadio kat ei yehin ni kaini hra ei ykain. 41 Klebet ei yhokti kat fot yehin na marok. Klebet ei yhlein tiwain yto: “Nen nke Nago Wfe Wet nen!” Mahin Yesus whar kat ei wto ysatmor, yrana dait ni hra ynok. Fe [ei] ynok ou le ma wabe Kristus, Raja Waeren Kaka Nai.
Yesus Wahin Oko Wain Wrana Nago wfe Giet Mabot
4:42-44
(Mrk. 1:35-39)
42 Wade kat, tali mska sonat mak fobi kom, Yesus whok wahin kampung Kapernaum, wain wse wi domri wabe wsikafit. Mahin na marok yein ydihar wain ou. Yrana skatias man ou yto wahinti kat dait ei. 43 Mahin ou waha waheit, wto, “Tet tain tse wi wat-wat mrei, trana giet mabot mabe Nago wslonti nai yibri, taheit dait tak deri ko. Mabe Nago wbahe wale tet taka tse fobi kom, se bo trana fe man na marok.” 44 Yesus wain wrana lis-lis kawuak giet okom wak bol sikafit wat-wat ei yibri, wrana man na marok mak kadio kat fobi Yudea.