Yohanes Wasrik Kat Kla Fe Nai
3:1-20
(Mat. 3:1-12; Mrk. 1:1-8; Yoh. 1:19-28)
3
Mde Nago Allah wrana wfe giet om man Yohanes. Nago wrana wfe giet om man Yohanes mtatol madien der hra raja Kaisar Tiberius wslonti wale fobi katak Romawi wase wale der yahar teit mahot (15). Madien oko fo, Pontius Pilatus wabe gubernur wak fobi Yudea. Raja Herodesa wslonti fobi Galilea, waliwet Filipus wslonti fobi Iturea madien Trakhonitis. Lisanias wslonti fobi Abilene. 2 Mak kota Yerusalem, Hanas wadien Kayafas la ysiokti ni yibe imam yifle yibe agama Yahudi.Mtatol madien na kadio ekei yslonti yfe wi mde, Nago Allah wrana wfe giet om man Yohanes. Yohanes le ma Zakharia wfe wet ou, wase wak na wi samdi. 3 Mde Yohanes wain kohli fobi yitaren kla Yordan ou, wrana giet mahin Allah wak. Ofo wsalo kaf kat wto: “Nlelek, nehinti kat nan nfe satian ei. Nket toron kat, ofo nhnak la nkan om man tet tsrik kat kla fem, se bo Allah wyan kat nan nfe satian ei ydain!” 4 Mde kayi hra nabi Yesaya wsroin wale mak katik fari mto:
“Na oko wak fobi samdi wsalo kahradan wto:
‘Nsiok kein fan man Sma Nago,
Nkotrot la fan man ou.
5 Wi hra ykedi lolik-lalak, nlak tatik yse ago.
Wi safik sa yta riere-rara, nkak kat yse aiti.
Fan ykedi ywok-wak, nsat nkotrot.
Fan ykedi fik-fak, nsiok yenes kat.
6 Se bo na kadio kat yik fobi katak ei, yhot tnes
na hra bo Allah wteye wabe weren kaka nai.’ ”
7 Mde na marok ei ysiolok yse Yohanes wak, se bo ou wsrik kat ei yidien kla. Mde Yohanes wrana man na mrei yehin ei yik wto: “Hyee, nan nke nai yto boisi nan nibe na ybot ha nan nyaka, nde le lua soko wak fan ei. Tet tto: Nan nket wata nehin nan nfe ni ysgia ei. Mto mdain fo, nto nan nka deri nto tet tsrik kat kla fe nan, nan nket dait, bo Allah whirit wata nan nin kafir maflem. 8 Yo, nan nket homo-homo sok, nehinti kat nan nfe satian ei, nsiok ni ybot-bot deri. Nan nto dait amot nto, ‘Bo basak Allah whirit dait mam, fe hra mam mate kokos le Abraham ou, mam mate kokos ei yibe Allah wfe nai. Mde mam mibe fot Allah wfe nai.’ Mahin tet trana man nan mabe, mto nan nket dait nsiok dait ni ybot, ofo Allah wnok dait nan, nan nibe dait Ou wfe nai. Mde hra Ou wrana giet fo nan noso dait, amak le man kei wsiok kahet wata yibe Abraham wbiti wbla wtakein yifi ydanhok nan. 9 Tmak madan mak wale wkoit mteit molo aiti. Wkoit kadio hra ykan dait ei, bo Allah wala kat, wladet kadio, wago kat yse sala mdhen.”
10 Mahin na marok om yefitwain yto: “Mto mde ke fo, bo mam msiok ni mit ma om?”
11 Mde Yohanes wfalas wto: “Na man hra wkain not trik lak ofo, whnak mrem man wanak hra wdain kat not trik. Yo, na man hra wkain ni eit, ofo wkoriet mre yin wanak man hra wdain ni eit.”
12 Mde na hra ykein blasten ei yka yibe Yohanes wsrik kat kla fei. Mde yefitwain man ou yto: “Guru, ni mit ma mam msiok ei?”
13 Ofo ou wto: “Nwien yewer dait yehin hra pemerinta ykerek sadir fe pitis ytatol lokdi wale.”
14 Mde na sae kahat mre yefitwain man ou yto: “Se bo mam mde sie? Msiok mit ma ei?”
Ou wto: “Nan nsadir skatias fe amot na man ei yei yi pitis yi mala! Nan nadon dienen dait na man ei yila! Nsi fle buon amot na man ei yfe pitis ei yila! Ha, nkain wale ni hra nsiok ei ytatol.”
15 Hra oko fo na marok ei ynok tmol yik yibri ra yto: “Bo Yohanes oko walbat wabe raja wafle Kristus ou hra faf fleli kein ou, afe?”
16 Mde Yohanes wrana hatot man ei wto: “Tet tdain, ha, tet tsrik kat deri kla fe nan. Yo, basak sba na mreu waka, wsrik kat nan nidien Nago Wawua om Makohok om, madien fot sala madhen. Ou eke wfle wewer kat wahin tet. Tet ttol dait Ou. Tet ttol dait mabe tet ttli kat sayi dait wfe sepatu ei.”
17 Yohanes wrana oli flet wto, “Ou eke wkro wak wi ma badiak gandum, wslon wfe riak garpu maflem mak wna, mde wkoriak wbatet gandum yse ago. Yfalek ei foron wkafe kat yti yse tlein, ha yfuon yti yiheit yik wi badiak. Yka fo, wlak hao wse hate, mahin yfalek ei wladet kat yse sala hra mdhen lis kawuak, maigi dait.”
18 Mde le eke, Yohanes wska ojin heit-hat yin na marok, wrana tahak kat giet mabot man ei.
19 Hra oko fo Yohanes whar kat Herodes, raja fobi Galilea. Whar kat wabe ni warok hra ou wsiok sgia ei, mde kayi le ou wlouk kat sayi waliwet wsmian Herodiana om maka, wsmian kayim. 20 Mde Herodes wtrere wsiok kafir masgia mre oli, o le ma whirit Yohanes wse bui mabri ra.
Nago Watik Kein Yesus Wabe Wfe Wet
3:21-22
(Mat. 3:13-17; Mrk. 1:9-11; Yoh. 1:32-34)
21 Yohanes wsrik kat sonat na marok om, ofo Yesus waka, mde Yohanes wsrik kat fot ou. Oko fo Yesus wsikafit sonat, mde yik ou wfla wtariet. 22 Mde Nago Wawuam hra Makohok Kat om, mais msilok mde le klen okles mhri mleli mak ou wak. Ofo Nago wsalo mhok mahin yik ago mto: “Ahe! Nen nke le ma tfe wet nen! Tet tabri om man nen, tkashok kamyi kat fe nen!”
Yesus Wate Kokos Wai
3:23-38
(Mat. 1:1-17)
23 Hra oko fo Yesus wase wale bo mal kayi der 30 (na mre waigi whri na wna yahar), ofo wteik mabe wsiok sayen ni. Na marok kadio kat yto bosi Yusuf wfe wet le ou. Yesus wate kokos le mke:
Yusuf wono le ma Eli, 24 Eli wono le ma Matat, Matat wono le ma Lewi, Lewi wono le ma Malkhi, Malkhi wono le ma Yanai, Yanai wono le ma Yusuf, 25 Yusuf wono le ma Matica, Matica wono le ma Amos, Amos wono le ma Nahum, Nahum wono le ma Hesli, Hesli wono le ma Nagai, 26 Nagai wono le ma Maat, Maat wono le ma Matica, Matica wono le ma Simei, Simei wono le ma Yosekh, Yosekh wono le ma Yoda, 27 Yoda wono le ma Yohanan, Yohanan wono le ma Resa, Resa wono le ma Zerubabel, Zerubabel wono le ma Sealtiel, Sealtiel wono le ma Neri, 28 Neri wono le ma Malkhi, Malkhi wono le ma Adi, Adi wono le ma Kosam, Kosam wono le ma Elmadam, Elmadam wono le ma Er, 29 Er wono le ma Yesua, Yesua wono le ma Eliezer, Eliezer wono le ma Yorim, Yorim wono le ma Matat, Matat wono le ma Lewi, 30 Lewi wono le ma Simeon, Simeon wono le ma Yehuda, Yehuda wono le ma Yusuf, Yusuf wono le ma Yonam, Yonam wono le ma Elyakim, 31 Elyakim wono le ma Melea, Melea wono le ma Mina, Mina wono le ma Matata, Matata wono le ma Natan, Natan wono le ma Daud, 32 Daud wono le ma Isai, Isai wono le ma Obed, Obed wono le ma Boas, Boas wono le ma Salmon, Salmon wono le ma Nahason, 33 Nahason wono le ma Aminadab, Aminadab wono le ma Admin, Admin wono le ma Arni, Arni wono le ma Hezron, Hezron wono le ma Peres, Peres wono le ma Yehuda, 34 Yehuda wono le ma Yakub, Yakub wono le ma Ishak, Ishak wono le ma Abraham, Abraham wono le ma Terah, Terah wono le ma Nahor, 35 Nahor wono le ma Serug, Serug wono le ma Rehu, Rehu wono le ma Peleg, Peleg wono le ma Eber, Eber wono le ma Salmon, 36 Salmon wono le ma Kenan, Kenan wono le ma Arpakhsad, Arpakhsad wono le ma Sem, Sem wono le ma Nuh, Nuh wono le ma Lamekh, 37 Lamekh wono le ma Metusalah, Metusalah wono le ma Henokh, Henokh wono le ma Yared, Yared wono le ma Mahalaleel, Mahalaleel wono le ma Kenan, 38 Kenan wono le ma Enos, Enos wono le ma Set, Set wono le ma Adam, Adam wono le ma Nago Allah hra wafik ou wabe na tkoin.