Ysois Yesus
2:1-7
(Mat. 1:18-25)
2
Hra oko fo Kaisar Agustus wabe na wafle wkamti fobi Romawi. Mde wbahe nai yaher na kadio kat yik fobi katak Roma, ysroin kadio nai ykedi se bo yklat blasten. 2 (Na yaher na okom o le ma na yaher na masayen kat mak propinsi Siria, ofo Yudea om mloit fot. Na yaher na yidien kamuolo Kirenius wabe gubernur wak Siria.) 3 O le ma na kadio yein ysalit wat-wat yse kampung yate kokos ei yi, yibe nai ysroin ykedi yik ana.4 Mde Yusuf wsalit wahin kota Nazaret hra mak fobi Galilea, wain wse fobi Yudea, wse ou wa kota ou wa Betlehem, hra mkedi fot mabe kota Raja Daud, fe hra kamuolo Yusuf wbla Daud wkafifa le mkom. 5 O le ma Yusuf wadien wkowahe Maria, la yein sisi yse Betlehem yibe nai ysroin la ykedi, yklat blasten ei yi yik oko. [Yusuf wala wale kwat mahin, wkowahe sonat om, yese sisi dait sonat.] Hra oko fo Maria mkmat ou wfle wale, mataren mabe msois.
6 Ei yhok wale yik oko ofo, Maria mkedi koko mabe msois. 7 Mde msois sros kayi wet wadlau, wet waflesa mres. Wet ou om mhobor wadien not kabor, ofo mlo wase wak ni hra ni ror yeit ni eit fe om. Mabe ei ytatiere fe dait wi hra na tkoin yese mrem.
Malaikat Wrana Twa Fe Yesus Kristus Wemem Msois Ou
2:8-20 [SGM: 2:8-12, 16, 20]
8 Amuk hra oko fo, na yiror kambing domba mre yese taban sisi fali yfe ni ror yik sanwat hra yitaren kota. Ysmit lien samne-mna yfe ni ror ekei. 9 Mde yrioro fe ro kat fo, Sma Nago wfe wedla bahe malaikat mres ou wyen hata wkan om man ei, ofo Sma Nago wfe fle kohok malais kat mnarak, mhanak ei, ofo ei yeliek kamyi kat. 10 Mahin wedla bahe malaikat ou wto: “Nan neliek amot! Tet tke taka tatik giet mabot man nan, giet hra mhnak kashok fe na tkoin marok kadio kat. 11 Amuk hra ke ko, na mre msois wet wahen mreu wak kota Betlehem, kota hra kamuolo Daud wase om. Ou ekei wabe Sma Kristus, Na Wafle hra Allah wlouk helwain wale wabe waka weren kaka na tkoin nan. 12 Ni eke yibe kyat fe yin nan: Bo nan nein ntatiere fe wet hen mreu, nai yhobor ykohli wadien not, ylak wase wak wi malak ni eit ni ror yfem. Nto nhot ni eke, ofo nan nnok sros kat ou le wko.”
13 Allah wfe wedla bahe malaikat okou wrana ni mfot fo, nai yror ni ei yiwua main kat, yhot ro kat fo Allah wfe wedla bahe yrok karmiak kat yehin wi mayehet ago yyen hata ykan ei, yhdin Allah yto:
14 “Nai fe na Nago Allah!
Mam mtalan mtiksi Nen nak wi mayehet ago!
Mak fobi oko, bo ble mbot
man na tkoin hra Nago wkashok fei.”
15 Yfot sba fo, Allah wfe na bahe malaikat yrok ekei yehinti kat ei, ysalit oli yse wi mayehet ago. Mde na yiror ni ror ekei, man ei yto man yanak ei yto: “Nka, faf fein fse Betlehem, fhot la ni hra yhok yik ale, yde kayi hra Sma Nago wrana yin faf ekei.”
16 Mde ei ysidik tamli yein, ytatiere fe Maria madien Yusuf, yhot fot wet wahen hra wase wale wak ni hra ni ror yeit ni eit fe om. 17 Mde na hra yror ni ror ei, yrana hatot mabe ni hra malaikat wrana wale ei yin Maria madien Yusuf. Ofo yein yrana yin fot na kadio kat, fe ni kadio hra malaikat wrana fe wale yibe wet wahen okou. 18 Na marok yoso ni hra na yror ni ror yrana eke, mde ei yteit rioro kadio kat. 19 Mahin Maria om moso ni ekei, yehin mtelek yse mabri aiti, mnok feya deri. 20 Na yror ni ror eke ysalit oli yidien ykashok ysrar heyit man Nago Allah, mabe ni kadio hra ei yoso yhot ekei. Fe hra ni eke yhok ytatol kayi yidien ni hra Nago wfe na bahe malaikat wrana wale man ei.
Ywak Wkedi
2:21
21 Wase wale amuk mtadolik fo, wet okou nai ybrein, ofo ei ywak wkedi mabe Yesus, wtatol wadien kedi hra kaman Nago Allah wfe wedla bahe malaikat ou wwak krek wale wak wemem mkmat.
Yhnak Wse Allah Wak Wfe Bol Kohok Mak Yerusalem
2:22-40 [SGM 2:25-31]
22 Mde yiheit yik deri bol ei yi kayi de amuk na lak yeigi yfot sbaa. Yiheit ytatol kayi yidien ojin Taurat Musa wfem. Amuk na lak yeigi yfot sba fo, yidien twa wet wse kota Yerusalem, yse Allah wfe Bol Kohok Mres om. Yein yibe yhnak wet ou wse Nago Allah Ou wak. 23 Mde kayi nai ysroin wale mak Ojin Taurat Sma wfem: “Wet kadio kat yiflesa ekei yibe wet Nago wfe, ofo nhnak tiktol wata yin Nago.” 24 Ei yhnak fot sanfe fe ytatol yidien giet Ojin Sma wfem, o le ma klen tekukur lak afe klen okles lak le nai ywit yto merpati.
25 Madien hra oko fo, na mre wkedi le Simeon, wase wak kota Yerusalem. Ou eke na wabri mbot, ou waliak man Nago, wleli kein ni hra Nago wkadoin wto wteye Raja Waeren Kaka na sa Israel. Nago Wawua hra Makohok om madien sisi Simeon. 26 Nago Wawua om mrana fe wale mabe Simeon bo waigi dait kawuak de, whot sba na hra Nago wlouk helwain waka wabe weren kaka na tkoin. Sba fo se waigi. 27 Mde hra ke ko fo, Nago Wawua om mkororo Simeon wtrik wse Bol Kohok Nago Wfem. Yusuf wadien Maria yloit kmo yotik wet hen Yesus, yibe ni hra ytatol yidien ojin Musa wfem. 28 Mde Simeon wlouk wet oko waka, wafan wak wkmuon, ofo whdin man Nago Allah. Wto,
29 “Ahe Na Wafle Nago, Nen nfe giet om mtatol wale!
Ni hra Nen nrana nkadoin om, Nen nsiok walem.
Mde nliokeit wata nfe na dihan tet taigi tadien tbot-bot deri.
30 Wabe tet tsifuon kei yhot tnes wale na okou,
na hra Nen nrana nkadoin wale
waka wabe weren kaka na tkoin mam,
31 ou le hra Nen nlak kein krek wale wan na sa kadio kat.
32 Ou eke wabe nfe sitin wa hanak fan
se bo na sa wat-wat ei yka yse Nago Allah Nen nak.
Ou le wfe he nai yhdin fot Nen nfe na sa Israel mam mkei.” b
33 Mde Yesus wono wadien wemem yiwua main fe ni kadio kat hra Simeon wrana yin Ou ei. 34 Mde Simeon whnak fle fe ei, ofo wto man Maria wto: “Tet tto toron kat, wet kou Nago Allah wlouk helwain wale. Basak ou wolot fe na sa Israel marok ei, mrei man ei yti, ha mre man ei ysidik. Ou wabe kyat wahin Nago Allah wak, wkaheit ni hra Nago waisi fe yin na wat wata, mahin na marok om bo yhar kat ou. 35 Ou bo wkofla nai ysablit, hra yibri ybot fot, hra yibri ysgia fot, se bo na marok bo yhot kadio kat. Yee, nen nnok deri basak na mna nen nabri om mtra fe nhot nai yidien sgia wet ou, mde kayi le mnian lis hra bo mskalit nen nabri om.”
36 Mak fot oko nabic madli mrem mkedi le Hana. Mono le Fanuel wahin na sa Asyer. Msmian yese der mtalak ofo waigi, ofo maheit mabe semit. 37 Hana om mtrar mase wale der na hat yeigi whri na wna hat (84). Om mahinti kat dait kat Bol Kohok Nago wfem madien amuk tali msikafit ta-ta kawuak. 38 Mahin hra oko Hana maka, mhok mak Yusuf wadien Maria la yik, ofo mtiksi Nago Allah. Mde mrana hatot mabe wet okou wan na marok kadio kat hra ywade kein wale Nago bo waka wskalofos wfe na yik Yerusalem.
39 Yusuf wadien Maria la ysiok kadio kat sba ni ytatol yidien Ojin Taurat ekei ydain fo, ysalit oli yse krotia ei yi Nazaret, hra mak fobi Galilea. 40 Wet okou wfle, wkanas. Wsablit mhron, wnok ni, ofo Nago wkashok fe kawuak Ou.
Yesus wase der yahar teit lak
2:41-52
41 Der man o, der man o, Yesus wfe na trar ei yein ta-ta kawuak yse kota Yerusalem yibe Konon Paskah ou. [Konon Paskah o le ma hra Nago Allah wbahe na Yahudi ysiok yibe ynok tmol kamuolo, Ou wko thok kat yate kokos yehinti kat fobi Mesir. Kamuolo yate kokos yibe kawor yik fobi Mesir, na Mesir ei ysiok sgia ei. Mde Nago wko thok kat yehin fobi Mesir, ofo ynok tmol lis mabe Konon Paskah.]
42 Hra oko fo, Yesus wase wale der yahar teit lak ofo wadien weme wono ei yein sisi yse Yerusalem. Yein yibe ysiok Konon Paskah, yde hra na Yahudi ysiok lokdi wale. 43 Konon oko wdain fo, mde weme wono ysalit oli mahin, ynok dait yehin ti kat samne Yesus waheit wak Yerusalem. 44 Ynok yto bosi ou wain sisi wale wanak man hra yelin ei. Mde ei yein fan om tali mres mde ydihar kmo ou yhot dait, wadien dait yanak yai yihano yiliwet yai. 45 Yhot dait ou wde, tali ma lak fe ysalit oli yse Yerusalem yibe ydihar ou. 46 Tali tolik fe ofo yhot tnes ou wak sdiefta Bol Kohok Nago Wfem. Ou wleli wadien guru agama yibe woso kmiet ni hra yrana ei, yidien wefitwain fot ni yin ei. 47 Mde na marok hra yoso Ou wrana ni kei yiwua main kat, fe wsablit mroro karmiak kat. Guru agama ei yefitwain fot Ou mde wnok ni. 48 Na trar ei yhot Ou mde, yiwua main kat. Mde weme om mto man Ou mto: “Tfe wet, nen nsiok buon ni ke yibe? Nono wadien neme tet la mam msidihar Nen kayi de mkliowo kat le mkei!”
49 Yesus wada wto: “Hra la nan ndihar Tet tabe? Hra la nan nnok dait Tet tleli kayi tak bol Tono wfe kom?” 50 Mahin ei ynok rorowain dait ni hra Yesus wrana man ei. 51 Ofo Ou wadien sisi oli ei ysalit yse krotia Nazaret, mde woso wyo ti ojin hra weme madien wono lai yrana ei. Yesus wemem myo ti kadio kat ni kei yik mabri ra.
52 Mde Yesus wsidik wfori wfle, wsiafolo. Tali man om tali man om, Nago wkashok fe wadien na tkoin ykashok fe ou.