Nago Wawua Makohok Om Maka Madien Tali Pentakosta
2:1-13
2
Mayi fe tali Pentakostaa fo, Yesus wfe wedla wedli ei ybalifis yleli yife mres.b
2 Yleli samne mde yrioro fe ro kat fo, yoso ni mhi mde le safar fleu, mais mahin yik ago, mkauu msiok kohliowo kat bol hra ei yleli om. 3 Mde ei yhot ro kat fo ni mde hra sala mdhen, msa klen nok mhriak mleli wat-wat mak ei ysa kadio kat. 4 Oko fo Nago Wawua Makohok om msisik ei yikan kadio kat, mde ei ysidik yrana ni yidien na sa wat-wat ysalo ei yi, fe le hra Ou Wawua om mkororo ei.
5 Hra oko fo na Yahudi yehin fobi kadio kat yik fobi katak, yehin yik wolo, tali wolo, yka yklat lili, yese yik Yerusalem, mabe ysaesik man Nago wak. 6 Mhi om mais ro kat fo, na marok om miyo kadio kat, yren fe Yesus wfe wedla wedli ei. Mde ei ykahiowain kat fe hra na man ou woso ei yrana ni yidien ou wsalo ou wa, na wat kdie man ei yoso fot ei yrana ni yidien ei ysalo ei yi. 7 Ei yikan kadio kat ykan mtaret, yiwua main kat, mde ei yto: “Hei, nan noso la? Na angkei na Galilea kadio kat. 8 Bo mde sie ma hra faf foso wat-wat ei yrana ni yidien salo faf fi hra faf fnok lokdi mak fobi faf fi ei? 9 Faf fikan kadio kat hra kei, mre yehin Partia, mre yehin Media, mre yehin Elam; mre yibe na fobi Mesopotamia, mre yibe na Yudea yehin deri fobi ko, mre yibe na Kapadokia, mre na Pontus, mre fot na Asia; 10 mre yehin Frigia yo, Pamfilia yo, Mesir yo; mre yehin fobi katak Libia, mbiya hra mataren madien Kirene, mre ytfoi yehin Roma 11 (na Yahudi toto, yidien fot na sa wat-wat hra ytrik wale yse agama Yahudi faf fi, yibe na Yahudi tbak); na Kreta yo, na Arab yo – faf fikan kadio kat foso wat-wat ei yrana ni yidien ysalo faf fi, yrana fe ni owuok-awak warok hra Nago wsiok!” 12 Mde yikan ekei ytmayes, ykahiowain kat, ofo ei yefitwain frit-frat man ei yto: “Ni mit ma mhok angkei om, mfe he ei ysalo msadiak madien faf salo faf fi ekei? Ofo bo faf fde sie?”
13 Mahin na mrei ytbekein yto: “Hyee, na angkei ymsit uwade, fe hra ei yoko twok anggur karmiak kat!”
Petrus Wrana Ni Wto Yesus Wabe Mesias
2:14-40
14 Mde Petrus wsidik wahin wkro wadien rasulc yahar teit mre ei, mde wsalo mkayehet, mfle kat man na marok ei wto: “Nai fe na table na Yahudi nan, nidien fot nan nikan kadio kat hra nan nese nik Yerusalem kom, noso kmiet roro wain la tet trana tahak fe ni ko man nan. 15 Nan nnok bosi nto na ke ymsit, aa? Mdain! Ei ymsit dait! Tali mkedi mtanhat kmo le mkom! Na mre ymsit dait yidien uwade ko!
16 Hau. Ni warok hra yhok eke Nago wrana krek wale madien kamuolo kat main fe nabi Yoel. Ou wrana wto,
17 ‘Basak dian, fobi mkahlia kat fo,
Tet tke bo tkolihet Tet Tawua kom msisik man na tkoin ei yibri.
Mde nan nfe wet yidlai yidli bo yrana kein yse na wat ni hra tet trana krek yin ei.
Nfe wedla fori sasia bo yhot ro kat ni hra tet tyen hata yin ei yhot,
yo, nfe na dla yitrar bo thnak ei yisamik fot ni yehin Tet tak.
18 Madien tolo kahlia kat oko, bo tet tolio kat Tawua om
man tfe na dla na dli ei,
ofo yrana kein ni yehin tet tak.
19 Tet bo tsiok ni owuok-awak yse yik ago,
tet tafik fot kyat heit-hat mak fobi aiti ko,
mde hra tsiok hen madien sala mdhen mhok-mhok, mbi mkodo, mfak fot marin.
20 Basak tali om mhanak oli dait, mmian deri.
Mok ou welek bo wlelek wde le hen.
Ni ekei yhok yelin sba fo, mayi fe Tuhan wfe tali makohok msariomon om mhok, tali man hra mfle masamsa karmiak kat, fe hra ou waka wabe wkerek sadir kahlia kat fe na tkoin kadio.
21 Mahin na man sie ma ykader kohok mse Tuhan wak, ofo ou weren kaka kayi ei, wsigi kat ei [yehinti kat satian ei yi] se bo yiron kadio.’ ”d
22 Mde Petrus wrana sba oli kdie man ei wto: “Table na sa Israel wa nan, noso la: Nago wnato wale Yesus, na Nazaret ou, wan nan. Main fe Yesus okou, Nago wafik wsiok heit-hat ni owuok-awak yrok yin nan. Ni eke nan nhot, nan nnok wale. 23 Nago wsiok mtatol mde hra kaman ou wsin wale, o le ma ou whnak na okou wse nan nik, mahin nan nidien na sa wat-wat hra ysaesik dait man Nago, nan nska wale ou, nbadan ou wse wkoit skarok se bo wkak.e 24 Mahin Nago wkosia ou wsidik wron oli, wsigi kat ou whok wahin wi maegi om. Ofo whlet oli dait ni mrem malmias man ou. Fe hra kafir eigi mkanas oli dait kat, mkeben eye dait deri ou.f 25 Madien kamuolo faf fbiti Daud wsroin mabe Yesus wrana wto:
‘Tet thot Tuhan Nago wak sawuan tbariomo.
Ou wkro wak tet tna tkoin wlolowain kayi tet,
se bo nai ykowiri-wara dait tet.
26 Mde ke fo, tabri om mkashok, tadel om msabaer mgirik, tteit ysrar heyit man Nago.
Tkan tkoin fot mase mbot-bot deri, morsfe mowuo kat mse Nago nen nak,
27 fe hra tet tnok kayi mabe basak nen nahinti kat dait tet taheit dait tak wi maegi om.
Nfe Na Wakohok Wlais Kat tet basak Nen nliokeit dait tet taheit tban tdeya tak hin bet aiti.
28 Nen nkakniet wale man tet fan mse wi maron.
Bo nen nsiok tet tabri om mkashok kamyi kat fe hra nen nadien lok-lok sawuan tet.’”g
29 Mde Petrus wrana skatiokot oli wto: “Table na sa Israel wa nan, tet trana tahak sros kat man nan mabe hra faf fbiti Daud ou waigi, ofo nai ykali wale wadien kamuolo. Ou wfe hin knawato mafe sonat faf fik ko, kawuak de hra ko. 30 Daud okou wabe raja, wabe fot nabi, o le ma na man hra woso sros kat ni yehin Nago wak ofo wrana kein oli yse na wat. Mde ke fo, ou wnok wale mabe Nago wfafti krek man ou, wto: ‘Basak Nago tet tkosia ntakein mreu wleli wak nen nfe takhta, wabe raja wdanhok wan nen.’h 31 Madien kamuolo kat, Daud wnok krek wale ni hra basak yka, ofo ou wrana krek mabe Kristus, na Mesias ou,i wabe basak wsidik wron oli. Nago wahinti kat dait Yesus ou waheit wak wi maegi om mdain, wliokeit dait ou wkan tkoin om mtra mban dait mak hin ale. 32 Ha, Nago wkosia kat wale Yesus okou wsidik wron oli. O le ma mam mhot wale, ofo mam miheit mrana wain. 33 Yesus wron oli fo, Wono Nago wkosia kat ou warin wsalit oli wse ou wak wi mayehet ago, ofo whnak fle kohok karmiak kat man ou wabe na wafle hra wleli wak Wono wna tkoin. Yesus le ma wwien fien wale Wono Wawua Makohok om hra Wono wkadoin fe wale, maka fo, wolio kat oli man mam. O le ma hra nan noso nhot kmo le mkom. 34 Yo, na mna Daud ou warin dait wse wi mayehet ago, ha, ou wrana deri wto:
‘Tuhan Nago wrana man tet tfe Tuhan ou wto:
35 “Naka, nleli sisi nadien Tet nak Tet tna tkoin, nak wi makohok masariomon kom,
kayi de Tet tsiok nen nfe kaisin ei ykatawok ysamorik yse nen nteit olo aiti, ofo nen nteit eye kawuak ei yidioro ei.”’j
36 Mde ke fo, na Israel kadio kat nan, nnok toron kat fe hra Yesus okou, hra nan nskarok wale ou, Nago le wbetok ou wabe Tuhan, wabe fot Kristus,k Raja Wafle Hra Wskalofos Fien Nai.”
37 Petrus wrana kahlia kat ni ofo na hra yoso ni ekei ybakoko, yibri om mluwa kat, yimro fe Yesus hra nai yskau, ofo ei yefitwain man Petrus wadien wanak rasul man ei yto: “Table wa nan, bo mam mde sie? Se bo mam msiok ni mit ma ei?”
38 Petrus wrana tahak man ei wto: “Nan nikan kadio, nlelek, nket, nehinti kat nfe satian ei. Ofo nhnak wat-wat nkan ei yin mam msrik kat kla fei, main fe Yesus Kristus wkedi om. Nsiok nde ke fo, Nago bo wyan kat nfe satian ei ydain, ofo whnak Ou Wawua Makohok om man fot nan. 39 Ni kadoin mabe Nago Wawua Makohok om man nan, man fot nfe wet ei, ntakein ei, man fot na marok kadio kat hra yik sonat wi mkadlo – na kadio kat hra basak faf fi Tuhan Nago wwit fien ei yka yse ou wak.”
40 Mde le ke fo Petrus wrana ni yrok wat-wat, wkait saswain man ei. Ou wbahe lon-lon kayit-yit man ei wto: “Nhok! Nsifi kat! Ntainti kat nehin na man hra yiyaka, yban kafir kei! Nlelek nse Nago wak. Nhnak nibri om man Yesus se bo weren kaka, wsigi kat nan nehin nfe satian om!”
Na Hra Yten Ykaso Yse Yesus Wak Ei Yible Yibot-bot Deri
2:41-47
41 Petrus wrana ni mfot fo, na marok ekei yoso ywien fien sadir okom. Ei yten ykaso mse Yesus wak, ofo yhnak ykan om man rasul ei ysrik kat kla fe ei. Tali hra okom bo mal kayi na tolik ribu (3.000) yten ykaso yse Yesus wak. Yikan yrok ekei yloit ydan kein yse Yesus wfe wedla wedli ei yik.
42 Tali man, tali man, ei yhnak toron kat ykan om yibe ybalifis yife mres, yoso kmiet ni hra rasul yrana ykakniet man ei. Ei yerek ta-ta roti, yeit lok-lok sisi ni, yidien fot ysikafit sisi sawuan man Nago.
43 Rasul ei ysiok heit-hat ni owuok-awak yrok, ofo na kadio kat yeliek, yiwua main kat. 44 Na kadio hra ynok tmol mse Yesus wak ybalifis sawuan yife mres, yhares sisi, ykain lok sisi-sasa ei yfe ni eit, hrien kadio kat.l 45 Ni mre mto msalolo man yanak man ei, ofo ysafo yfe bet mata mre, afe hrien mre, pitis om maka fo, ysan wat-wat man Yesus wfe nai hra ysakna, ykain dait not trik, ydain hrien, afe yfe ni eit ei yisalolo latiot ei. 46 Tali man tali man, ei ybalifis yife mres yse Nago wfe bol kohok mklik om,m wi hra rasul ei ykakniet ta-ta Nago wfe giet man ei. Mfot fo, ei ysiar wat-wat yidien yanak man ei, ykashok yeit sisi ni eit yse yfe bol wat-wat. Ei yble ylek-lek tkoin kat yidien yanak man ei. 47 Ei ysrar heyit ta-ta man Nago. Nai yrok wat man ei ykashok fot man ei. Tali man, tali man, Tuhan wkaka na wat kdie man ei yehinti kat yfe satian ei, ofo ei yloit yse Yesus wfe na ei yik.