YESUS WRANA KREK NI KAHLIA KAT
MAN YOHANES
Ysayen
1:1-3
1
Katik fari okom mrana fe ni hra Yesus Kristus wyen hata ei. Allah whnak ni eke yin Yesus yibe wyen hata oli yin wfe wedla ei se bo ynok krek ni hra bot yhok yka ei. Mde Yesus wbahe wfe malaikat wain wyen tahak ni eke yin Yohanes tet. 2 Tet le tsroin katik fari okom, trana hatot fe ni kadio kat hra tet thot toso kmiet ekei. O le ma giet mahin Allah wak hra Yesus Kristus wrana hatot man tet ei. 3 Mabot karmiak kat man na hra ybaca ni sewet okom mahin Allah wak. Mabot fot man na hra yosom, ysamenie fem, ofo ysiwain ni kadio hra tet tsroin yik katik fari ekei, fe hra magiet mayi fe mataren wale le mkom.Tali Wabot Wan Jemaat Mtalak Nan
1:4-8
4 Mahin Yohanes tet tak,
Man jemaat mtalak nan nik propinsi Asia:
Hares madien ble bot yin nan yehin Allah wak, hra wahin kamuolo kat, wadien sonat ko, ofo basak Ou waka oli. Hares madien ble bot yin nan yehin fot yiwua mtalak hra ykro yik wbariomo ra yik wfe ni maleli makohok mak wi sahin om. a 5 Hares madien ble bot yin fot nan yehin Yesus Kristus wak. Ou eke whron kein wrana twa Nago wfe giet om. Ou wabe na wasidik sayen kat, wahinti kat nai yeigi ei. Ou wabe fot na waslonti raja kadio kat yik fobi ko.
Ou eke wmro fe sawuan faf, wkothok kat wale faf fehinti kat fafi satian madien Ou wfe hen om. b 6 Ou wlok helwain wale faf, wslonti faf, wsiok faf fibe na kni tara hra ydihan Ou wfe Allah, hra Wono Ou. Man deri Yesus Kristus oko le ma fle kohok madien kanas kayi de dian-dian kat. Esree! c
7 Basak Ou waka oli, nhot la!
Wain fe yik wabat ago, wafan yik sakait.
Noso la! Basak sifuon na kadio ei bo yhot Ou!
Yidien fot na hra kamuolo yska wale Ou.
Yhot fo, yowa, yhot fo yrwe kayi fe Ou,
Ou le waka wkerek sadir fe na tkoin kadio. d
Esree! Mde le eke!
8 Sma Nago wto: “Tet tke le ma Alfa, tabe fot Omega. Tet tahin kamuolo kat, tadien sonat ko, basak Tet taka oli. Tet tke le ma Nago wafle wewer kat.” e
Yesus Wyen Hata Wkan Om Man Yohanes
1:9-20
9 Table wa nan, Yohanes tet tadien sisi [] faf fife mres, fe hra faf fnok tmol sisi mse Yesus Kristus wak. Nai yhat faf, fhlet ni ysgia wata le mke, fe hra Yesus wslonti faf fibri ei. Mahin faf fluwa deri, fhron kein wata. Nai yhat fot tet, yhirit wale tak rowe Patmos ko, fe hra trana Nago wfe giet, ni kadio kat hra Yesus wsiok wrana ei. 10 Mayi fe hari Minggu, tali hra Sma Yesus wfem, Nago Ou Wawua om mkororo tet. Mde tet toso ro kat fo salo mrem mahin tsbiele hra mdror kat mde le ofir, 11 mto: “Ni hra nen bo nhot ro kat ei, nsroin kadio kat [yin/yse/yik] katik fari malolok mrem, mde nteye kohli mse jemaat mtalak kei: mse Efesus, Smirna, Pergamus, Tiatira, Sardis, Filadelfia yidien Laodikia.”
12 Ofo tet tlelek tto tsmit na sie ma wrana ni man tet okom. Mde thot ro kat [fo] pelita mtalak hra nai ylak wat-wat yse tiyen emas ysa ago. 13 Thot fot na mreu hra nai ywit yto ‘Na Tkoin Yfe Wet’ Ou wkro wak flalie bri pelita mtalak yteit olo ekei. Na oko wtrik not jubah malis om kayi de mak wteit aiti, wamak brat fe fot not emas hra mkohli wkmuon om. f 14 Wsa madien wsagien ei yelek yde domba ygien, yelek yde salju; wsifuon ydhen yde sala. g h 15 Wteit ei ydlen yde tembaga ybia yik sala mabri; wsalo om mhi mklan mde kla matlok. i 16 Mak wna tkoin wsiokti twon yik mtalak. Mahin wgiet ago mnian klabra mres whok, wtato wat fot, wtato wat fot. Wsifuon ei ynarak kat yde tali wdrot.
17 Tet thot Ou ofo tti tsamorik tak wteit olo wbariomo aiti, tsadiak tde na waigi. Mahin Ou wlak wna tkoin mak tkedi ago, ofo wto: “Naliak amot! Tet tabe fot Masayen kawuak mde tabe fot Makahlia kom.j 18 Na Waron Tet le mke. Kamuolo taigi wale, mahin nhot la, tron oli le mke, kayi de dian-dian kat! Tet le ma tfle kohok, tsiokti kunci eigi madien fot kunci Mla Sminggir.
19 O le ma Tet tbahe nen nsroin kadio kat ni hra nhot kmo ei, yidien fot ni hra yhok yidien ko ei, yidien fot hra basak yhok yka ei. 20 Hra ke ko Tet trana tahak kat fe ni hra nen nhot kmo ekei. Pelita emas mtalak ei yhnak kakniet fe jemaat mtalak ei. Twon mtalak hra nen nhot Tet tsiokti yik tna tkoin ei, yhnak kakniet fe malaikat mtalak hra [ylolowain / ykomot] jemaat mtalak ekei.”