Paulus Wak Rwe Malta
28:1-10
28
Mam mhok wale midien mbot mik kla wtefit, se na hra wak oko mreu wrana hatot wto rowe oko wkedi le ma Malta.
2 Na hra yese yik rowe ekei yhares karmiak kat yidien mam, mde ytatik sala mak tlein ra mde ywiehla fien mam mka mkayak mik sala mtefit, fe hra uwade okou foron wbloin wadien kyen yska mam mkomin karmiak kat. 3 Paulus wkolao samne wkoit yma mre yka, wtatik yse sala masa, mde lua soko mreu whok ro kat wahin wkoit hra wlak eke, fe hra sala mtbat, mde watan Paulus wak wna.
4 Hra oko fo na rowe eke yhot lua ou watan wlo wak Paulus wna mde yrana wain frit-frat man ei yto: “Woi, na kou bo wabe kayi na waska wale nau, fe hra ou wsifi wale wahin siwan ale, mahin mam mfe nago Akalet om mtriesi ya ou, mliokeit dait ou wron.” 5 Mahin Paulus wna batet kat lua ou wti wse sala mabri ale, mde ou whlet dait ni mrem. 6 Na ekei ysmit lien yto bo wna mfik, afe ou wti wkak ro kat. Ei yleli kayi yfasa kat, yhot dait ni mrem, mde ei ysablit mtbelek, ynok yto ou wabe kayi nago mreu, fe hra waigi dait.
7 Publius, na wafle hra wslonti na kadio kat yik rowe oko, ou wabe na wabot. Ou wfe bol, biele, yidien bet sanwat ei yitaren yse kla wtefit okou, mde ou wwit fien mam midien mese meit ni mik bol ou wa, mese amuk tolik. 8 Hra oko fo Publius wono ou wkaini wase wak wi maese, wkan tbat wsmeren kat, wasik sgia lis. Mde Paulus wtfoi ou wse sit ou wa, wsikafit mabe ou, sba fo wlak wna yin ou ofo wkaini om mdain sros kat.
9 Oko sba fo na marok hra ykaini yik rowe eke yka yse Paulus wak, ofo ou weren ei ydain kadio kat. 10 Mde ei yhdin karmiak kat mam, yhares yhnak wat-wat ni yin mam, ofo mam midien mese kayi de tolo safar fle ou wdain. Mam mto mein kein kdie oli, ofo ei yhnak pitis, not trik, yidien ni eit kadio kat yibe fan kedi.
Paulus Whok Wak Roma
28:11-16
11 Mok tolik yewer kat fo mam mein kein kdie, morin kapal mrem hra mklia lis wale mak sfie rowe okom kawuak de tolo safar fle ou wdain, mde mam mska kat mein. Kapal rar okom mahin Aleksandria, hra nai yhein patung nago lak ykro yik kapal matawadio om. Nago kafe tbuok eke ykedi le ma Kastor wadien Poluks. 12 Mam mfoto kawuak de mhok mik rowe fle Sisili, ofo msiswa mik sfie Sirakusa, mese amuk tolik mik oko. 13 Ofo mehin oko mein kein kdie mslili kawuak fe rowe wtefit kayi de mhok mik wanggo Regium hra mak fobi Italia, mtato kat mse siwan, ofo mese amuk mres mik oko. Uwade fo komin whok wahin selatan wfrio wbot, ofo mam mska kat oli, mslili kawuak fobi Italia kayi de tali mao lak fe fo mam mhok mik sfie Putioli. 14 Mik oko mam mtatiere fe mam manak Yesus wfe wedla mre. Ei yhakan mam mese midien ei kayi de amuk mtalak, ofo mam mein kein kdie kayi de mhok mik sfie Roma. 15 Mam manak wedla mre hra yese yik kota Roma yoso krek wale hene magiet mabe mam mka, mde ei yein teit fan lis yehin kota Roma, yka mre ywayen mam mik Bol Frihene Apius, mre oli ywayen mam mitaren wi hra nai yto Bol Yese Tolik. Paulus whot ro kat ei yka yto yidien twa mam, mde ou wkashok fe ni okom mhnak kanas fe wabri om, ofo ou whdin man Nago.
16 Mde mam midien yein kayi de mhok mik Roma, ofo nai yhnak Paulus wase wat bol, wadien na sae kahat mres hra wsmit lien kawuak ou.
Paulus Wrana Tahak Kat Fe Yesus
28:17-29
17 Paulus wase amuk tolik, ofo wwit fien na sa Yahudi yfe nai yifle ei yka ybalifis yife mres. Mde ou wto man ei wto: “Table wa nan, tet tsiok dait kat ni mrem msgia mtatol man na sa Yahudi faf fke. Tet tsiok dait kat fot ni mrem msgia mkan yakres kat ojin trar faf fate kokos yfem. Wanik deri nai yslon tet tak Yerusalem, yhnak tet tse na sa Roma ei yik yibe yhirit tet tkak. 18 Na Roma yefitwain skadelek wale tet, ei ynok yto ynahla tet, yibe ytatiere fe dait ni mre msgia mak tet tak hra mhnak kakniet fe se tet tkak. 19 Mahin na Yahudi yhar kat, yto tet tkak wata, kayi ti-ti tkader kohok mse Kaisar wak, se bo wkerek sadir fe tet. Noso la, tet tarin fali dait na sa tet ta ei, tet tadon dait ni mre man ei ha, tet twaini deri na wafle Kaisar wefitwain skadelek homo-homo tet.a 20 O le ma tet twaini tto thot nan se bo tet tsadir tadien nan. Tet trana tahak man nan mabe nai ykait yhirit tet tadien rantai kom, fe hra tiktol tet tsamenie fe Mesias ou waka wale – Mesias, hra na Israel faf forsfe mabe basak ou weren kaka faf kadio kat.”
21 Mahin na Yahudi ei yto: “Mam mhot dait latiot katik fari mre maka mahin Yudea mrana fe nen. Mam mible hra yka firi yehin ana yrana hatot dait fot ni mrem msgia mabe nen. 22 Mahin mam meisi moso nen nrana hatot nsablit nen na okom man mam. Fe hra agama hra nen natik okom, hra nai ywit yto Fan Toron om, mam moso wale na warok yik fobi katak yrana yhar kat walem. Mahin mam meisi moso sros kat mahin nen nak.
23 Mde ei ykadoin hene wagiet mreu wabe yka yleli yoso kmiet Paulus wrana ni. Hene magiet hra oko fo, yikan marok yka freyit kadio kat yse bol Paulus wasem. Mahin uwade kawuak de amuk, Paulus wrana hatot fe Nago wfe kerajaan – o le ma Nago wsin wteye wfe na wafleu wslonti na sa fobi kadio kat. Mde Paulus wteik mahin ojin Taurat Musa wfe kayi de katik fari nabi yife, ou wkakniet mabe giet eke yrana tiktol wabe Yesus. Mde eke fo ou wbalalan ei yten ykaso mse Yesus wak. 24 Mde na mre yehin ei yik yoso kmiet rorwain ni hra Paulus wrana eke, ofo ysamenie fe Yesus. Ha, na wat mre ei yaha kat Yesus. 25 Mde ei ykaf kesik frit, mre yto Yesus wabe Mesias, mre yto wdain. Kayi de yto ysiar wat-wat yehin sadir trar okom, ofo Paulus wkait wain kahlia kat giet man ei wto: “Nto tkoin kat Nago Wawua Makohok om mrana hatot man nate kokos ei main fe nabi Yesaya wto:
26 “ ‘Nen nain nse na sa eke, nrana wata nto:
“Nan nke noso sawuan wata, mahin nan nnok dait;
Nan nhot ta-ta wata, mahin nan nhana sros dait ni eke.
27 Fe hra na sa okom ei yibri om mdrot kat,
ytefit ei ydik wale, yoso homo-homo dait ni,
ysifuon ykafit, yhot dait ni;
Amloi fo ei ysifuon yhak, yhot tnes ni,
ytefit yhak, yoso kmo ni,
ysablit yroro, ynok tnes ni,
ofo ei ylelek oli yse tet tak, mde tet teren ei ykaini ydain.’b
28 Mde Paulus wskatiokot wto: “Na Yahudi nan, giet mabot okom mabe Nago wto weren kaka nan main fe wfe wet Yesus – giet okom nan nnahla kat wale om. Mde ke fo nan nnok sros kayi mabe Nago wteye wale ou wfe giet mabot mabe Yesus okom main mse na sa wat-wat kadio kat hra yibe dait na Yahudi. Bo ei yoso sros kayi, ysamenie fe Ou! 29 [Na Yahudi yoso mde ke fo, ei ysiar wat-wat, yheden frit-frat fe hra ysablit lok oli dait.]
Paulus Wrana Giet Nago Wfe Mak Roma
28:30-31
30 Mde Paulus wase der lak wak Roma, wase wak bol siowo, whnak ta-ta pitis fe na hra wkain. Wak ana fo, ou wwien fien sawuan na kadio hra yka ytfoi ou. 31 Mde ni mre mwewis dait kat ou. Ou eke wbren kat deri, waliak dait fe na mreu, wrana tahak kat fe Nago wfe kerajaan, wkakniet man na marok wto: “Tuhan Yesus oko wabe kayi Mesias afe Kristus hra Nago wkadoin krek fe wale ou.” Mde ou waheit wkakniet sawuan ni hra Yesus wfe yin ei.