Petrus Weren Na Wakarat Wdain
3:1-10
3
Tali mre fo, mkdia mabe siwit, tali mkedi tolik, Petrus wadien Yohanes la yein yse bol kohok Nago wfem, mayi fe mabe nai ysikafit sawuan yidien siwit yse Nago wak. 2 Ei yhok latiot yik ra fo, na mre ykafe yanak na wakarat mreu, ylak ou wleli wak wi hra ei ylak lokdi om, hrede bol kohok Nago wfem hra nai yto Hrede Mabot, se bo ou wwaini lon-lon pitis man na marok hra yloit yse Nago wfe bol kohok mklik om. Na oko wakarat wale wadien kamuolo wemem msois. 3 Mde na okou whot ro kat fo Petrus wadien Yohanes, la yka yto ytrik yse bol kohok mklik om, ofo ou wwaini pitis wan ei.
4 La ysmit torot kat ou. Petrus wto: “Nsmit la mse mam mik ko!” 5 Ofo na ou wkobia wsifuon wsmit ei, ou worsfe wto, bo ei yhnak pitis.
6 Mde Petrus wto: “Perak, emas le ma tet tkain dait, ha, ni wat kdie hra tet tkain, o le ma tet thnak man nen. Main fe Yesus Kristus, na Nazaret ou wkedim, nsidik nkro, nain!” 7 Ou wslon na okou wna tkoin om, ofo wkosia wanik wsidik wkro. Mde wteit yidien wteit si ekei ykanas sros kat. 8 Ou wkahri wsafok tiwain, ofo wadien sisi ei ytrik yse bol kohok mklik okom. Ou wain wkahri-hra wkashok, wsrar heyit man Nago.
9 Na marok ei yhot ou wain, wsrar heyit whdin man Nago. 10 Mde ei yhana ro kat ou, ofo yiwua main kat fe ou, yto: “He, na wakarat hra wleli wwaini sawuan pitis wak Hrede Mabot, o le ma wain wsafok tiwain angke! Bo wde le sie ma wain ro kat hra kei! Taliak!”
Petrus Wrana Ni Wak Kbogiet Bol Kohok
3:11-26
11 Hra oko fo na hra wwaini sawuan pitis oko wsiokti Petrus wadien Yohanes la ynai ytodo. Na marok ei yiwua main kat ofo ysese tamli yren fe ei yik bol mklik hra nai yto Kbogiet Salomo Wfe, ykohli kat ei. 12 Petrus whot na marok om, mde wto man ei wto: “Woi, na dla Israel nan nkei! Hra nan nteit rioro buon fe me? Hra nan nsayo ngiet klek fe buon nan mam mibe? Hra nan nnok nto na mna mam mres le ma mkain wat fle kohok mrem, msiok na ko wain? Afe nan nnok nto mam mbot mkohok malais kat mde hra Nago, afe? Mdain!
13 Noso la trana ni ko. Nago hra Abraham, Ishak, yidien Yakub yfe ou, Nago hra faf fbiti wai ysaesik fe ou,a o le ma whnak fle kohok malais kat man ou wfe na dihan Yesus. Kaman firi wa ko, nan nnaber kat ou wabe nai yskau. Gubernur Pilatus wkerek sadir fe, wto wna bhait kat, nai yska dait. Mahin nan naha nkanas kat, nto nai yska wata ou. 14 Nan nna kaf kat wale na wakohok walais kat, na wabot watoron kat, ha, nwaini man gubernur wabe ou wnahla kat na waska sawuan na whok wahin bui, wdanhok wse nan nik.b 15 Ha, na hra wkri kein nai yse wi maron, ou eke nan nska wale wkak, mahin Nago wkosia kat ou wahinti kat wale wi eigi om, wsidik wron oli. Mam mke mhot wale ni ekei, ofo miheit mrana wain. 16 Na wakarat hra nan nhot lokdi wak ko, ou wkarat ou wdain wale, fe hra mam mnok tmol mse Yesus wak, mtiksi ou wkedi om. Nnok la! Main fe deri Yesus wkedi om, mam morsfe ni okom mse ou wak, ofo Yesus le wbatala sros kat na ko. Nhot la! Ni mre msalolo dait man ou!”
17 “Table wa nan, tet tnok kwan firi wa ko, nan nidien fot nan nfe nai yifle hra ysiokti nan, nska wale Yesus wkak. Mahin nan nnok roro wain dait mabe na oko wabe Na Wakri kein nai Yse Wi Maron.
18 Madien kamuolo Nago wrana krek fe wale, main fe wfe nabi kadio kat, mabe basak ou wfe na dihan Kristus whlet ni msamsa kat, kayi de wkak. Hra ke fo, main fe nan nsiok samhak Yesus ou, Nago wbatirik wale ni ekei yhok kadio kat. 19 Mde ke fo, nket, nehinti kat nfe satian ei, ofo nlelek, nsalit oli nse Nago wak, se bo ou wnawalis kat nan nfe satian ei ydain. 20 Ofo Tuhan whnak nan nibri ei yhron. Mde Yesus Kristus, hra Nago wbatok wale wabe nan nfe raja wafle – basak Nago wteye ou wsalit oli wse fobi ko, wslonti faf kadio kat. 21 Mahin, mak bri fo, Nago wbahe Yesus waheit wadien ou wak wi mayehet ago, wleli kein kawuak de mkdia mayi fe Nago wsiok hao ni kadio kat, yde le hra ou wkadoin wale madien kamuolo, main fe ou wfe nabi ykohok ei. 22 Fe hra nabi Musa wrana krek wale wto: ‘Tuhan, nan nfe Nago okou, basak wkosia wbetok nabi wat mreu wsadiak wain tet wahin na sa man nan nik. Nan noso kein kayi ou wrana ni, ofo nan niheit nsiok kadio kat ni hra ou wbahe fe yin nan. 23 Na man sie ma woso dait ou, bo Nago wska na sia na okou whok kat wse tlein, wtrik oli dait wse ou wfe nai yik.’”c
24 Petrus wrana sba kdie oli wto: “Tet trana tkoin kat man nan, mabe nabi kadio kat ei, mahin kamuolo Samuel yeis kawuak de hra ko, ei yikan kadio kat yrana krek fe tolo hra ko. 25 Fe hra kamuolo Nago wkadoin krek wan faf fbiti Abraham ou, wto: ‘Basak tet tatsiofo kayi na sa kadio kat yik fobi katak kei, main fe ntakein ou.’ Ni kadoin okom madien ni kadio hra nabi ei yrana krek fe wale ekei, yin tiktol faf, fe hra faf fke le ma yitakein faf.d 26 Hra oko fo Nago wbatirik wale ni hra wkadoin ekei, fe hra ou wbetok wale ou wfe na dihan Yesus, wteye walin wse nan nik, se bo ou watsiofo nan, main fe ou wkororo wat-wat nan nehinti kat ni ysgia hra nan nsiok ei.”