Petrus Wadien Yohanes La Yik Mahkamah Agama Ybariomo
4:1-22
4
Petrus wadien Yohanes la ysadir samne yidien na marok om. Mde imam yidien na sebe wafle waslonti na sae kahat yik bol kohok Nago wfem, yidien fot na Saduki, ei yka yhok ro kat. 2 Mde na Yahudi yifle eke ytrere karmiak kat fe hra yoso kmiet rasula la yikan lak ei yrana ykakniet fe Yesus man na marok, yrana yto basak, main fe ou wfe fle kohok om, na marok maegi om bo ysidik yron oli. 3 Mde ei yslon Petrus wadien Yohanes, ofo yhirit yse bui mabri, yiheit la uwade, wa mkdia amuk wale.
4 Mahin, na marok hra yoso firi ni kakniet ekei ynok tmol mse Yesus wak, kayi de nai yaher na dla ei mharfe wale bo mal sadik le na mahot ribu (5.000), ha, nai yaher dait latiot na dli ei.
5 Uwade fo, na Yahudi yifle yidien na trar yifle, yidien fot na guru agama ei ysalifis kadio kat, ysadir trar yik Yerusalem. 6 Imam wafle o le ma Hanas wak oko, wadien wkonsiofo Kayafas, wfe wet Yohanes wadien Aleksander, yidien fot na wat mre hra yiloit yse imam wafle Hanas wfe nai, ei yik fot oko.
7 Mde ei ybahe nai ywien fien Petrus wadien Yohanes la yka yse ei yik mabe nai ysadir trar fe ei. La yhok yka fo, mde ei yefitwain skadelek man ei yto: “Hra la nan nidien fle kohok buon mit ma om? Hra la nan nwit na sio ma wkedi se nhe nan nsiok ni eke?”
8 Mde Petrus, hra whon wale fe Nago Wawua Makohok om, wrana ni man ei wto: “Woi nai yifle kadio kat nan, nidien na trar kadio kat hra nsiokti na sa Israel faf! 9 Bo nan nefitwain skadelek yin mam fe hra mam msiok ni mabot man na wkarat hra angkou, afe? Nan nefitwain ni mit ma mfe he na okou wbot oli? 10 Mto mde ke fo nan nidien na sa Israel kadio kat nan nnok hao tnes mabe na wakarat kou hra wkro wak nan nbariomo, ou wbot oli main fe tiktol fle kohok Yesus Kristus, na Nazaret ou wkedi om. Ou eke nan nskarok kat wale ou, mahin Nago wkosia kat wsidik wale wahinti kat wi maeigi om. 11 Mde hra katik fari makohok om mflet mto:
‘Woi nan hra nsiok lokdi bol ou,
Amak man hra nan nnaber kat wale mse tlein,
ou le ma Nago wlouk waka,
wlak mabe amak sniyiti mabe ou wfe bol.’b
Mam mrana krek man nan, Yesus okou wabe kayi Nago wfe amak sniyiti.
12 Mahin na marok kadio kat hra yik fobi katak kei, Nago whnak wfe fle kohok man tiktol deri na wamres ou, wabe weren kaka na tkoin faf - o le ma Yesus Kristus. Ou eke deri sok, na wat dait.”
13 Hra oko fo na hra yleli ysadir trar yhot fo Petrus wadien Yohanes la ybren kat, ynok tnes la yikan lak ei na tkoin deri, ysekolah dait. Mde yteit rioro fe ei, yhana la yikan lak ei yidien lis sawuan Yesus. 14 Hra oko fo ei yhot na hra la yeren ou wkro flasak sisi wadien ei, wak la yklik, mde ei yhar kat dait ni mre mahin la yik. 15 Mde nai yifle ei ybahe rasul ei yhokti kat yehin bol sarife mabri om, mde nai yiheit ysadir trar fe ei yto, 16 “Nan nka, faf fsiok na ke yde sie? Fe hra na marok kadio kat hra yese yik Yerusalem ko ei ynok wale la ysiok ni ma owuok mewer kat. Mde faf fkesi fe dait.
17 Mahin nnok deri ni okom main siar mse na marok. Mabot ma faf fhar kat ei. Faf ftoji se bo ei yrana oli dait na wakedi okom man kdie na wat mre yila.”
18 Mde ei ywit fien la yikan lak ei ytrik oli yse bol mabri ra. Ei ytoji kat ei yto: “Nnok deri, la nikan lak nrana, nkakniet oli dait ni mrem madien Yesus wkedim!”
19 Mahin Petrus wadien Yohanes la yrana man ei yto: “Hyee, hra nan nbahe mam moso mse nan nik fe me? Ni mit ma Nago wto mbot mewer – mam moso mse nan nik, afe mam moso mse Nago wak? Yo oma, na mna nan nkerek sadir wata. 20 Mahin, ni kadio kat hra Nago whnak mam mhot moso ei, mam msatmor fali dait kat ha, mam miheit mrana wain kawuak!”
21 Mde ei ytrere karmiak kat, ytoji kahlia kat rasul ei, ofo yna bhait kat yein. Ei yto amo yhirit ei, mahin ykerek sadir fe dait, fe hra na marok kadio kat ei yihot wale ni owuok okom, mde ysrar heyit man Nago. 22 Fe hra na wakarat oko wkaini wase wale bo mal kayi der na lak yeigi (40) mewer, ofo Nago wsiok ni owuok malais kat, wweyen ou wdain, wbot oli.
Yesus Wfe Wedla Wedli Ei Ysikafit Se Bo Ybren Kat Yrana Ou Wkedi Om
4:23-31
23 Nai yifle yna bhait kat wale la yikan lak ei, ofo Petrus wadien Yohanes yein oli yse yanak ei yik. Ofo ei yrana wain oli ni hra imam yifle yidien na trar ei yrana yin ei. 24 Yanak wai yoso ro kat ni eke fo, ei ysikafit ysalo fle, yto man Nago yto: “O Tuhan, mam mfe na Wafle Hra Wasiokti mam, nen le ma nsiok yik wadien fobi katak kom, siwan wadien tlein, yidien fot ni kadio kat.c
25 Nen le ma nrana krek main fe Nawua Makohok om mkororo nen nfe na dihan mam mbiti Daud se wrana wto:
‘Hra na sa marok kei yheden mawain yidien Tuhan wabe?
Hra ei ysin ni hra ysiet, ydain kadio kat?
26 Hra raja yidien na yifle yik fobi katak kei
ybakaisin yto ykhan yidien Tuhan Nago wadien ou wfe Kristus, raja wafleu hra ou wbatok waled yibe?’e
27 Ya Tuhan, ni eke yhok ytatol kayi mde le nen nrana krek fe wale. Fe hra raja Herodesf wadien Pontius Pilatus ybakaisin yidien Israel yfe na sa ei yidien fot na sa wat-wat man ei yik Yerusalem oko, ysin yto yska nfe na dihan wakohok Yesus ou, hra nen nhnak fle kohok man ou.g 28 Ei ysiok kayi mde le kamuolo nen nkerek sadir krek fe walem, main fe nen nfe fle kohok om. 29 Hra ko fo, ya Tuhan, nhot la ei ytrere sgia wata mam ha, nhnak nfe na dihan mam mbren kat mrana nen nfe giet om. 30 Nkotguos la nna om se bo nen nsiok adit kat ni owuok, nweyen na kaini ei ydain, main fe nfe na dihan wakohok Yesus wkedi om.”
31 Hra oko fo, ei ysikafit samne ro kat fo, wi hra ei yleli satatik om mrioro ro kat, mde yikan ei yhon kadio kat yidien Nago Wawua Makohok om, ofo ei ybren kat yrana samne wata giet Nago wfem.
Yesus Wfe Wedla Wedli Yble Yibot-bot Deri
4:32-37
32 Oko fo na marok om hra ynok wale mse Yesus wak ei yibri mres, ysablit mres. Mre yrana dait ni yto: “Ni hra tet ta om, tet tmres tkain tiktol deri.” Ha, ei yhares yto: “Ni kadio kat eke mam mikan kei mkain sisi.” Na mreu wkrek dait.h
33 Madien fle kohok karmiak om rasul yrana samne ni fe hra Tuhan Yesus wsidik oli wale, mde yikan kadio kat yhron fe hra Nago whares watsiofo ni yilibi-laba kat yin ei. 34 Hra oko fo, na yfe ni eit, not trik ytatolo kadio kat. Mre ysalolo dait. Fe hra man bri man bri fo, na man hra ykain bol giet lak afe bet warok ysafo mre. Pitis om maka fo,
35 ei yhnak ylak tatik yik rasul ybariomo yteit olo aiti. Mde rasul ekei yberiet adit pitis ekei yse na hra ykain ni eit ysalolo, afe ykain not trik ysalolo.