Ananias Wadien Safira
5:1-11
5
Hra oko fo Ananias wadien wsmian Safira, la ysafo fot bet mata mrem mde le hra Barnabas wsiok wale.
2 Mahin, Ananias oko wadien wsmian om la yibri mres, la ykrek fe pitis matam hra ywien mahin bet om. La ykoriet matam maheit, yo mata om man Ananias watik, whnak man rasula ei, wlak mak ybariomo yteit olo aiti. Wto: “Pitis mahin mam mfe bet o le mkom.”
3 Mde Petrus wto: “Ananias, hra nen nhnak nabri om man Klebet Wafleu wtrik buon nabe? Hra nen nwien kein wale Nago Wawua Makohok om mabe? Hra nen nkrek, nyo hlok-hlok pitis matam mahin bet hra nsafo om mabe?
4 Kwan firi wa ko, nen nsafo latiot bet okom, ofo nen le nkain kadio kat. Mde nen nsafo wale bet okom, ofo nen le naheit nkain owuo pitis okom. Hra nen ngebra nto pitis kadio kat le mke! Ni mit ma molot fe nen ngebra mde le ke? Nen nlolot dienen dait deri na tkoin tet, ha, nen nlolot dienen fot Nago.”
5 Ananias woso ro kat ni hra okom mde, wti wbasadit wse fobi aiti, ofo wkaso mti, wkak. Mde na marok om yeliek karmiak kat, fe hra yoso kmo ni hra mde okom.
7 Kya mre oli fo, bo mal kayi jam tolik sba oli fo, Ananias wsmian om mloit maka, mahin om mnok dait sonat kafir hra madien wale wak ko. 8 Mde Petrus wefitwain man om wto: “La nan nsafo bet okom, mat pitis om mde kayi le hra eke?”
Om mto: “Ee, mde kayi le hra eke.”
9 Mde Petrus whar kat om wto: “Hyee! Hra la nan nde sie ma nibri mres mabe nwien kein nlolot Tuhan Ou Wawua om fe me? Nhot la! Wedla hra ykak firi nsmian ou, ei le ma yhok firi, ykro yik hrede bol giet tlein, kyamre fo bo yka ykafe kat fot nen nain nse hin bet ale, nbalifis nsmian.”
10 Madien hra oko na dli om mti mbatbirit ro kat fot mak Petrus wteit olo aiti, ofo mkaso mti, mkak. Mde wedla yfori ei ykafe mhok kat mse tlein, ykak fot om mak msmian ou wklik.
11 Oko fo, na marok hra ynok yse Yesus wak, o le ma jemaat kadio kat, yidien fot na hra ynok dait latiot yse Yesus wak, ei yeliek karmiak kat fe hra yoso kmo ni hra mde ekei.
Rasul Ei Yweyen Na Marok
5:12-16
12 Tali man, tali man fo, rasul ei ysiok adit owuok-awak ni warok yik na marok ei ybariomo. Na marok kadio kat hra ynok mse Yesus wak yyo ysatatik sawuan yse bol kohok Nago wfem, yik wi hra nai yto Bol Siala Kein Salomo, fe hra yibri mres ykanas kat. 13 Na wat mrei yeliek, ybalifis dait yidien ei. Wanik deri, na marok yik Yerusalem ykashok fe ei, yhdin ei. 14 Mwoi dait kdie fo, nai yaher na hra ynok tmol, yten ykaso mse Tuhan Yesus wak ei yrok yewer kat, fe hra na dla, na dli yrok yka yskadan yit-yit yse Yesus wfe wedla wedli ei yik. 15 Nai yotik na hra ykaini yhok fali yse fan soro mkedi, ylak yin wi ma esem afe, tikar afe, se bo Petrus wain kat fe oko, ofo bo ou wokot na man ei, afe wawuam mmialas kat man deri ei, ofo ykaini om mdain. 16 Mde hra oko na marok yehin kota wat hra ytaren yse Yerusalem oko yka yroro skayit-yit, yotik fot na hra ykaini yidien fot na hra klebet yiyaka yfla ysiok sgia ekei, ofo rasul yeren kadio kat ei ydain.
Na Yahudi Yifle Yhirit Rasul Yik Bui
5:17-25
17 Mde imam wafle wadien wanak na safuk Saduki ei ytadrot ykaf sarok karmiak kat fe hra yhot wale rasul ei ysiok ni owuok-awak yirok-rak, mahin na mna ei ykain dait fot fle mrem. 18 Mde ei yslon fien rasul ei yka, ytrik fali yse kota mfe bol hirit mabrim.
19 Mahin amuk oko fo Tuhan wfe malaikat mreu waka wkothok kadio kat hrede ekei, ofo ou wwiehla fien ei yhokti kat bol hirit om. 20 Ofo ou wbahe man ei wto: “Nan nsalit nkro oli nik Nago wfe bol kohok mklik hra koit, ofo nrana samne wata kadio kat giet Nago wfem mabe ron waifi okou, se bo na marok ei yoso kadio kat.”
21 Uwade wlabit kat fo, rasul ei yein ytrik yse Nago wfe bol kohok mklik om, ofo yrana ykakniet ni yin na marok, mde le kayi malaikat wbahe man ei.
Mak bri fo imam wafleu wadien wfe wanak ei yka, ywit na trar hra yslonti na sa Israel ei yka, ybalifis yife mres, o le ma nai yto Mahkamah Agama okom, yibe ysadir trar fe rasul eke. Mde ei ybahe na sae kahat mre hra yslonti Nago wfe bol kohok, se bo yein ywien fien rasul ei yhok yehin bol hirit, yka yse ei yik. 22 Na sae kahat ei yein yhok yse bol hirit, mahin ei yhot dait rasul ei yik bui mabri ra. Mde ei ysalit oli yrana hatot man nai yifle yto,
23 “Mam mhok mik koit mhot hrede om mdanti mtodo kat. Na sae kahat hra ykro fali, ei yik sonat hrede. Mde mam mkothok hrede om, mahin mhot dait na mre wak bui mabri ra, wi ei yfalek deri!” 24 Mde na tmak hra wsiokti na sae kahat yik bol kohok Nago wfem wadien imam yifle ei, ykan mtaret kat, ofo yefitwain frit-frat yto: “Hmpai, bo ni kom molot fe ni mit ma wat mhok?”
25 Mahin na mre whok wrana twa ni fe ei wto: “Woi! Na kei! Mam mtatiere fe na hra nan nhirit ei, ei le ma ykro yik Nago wfe bol kohok mklik, yrana ykakniet ni fe na marok hra keit.”
Ysadir Trar Fe Rasul Ei – Ojin Gamaliel
5:26-42
26 Mde na sae kahat wafleu wadien wfe wedla sae kahat ei yein yto ykami fien rasul ei yka. Mahin ei ysiok rasul ei ykanas dait ha, tmo-tmo deri, fe hra ei yelieksi walbat na marok ytrere fe ei, ofo ybatiorok yidien amak.
27 Ei yotik rasul ei yein yse Mahkamah Agama se bo imam wafleu wefitwain skadelek ni fe ei. 28 Ou wtrere wto: “Hra mam mtoji karmiak kat wale nan yibe nan nrana nkakniet oli dait ni nidien kedi hra okom mala! Wanik deri, nan nsero kat. Nan nrana siar-sar na ou wkedi man na Yerusalem kadio kat. Nan nto fe ta-ta kawuak na okou wfe hen mabe satian maflem man mam.”b
29 Mahin Petrus wadien rasul ei yfalas yto: “Mam moso kmiet kayi Nago wewer kat, ha, mam moso kmiet dait na tkoin!
30 Yesus ou, nan nbadan wlo wkak wale wak wkoit skarok om. Mahin, faf fbiti fbla yfe Nago, ou le ma wkosia ou wsidik wale, wahinti kat wi eigi om. 31 Ou le ma Nago wkosia kat, wlak wak wna tkoin, whnak fle kohok man ou. Nago wbatok ou wabe na wafle hra wsiokti na kadio kat, wabe fot na wafle hra weren kaka nai. Mde le eke Nago whnak man na Israel faf se bo faf fket, fehinti kat faf fi ni yisgia ei, ofo ou wnok tmol oli dait satian faf fi. 32 Kamuolo, mam mke midien sawuan Yesus, mhot wale ni ekei, ofo Nago wbatok mam, wbahe mam mrana hatot fe ni eke yin na marok. Ou Wawua Makohok om mrana hatot fe fot ni ekei. Fe hra Nago whnak Ou Wawua om man deri na man hra yoso kmiet ou, hra ysiok ni hra ou wbahe.”
33 Nai yifle yoso ro kat ni ekei yska yin ykaso, mde ei ytrere karmiak kat, yto deri yto yska rasul ei ykak kadio kat. 34 Mahin na Farisi mreu wahin ei yik hra wkedi le ma Gamaliel, na guru wafle hra wsaeti ojin Musa wfe, hra na kadio kat ytiksi, ou wsidik wahin, ofo wbahe nai yhok fali firi rasul ei yse tlein, se bo yiheit ykerek sadir hlok fe ei. 35 Yhok sba fo, ou wrana man na marok om wto: “Table na Israel nan, nnok saswain homo-homo ni mit ma nan nsin nto nsiok mtatol man na kei.
36 Fe hra kamuolo, na mreu hra wkedi Teudas ou whok waka, wto ou wwamo sok wsiok na sa Israel ei ykro wat, ofo na dla bo mal kayi le 400 yloit yse ou wak yibe kaisin. Mahin ou eke nai yskau, ofo wfe wedla ekei ytain siar wat-wat. Ni hra ei yorsfe yin ou, yhok dait kat. 37 Oko wale fo, na Roma yaher na sa Israel man faf, ofo Yudas na Galilea ou wahin wsidik, wkoyo fot na marok madien ou yto yfit na sa Roma ei. Mahin ou eke nai yska fot wkak, ofo wfe wedla ekei ytain siar wat-wat kadio kat. 38 Mto mde oko fo, tet tojin man nan tto: Nsiok sgia amot na ekei yila! Nnahla kat ei yein deri! Fe hra ni hra ei ysin ysiok okom, mto mahin deri na tkoin yik, ofo ni okom mni dait, msirik fali ei. 39 Yo mto ni okom mahin Nago wak, ofo nan nkosirik dait na kei ha, bo miyen hata man nan mabe nan nke le ma nhar kat, nkhan nidien Nago.”
40 Na kadio kat ei yoso homo-homo ofo ysamenie fe Gamaliel wfe ojin om. Mde ke fo, ei ywit fien oli rasul ekei ytrik, ofo ylouk omos yehin sapi mfalek yka, ybahrabat ei. Ofo ei ytoji kat ei yto: “Nrana oli dait na hra Yesus ou wan na marok om mala!” Oko wale fo ei ynahla kat rasul ei yhok.
41 Rasul ekei yhok yehinti kat sadir trar hra Mahkamah Agama. Ei ykashok karmiak kat yto: “Ahe! Nai ysiok sgia wata faf fe hra Yesus wkedi om. Mde wata eke, Nago wto faf fke fbot fe hra faf fhron kawuak.” 42 Tali man, tali man fo ei yik Nago wfe bol kohok mklik om afe, yehin bol yse bol, yrana ykakniet ta-ta giet mabot om yto: “Yesus ou le wabe Kristus,c na wafle hra Nago wkadoin krek fe wale, wabe wkosia kat na tkoin faf fehinti kat ni ysgia kadio hra faf fsiok ei.”