Ei Ylouk Helwain Na Dla Mtalak Yibe Ydihan Na Semit
6:1-7
6
Madien hra oko fo, na sa Israel, o le ma na Yahudi marok om, yka skayit-yit yten ykaso man Yesus, yibe Yesus wfe nai. Na Yahudi hra yti yehin fobi wat-wat, ei ynok deri salo Yunani, mde ei yrana yalwain yanak na Yahudi tit yehin fobi Israel hra ysalo Ibrani. Ei yto: “Bo hra na Yahudi tit ei yaher dait mam mfe na semit yidli yibe? Tali man, tali man ei yriak ni eit man deri ei yfe semit, mahin mam mfe yde sie? Yila fe me?”
2 Rasula yoso ro kat fe heden okom de, ei yikan yahar teit lak ywit fien Yesus wfe wedla wedli marok om yka ybalifis. Mde ei yto: “Table wa nan, Nago wbahe mam mrana mkakniet ou wfe giet om man nan. Mto mam mrana oli dait Nago wfe giet om mabe mam mswin sawuan deri fe mriak ni eit yin nan nfe semit ei, ofo ni okom msgia. Hau, mam mliokeit dait giet Nago wfem. 3 Mde ke fo, nan nlouk helwain na dla mtalak yehin nan nik, hra nan nnok ei ybot, ysablit lis, yhon fe Nago Wawua om, ofo mam morsfe ei yiheit ydihan na semit ei. 4 Mde le eke se bo mam msikafit samne man Nago, yidien fot mrana tri-tri Nago wfe giet om.”
5 Na marok ei ysamenie fe ni hra rasul ei yranam. Ofo ei ytrie Stefanus, na man hra ou whon kat fe Nago Wawua Makohok om, wnok tmol mkanas kat mse Yesus wak, ou eke wadien fot Filipus, Prokhorus, Nikanor, Timon, Parmenas, yidien fot Nikolaus. Nikolaus oko wabe na sa wat wahin kota Antiokhia hra wadien kamuolo wnahla kat ou wfe agama klebet ei, wtrik wse agama Yahudi, [man hra nai ysaesik yse deri Nago wak, ysiok deri ni hra Musa wbahe fe ei. Mahin firi-firi wa ko, ou eke wnok tnes mse Yesus wak, worsfe ou wfe satian ei yin Yesus wkosia kat, ofo wloit wse na marok hra yibe Yesus wfe wedla wedli.] 6 Mde na marok ei yidien twa wedla yikan mtalak ei yse rasul ei yik, mde rasul ei ylak batit yna yse wedla ekei ysa, ofo ysikafit fali yse Nago wak.
7 Mde ke fo Nago wfe giet om nai yrana main siar, kayi de na Yerusalem man hra yloit yse Yesus wak ei yyol yrok karmiak kat. Mde na imam agama Yahudi marok fot yka yten ykaso mowuo kat mse Yesus wak.
Nai Yadon Stefanus
6:8-15
8 Mde Stefanus, hra whon fe hares madien fle kohok mahin Nago wak, ou wsiok owuok-awak ni ysamsa kat wak na sa Israel marok ei ybariomo.
9 Mahin na dla Yahudi mre hra yaha kat Yesus, ei ydor giet yidien Stefanus ou. Na eke yehin bol sikafit na Yahudi yfe hra nai ywit yto Bol Sikafit Na Man Hra Yibe Oli Dait Kawor, [fe hra yidien kamuolo yate kokos wai nai ysafo yibe kawor, mahin kwan wa ko na yfelit kerek ei yibe oli dait kawor, ei ybretot kat wale.] Na eke yibe na Yahudi yehin kota Kirene madien Aleksandria, mre kdie oli yehin propinsi Kilikia madien Asia. Na eke yka yibe ydor giet yidien Stefanus, yhar kat ni hra ou wrana ei. 10 Mahin ei ykait flie dait Stefanus, ha ou wkait flie kayi ei, fe hra ou wsablit lis mewer, wrana ni mkanas kat, fe hra Nago Wawua om mkororo ou.
11 Mde na ekei ybahe hlok-hlok yanak mre yein yrana siorok fe Stefanus. Ofo na ekei yrana yadon yto: “Mam moso na kou wrana ni ysgia yin Nago, wrana ni ysgia yin fot faf fbiti Musa.”
12 Mde le ke ei ygebra na marok, kayi de na trar yifle hra yslonti na sa Israel yidien fot guru agama Yahudi ei ytrere ykaso msa yidien Stefanus. Mde ei ykami ou, yotik wain wse Mahkamah Agama yibe ykerek sadir fe ou.
13 Ofo ei ybahe na mre yka yadon ni, yto: “Na hra ko wrana sawuan ni ysgia ei yse wi makohok okom, Nago wfe bol kohok okom. Ou whar kat fot ojin hra Nago wrana man Musa ou. 14 Yibe mam moso ou wrana wto: ‘Yesus na Nazaret ou le ma basak wtdak bol kohok faf fi kom. Wto kdie wto faf fi ojin faf fi hra Musa wsroin skatoin wale yin faf fsiwain, basak Yesus wsalit wdanhok oli yidien deri ni yifi.’ ”
15 Na kadio hra yleli ybalifis yik wi sarife okom ei ysmit torot Stefanus, fe hra yhot wsifuon ei ynarak ysadiak yde le malaikat.
