Stefanus Wrana Tahak Man Mahkamah Agama
7:1-53
7
Mde imam wafle ou wefitwain skadelek man Stefanus wto: “Ni hra nai yrana yadon man nen ei, ofo ni eke nen nto tkoin afe yde le sie?”2 Oko fo Stefanus wrana tahak man ei wto,a “Nai yfe na, table wa nan, tono wa nan, noso la tet trana ni ke! Mabe madien kamuolo, Nago hra wfle wkohok walais kat, ou le ma wyen hata wkan om man faf fbiti Abraham. Oko fo wase latiot wak fobi Mesopotamia, wti dait latiot wse Haran.
3 Hra oko fo Nago wbahe man ou wto: ‘Abraham, nsidik, nahinti kat fobi nen na, nahinti kat nahano mai, naliwet wai, nti nain nse fobi hra bo tet tkakniet man nen om.’b
4 Mde ou whok wahinti kat fobi na Kasdim yfem ofo wti wase wak Haran (mak fobi Siria) kayi de wono waigi. Mde Nago wbahe oli kdie ou wahinti kat wi man hra anam, wain kayi de whok wak fobi hra okom - wi hra nan nese hra kom. 5 Hra oko fo Nago whnak dait latiot bet mata kyamrem man ou wkain, ha, ou wkadoin krek deri wto basak ou whnak fobi okom man ou wadien wtakein wate kokos ei ykain kawuak. Madien hra oko, Nago wto skatoin krek man Abraham, mahin Abraham wdain latiot wet, wkafe dait latiot wet mre wan ou.c 6 Mahin Nago wrana man ou wto: ‘Basak ntakein ei yti yibe na omuok yse fobi wat. Yik ale, na sa man ale ei ysiok sgia ei, ybahe yibe na kawor yin ei, ysiok sawuan ni, kayi de der mao 400 fe om. 7 Basak, mayi fe giet oko fo, bo tet thirit kayi na sa man hra ysiok sgia ei yibe kawor. Bo tbahe ei yhok kat yehin fobi man ale, yka ysalit oli yse fobi hra ko, ofo ysaesik yin tet yik wi man ko.’d 8 Mde Nago wbahe Abraham wbrein ou wfe na dla ei kadio kat, yibe kakniet, se bo wkait todo kadoin okom. Mde le ke fo, Abraham wkafe wfe wet Ishak, wase amuk mtadolik sba fo, wbrein ou mde le hra Nago wbahe. Basak kdie fo Ishak wkafe wfe wet Yakub, ofo wbrein kdie ou. Fot kayi le Yakub wbrein kadio fot wfe wet yidlai yikan yahar teit lak, ei ekei yibe kayi faf fbiti fbla ei.e
9 Yakub wfe wet ei ykaf sarok kat, ykrek yidien yiliwet Yusuf, ofo ei ysafo ou wabe kawor wain wse fobi Mesir. Mahin Nago wadien sisi kawuak ou,f 10 wkothok ou wahinti kat ni ysgia kadio hra nai yhirit yin ou. Ou whnak Yusuf wsablit lis, wolot fe Firaun, raja Mesir ou, whares man ou, webet ou wabe na wafle hra wslonti fobi katak Mesir, wslonti fot na kadio hra yik ou wfe bol istana om.
11 Mde tolo katot wsamsa whok, watsi kat na kadio mak fobi katak Mesir, mak fot fobi katak Kanaan. Katot ou wfle kayi de biarak wa nai yeigi fe ni eit. Faf fbiti ei ytiblie fe ytatiere fe dait ni eit. 12 Mahin Yakub woso ro kat fo nai yrana fe fobi Mesir madien gandum warok, mde ou wbahe wfe wet hra fate kokos ei ysiolok yse ale, ykain fien gandum mre. Oko fo ei yein saswain kmo mao mres. 13 Mde ei yein oli mao lak fem. Yik ale fo, Yusuf wrana hatot man wamon wai waliwet wai wto: ‘Yusuf tet le mke!’ Hra oko fo Firaun wnok tnes mabe Yusuf wfe nai le mekei. 14 Ofo Yusuf wteye giet man wono Yakub, wthein wto wono wadien wfe wet, wate ei yti kadio kat yren fe ou wak Mesir. Hra oko fo, ei yikan kadio kat ei le ma 75 (na tolik yeigi whri na wna yahar wtlok foko mahot). 15 Mde Yakub wsiolok, wain wse fobi Mesir. Wak ale fo ou wadien faf fate kokos ei yese kawuak, kayi ti-ti-ti yeigi. 16 Oko fo ytakein ei yotik ykan eigi ei ysalit oli yse fobi Kanaan, yse kota Sikhem, se bo ykali yse hin knawato hra kamuolo Abraham wfelit kerek madien pitis perak mahin Hemor wfe wet ei.g
17 Mataren mayi fe hene hra Nago wkadoin man Abraham fo, na sa faf fi ei ykafe kein wet skayit-yit kawuak de ei yrok sanini yik Mesir.h 18 Mde raja wat mreu, hra wnok dait latiot ojin Yusuf wfem, ou le ma warin wslonti fobi Mesir. 19 Raja okou wsiok ni mtla drot, wlolot faf fate kokos ei, wsiok sgia ei yibe kawor yin ou. Ou wbahe whorot ei yklat kat ei yfe wet yihen yse tlein se bo yeigi, na sa man faf ftinik kat, frok oli dait.
20 Hra oko fo Musa weme msois wet hen ou wbot karmiak kat. Wfe na trar ei ylak diaman ou wak bol mabri ra, yror ou kawuak de mok tolik. 21 Ofo ei ylak wet ou wak montik, ytik wklia fali wak kla Nil wtefit. Mde Firaun wfe wet madli om mlouk wet ou waka, mror wabe om mfe wet. 22 Nai ykakniet adit ni warok wan Musa, kayi de ou wsae wnok kadio kat ni kakniet hra na sa Mesir yfe. Ou wkanas wrana ni, wkanas fot wsiok ni ei yibot kadio kat.
23 Musa wase kawuak de der 40 (na lak yeigi), mde ou wnok saswain mak wabri ra wto wain wahenek fien wfe na sa Israel ei.
24 Hra oko, wak ana fo, whot na Mesir mreu wsiok sgia na Israel mreu. Mde ou wkaka na Israel ou, wbatiorok na Mesir ou wkak. 25 Musa wnok deri wto bo wfe na sa Israel ei ynok wale mabe Nago wbahe ou weren kaka ei, mahin mdain, ei ynok roro wain dait latiot ni hra mde kom. 26 Tali oli man ou fo, Musa wain saswain wtatiere fe oli na Israel la yikan lak ei ykafa frit. Ou wto wkohriak ei, wto: ‘Woi, table wa nan, la nan nikan sisi deri. La nan nkafa frit fe me!’
27 Mde na man hra wsiok sgia wanak ou wna kaf kat Musa ofo wto: ‘Na sie ma ybahe nen nabe na wafle hra wkerek sadir fe mam? 28 Nen nto naka nba kdie tet tde le hra kramuk nbatiorok wale na Mesir hra wkak ou?’i 29 Na oko wto wrana mde eke de, Musa wtain. Wtainti kat Mesir, wain wse fobi Midian. Wak ana fo ou wase wabe na omuok, kawuak de wsmian, wkafe wet yidla lak.j
30 k Der na lak yeigi yewer kat sba fo, Musa wror samne ni ror yik samdi watato ana hra wataren wse sfa Sinai. Wak ana ou whot ro kat fo, malaikat Nago wfe wyen hata wkan om main fe sala hra mdhen lis karmiak kat mak wi sari masatrio mrem. 31 Musa wteit yrioro kat fe whot sala mdhen om. Wtmayes fe ni hra whot om, ofo wain wataren, wren fe sala om se bo whot roro wain. Mde ou woso ro kat Tuhan wsalo om, wrana wto, 32 ‘Tet ke le ma Nago hra nen nate kokos ysaesik, Nago hra Abraham, Ishak, Yakub ei yfe.’l Mde Musa wteit rioro, waliak karmiak kat, ofo wbren kat oli dait, wsmit oli dait wse wkoit om.
33 Mde Tuhan wbahe man ou wto: ‘Nkothok kat sandal yehinti kat nteit aiti, mabe wi hra nen nkro okom mkohok malais kat. 34 Tet thot kayi wale na Mesir ysiok sgia sawuan tfe na ei yik ale, kayi de ei yhlet ni ysamsa kat. Tet toso wale ei ykdie, ykader kohok man tet, mde tet tais taka le mke, tto tsigi ei yhok yehinti kat na hra ysiok sgia ei. Mto mde ke fo, Musa, nen naka. Tet tbahe nen nain nsalit oli nse fobi Mesir.’
35 Mde ke fo Nago wbahe Musa okou wsalit oli wse na Israel, na man hra kaman ynaba kat wale ou. Ei ynaba kat ou yto: ‘Na sie ma ybahe nen nabe na wafle hra wkerek sadir fe mam?’ Mahin ou eke le ma Nago webet, wkosia ou wabe wsiokti na sa Israel, wlofos fien ei, wadien yein, yhok yehinti kat Mesir. Nago webet ou main fe malaikat hra wyen hata wkan man ou wak wi sari masatrio om. 36 Ou le ma wsria ei yhok kat yehin Mesir. Ou wsiok ni owuok-awak heit-hat yik fobi Mesir, yik fot Siwan Wahen ou, yik fot fobi sahen sabarak ra, yese kayi ti-ti-ti der na lak yeigi (40).m
37 Musa ou eke le ma wrana krek man na Israel wto: ‘Basak Nago wlouk helwain na mreu wahin na sa nan nik, webet wabe nabi wan nan nde le tet tke.’n 38 Musa ou le ma wabe kni tara fe wan fate kokos ei yidien Nago. Ou wadien sisi fot ei ybalifis yik fobi sahen sabarak, wadien sisi fot malaikat hra wsadir wadien ou wak sfa Sinai wasa ago. Ou le ma wwien fien sadir maron mahin Nago wak, se bo wrana kein oli man faf fiheit fnok fan mse wi maron.o
39 Mahin faf fate kokos ei yoso dait kat ni hra ou wrana ei. Ei yaha Musa wsiokti ei ha, mak yibri ra ei yeisi deri yto ysalit oli yse Mesir. 40 Ei yto man Harun yto: ‘Na dla Musa oko, hra wadien twa mam mhok mehinti kat Mesir, mam mnok dait ni mit ma man ou. Wase wale amuk na lak yeigi, bo wasak afe, wak ta man sio? Mde ke fo, nsiok wata nago wat mre yin mam se bo ei ysria wain mam.’p 41 Mde hra oko fo ei ysiok patung mrem msilok mde sapi wawet, mde ei ysanfe ni yse patung okom, ofo ei ykashok ysrar heyit ni hra ei ysiok om. 42 Mde Nago waha kat ei, wahinti kat ei. Ou wliokeit ei ysikafit wata man tali wadien mok yidien fot twon warok yse yik ago, hra ei ynok yto yibe ei yfe nago ei. Mde le hra nai ysroin mak katik fari nabi yfe:
‘Woi, na sa Israel nan! Kamuolo nan nese der na lak yeigi (40) nik fobi sahen sabarak fo,
nan nsanfe kawuak ni mit ma ei yin tet? Nan nhnak buon ni mit ma yin tet tke?
43 Hau! Mdain! Nan nfe nago Molokh - ou le ma nan nsiok bol dik makohok man ou, nwit sawuan wkedi ou.
Yo, nan nsrar heyit fot man twon, man nan nfe nago Refan, nan nsiok fot patung mabe nsaesik man ou.
O le ma molot fe tet bo tklat kat nan nein nse fobi lis,’ hra Babel mtato mse ana om.q
44 Faf fate kokos yese yik fobi sahen sabarak, ykohli Nago wfe bol kemah makohok om mak flalie bri, bol hra Nago wais wsadir wadien Musa. Bol kohok okom, nai ysiok mtatol mde le ni hra Nago wkakniet man Musa.r 45 Mde bol kemah makohok okom faf fate kokos yotik main kein-kein kawuak, kayi de yhok yse fobi Kanaan. Yik na ana fo Yosua wkoyo ei yfit na sa hra yese yik ana. Ofo Nago wkaka ei, wwan kat na sa eke ytain, ofo faf fate kokos yiheit yhouk fobi okom man ei ykain. Ei yese yik fobi oko yidien fot bol kemah makohok hra Nago wfem kawuak kayi ti-ti mti mse raja Daud wak. 46 Daud oko le ma wsiaba fe hra Nago whnak sawuan hares man ou, mde ou wwaini wto wsiok bol kohok mabot man Nago, Nago hra wbiti Yakub wsaesik ou.s 47 Ou wsin wanik deri ha, wfe wet Salomo ou le ma wsiok tnes bol kohok om man Nago.t
48 Wsiok wanik deri, mahin Nago hra wfle wkohok wlais karmiak kat ou waha wase dait wak bol hra na tkoin ysiok. Mde le hra nabi ou wrana krek wto:
49 ‘Wi mayehet ago mabe tet tfe takhta, wi man hra tet tleli tslonti kadio kat ni.
Ha fobi katak okom mabe deri uwas man tlak tteit. Mto mde ke fo bol man sio ma nan nsiok man tet om? Wi man sio ma mfle se bo tet tleli skaros?
50 Na mna tet le ma tsiok sros ni kadio kat hra yik fobi katak kei.’”u
51 Mde Stefanus wrana skatiokot oli wto: “Woi na sa hra ysafle sawuan nan, hra nibri ykanas, ntefit dik nan! Nan nke nsadiak sisi nde kayi le nate kokos ei. Hra nan naha kat sawuan Nago Wawua Makohok om!v 52 Nabi man sie ma nate kokos ei yibot yidien ou? Hau, ei yidien sgia nabi yikan kadio kat ei. Ei yska sawuan nabi hra yrana krek fe Na Wabot Kamyi Kat hra basak waka ou. Hra madien firi wa ko nan nke le ma nbaret lolot nska Na Wabot Kamyi Kat ou wkak. 53 Nan nke le ma nwien fien wale ojin Taurat hra malaikat yrana twa om, mahin nan nsiwain dait, noso kmiet homo-homo dait.”
Nai Yska Stefanus – Saulus Wak Fot Oko
7:54–8:1a
54 Madien hra oko fo na Mahkamah Agama ei yoso kadio kat ni ekei yska yin ykaso, mde ei ytrere karmiak kat kayi de yhek ykabrere. 55 Mahin Stefanus hra whon fe Nago Wawua Makohok om, ou wgiele mse yik ago whot ro kat fo Nago wfe fle kohok om, ofo whot Yesus wkro wse Nago wna tkoin. 56 Ofo wto: “Woi, nsmit la mse ago! Tet thot yik ou wtariet, thot Na Tkoin Yfe Wet ou le wkro wse Nago wna tkoin!”
57 Mde ei yihlein tlafle kadio kat ylakti ytefit, ofo ykaprsat ro kat ykami ou. 58 Mde ei ykein krit wahinti kat kota oko wse tlein, ytli kat ei yfe not trik jubah yilis ei, ylak tatik yik na dla wafori wkedi le ma Saulus wteit olo aiti, ofo ylouk amak yka, yba ylet ou.
59 Yba ylet samne wata fo, Stefanus ou wsikafit wto: “Ya Tuhan Yesus, nwien fien tawua kom!” 60 Mde ou wleli wskatoko, worik wteit sia, ofo wkader wsalo fle karmiak kat wto: “Tuhan, nto fe amo satian ko man na ke yila!” Ou wrana kahlia kat ni ke, ofo wkak.
Na dla wafori Saulus ou wkashok wsamenie kayi fe nai yba ou wkak.
