Ni Rana Fe Nai Ywain Siar Jemaat Yerusalem
8:1-3
8
1-3 Saulus wkro wsayo fe nai yba Stefanus wkak fo, wsamenie. Wsamenie waisi kayi fe yba wkak. Mde eigi Stefanus ou, na mre hra ysaesik yin Nago ykak eigi Stefanus wse bet aiti, ofo yowa feu, yowa feu yidien ysalo fle.Mayi fe Stefanus wkak fo, ykhan, Saulus ou wadien fot na wat ei ykhan man Yesus wfe nai, man hra yten ykaso man Yesus. Saulus wadien sgia jemaat ei wsiok sgia ei wto ykak kadio kat wati. Wain hewain wse bol man bol man wkami na dla fot, na dli fot, wkein fien-fan wtrik fali yse bui. Saulus wadien na wat ei Yidien sgia kat ywain siar de Yesus wfe nai ytain kat. Ytain yehin Yerusalem, yein siar-sar yse wi wat yik fobi Yudea madien fobi Samaria. Hra yiheit jemaat yfe na tmak deri, Yesus wfe na tmak rasul ei deri yiheit yik Yerusalem, na wat hra yse Yesus wak ytain kat.a
Filipus Wrana Fe Giet Mabot Ofo Na Fobi Samaria Ynok Tmol Man Yesus
8:4-8
4 Ofo na hra ytain siar-sar ei, ytain yehin Yerusalem. Ytain wata yse wi wat-wat de, yrana wata bren kat giet mabe Yesus, yik wi man om mde wata eke, ei yik wi man ou fot yrana hatot wata mabe Yesus man na marok man ke yoso fot.
5 Filipus wtain fot. Filipus wain wse kota wat mre mak fobi Samaria. Na Samaria ei o le ma na sa hra yibe dait na sa Israel. Mde Wak Samaria de wrana wain Giet mabe Yesus om. Wrana giet mabe Yesus man na hra yese yik oko, hra yibe dait na sa Israel. Filipus wrana man ei wto: “Yesus ou ekei le ma Kristus.” Wrana wto: “Yesus okou, wabe na wafle hra Nago wkadoin krek fe. Wkadoin krek fe wale Yesus wabe wkosia kat faf fehinti kat ni sgia hra faf fsiok ei.”
6 Wrana eke de na marok om mak Samaria moso kmiet, yoso ni hra Filipus ou wrana ei, yidien fot yhot ou wsiok ni yilais kat, mde nai yikan ei yibri mres yoso kmiet deri ni hra Filipus wrana ei. 7 Wsiok ni ylais mde hra na marok hra ykoli de, ydain. Filipus wwit mse Nago wak fo wwan kat klebet yiyaka yhok kat, ykle yhokti kat yehin yibri ra de nai yiheit ybot tnes. Mde fot na marok hra yikarat ei yein, na hra ymli dait ei ymli yein. 8 Fo na Samaria ykashok kat, na marok mak kota eke ykashok fei.
Rasul Petrus Whar Kat Na Ilmu Sihir Hra Wto Wkain Wadien Pitis Ni Kohok Nago Wfem
8:9-25
9 Hra oko fo na ilmu sihir mreu wkedi le Simon wase wak fot kota Samaria oko. Na ilmu sihir ou wkedi le Simon. Simon wase lis wale wak oko de, wadien kamuolo ou wafik ni heit-hat sawuan yrok. Wlan ni ilmu sihir owuok de, na Samaria kadio ysmit lien ou, yiwua main kat fe ou. Filipus ou whok latiot ofo nai ysmit lien yiwua main fe sihir ou. Mahin sihir ou wsa fle. Wsa fle wkashok wrana kawuak wan nai wto wfle wewer na marok, wto wfle wewer fe wto ou wmres deri wkanas. 10-11 Na marok om moso na sihir ou. Nai yfle fot nai ywet fot ynok sele yto: “Bosi Nago le ma wfe wedlau le wko. Bosi na hra wkedi le ‘Kohok Wafleu,’ le wko.” Fo yoso kmiet ou. He hra wsiok heit-hat ni de yiwua main, ei yoso kmiet ou. 12 Mahin Filipus ou whok waka mde, wrana tnen giet mabe Yesus. Filipus ou wrana fe Yesus wabe Nago wfe wedlau hra wteye wale, Nago wteye Yesus wabe wkosia kat nai yehin yfe ni sgia. Filipus wrana wto: “Nan nke nka nten nkaso man Yesus Kristus se bo nan nloit nse Nago wfe kerajaan. Nten nkaso man Yesus se bo wslonti kawuak nan nibri om.” Mde na marok yoso de ysamenie yten ykaso man Yesus. Na dla fot na dli fot ysamenie ynok tmol man Yesus, mde yka yhnak ykan man Filipus wsrik kat kla fei. 13 Sihir Simon fot, woso de waisi waka whnak wkan man Filipus wsrik kat kla feu. Sihir wto wten wkaso man Yesus wak mahin, wten wkaso kaf kat deri, wnok tmol rorwain dait wak wabrim. Sihir whot ni owuok ni mlais hra Filipus wsiok ei, de wteit yrioro kat wawua main mde wto wain siwain Filipus. Wain siwain se whot kawuak ou wsiok ni heit-hat owuok eke.
14 Yesus wfe na tmak rasulb ei hra yese yik Yerusalem, yoso mabe na Samaria, mabe yten wale ykaso man Yesus. Yoso ofo na tmak rasul ei yteye lak man yse ale, yto yihenek yto yein saswain, yse na Samaria ei. Mde yteye lak man le ma Petrus wadien Yohanes la yein yse Samaria. 15 Ofo Petrus wadien Yohanes yein yehin Yerusalem, yhok yik kota Samaria de, la ysikafit yin na. La ysikafit yin na Samaria yto: “Nai fe nau Nago, nhnak fot Nawua hra Makohok om mloit fot mse na Samaria ekei yibri.” 16 Yo wanik deri na Samaria ei yten wale ykaso man Tuhan Yesus, Filipus ou wsrik kat wale ei yidien kla mahin, Nago whnak dait latiot ou Wawua Hra Makohok om mais latiot mloit mse ei yibri ra. 17 Ofo Petrus wadien Yohanes la ylak ynai yin na Samaria ei fe mres-mres, ywien fien Nago Wawua Hra Makohok om wfe fle kohok mais mloit tnes mse ei yik, mslonti ei yibri.
18 Mde na sihir ou wbahoin fle okom. Sihir whot fo, Petrus wadien Yohanes ylak ynai yin nai ysai fo, Nago Wawua Hra Makohok om mfle kohok mfla ei, mde sihir ou wkas tlok wbahoin fle kohok man fot ou, se bo wlak fot wna yin na man ei. De wwaini man ei wto: “Pitis le mkom.
19 Nan nhnak fot fle kohok kom man tet. Tet taisi fot tlak fot tna yin nai ysa se bo Nago Wawua Makohok om mloit ei yibri ra mfla ei.”
20 Mahin Petrus whar kat Simon wto: “Hyee! Nen nrana ro kat ni mit ma eke? Nen nrana sgia kat le mkom. Kafir mat nen nadien nfe pitis ekei, wa nen nbahoin sele nto nkain madien pitis ni hra Nago whnak tkoin deri, o le ma Wawua Makohok om. Wa Nago le whnak deri man na hra ynok tmol mse ou wak.
21 Hra nen nbahoin nto naka nsiok sisi nadien mam mi ni mik ke? Mdain. Nen nabri om mbot madien Nago aa? Mtatol madien Nago aa? Nabri msgia! 22 Mto mde ke fo nket ntehla kat ni sgia hra nen nnok tmol yik nabri ei. Nsikafit man Tuhan. Nket ntehla kat ni sgia bo Nago wmro fe nen de wwien fien oli nen afe, fe hra nen nsae wat-wat ni ei. 23 Tet thot nen nabri okom mkrek, nkaf sarok kat mam, madien sablit sgia mfla nen, sablit sgia mho nen, nen nnok deri ni ysgia. Mde nket, ntehla kat ni sgia.”
24 Mde na sihir Simon ou waliak wrana oli man rasul lak ei wto: “Ha la nan nsikafit wanik wata man Tuhan ou, se bo ni ysgia hra nan nrana wale eke yhok yba dait yin tet.”
25 Mde, Petrus wadien Yohanes la yik latiot kota Samaria okom de yrana kein-kein Tuhan wfe giet mabot. La yrana fot fe ni hra kamuolo yhot wale ei, Yesus le wsidik wale. Mde la yehin yka yein oli yse yfe wi mak kota Yerusalem. Yik latiot fan kedi de, yrana tiwain-wain giet mabot yik tar-tar kampung fobi Samaria, kawuak mde yhok oli yik Yerusalem.
Filipus Wadien Na Wafleu Wahin Fobi Etiopia
8:26-40
26 Oko fo Tuhan wfe malaikat mreu wain wse Filipus wak. Malaikat ou wto man Filipus wto: “Nen nsidik nain la, nain nse tasik blen, fe fan domri hra msiolok mahin kota Yerusalem main mse kota Gaza.” 27 Mde Filipus wsidik wain, wsiolok wse fan domri hra mse kota Gaza. Wain kayi de, wak fan kedi, whot wahin afat na wafle mreu. Whot na mreu wahin fobi wat hra nai yto Etiopia, na wafleu. Na wafle oko ou wabe bendahara wafleu wak fobi Etiopia. Wabe bendahara wslonti pitis wabe Sri Kandakem, hra mabe ratu fobi ana. Hra oko fo wsikafit fien wak Yerusalem,
28 wsalit oli le wko, wsalit wse fobi ou wa wak fan kedi. Warin kereta le mkom, kma sabarak hra kuda wkein wanik. Wleli wak kereta wabri ago, de wbaca. Wbaca wak katik fari mrem. Katik fari hra okom hra Nago wfe wedla bahe nabi Yesaya ou le wsroin. 29 Mde Nago ou Wawua om mrana man Filipus mto: “Nain la ntatol fe kereta okou, nsliliwain la fe kereta ou.”
30 Ofo Filipus ou wsese wren fe kereta okom, ofo woso fo na wafleu wbaca katik fari okom. Mde Filipus wefitwain man na wafleu wto: “Tuan, bo nen nnok sadik ni hra nen nbaca eke?”
31 Mahin na wafleu wkesi wto: “Hau, mdain deri, bo tet tnok mde le sie? Na mre yrana skadhok man tet, se bo tnok?” Mde wbahe wfe kereta om mtono, mde wwit fien Filipus ou warin. De warin, wadien la yleli sisi yein.
32 Nas hra na wafle ou wbaca ou le hra kom:
“Ysria ou, ysiriau wde le domba, domba hra bo nai ykerek, nai ysiriau wain wse wi ma nai yto yskau, mde kayi le nai yti kein domba wain wse wi nai ykerek wdioro.
Wtono deri, wluwa wde le domba wawet, domba wawet, nai yti kein wabe ykerek wgien ei,
wtono, wsatmor.
33 Na oko nai ytbekein, yasak klo feu,
ha ou wsiok dait ni mrem msgia mahin,
nai yto omuok deri ni fe ou,
ysiok dait man ou mtatol madien hra Nago waisi.
Na mre wrana oli mabe wta kein ei afe? Mdain,
fe waigi wsadmik kat deri, wak oli dait wale fobi ko.”c
34 Na wafleu wbaca ayat eke ydain fo, wefitwain tiwain man Filipus wto: “Yo ma, nen nto de sie, flet oko mabe nai sio? Bo nabi ou wsroin ni eke wrana man na mna ou afe, wrana man na wat mreu?”
35 Mde Filipus wrana wan na wafleu wto: “Wrana fe Yesus le wko.” Fo Filipus wrana kakniet mabe nas oko mrana mflet mabe Yesus, mde wrana oli skadhok man na wafleu mabe Giet Mabot mabe Yesus om, mabe waigi mahin wsidik oli.
36 La yein-yein wata, kayi de yik fan kedi fo, na wafleu wto: “Kla mre le waiti ko. Ofo nen nsrik wata kla fe tet.” 37 [Mde Filipus wto kein wto: “Yo, ofo nen nnok homo man Nago, nhnak nabri oko man ou.” Wsamenie wto: “Yo, tet tnok fe hra Yesus o le ma Mesias fot, Nago wfe wet fot ou.”] 38 De na wafleu wbahe wfe kereta oko wtono, la yeis. Yik kla aiti fo, Filipus ou wsrik kat kla fe na wafleu.
39 Yhok oli yehin kla fo, Nago Wawua om mkosia kat Filipus ou wsiet wahin na wafleu wsifuon, whot oli dait. Mde na wafle oko wkashok mfle kat, wain sros wsalit oli wse fobi ou wa. 40 Mahin Filipus ou whok ro kat kdie wale wak kota Asdod ou, wain kat fe wi ekei, wrana tiwain-tiwain giet mabot mak kota oko kadio kat kayi de whok wak kota Kaisarea.