Paulus Wrana Hatot Ni Wak Raja Agripa Wbariomo
26:1-11
26
Mde raja Agripa wto man Paulus wto: “Tet thnak man nen nrana ni mrei yin toso.” Mde Paulus webet wna wrana hatot fe ni hra nai yadon man ou wto, 2 “Nai yfe nau raja Agripa nen, hra ke fo tet tkashok fe hra nen nhnak tet tkro tak nbariomo, trana tahak kat ni. Na Yahudi yadon-adan wata, mahin trana tahak kat mabe tabri om melek. Tsiok dait ni mre. 3 Tet tkashok fe hra nen nnok homo-homo rorwain na sa Yahudi mam mi ni mam mi, mam mi ojin trar, madien fot ni hra yolot fe mam mhoyok frit afe msadir sgia. O le ma tet twaini nen noso kmiet homo-homo tet.4 Na Yahudi ynok kadio kat tet tahin kamuolo twet tak fobi tet ta, kayi de tfori toros, ofo tet tain tti tse Yerusalem.a 5 Ei ynok lis karmiak wale tet, bo ei yeisi nayi, ofo ei yrana hatot man nen mabe tet, fe hra tet tloit tse satatik agama mam mi hra mtian mkanas mewer kat, hra nai yto satatik Farisi, ofo tet tsiok sak-sak dait ni ha, tet ttrein tsiok karmiak kat ni hra ysiwain tiktol yidien ojin Taurat.b 6 Tet tkro tak ko, nai ykerek sadir fe tet fe hra tten tkaso man Nago. Ni hra kamuolo Nago wkadoin wkaitti-ti wale man mam mate kokos, ni okom tet tsamenie fe mowuo kat. 7 Tet tmres dait ha, na Israel mam kadio, na sa yahar teit lak mam kadio kat, mam mten mkaso man Nago wabe ni hra ou wkadoin wale, ofo ou wsiok kayi man mam. O le ma tali man, amuk man, mam mtrein msaesik kawuak Ou. Nai fe nau raja nen, kadoin tiktol okom le ma molot fe na Yahudi yadon tet. 8 Hra nan nke nkahiowain kat sonat fe me? Hra nan nto Nago wkosia dait nai yeigi ysidik oli?
9 Kamuolo tet tke fot le ma tkanas, thar kat fot na kadio hra yrana fe Yesus na Nazaret ou wkedi om.c
10 Tet le ma tsiok sgia fot na kadio kat yik Yerusalem hra ysaesik man Yesus. Imam yifle yhnak fle kohok fe tet tabe tkein krit na marok eke yse bol hirit. Nai ysarife na eke, ofo tet le ma tsamenie fe yibe nai yska ykak. 11 Kamuolo tet tain ta-ta kawuak tak na Yahudi mam mfe bol sikafit man, bol sikafit man, tsiok sgia na hra eke. Tet thorot hewain se bo ei yaha, ykan yakres Yesus. Tet ttrere kayit-yit karmiak kat ei. Tet tain fot tse fobi wat man ei, tse kota man, kota man, tsiok sgia fot na man hra yde eke yik ana.
Yesus Wwit Fien Paulus
26:12-23
12 Mde eke fo tet tak fan kedi tse Damsyik, tatik katik fari mahin imam yifle yik. Ei yhnak fle kohok fe tet yibe thirit na kadio kat yik ana hra ytiksi Yesus.d 13 Nai yfe na raja Agripa nen, tali fle mkro trik fo, tet tak sonat fan kedi, ofo thot ni mre mhak, mdhen mewer kat mahin tali mteit om, mtfelek kat mahin yik ago mnarak mkohli kat tet tadien tanak hra mein sisi, ofo tsifuon yikali. 14 Mde mam mti kadio kat mse fobi aiti, ofo tet toso na mre wsalo Ibrani wrana man tet wto: “Saulus, Saulus, hra nen nsiok sgia ta-ta buon tet tabe? Nen nsafle buon fe me? Bo na mna nen nkain kafir mabe nen nto nsa fle lis nadien tet.”
15 Mde tet tfalas tto: “Nai fe na Smau, na sie ma nen?”
Mde Tuhan wto: “Tet tke le ma Yesus hra nen nsiok sgia sawuan tet. 16 Nsidik la nkro trik. Tet tyen tkan kom man nen tto tkosia nen nabe wedla na bahe nan tet. Tet tbahe nen nain nse na sa wat-wat, nrana siar fe ni hra nen nhot wale yehin tet tak ke, yidien fot ni hra basak tet tkakniet yin nen. 17 Basak nai yiyaka yehin fot na sa nen na Yahudi afe, yehin fot na sa wat-wat, yto ysiok sgia nen, ofo tet tkaka nen, tkosia kat nen nahinti kat ei kadio kat. Tet tteye nen nain nse ei yik, 18 se bo nen nkodher ei ysifuon yhak, yhot tnes ni, ofo yhokti kat yehin wi mamian, yka yse wi mahak. Yo, yehinti kat klebet wafle ou, ylelek oli yse Nago wak. Mde na kadio hra yten ykaso yse Yesus tet tak, ofo Nago wyan kat ei yfe satian ei, wkoriet ei yloit yse na safuk man hra Nago wkain.
19 Nai fe nau Raja Agripa nen, mde le ke Tuhan Yesus wyen hata wkan om man tet mahin wi mayehet ago. Mde ni hra ou wbahe man tet, ni eke tet tkan bren kat dait, ha trana siar sawuan ou wfe giet mabot om.
20 Tteik tahin Damsyik, tse Yerusalem, tse fobi katak Yudea, kayi ti-ti tsiar tse na sa wat-wat yik fobi katak. Tet trana tkakniet sawuan ni man fot na Yahudi, man fot na sa wat kadio kat, tbahe ei yket, yehinti kat ni yisgia hra ysiok ei, ofo ylelek ysalit oli yse Nago wak. Tet tkakniet se bo ei ysiok kawuak homo-homo deri ni yibot hra Nago waisi fe, se bo na wat kdie man ei yihot ni eke, ofo ysamenie fe yibe ei yket toron kat wale.e 21 Oko le ma na Yahudi yslon tet tak Nago wfe bol kohok mklik om, yto yska kat ybatiorok tet tkak wata. 22 Mahin Nago wkosia kat tet tahin kafir okom. Kayi de hra ke fo, Ou eke wkaka fien kawuak tet se bo tkak dait ha, trana lis Ou wfe giet mabot kom man fot na hra yiwet, man fot na hra yifle, mde hra ke tet tkro trana hatot man nan kadio kat. Giet man hra tet trana okom, ni mre mwat dait ha, trana tiktol deri giet man hra kamuolo Musa wadien nabi kadio kat ei yrana krek fe walem – 23 Ou le ma Mesias, bo nai ysiok sgia, whlet ni warok kayi de wkak. Ofo ou le ma walin, wsidik lalie, wahinti kat nai yeigi. Ofo wrana siar man fot ou wfe na sa Israel ei, yidien fot na sa wat kadio kat, wabe na mna ou wmres kat wdhen, wnarak wse fobi mamian okom. Mde na kadio hra yten ykaso yse Ou wak, ofo Ou watik fien ei yehinti kat wi mamian, yka ysalit yse Wono Nago wak.”f
Paulus Wkait Man Agripa Se Bo Wnok Mse Yesus Wak
26:24-32
24 Paulus wrana samne wata ni kadio kat hra wsiok yelin eke fo, Festus wsalo komar whoa kat wto: “Woi, Paulus! Nen nrana buon ni mit ma hra eke? Nkoli! Ni warok hra nen nsae yik nabri ekei le ma yolot fe nen nkoli!”
25 Mahin Paulus wada wto: “Nai yfe na Festus nen, tet tke tkoli dait, tet tsablit om mbot deri! Ni kadio kat hra tet trana ke trana toron kat, nai ysamenie fe kadio kat. 26 Ni kadio kat hra tet trana tahak kat man nen, ni eke nanak wafle raja oko wnok lalie wale. Oko le ma trana samne wata ni eke yin ou. Tet tnok toron kat mabe hra ou wnok kadio kat wale ni eke. Fe hra ni eke yibe dait ni ylak diaman ha, yhok hata wale kadio kat yik wi mayiye, nai ynok kadio kat. 27 Nai yfe na raja Agripa nen, se nen nsamenie fe ni kadio hra nabi yrana krek fe wale, afe? Tet tnok fe hra nen nsamenie fe wale!”
28 Mde Agripa wto man Paulus wto: “Hyee? Nen nnok nto nsiok tamli kat tet tabe na Kristen tadien hra sguo ko, nde sie?”
29 Mde Paulus wto: “Yo oma, nadien hra sguo ko, afe nadien basak kdie – tet tsikafit man Nago se bo nen nadien fot na marok hra yoso ni hra tet trana kom, nan kadio kat nlelek, nibe na Kristen nde le tet. Mahin deri tet taisi dait nai yhirit nan nidien rantai mrem mde le hra nan nhot nai ykait sonat tet tke!”
30 Mahin oko fo raja Agripa wadien wahano Bernike yidien fot gubernur Festus ei ysidik ykro yelin, ofo na hra yik eke ysidik ykro sisi kadio kat.
31 Ei yhok yse tlein ra, yrana mawain sisi ni yin mrei yto: “Na ko wsiok dait kat ni mrem msgia mtatol mabe nai yhirit ou wse bol hirit afe, nai yska ou wkak. Mdain!”
32 Mde Agripa wto man Festus wto: “Yo, na kou wsiok dait kat ni mrem msgia. Mabot ma nen nnahla kat deri ou. Mahin mdain, fe hra ou wkader kohok wale mse Kaisar wak!”