Paulus Wkader Kohok Wse Kaisar Wak
25:1-12
25
Gubernur Festus whok kmo wase amuk tolik wak propinsi oko, sba fo wahin Kaisarea whri wse Yerusalem. 2 Whok wak ra ofo, imam yifle yidien na Yahudi yifle marok kadio kat yka yorin fali Paulus wse ou wak. 3 Ei ywaini kayit-yit man ou yto: “Nai fe nau, nto nhares man mam, nbahe wata Paulus wsalit oli wse mam mik Yerusalem ko, se bo nen nsarife ou wak ko.” Ei ysadir baen yde le ke fe hra ei ysin yto yleli kerek Paulus wak fan kedi ofo yska kat wkak. 4 Mahin Festus wto: “Paulus okou nai yhirit sonat wak Kaisarea. Kya mre fo na mna tet tsin tsiolok, tsalit oli tse ale. 5 Mto mde ke fo, mabot ma nai yifle mrei yehin nan nik nidien sisi tet faf fsiolok fse ale, se bo nan norin fali ou nadon ou wak ana. Mde hra wto wsiok sgia ni mreu wtian, ofo thirit ou, yo wto wdain, ofo wdain.”6 Festus wase kaf kat deri wak Yerusalem, bo mal kayi amuk mtadolik afe amuk yahar, sba fo ou wsiolok oli wse Kaisarea. Wak ale ou wase kayi de tali, ofo wbahe nai ybalifis, wwiehla fien Paulus waka, se bo wkerek sadir fe ou.
7 Paulus whok waka mde na Yahudi hra yka yehin Yerusalem ysidik ykro kohli kat ou de yrana sak-sak kat ni adon yitian yin ou, mahin ni mrei ytatol dait kat.
8 Mde Paulus wkesi wto: “Ni adon wanik hra yrok ekei wata deri, mahin tet tke telek, ttian dait. Tsiok dait kat ni mrem mewer kat man ojin Taurat na Yahudi yfe, afe man bol kohok Nago wfem, afe man fot Kaisara, raja Roma ou.”
9 Mahin Festus wsadir wtwan fien na Yahudi yibrim, wto man Paulus wto: “Nen naisi nhri oli nse Yerusalem, se bo nai yondor ysarife nen nak ra, nak tet tbariomo? Yo oma, nrana la man tet tadien hra ko!”
10 Mahin Paulus wto: “Hau, Kaisar sok ma wkerek sadir fe tet! Hra ko fo tet tahinti kat nen, tarin tse Kaisar wbariomo. Fe hra nen nnok rorwain wale tabe tet thmes. Tet ttian dait kat, tsiok dait kat ni mre msgia man na Yahudi. 11 Mde hra tet tsiok kayi ni mre msgia kat, mtatol madien nai yhirit tet tkak, ofo tet taisi nai yska tkak. Mahin ni hra ei yadon yin tet ekei ytatol dait, ydain deri, ei ygebra. Na mre wfle kohok dait wto whnak sak-sak tet tain tse na Yahudi eke. Hau, tet tkader kohok mse raja Kaisar le mke. Na mna ou sok ma wkerek sadir fe tet!”
12 Festus wsadir saswain wadien ou wfe na tmak kayi de wfot, ofo wkerek sadir wan Paulus wto: “Nen nke nkader kohok wale nse Kaisar wak. O le ma tet teye nen nain kayi nse na wafle ou wak!”
Festus Wrana Hatot Fe Paulus Wan Raja Agripa
25:13-27
13 Amuk tolik afe hat yewer fo, raja Agripab wadien wahano Bernike la yka yse Kaisarea yibe ytfoi fien Festus, fe hra ou wabe gubernur waifi. 14 Fe hra la ysin yese amuk warok yik oko fo, Festus warin fali ni hra Paulus wfe yse raja ou wak wto: “Mam mik ko fo, na hirit mreu wase wale der man der man wak ko, fe hra Feliks wto wain, de wlaktoin kat waheit kawuak wak bol hirit.
15 Firi-firi ko tet thri tse Yerusalem, ofo imam yifle yidien na trar hra yslonti na Yahudi, ei yadon na okou. Ei yeisi kayi yto na okou nai yhirit wkak.
16 Mde tet thar kat ei tto: ‘Noso la, na sa man Roma mam msiok sak-sak dait ni yde le eke ha, mam mhnak lokdi na hirit ou wkro sisi wadien na hra yadon ou, se bo wkesi fe ni adon ei, afe wrana tahak fe ni hra ou wsiok ei.’ 17 Mde hra na eke yka, ofo tet twoi-wai dait. Uwade kat fo tet twiehla fien ei yidien na hirit okou yka ybalifis yse tet tak, se bo tet tkerek sadir fe ou. 18 Mahin na hra yadon ni ekei ykro kohli kat wale, ei yrana sak-sak ni. Tet tnok bosi mabe ei yadon ou wsiok ni masgia mtian mrem, mahin mdain. 19 Ei yadon deri yto ou wsiok sele agama ei yi. Ei yheden mawain deri fe ou, yto na mre hra wkedi wabe Yesus ou waigi kawuak, mahin Paulus wrana wkanas kat wto: ‘Hau, ou le wsidik wron oli!’ 20 Mde tet tke tkahiowain tsarife dait ni hra mde okom. O le ma tet tefitwain deri tto: ‘Nen naisi nhri oli nse Yerusalem, se bo tet tsarife nen nak ra, afe?’ 21 Mahin Paulus wkader kohok wto: ‘Hyee, raja wafle Kaisar sok ma wkerek sadir fe tet.’ O le ma tet tbahe nai yhirit oli ou wak bol hirit. Tet ttek fe ou kawuak de tet teye wse Kaisar wak.”
22 Mde raja Agripa wto man Festus wto: “Tet taisi toso mahin na mna wgiet.” Mde Festus wto: “Yo, klen sawok na mna nen noso mahin ou wak.”
23 Klen sawok kdie fo, raja Agripa wadien Bernike la yka sisi yidien na sae kahat yifle yidien fot nai yifle kadio kat yik kota okom, nai ysrar ylia kein ytrik yse bol pengadilan, ofo Festus wbahe nai ysria Paulus wtrik fot.
24 Mde Festus wto: “Sma Agripa! Naka, nadien nfe na kadio kat hra nik sisi wale mam mik ko, nhot la na kou! Na Yahudi kadio kat man hra yehin Yerusalem, yidien fot man hra yik lokdi Kaisarea ko yadon kadio kat ou. Ei yka yse tet tak, ywak lo yto na hra wade okou waheit wron senfe dait. 25 Mahin mhakta man tet, ou wsiok dait ni mrem msgia mtatol madien nai yhirit yska wkak. Tet tto tkerek sadir fe ou wak tiktol Yerusalem, mahin ou wkader kohok wse Kaisar wak, ofo tet tkerek sadir mabe bo teye wain wse Roma. 26 Tet tto tsroin katik fari man raja wafle ou wak, trana hatot fe na oko, mahin tet tsroin mde sie? Ni mrem mtatol dait kat. Oko le ma tet tatik waka wse nan nik, wse toron kayi le raja Agripa nen nak, se bo nen nefitwain skadelek ya, ofo bo tet tsroin ni hra wrana ei. 27 Fe hra tet thes tteye sabloit deri na man hra nai yadon-adan yhirit, yorin fali sak-sak tkoin deri kou, mahin wdain. Mabot ma tet toso ni ysgia mre hra ou wsiok, ofo tsroin man nai fe na Kaisar se bo ou wnok.”