Gubernur Feliks Wkerek Sadir Fe Paulus
24:1-27
24
Amuk mahot yewer wale fo, imam wafle Ananias wadien fot na trar yifle hra yslonti na Yahudi yidien fot na wafle mreu hra wsaeti homo-homo ojin hukum na Roma yfe, hra wkedi wabe Tertulus, nai yikan eke yein, ysiolok sisi yehin Yerusalem kayi de yhok yik Kaisarea. Yhok yik ale fo, ei yorin fali Paulus wse gubernur wak.
2 Mde nai ywiehla fien Paulus waka fot wse gubernur wak. Whok waka fo, na wafle Tertulus wsidik wahin wrana ni, warin fali Paulus wan gubernur Feliks wto: “Na fe na kohok nen, mahin masayen kayi de hra ko, nen nslonti wale na sa mam mi midien mbot karmiak, molot fe mam mble mbot lis kawuak, fe hra nen nsablit lis nsiok ni yibot-bat warok mse na sa mam mik. 3 Mam mhdin kamyi kat nai yfe na Feliks nen nabe nsiok ni ybot yible karmiak kat yin mam. 4 Mahin se bo nen nkliowo dait afe nkahiowain oli dait fe ni hra mam mrana ke, tet trana lis oli dait ha, tet twaini bakoko fe hra nen noso la ni hra mam morin fali mrana yin na wafle nen.
5 Na dla hra oko mam mnok sros waleu wabe watik salo sawuan wak wi warok, wolot fe na sa Yahudi mam mik fobi katak mrewer kadio kat fe ou. Bo nen noso wale mabe na safuk man hra ysaesik yin Yesus na Nazaret ou, afe? Oma, Paulus oko wabe na wafle mreu wahin ei yik.
6 Ou eke wsiok sgia hewain fot Nago wfe bol kohok mak wi mahon, mahin mam mslon wale ou, mto mhirit ou wtatol wadien mam mfe ojin. 7 Mahin na sebe wafle Lisias wadien wfe na sae kahat warok ei ykokaka kat na ko wahin mam mik. 8 Mde ou wbahe mam mein morin fali ou wse nen nak. Na mna nen nto nefitwain skadelek ni fe na ko, ofo nen nnok sros kat mabe ni hra mam madon yin ou ei ytoron kadio kat. Mam mto tkoin kat.”
9 Mde na Yahudi kadio kat ysamenie fe ni hra ou wrana ei yto tkoin kat.
10 Mde gubernur wna ebet Paulus se bo wsidik wrana fot ni, mde Paulus wto: “Nai fe nau, tet tnok mabe der man, der man, nen nabe wale hakim wafle, nslonti roro wain na sa hra kei. O le ma tet tkahiowain dait ha, tkashok trana ni hra tet ta ke yse na wafle nen nak.
11 Nefitwain skadelek deri man na hra yadon tet eke, bo nen nnok kayi mabe tet tgebra dait, ha, ni hra tet trana man nen ei ytatol yitoron kadio kat. Amuk yahar teit lak malalie tet thri thok wale tse Yerusalem, tto tsaesik tan Nago. 12 Na hra yadon tet eke ygebra deri, fe hra ei ytatiere fe dait tet tadien na mrei mhoyok mik bol kohok Nago wfe, mdain! Tet tolot fe dait na mre yheden frit yik bol sikafit mabri mrem, afe yik wi wat mrem mak kota Yerusalem om, mdain. 13 Nefitwain skadelek deri wata man ei, ofo nen nnok kayi tkoin kat mabe ni hra ei yadon yin tet ei ygebra deri, ni mre ytatol yitoron dait kat.
14 Mahin tet tsamenie wata deri man nen mabe tten tkaso lokdi man Nago mde fot le na Yahudi mam mate kokos ei. Tet tke tabe fot wedla na safuk man hra nai ywit yto Fan Toron, hra na eke yadon yto na safuk man mam mgebra deri. Tet tke tsamenie fe ni kadio kat hra ytatol yidien ojin Taurat. Mde fot le ni hra nabi ysroin wale yik katik fari makohok om, tet tsamenie fe fot kadio kat. 15 Na hra yadon tet eke ynok tmol mse Nago wak ysadiak sisi yde fot le tet. Mam mikan kadio kat msamenie sisi mto basak fo, na hra yeigi, ofo Nago wsiok ei ysidik yron oli. Na man hra ysiok ni yibot, yidien fot na man hra ysiok ni yisgia, ysidik yron kadio kat. 16 O le ma tet tsiok sanini hewain se bo tabri om mbot mrnin kat man fot Nago, man fot na tkoin.
17 Nai fe na, tet tase batara wale der man, der man, kayi de firi-firi wa ko tet tsalit oli tse Yerusalem le mke, tatik pitis mabe thnak man tet tfe na sa man mam hra ybhait, yidien dait ni, mabe fot thnak ni sanfe main mse Nago wak.
18 Hra oko fo tet tbot-bot deri, fe hra tet thara kat kla kohok fe tkan om mfot wale. Mde tet tain tse Nago wfe bol kohok mabe tsanfe ni man Ou. Tsanfe samne wata ni tak bol kohok Nago wfe mklik om, mde na Yahudi mre yehin propinsi Asia yka ytatiere fe tet tak oko. Hra oko fo na mre yidien dait tet. Tet thoyok frit dait tadien na mrei.a 19 Ei le ma yka ykamie fien tet, ysalo rewer yrowak frit, ybatiorok tet kayi de bhait wa tet tkak. Hra na eke yka dait yse nen nak fe me? Mde hra tet tsiok sgia ni mre mde, ei sok le ma yka yorin fali hewain tet tan nen, ha, na wat hra yka eke yila! 20 Afe na hra yadon tet eke, mabot ma ei yrana tahak kat mabe kwan firi wa ko, tet tkro tak Mahkamah Agama ybariomo ei, ofo ytatiere fe tet tsiok buon ni mit ma msgia om. 21 Bo ni mres deri hra tet tsalo kaf kat tak ei ybariomo - o le ma tto: ‘Nan le nkerek sadir fe tet fe hra tet tsamenie fe na eigi basak ysidik yron oli.’ Ni mres deri le hra okom.”b
22 Gubernur Feliks oko wnok homo wale mabe safuk Fan Toron okom. Mde ou wbahe nai ysiar yehinti kat ou, wto: “Mtol wale. Mharfe le wko. Bo Lisias, na sebe wafle ou waka sba, ofo tet tsadir trar fe oli nan.”
23 Mde ou wbahe wfe na sae kahat wafle ou wto: “Nain nhirit sba oli Paulus oko, nsitodo kawuak. Mahin deri, nliokeit wanak wai yka ytfoi ydihan wata ou.”
24 Tali tolik afe hat kdie oli fo, gubernur Feliks wadien wsmian Drusila, na dli Yahudi om, la yka yto yoso ni mahin Paulus wak. Ofo Feliks wbahe nai ywit fien Paulus whok wahin bol hirit mabri, waka fo, wbahe ou wrana fe Yesus. Mde Paulus wrana wkakniet fe mabe nai yten ykaso man Yesus Kristus.
25 Hra oko fo Paulus wrana fe mde sie ma nai ybot-bot toron kat, yibri yelek kat yin fot Nago yin fot na tkoin. Mde ou wrana fe nai ykein ykan mtodo se bo ysiok dait ni ysgia, [mde hra ykashok-shak dait, ybahoin dait na man ei yi ni ei yim mrem, yemir sak-sak dait.] Ou wrana fe fot mabe basak fobi mkahlia kat fo, Nago wkerek sadir fe na tkoin kadio kat, bo whirit kayi na tkoin fe ni ysgia yrok hra ei ysiok hriok yewer kat ou. Paulus wrana samne-mna wata fe ni eke, ofo Feliks ou waliak, ofo wbahe Paulus wsatmor. Ou wto: “Mtol! Mharfe le oko! Nen nain wata la. Basak tto taisi toso nen nrana ni kdie fo, tet twit fien oli nen.” 26 Hra oko fo Feliks wto bosi Paulus whnak pitis mre yin ou se bo ou wna bhait ou. O le ma kes-kes fo, ou wwit fien Paulus waka wse ou wak, yibe la yrana ni. Mahin mdain.
27 Kayi de der lak oli kdie man ei yewer kat fo, gubernur Feliks oko nai ydanhok wadien Perkius Festus. Mahin Feliks oko wais latiot fo, ou wto wbalalan fien na Yahudi yibri, ofo wliokeit Paulus waheit kawuak wak bol hirit mabri.
