23
Paulus wsitodo wata na Mahkamah Agama ekei fo, wto man ei wto: “Woi table wa nan, madien kamuolo kayi de hra ko tet tsiok sawuan ni yse Nago wak, ofo tsiok sgia dait ni mre man ou, ha, tabri om melek kat mse ou wak.”
2 Paulus wkesi toron mde ke fo, imam wafleu wkedi Ananias wbahe na hra ykro yitaren Paulus ou ybaktak wgiet om. 3 Mde Paulus wto man imam wafle ou wto: “Woi, na wagebra nen, bo Nago wbaktak ya ngiet okom! Fe hra nen nleli nak oko nto nkerek sadir mabe tet mtatol madien ojin Taurat, mahin na mna nen mres nsiok sero ojin oko, mabe nen nbahe nai ybaktak tet!”a
4 Mde na hra yik ekei yto: “Hyee! Nen nke sok ma ntbekein Nago wfe imam wafle ou, waa?”
5 Mde Paulus wto: “Table wa nan, tet tnok dait bo ou ekei wabe imam wafle. Fe hra nai ysroin wale yik ojin Taurat om yto: “Nnok deri, na wafle hra wsiokti na sa man nan, ofo nrana wain amot wala!”b
6 Paulus wnok wale yikan ekei yehin safuk lak, mre yibe na Saduki, mre oli yibe na Farisi. Ofo ou wsalo tlafle wak Mahkamah Agama ybariomo wto: “Woi table wa nan. Tet tke tabe na Farisi, tono tate kokos wai yibe fot na Farisi kadio kat. Hra ko fo nan nto nkerek sadir fe tet tabe tsamenie fe nai yeigi basak ysidik oli.”c 7 Wto ro kat mde ke de, na Farisi yidien na Saduki yrewer yheden frit, yfla flalie, mre ywat, mre ywat. 8 Fe hra na Saduki yto, na mre wto waigi ofo wsidik oli dait. Ei yto fot yto malaikat dait mre, yto fot klebet afe ni yiwua dait mrem. Mahin na Farisi ysamenie fe ni ekei kadio kat.d
9 Yheden frit ysalo fle karmiak kat. Mde na Farisi satrio mrei hra yibe guru agama Yahudi ysidik ykro ysalo fle yhar kat yto: “Mahin mam mik, na kou wsiok dait ni mre msgia. Bo hra ni yiwua afe malaikat ma yrana ni fe ou? Mto mde ke fo, mbot deri!” 10 Hra oko fo ei yhoyok frit msamsa karmiak kat oli, ykein sadak Paulus wse ta, wse ta, wabe mre yto ou wsiok ni yibot, mre yto wsiok ni ysgia. Ei ykein krit Paulus kayi de na sebe wafleu waliaksi ykein ou wkan om mtahak. Mde ou wbahe wfe na sae kahat ysiolok yein tamli, ykohriak kat Paulus wahinti kat na eke waka, yotik wsalit oli wse mla wasa ago.
11 Madien amuk hra oko fo, Tuhan Yesus wkro lolowain Paulus ofo wto: “Naliak amot. Nabri om mhron wata! Nen nbren kat nrana fe wale tet tkedi om mak Yerusalem ko. Yo, mde le eke basak nen nrana fot kayi tet tkedi kom mak fot kota Roma.”
Nai Ybakaisin Yto Yska Paulus
23:12-22
12 Uwade mlabit kat fo, wedla Yahudi mre yleli safik yfafti ni yto yeit oli dait ni eit, yoko oli dait kla mrem, kayi de yska sba Paulus, ofo yeit tnes ni eit. 13 Na hra ybakaisin eke yikan na lak yeigi (40) mewer.
14 Ofo ei yein yse imam yifle yidien fot na trar yifle hra ysiokti na sa Yahudi ei yik mde yto: “Mam mke mfafti wale ni mabe meit oli dait ni eit mrem kayi de mam mska sba Paulus wkak. 15 Mto mde ke fo, nan nke nidien fot Mahkamah Agama nwaini sisi man na sebe wafleu watik fien Paulus wsalit oli wse nan nik. Nrana deri nto nan neisi nefitwain skadelek oli ni mre yin ou. Bo mam mke mlak diaman mik fan kedi. Paulus waka fo, mam mska wkak.”
16 Mahin Paulus waro, o le ma wahano mfe wet wadla ou, woso kmiet ni hra ei ysin ekei, mde ou wain satmor wse mla wasa ofo wrana salo waha hlok ni eke fe wamuk Paulus.
17 Oko fo Paulus wwit fien na sae kahat wafle man ou waka ofo wrana wto: “Wet wafori ko waisi wrana ni mre yin na sebe wafleu. Nadien twa bakoko ou wse na wafle ou wak.” 18 Mde na sae kahat wafle ou wadien twa wet ou wse na sebe wafleu, ofo wrana hatot wto: “Paulus hra nai yhirit ou wwit fien tet, wwaini fe tet tadien twa wet wafori ko waka wse nen nak, waisi wrana ni mre yin nen.”
19 Mde na sebe wafle ou wslon fien wet ou wak wna, la ykatdin yse slili oko, ofo wefitwain wto: “Ni mit ma nen nto nrana man tet om?”
20 Ou wto: “Na Yahudi kadio kat yto ywaini dienen man nen. Ei yto klen sawok nen nadien twa Paulus wain wsalit oli wse Mahkamah Agama ei yik, se bo ei yefitwain skadelek roro wain sba ou.
21 Mahin noso kmiet amo ei yila, fe hra ei yikan na lak yeigi (40) mewer yleli kerek wale, ysin yto yba yska ou. Ei yfafti wale ni yibe yeit dait ni eit, yoko dait kla kawuak de yska sba Paulus ofo yeit tnes ni eit. Na eke yka wale, yife wale tlein ra, yleli kein nen naka nrana nsamenie fe deri ni hra ei ywaini yehin nen nak.”
22 Mde na sebe wafle oko wbahe wet wafori oko wsalit oli. Ou wkait wain wto: “Nnok deri, ni hra nen nrana hlok yin tet tke, nrana kein kdie amot yila!”
Paulus Na Yteye Wain Wse Kaisarea
23:23-35
23 Mde na sebe wafle ou wwit wfe na sae kahat yifle lak man ei yka, ofo wbahe wto: “La nan nkoyo nfe na sae kahat hra yik ekei yikan nai yahar yeigi (200) [hra ysiok mnian lis], nai yahar yeigi (200) sba oli hra ysiok kahat, yidien fot na hra yorin kuda ekei yikan na tolik yeigi whri na wna yahar (70). Nan nkoyo homo-homo nan nfe na sae kahat eke, se bo amuk tali mkedi mtanhat, ofo nan nein kadio kat nse Kaisarea. 24 Nyo wain fot kuda mre yin Paulus warin, se bo nan nidien twa roro wain na hirit oko wain wse Gubernur Feliks wak ale.”
25 Mde ou wsroin fot katik fari mrem hra mrana mto:
26 “Mahin Kladius Lisias tet,
Mse na wafle Gubernur Feliks nen nak Kaisarea,
Tali wabot wan nen!
27 Na kou na Yahudi yslon wale, mde yto ybatiorok kayi de wkak, mahin tet taka tamli tadien tfe na sae kahat mam mkotadet ou, fe hra tet toso ou ekei wabe na warga negara Roma. 28 Tet taisi toso ni mit ma mfe he ei ysin yto yska ou, ofo tet tadien twa ou wain wse ei yfe Mahkamah Agama. 29 Mhakta man tet fo, fe hra ou wke nai yadon sabasan deri ou wtatol wabe ei yfe ojin ei yi, ha ni roro wain dait mre yolot fe nai yska ou, afe nai yhirit ou. 30 Nai yrana wale ni fe tet fe hra yikan safuk mrei ysin yto yska ou. O le ma tet tbahe kat nai yidien twa tamli waka wse na wafle nen nak. Tet tbahe na hra yadon ou ekei yka yein heles, yorin fali fot ni yse na wafle nen nak.”
31 Mde na sae kahat ekei ysiok kadio kat ni hra na sebe wafle ou wbahe. Amuk fo ei ywien fien hlok Paulus waka, yidien twa sakro kayi de yhok yik kota mre mak fan kedi hra nai yto Antipatris. 32 Uwade mlabit kat fo, na sae kahat man hra yein teit ei ysalit oli yse yfe mla wasa, ha Paulus wadien na hra yorin kuda ei yein kein kdie. 33 Kayi de yhok yik Kaisarea, ofo na hra yorin kuda ekei yhnak katik fari okom madien fot Paulus yein yse gubernur wak. 34 Gubernur wbaca sba katik fari okom ofo wefitwain man Paulus wto: “Nen nke nahin propinsi man sio?” Mde Paulus wada wto: “Tet tahin Kilikia.”
