Paulus Wrana Tahak Ni
22:1-22
22
Ou wrana wto: “Hei table wa nan, tono wa nan, noso la tet trana kerek firi ni mre yin nan yibe tet tdain, tet tbot deri.” 2 Na marok om yoso ou wrana ni yidien ei yi salo ei yi Ibrani, mde ei ysatmor karmiak kat.De ou wto, 3 “Tet tke na Yahudi tet. Teme msois tak kota Tarsus, fobi Kilikia, wanik deri, tfle tak fobi kom. Na tmak Gamaliel le wkakniet ni toron kamyi kat fe tet, ojin hra faf fate kokos yfe om, kayi de tet tkanas ttrein tsiok ni yin Nago, tde fot le nan kadio kat nidien hra ko.a 4 Kamuolo na safuk man hra nai ywit yibe Fan Toron okom, tet le ma tsiok sgia ei kayi de ykak. Tet le tkami ei yfe wedla wedli, tklat ei yse bol mahirit mabri, yiheit kawuak. 5 Tet trana tkoin kat. Tet tgebra dait. Imam wafle wadien fot na tmak Mahkamah Agama kadio kat ynok yibe kamuolo tet tsiok wde le ko. Yto yeisi fo, bo yrana hatot kahet fem. Fe hra tet twaini ei ysroin katik fari man mam mfe nai yik kota Damsyik, hra mrana mhnak fle fe tet tabe tain tse Damsyik, se bo tto ttatiere fe wedla afe wedli mre yehin safok Fan Toron okom hra yik ana, ofo tslon ei, tatik oli yse Yerusalem ko yibe mam mhirit ei.”b
6 [Imam yifle yhnak sba katik fari okom man tet, mde tet tkoyo wedla mre ykomot tet, ofo mam mein fan lis om mse Damsyik.] Hra oko fo tali mkro trik, mam mitaren wale mse fan ta Damsyik, ofo ni mre msadiak mde felek mhok ro kat, wtweit-twat mahin yik ago mkohli tet.
7 Tet tti tse fobi aiti, ofo toso salo mreu wrana man tet wto: “Saulus, Saulus, hra nen nsiok sgia tet tabe?”
8 Ofo tet tefitwain tto: “Nai fe na Smau! Na sio ma nen?”
Mde ou wto: “Tet tke le ma Yesus, na Nazaret tet, hra nen nsiok sgia sawuan tet.” 9 Wedla man hra yidien sisi tet, ei yhot deri felek hra wtweit ou, yoso deri salo om, mahin ei ynok dait ni hra ou wrana man tet om.
10 Mde tet tto: “Nai fe nau Tuhan, tet tsiok de sie?”
Mde ou wto man tet wto: “Nsidik nahin, nain wata nse Damsyik! Nak ale, ofo tet trana kadio kat ni hra bo nen nsiok yik ale.” 11 Mde hra oko fo tet thot dait kat ni. Tsifuon ei ybra, fe hra felek ei ytweit, wala wan tsifuon ei, mde tsifuon ei ymian, thot dait kat ni. Mde tanak yslonti tna ei, ysria tet tloit tse kota Damsyik.
12 Hra oko fo, na wadlau mreu wkedi le ma Ananias wase wak Damsyik. Ou eke wsiwain tiktol ni bahe kadio kat yehin Nago wak hra Musa wsroin yik ojin Taurat, kayi de na Yahudi kadio kat hra yese yik ekei ynok ou wabe na wabot. 13 Mde ou waka wkro wak tet tklik, ofo wto: ‘Table Saulus nen, nsifuon ei yhak le mke!’ Mde hra oko fo tet tsifuon ei yhak. Thot tnes oli ni, thot ou.
14 Mde ou wto oli wto: ‘Nago hra faf fate kokos ysaesik ou, o le ma webet nen se bo nen nnok ni hra ou waisi wrana fe man om. Se bo nen nhot tnes Na Wabot Watoron Kat, o le ma Tuhan Yesus ou, ofo noso kahet ni mahin ou wagiet om. 15 Ofo nen nabe ou wfe wedla bahe hra wrana wain ou wfe giet om. Ni hra nen nhot noso yehin ou wak, bo nen naheit nrana wain mse na sa kadio kat. 16 Mto mde ke fo, nen nleli kein ni mit ma ei! Nsidik la, nhnak nkan om man nai ybasiere kat madien kla. Nen nwit mse Tuhan wak, se bo nen nfe satian om ou wtotik wware kat se bo mdain.’c
17 Mahin oli fo, tet tsalit oli tse Yerusalem ko, tloit tse Nago wfe bol kohok mklik, ofo tet tsikafit man Nago. Mde Nago Wawuam msisik tet tabri om, ofo thot ro kat ni mde hra tasamik. 18 Mde thot Tuhan Yesus wyen hata wkan man tet. Tet thot ou wrana man tet wto: “Habi! Nhok kat! Nahinti kat tamli Yerusalem ko, fe ni hra nen nrana mabe tet om, nai yoso kmiet dait!”
19 Mde tet tto: “Tuhan, na eke ynok wale tet, mabe kaman firi wa ko, tet tloit-lat kein-kein tse bol sikafit yibri, yibe tet tslon fien na hra yten ykaso yse nen nak, yka fo tba thirit ei yse bui. 20 Kaman nfe wedla Stefanus, hra wrana hatot sawuan fe nen nkedi om, nai ykaflet amak fe ou kayi de wkak fo, tet le ma tkro fot tak oko, tet taisi fot tto nai yba wata wkak. Fe hra na hra yskalet Stefanus wadien amak, ofo ei yfe not lis jubah hra ei ytli kat ei – tet le ma tkro fali not trik ei.d
21 Mahin Tuhan wto man tet wto: “Nen nain wata, tet tbahe nen nain nse fobi hra yilis yehin oko, se bo nrana tet tkedi kom man na sa wat-wat ei.”
22 Paulus wrana sonat ni mak bri kayi de mharfe wto Nago wbahe ou wain wse na sa wat-wat ei yik, mde na marok ei ytrere karmiak kat, ysalo fle yto: “Hyee! Nska kat wata na hra ko wkak! Ou waheit wron samak wak oko fe me!”
Paulus Wak Sae Kahat Yfe Mla
22:23-29
23 Mde na marok okom yhowa kat yrewer ytris, ytli kat yfe not lis jubah ekei, yklat har bet ksirin yse yik ago. 24 Kayi de na sebe wafle ou wbahe wfe na sae kahat ei wto: “Notik la na oko wse bol mla mabri ra. Nlouk fien omos knar, nbaknar kat ou, nefitwain skadelek se bo wrana hatot tahak kat ni mit ma molot fe na marok angkei yhowa kat, ytadrot yidien ou.” 25 Mde ei ykaitti Paulus wna wteit wkakak wasten, wsifuon yse kda, se bo yto ybahrabat ou, mahin, Paulus wefitwain man na sae kahat wafle mre hra wkro wak ko wto: “He! Nai yfe nau, hra nan nhewi-wa nto nbahrabat na warganegara Roma tet tabe? Hra nan nefitwain skadelek latiot fo, nan nsiok sgia wale tet, ofo ni okom mbot afe?”
26 Mde na sae kahat wafleu hra wto wbahrabat ou woso ro kat ni hra ou wrana hatot man ou, ofo ou wain wse na sebe wafle ou wak wto: “Bo ni mit ma nen nsiok man na ko, fe hra na ko na negara Roma!”
27 Mde na sebe wafleu wain wse Paulus wak, wefitwain wto: “Nen nto tkoin nabe kayi na warganegara Roma?”
Mde Paulus wto: “Yo, tet tto tkoin kayi, na Roma tet.”
28 Ofo na sebe wafle wto: “Tet tfe warganegara Roma tet tkain mat pitis wrok msamsa kat.”
Mahin Paulus wto: “Mde wata eke ha, tet tabe kayi na warga Roma fe hra yidien kamuolo tono teme yelin yibe wale warga Roma.”
29 Mde na sae kahat hra yto ybaknar Paulus ei ykadin kat tamli, yehinti kat ou. Na mna na sebe wafleu waliak fot wteit rioro fe hra ou wnok wkaitti samhak wale Paulus, na warga Roma ou, wadien rantai besi.
Yotik Paulus Wse Mahkamah Agama
22:30–23:11
30 Wanik deri, na sebe wafleu ou waisi wnok roro wain homo-homo ni mit ma hra na Yahudi yadon wan Paulus. Wi mhak fo, ou wtli kat Paulus, ofo wbahe imam yifle yidien na Mahkamah Agama kadio kat ybalifis yife mres. Mde ou watik Paulus wlak wkro wsifuon wse ei yik.