Paulus Wak Tirus Madien Kaisarea
21:1-14
21
Mam mhros kat na tmak jemaat Efesus yfe ei, mkami lon-lon, ofo mam mhriakti kat ei, morin kapal, mska kat mse siwan, ofo mfoto sros kat mse rowe Kos. Tali kdie oli fo mam mhok mik rowe Rodos. Mik sba oko fo mein sros kayi de meis mik kma sfie Patara. 2 Mik Patara mam mtatiere fe kapal rar hra mto mfoto main mse propinsi Fenisia, ofo mam morin kapal okom, ofo mska kat mein. 3 Mik fan kedi fo mam mhot afat rowe Siprus wse mna wait, mahin mam msoro kat mein mtatol mse propinsi Siria, kayi de mhok mik kma sfie Tirus. Mik oko fo na kapal ybatdak hrien yeis yse kota okom.
4 Mde mam meis fot, mtfoi manak Yesus wfe nai yik ekei, mese amuk mtalak. Main fe Nago Wawua Makohok om wedla-wedli ekei ytoji Paulus yto: “Nen nain dait nse Yerusalem, wa bo nai ysin yto yska nen.” 5 Mahin mayi fe magiet mabe kapal om mska kat oli main, ofo mam mein kein oli kdie. Yesus wfe wedla ekei yidien ysmian mai, yfe wet kadio kat ei yidien twa mam kayi de mhok mse kla siwan mtefit ale. Mik oko fo, mam mbatoko mteit sia mse kinti aiti, ofo msikafit sisi midien ei.
7 Mehin Tirus mam mein mslili fe ompit wtefit kayi de mhok mik Ptolemais. Mik oko mam meis mkami kat manak Yesus wfe na mre yik ko, ofo midien ei mese sisi amuk om mres. 8 Tali fo mam morin oli mse kapal, mein kein kdie mehin oko kayi de mhok mik Kaisarea, ofo mam meis mehinti kat kapal, mtrik mese mik bol Filipus wfem. Filipus oko wabe na warana sawuan giet Nago wfem, hra kamuolo jemaat Yerusalem ylouk helwain yikan mtalak ei, mre le wou.a 9 Ou wkafe wet yidli hat hra ysmian dait latiot. Ei ykain hares mahin Nago wak mabe yrana krek ou wfe giet, ysewet fot ni hra basak yhok.
10 Mam mese amuk tolik afe hat mik oko ofo, nabi mreu wsiolok wahin fobi Yudea waka, wkedi le ma Agabus.b 11 Ou waka sros kat wse mam mik, wlouk kat Paulus wfe sron kedi, maka fo, wkait man Paulus wteit wna, ofo wto: “Nago Wawua Makohok om mrana krek mto: ‘Na man hra wkain sron kedi kom, basak na Yahudi yik Yerusalem ysiok omos yka, ykaitti todo na okou mde le ke, ofo yhnak wan na sa wat-wat ei yhirit.’ ”
12 Mam moso ro kat ni okom mde, mam midien manak Yesus wfe wedla wedli man ei, mtoji lon-lon mto Paulus wain whri dait kat wse Yerusalem. 13 Mahin Paulus whar kat ei wto: “Hra nan nowa, nsiok buon tabri mtra fe me? Hau, bo nai yhirit tkoin tet afe, yska tet afe, tet taisi fe deri Tuhan Yesus wkedi om mwamo mak wi mahon.”
14 Mam mrana hewain deri mahin ou woso dait ojin yehin mam mik, ofo mam msamenie deri, mhnak ou wse Nago wak mto: “Ni hra Tuhan waisi fe mde le ke.”
Paulus Wadien Yakobus Ysadir Trar Yik Yerusalem
21:15-26
15 Oko wale fo, mam myo hrien mibe mhri mse Yerusalem. 16 Mde Yesus wfe wedla mre yehin Kaisarea yidien twa mam mein kayi de mhok mik Yerusalem mloit mse bol Manason wfem. Ou ekei wahin rowe Siprus, wabe lokdi wale wedla wan Yesus wadien kamuolo kat, mde mam mnokwain ou, mese mik ou wak.
17 Mam mhok kmo kayi mik Yerusalem, ofo manak hra Yesus wfe yik oko yibri om msiaba, ykashok fe mam.
18 Mam mese, tali kdie fo midien sisi Paulus mein mtfoi Yakobus, mde jemaat yife na tmak yrok ekei yik kadio kat wale oko. 19 Paulus wkan tali wan ei, mde wrana tias wain oli ni warok hra Nago wsiok wale yin na sa wat-wat marok om yein fe ou wak.
20 Ei yoso ni ekei, mde ei ysrar heyit Nago. Mde yrana ni fe Paulus yto: “Table Paulus, nen nnok wale na Yahudi faf warok karmiak kat. Ribu man, ribu man, yten ykaso wale mse Yesus wak, mde ojin Taurat om ei ysiokti kat mtodo. 21 Mahin ei yoso sak-sak wat-wat giet mabe faf fible na Yahudi marok hra yese yik fobi na sa wat-wat ei, nen le ma nkakniet sawuan man ei yibe yna bhait kat ojin Taurat Musa wfem. Mde hra nen ntoji nto ei ybrein oli dait ei yfe wet yiwet yidla. Mde hra fot nen ntoji ei ysiwain oli dait ojin na Yahudi faf fi. 22 Se bo faf fsiok mde sie? Bo ei yoso kayi, fe hra nen naka wale nak ko.
23 Mto mde ke fo, nsiok kayi ni mde hra mam mrana fe kei. Na dla yikan hat le mke yehin mam mik ko, yfafti wale ni yin Nago. 24 O le ma mam mrana ni fe table nen, klen sawok uwade nan nhara kat kla kohok fe nan se bo nan nbot-bot oli nidien Nago, ni mre ysgia oli dait yin nan. Mfot fo, nadien twa wedla eke yein yse imam ei yik, mde na mna nen nfelit kerek pitis kadio kat se bo ei ysanfe yin Nago ni hra yitatol yibe na hra yfafti ni yin ou ei yfot tnes. Sba oko fo, nan nleli oli amuk mtalak, ofo nadien twa ei ysalit oli yse imam ei yik, yibe ykok kat ysagien kayi de ysa ei yeliek kat, mabe kyat yibe ei yfe ni fafti man Nago ei ydain kat wale. Tanak, nsiok sorhoi kadio kat ni ekei, se bo nai ynok na mna nen nsiwain nna todo kat sonat ojin Musa wfem. Mde giet sgia hra nai yrana sak-sak yibe nen, ofo na marok kadio bo ynok yto nai ygebra deri, fe hra nen nsiokti kawuak sonat ojin Taurat om.c 25 Mahin man deri na sa wat-wat man hra ynok wale yse Yesus wak, mam msroin wale man ei ni kadio hra mam mkerek sadir fe wale - ei le ma nai yleli ni eit hra nai ysanfe wale yin patung nago ei, yeit amot yila, nai yeit dait hen, yeit dait fot erwas hra hen mhok dait latiot, nai yeit dait fot erwas hra nai ysofot wak wdioro ofo wkak. Ni eke ei yeit dait yila! Mam mtoji fot wale nai ysiok oli dait sebe tkoin, afe ysiok oli dait fot sebe emir kat!”d
26 Uwade fo, Paulus wkoyo wedla nai yikan hat ofo whara kat kla man fot ou, man fot ei. Mfot fo, na mna Paulus ou wain wtrik wse Nago wfe bol kohok mklik om mabe wkadoin krek fe hra amuk mtalak oli fo ni fafti ei yi ydain wale, ofo yka yhnak ni sanfe man Nago.
Paulus Na Yslon
21:27-36
27 Amuk wagiet mtalak fe wkdia wdain fo, na Yahudi mre yehin propinsi Asia, yhot afat fo Paulus wak bol kohok Nago wfe, ofo ei yrana siorok ni fe na marok okom se bo ei yka yslon ou.
28 Ei ysalo komar yto: “Woi na Israel nan! Nka nkaka mam! Na hra ko le ma wkowiri-wara na sa man faf fse ta, fse ta. Fe hra ou wrana wkakniet sawuan ni yin na kadio kat se bo ei yaha kat na sa faf fi, yaha kat fot ojin faf fi kom yidien fot bol kohok faf fi kom. Yo, na oko wsiok sgia wale bol kohok faf fi kom kayi de mbhait, mkohok oli dait, fe hra ou watik firi na Yunani mre yka yloit sayi wale yse bol kohok kom mklik.” 29 Ei yrana ni yde ke fe hra yhot wale Paulus wak Yerusalem wadien sisi wanak Trofimus, na Efesus ou. Ei ynok yto wadien sisi wale la yik bol kohok mklik, mahin mdain, ei yadon deri.e
30 Mde kota okom mkauu kat, na marok ysese yehin ta, yehin ta, yhok ykamti birit Paulus ofo ykein krit whokti kat wahin Nago wfe bol kohok mklik okom wse tlein. Mde nai ykdati tamli kat hrede kadio kat yik bol kohok Nago wfe, se bo na mre ytrik sayi ysiok sgia oli dait.
31 Ei yba kayit-yit se yto wkak kat, mahin giet om mhok tamli mse na sebe wafle hra wslonti sae kahat Roma yfe. Ou woso mabe na kadio kat yik kota Yerusalem ekei yrowak-wak ykawu-wa. 32 Mde na sebe wafle ou wkaprsat wkoyo na sae kahat yifle mre yidien fali ei yfe na sae kahat, ofo ysese yren fe na marok hra yirowak ei. Na marok om ei yhot fo na sebe wafle ou wadien ou wfe wedla na sae kahat ekei yhok, ofo ei ynahla Paulus, yba oli dait ou.
33 Na sebe wafleu wain tiktol wse Paulus wak, wslon fien ou, ofo wbahe nai ykaitti ou wadien rantai lak. Mde ou wefitwain wto: “Na sie ma hra ko? Ou wsiok ni mit ma om?”
34 Mahin na marok om yhowa sak-sak kat ni kayi de na wafleu wkahiowain kat, wabe woso wnok roro wain dait ni hra ei ysalo kaf kat man ou. Mde ke fo ou wbahe ou wfe wedla sae kahat ei yotik Paulus wain wse bol mla wasa ra, se bo wefitwain ska delek ou. 35 Na sae kahat ykein krit Paulus kayi de yhok yik wlin mla wolo, ofo ei ylouk Paulus ykafe kat ykroti yorin fali ou, fe hra na marok ei yhoin yit, yto yska ou. 36 Na marok ei ykafriyit-yat, ysalo hoin yit yto: “Nska kat wata ou! Nska kat wata ou!”
Paulus Wwaini Wrana Ni
21:37-40
37 Na sae kahat yorin wale yto yloit yse mla wa sa, ofo Paulus wsalo Yunani, wefitwain man na sebe wafle ou wto: “Nen naisi tet trana ni mre yin nen?”
Mde ou wto: “Waa, nen nnok salo Yunani, yaa! 38 Tet tnok deri nen nabe na Mesir hra kwan firi nkoyo kaisin 4,000, nkri kein ei yse samdi ra, nto nfit na Roma mam, nsiok fobi kom mkro wat. Nen nabe na Mesir oko afe?
39 Mahin Paulus wkesi wto: “Hau, tet tabe dait na Mesir. Mahin tet tke na Yahudi tet. Tet tahin Tarsus, kota mafle mwamo kat mak propinsi Kilikia. Tet twaini nen nhnak tet trana hatot ni yse na marok angkei.”
40 Mde na sebe wafleu wsamenie fe, wliokeit Paulus wkro wak wlin masa ago wabe wrana ni man na marok om. Paulus wna baesik na marok om se bo ei ysatmor. Mde ei yrodek kat, ofo ou wteik wrana ni man ei wadien salo ei yi Ibrani.
