Paulus Wkohli Makedonia Madien Akhaya
20:1-6
20
Nai ykauu okom mluwa wale ofo, Paulus wwit fien Yesus wfe wedla wedli hra yik Efesus ekei yka, mde wto skatoin ni whnak hron fe ei. Sba fo ou wkami ei, mde wain wse propinsi Makedonia. 2 Ou wain kohli tar-tar fe fobi Makedonia, whnak hron fe wable wai yibri ei kayi de whok wak propinsi Akhaya hra nai ywit fot yto fobi Yunani. 3 Wak Akhaya fo ou wase wadien Yesus wfe na ei kayi de mok tolik, ofo wsin wto warin kapal wfoto wse propinsi Siria. Mahin hra oko ou woso ro kat fo na Yahudi ysin yto yska ou wak fan kedi. Mto mde ke de ou wbagiaka wsalit oli wain teit deri fe Makedonia. 4 Wedla mre ykomot ou wak fan kedi kawuak de yhok yik Filipi. Ei le ma Sopater, Pirus wfe wet ou, hra wahin Berea, mde Aristarkhus wadien Sekundus la yikan lak ei yehin Tesalonika, ha Gayus wahin Derbe, Timotius fot, yidien fot na lak yehin propinsi Asia, ei le ma Tikhikus wadien Trofimus. 5 Wedla yikan mtalak ekei yelin, yleli kein mam mik Troas. 6 Mahin Paulus wadien Lukas tet mam miheit sonat mik Filipi kawuak de konon Paskah Roti Madien Dait Ragi mdain. Sba fo mam morin kapal, mfoto mehin Filipi, mese amuk mahot mik fan kedi. Mhok mik Troas fo, mam meis, mwayen mam manak wedla ei hra yhok lalie yik oko yleli kein mam, ofo mese sisi amuk mtalak.Eutikhus Wsidik Wron Oli
20:7-12
7 Amuk wasayen wadien minggu hra oko, mam mbalifis mife mres, mleli sisi mibe merek-arak roti yin meit mnok saswain oli Yesus. Mam meit dait latiot fo, Paulus wrana lis ni fe wanak wai na kadio kat hra yik eke, kayi de amuk amri kat, fe hra wto uwade fo, wain. 8 Mam mleli mik sit man hra mbat tolik fe mse ago om, msiok pelita warok-rak ydhen kadio kat. 9 Wet wadla wafori mre wkedi le ma Eutikhus wleli wak jendela om. Fe hra Paulus wsadir om mlis karmiak kat, mde wet wafori okou wsirobo mflie wase satik, wnok dait kat, mde wti ro kat wahin mbat tolik fe ago, wba wse fobi aiti. Nai yto ykosia, wde wkak wale.
10 Mahin Paulus wais wak aiti, wase kofit eye wkamti ou, mde wet oko wsidik wron oli. Mde Paulus wto: “Nrewer amot. Wedla fori oko wron wbot oli!” 11 Ysalit yorin oli yik antian sit mbat hra yleli tolik fe ago, Paulus werek-arak tnes roti ofo mam meit sisi ni. Mfot fo ou wrana kawuak ni kayi de sies mtlein, sba ofo ou wain. 12 Wain wale fo, nai yidien twa na dla wafori okou, wron sonat deri, wain oli wse bol ou wa. Mde ei ykaso om mluwa kadio kat.
Mehin Troas Mse Miletus
20:13-16
13 Mam mein morin kapal melin kein mse Asos, mto mtafri Paulus, mlak fien wak oko, fe hra ou wkadoin krek fe wale wain fe tlein wse ana.
14 Wtatiere fe mam mik Asos, ofo mam mwiehla fien ou wse kapal, ofo mam mein kdie mse Metilene. 15 Uwade kat fo, mam morin oli, mein kawuak de mhok mese mitaren mse rowe Khios. Tali lak fe fo mam mslili dait mse kota Efesus, ha mam mfoto sros kat deri mse rowe Samos. Tali oli kdie man ou fo mam mhok mik kma sfie Miletus. 16 Hra oko fo Paulus whewi fe wain tamli wse Yerusalem, waisi wto whok wak deri ana, sba se nai yeit konon fle Pentakosta. O le ma kramuk ou waha wtik kapal mak Efesus ha, wto wain soro kat, se bo wbakya dait amuk mre oli yik propinsi Asia.
Paulus Wkami Jemaat Efesus Yfe Na Tmak, Wto Skatoin Ni Fe Ei
20:17-38
17 Mde Paulus wbahe na mre wsese wse Efesus, wtik giet man na tmak yik jemaat ekei yibe yka tamli yse ou wak Miletus.a 18 Ei yka kadio kat wale ofo ou wrana man ei wto: “Nan nnok wale mabe mahin kamuolo tet taka thok kmo sayen tse nan nik propinsi Asia oko fo kawuak kayi de kwan tet tahinti kat oli nan, ofo tet tase tadien nan tbot-bot deri, tsiok dait ni mrem msgia man nan.
19 Fe hra tet tabri om mluwa deri man nan, tsiok ni man Tuhan kayi de tsiklia he-hi-ha-ha tmro fe nan. Wanik deri na Yahudi ysiok ni ysgia, ywewisti tet, ysin fot yto yska tet, mahin tet thron kein, tkakniet wata Nago wfe ni yin nan. 20 Nan nnok wale fe hra kwan tet tkakniet sawuan ni hra yhnak hron fe nan, tkrek fe dait ni mre man nan. Ha, tali man, tali man, tet tkakniet ni yibot fe nan, nik fot mayiye wi mahon, nik fot bol nan ni. 21 Tet trana hatot wale, man fot na sa Yahudi, yidien fot na sa Yunani, se bo ei yket kayi, yehinti kat ei yfe satian, ylelek yse Nago wak, ynok toron kat mse faf fi Tuhan Yesus.
22 Mahin madien hra ko Nago Wawua Makohok om mkororo tet tain tse Yerusalem, mahin tet tnok dait ni mit ma mhok mba man tet tak ana. 23 Tet tnok deri Nago Wawua Makohok om mkait wain sawuan ni fe tet, mabe bo tak kota man, kota man, bo nai yhirit tet afe, ysiok sgia tet kayi de thlet afe, ni ykoko yalmias yorin eye tet. 24 Mahin tet tkan ta kom, tron afe taigi, taliak dait kat mrem. Tet tsese tkanas kat se bo tharfe kdein hra Nago wlak kakniet man tet. Tet tsiok kayi ni kadio kat hra Tuhan Yesus whnak man tet tsiok eke - o le ma trana hatot man na kadio fe giet mabot mabe Nago wfe hares om.b
25 Hra ko fo tet tnok wale mabe nan nikan kadio hra tet trana fe lis wale kerajaan Nago wfem, bo basak nan nhot oli dait tet. 26 O le ma hra ke tet trana krek man nan fe hra tet tke telek kat, tsiok dait ni mre msgia man nan. Mde hra nan nikan hra kei mreu basak wto waha kat Nago, wti wse Neraka, ofo nto dait man tet. Basak Nago wto fe dait man fot tet, fe hra tet tkait saswain sawuan nan. 27 Tet ttek dait ni mre yehin nan nik, ha, trana sanini toron kat ni kadio hra Nago waisi fe yin nan. 28 Mto mde ke fo, nan nelieksi nkan nan ni om, nsitodo fot nable jemaat kadio kat. Fe hra Nago Wawua Makohok om mhnak fle fe nan se bo nan nsmit lien ou wfe wedla wedli kadio kat hra Tuhan wfelit kerek wale yidien wfe hen. 29 Tet tnok wale mabe bo tet tain sba fo, na hra yiyaka yde serigala bo yka yhok yse nan nik ko, yka ykdio yit nan, yatan babarie, ysiok sgia nan nfe jemaat ei. 30 Bo mre fot yehin nan nikan ke ei ysidik yehin, ygebra nfe jemaat ei, ykakniet ni yisgia, ywien kein-kan, yto ykein fien ei yehinti kat fan maron om, se bo yloit yse deri ei yik, yibe ei yfe nai. 31 Mto mde ke fo nelieksi nkan om, nsitodo homo-homo kat. Nnok tmol deri mabe kaman tet tase lis tadien nan der tolik, ofo tskaros dait ha, amuk tali tet tkait saswain kawuak nan, tsiklia mti fe wet-wet, fe hra tbakoko fe nan.
32 Hra ko fo tet thnak nan nse Nago wak se bo Ou wfe giet hares om mhnak hron fe nan kawuak de basak nan nloit nse wi maron hra Nago wlak kein wale yin na kadio kat hra ou wlouk helwain wale. 33 Tet tke tbahoin dait kat na mreu wfe hrien, pitis, afe not trik mre. Mdain. 34 Nan nnok wale fe hra na mna tet tke, tna ykanas tsiok ni yin tat. Thnak fot yin table wai hra yka yeren tet, msiok sisi ni Nago wfe. 35 Mde le eke tkakniet wale yin nan, se bo nan nsiwain tet, ntrein nsiok fot ni, se bo nan nhnak fot ni fe na hra ydain. Fe hra tet tnok kayi ni hra Tuhan Yesus wrana ei, wto: “Faf fto fslon fien ni mahin nai yik, okom mbot. Mahin hra mabot mewer kat o le ma faf fhnak kawuak wata ni man na hra ydain.”