Paulus Wak Efesus
19:1-12
19
Apolos wak sonat Korintus, ofo Paulus wain teit kawuak fe propinsi Asia kayi de whok wak Efesus. Wak oko fo wtatiere fe wedla mre hra ysaesik yin Nago. 2 Mde ou wefitwain man ei wto: “Kaman nan nten nkaso mse Nago wak, ofo Nago whnak tnes Wawua Makohok om mloit mse nabri ra, afe mdain latiot?”Mde ei yada yto: “Hau, mdain sonat. Mam mke moso dait latiot ni mit ma mabe Nago Wawua Makohok om?”
3 Mde Paulus wto: “Mto mde ke fo, kaman nai ysrik kat kla fe nan main fe na sio mkedi om?”
Mde ei yto: “Na ysrik kat kla man mam msadiak fe hra ni Yohanes wkakniet om.”
4 Mde Paulus wto: “Kamuolo Yohanes wkakniet nai ysrik kat kla yibe tiktol nai ysalit ylelek yehinti kat ei yfe satian. Ou wrana man na marok ei wto: ‘Basak na wafle whok waka, ofo nan nnok tmol homo nten nkaso kayi mse ou wak.’ Na hra Yohanes wrana fe o le ma Yesus.”a 5 Wedla yoso ro kat ni okom mde yten ykaso mse Yesus wak. Mde ei yhnak kadio kat ykan om man nai ysrik kat kla fe ei main fe Tuhan Yesus wkedi om. 6 Paulus wlak wna man ei, ofo Nago Wawua Makohok om msisik man ei yibri, mde ei ysalo heit-hat na sa wat-wat ysalo ei yi, yrana krek fe ni hra bo basak yhok yein heles.
8 Mde Paulus wase kayi mok tolik yik oko, ou wtrik ta-ta kawuak wse na Yahudi yfe bol sikafit mabri mabe wkakniet wkatrein kat ni mabe kerajaan Nago wfem - o le ma Nago wwien fien na tkoin yka yse ou wak main fe deri wfe wet Yesus.
9 Mahin na mre yehin ei yik ysa fle, yaha kat yten ykaso yse Yesus wak. Ei yhar kat ykanas kat mak mayiye na marok ybariomo yto: “Ni kakniet waifi okom hra nai ywit yto Fan Toron om, om msgia karmiak kat!” Oko le molot fe Paulus wadien wfe wedla wedli ei yehinti kat na eke yiheit yik bol sikafit ha, ou wkatdin kat wse bol sekolah hra mkedi Tiranus, ofo tali man tali man wkakniet wsadir sas fe Yesus yin na kadio hra yka yse ou wak ana. 10 Wak ana fo Paulus wrana wkakniet ni kawuak de der lak, mde na kadio kat yik propinsi Asia yoso giet Tuhan wfem, na kadio kat Yahudi yidien fot na Yunani.
11 Hra oko fo Nago wsiok ni owuok-awak ewer kat main fe Paulus hra yolot fe na marok ei yteit rioro karmiak kat. 12 Mde hra not lenso afe not uwas hra yokot wale Paulus ei, yto nai yein fali not eke yse na kaini ei yik, ofo ei ydain. Klebet yiyaka yhokti kat fot ei.
Skewa Wfe Wet Ei
19:13-20
13 Hra oko fo, na Yahudi mre yein kohli-hla kota oko ywit hewain Tuhan Yesus wkedim, yto ywain kat klebet hra yfla ysiok sgia nai. Ei ylan hewain yto: “Main fe Yesus wkedi hra Paulus wkakniet sawuan, tet tbahe klebet nen nhokti kat na ko!” 14 Na Yahudi yfe imam wafle wak oko wkedi le ma Skewa, wfe wet yidla yikan mtalak ei le ma ysiok hewain ni ekei. 15 Tali mre fo klebet ou whar kat ei wto: “Yesus tet tnok wale, tet tnok fot Paulus, mahin nan nke, na sie ma nan? Nan nke nnok dait Yesus. Tet toso dait kat nan nbahe tet.” 16 Mde na hra klebet wfla ou wkahri wba kayit-yit kayi de yklis karmiak kat, wkodihak ei yfe not trik ei, mde ytain sadak, ysese sabloit deri.
17 Na Yahudi yidien na Yunani hra yese kadio kat yik Efesus ekei yoso ro kat ni eke mde yeliek karmiak kat, ytiksi Tuhan Yesus yto wkedi om mrnin karmiak kat. 18 Mde na marok hra ynok tmol wale mse Yesus wak yka ysamenie mak wi mahon, mabe ni ysgia yrok hra ei ysiok wale. 19 Mre yehin ei yik hra ysaesik sawuan man klebet, ylan adit ni warok, ytik na, ei yka yto: “Madien hra oko fo mam mehinti kat ni eke, mwit oli dait klebet.” Ei ykohliowo ei yfe katik fari lolok ykohok hra ykakniet nai ytik lilin fe na, ysiok lait, afe ylan heit-hat sawuan ni ysgia. Ei ykoyo kadio kat katik fari eke, yka fo, yseli kat yse sala mak mayiye wi mahon na marok ei ybariomo. Katik fari ykohok eke nai yaher yeit pitis perak ykdois bo mal kayi 50,000 ykdois [hra madien tolo hra oko fo mat 50 milyar rupiah].b
20 Mde le ke giet mabe Tuhan Yesus om main siar tar-tar kayi de na marok ysamenie fe Yesus wabe Nago wfe na wakohok Ou.
Demetrius Wolot Fe Na Efesus Yrowak
19:21-41
21 Ni kadio eke yhok wale sba fo, Paulus wsin wto wain wse Yerusalem, wain kat fe propinsi Makedonia madien Akhaya. Ou wto: “Ttfoi sba wi ekei yfot fo, ofo tet tain kayi fot tse Roma.” 22 Ofo ou wbahe wfe wedla bahe lak, Timotius wadien Erastus, la yelin kein yse propinsi Makedonia, ha ou wmres waheit sonat, wase kaf kat oli amuk mre wak propinsi Asia.
23 Hra oko fo, na kota Efesus marok yrewer karmiak kat, ytrere fe hra Fan Toron, o le ma Paulus wadien wanak kadio hra yten ykaso yse Yesus wak. Fe hra Paulus wkakniet wto Yesus wmres kat deri le wabe fan matoron mse Nago wak, na mre wat dait kat. 24 Na hra wolot fe na Efesus yrewer ou wkedi le ma Demetrius. Ou eke wabe na wasiok perak maka fo, whein-han sawuan bol kohok ywet kat yidien patung nago madlim Artemis mak bri ra. Na marok ykain fien sawuan patung nago madlim Artemis eke, yhnak pitis warok yse Demetrius wadien wanak wai hra ysiok sisi ni yidien ou, kayi de ei ykohok karmiak kat.
25 Ou wkoyo kadio kat na hra ysiok sadiak sisi ni ei ybalifis, ofo ou wrana wto: “Woi, na dla nan, noso la! Nan nnok ni hra faf fsiok kei yhnak kohok fe faf fkei. 26 Hra ko nan noso nhot nidien nsifuon ni hra Paulus oko wsiok wale wak fot Efesus, biarak ma wse kadio kat propinsi Asia, o le ma wbalalan na marok yka yloit yse ou wak, wkakneit wto ni hra na tkoin faf fhein fidien fna tofo eke le ma dait nago ha, le ma deri hrien tkoin! 27 Bo ni kom molot fe nai yrana wain ni hra faf fsiok lokdi kom msgia, nai yrana wain fot faf fi nago Artemis mfe bol kohok mafle man koit. Faf fi nago Artemis hra mkedi ririn mwamo, hra na marok mak propinsi Asia yidien fot fobi katak kadio kat ysaesik sawuan man om, bo nai yaha kat om, kayi de om mfe fle kohok om masak, mbot oli dait!”
28 Ei yoso ro kat ni hra ou wrana fe ekei, mde ei ytrere karmiak kat. Ei ysalo fle yto: “Na Efesus faf fi nago Artemis om mkedi mwamo karmiak!”
29 Kayi de na marok yik kota okom ykawu-wa kadio kat. Na marok ykami Gayus wadien Aristarkhus, na dla yikan lak yehin Makedonia hra ykomot sawuan Paulus, yka ysese ykein krit ytrik fali yse stadion om mabri, yto ysarife ei. 30 Hra oko fo Paulus wto wtrik sisi wse stadion wabri wadien ei, mahin wanak Yesus wfe wedla yik eke ytoji ou. 31 Paulus wanak wai hra yifle yik propinsi Asia ytik fot giet ywaini lon-lon se bo wtrik dait wse stadion om mabri.
32 Madien hra oko na marok okom ykahiowain kat, ysalo fle wat-wat ni. Ei yrowak-wak mkowisi-wasa deri, ynok oli dait ni hra ei yka fe om. 33 Mde na Yahudi yna ska kat na mre wkedi le ma Aleksander whok wse nai ybariomo mayiye ra, ofo na mre ysalo kaf kat ybahe ou wkesi fe na Yahudi yolot fe dait nai yrewer ekei. Mde ou wna esik na eke se bo ysatmor, wto wrana ni wak ei yik. 34 Mahin na Yunani marok yto ynok ro kat deri fe hra ou ekei na sa Yahudi, mde ei yaha kat ou, ysalo kaf kat sadiak sisi yife mres yto: “Artemis, na Efesus faf fi nago om mkedi mwamo karmiak kat!” Ei ysalo fle mde le eke kayi de tali ykedi lak.
35 Mde sekretaris kota oko wbahe na marok okom msatmor, ofo wrana man ei wto: “Woi, na dla Efesus nan, na sie ma yik fobi katak ko ynok dait, fe hra kota Efesus kom mleli fali bol kohok nago mafle Artemis om, hra madien fali om mfe amak patung hra kamuolo mti mahin yik ago mak deri ko?
36 Na marok kadio kat ysamenie fe ni eke! Mto mde ke fo, nan nsatmor kat deri! Nsiok ni mrem mhewi-wa mala! 37 Fe hra nan notik wale na yikan lak kei yka yse ko, mahin la ysliak dait ni mrem mahin bol kohok om, la yrana sgia dait fot faf fi nago mkedi om. 38 Mde hra Demetrius wadien wanak wai hra ysiok sisi ni yto ytrere na mreu, mabot ma ei yein yse bol sarife ni, ofo yorin fali ni okom man faf fi na yifle afe man gubernur se bo ysadir trar fem. 39 Mde hra nan nadon fe ni ysgia wat kdie mre, nan norin fali homo-homo rorwain yse nai yifle faf fi se bo ysarife homo-homo. Nkawu-wa, nrowak-wak oli dait! Na sie ma ybahe nan nka nrewer buon nse wi oko mabe? 40 Ni hra yhok yidien hra ke ei bo yolot fe na Roma hra yslonti fobi faf fi ei ytrere faf! Bo na Roma ei yadon faf yto faf fkaf daok. Se bo faf fada ei, fto de sie? Mdain kat! Faf fke fsamenie fe dait ni mre madien hra ko molot fe faf frowak-wak ke! [Walbat ei yteye ei yfe sae kahat yka ysiok sgia faf!”] 41 Sekretaris kota wrana kadio kat ni eke, yehin fo wbahe kat nai ysalit, ysiar wat-wat.