Paulus Wak Korintus
18:1-17
18
Sba oko fo Paulus wahinti kat Atena wain kdie wse Korintus. 2 Wak Korintus wtatiere fe na Yahudi mre wkedi le ma nai yto Akwila. Na oko wemem msois ou wak propinsi Pontus, mahin firi wa ko ou wti waka wahin fobi Italia wadien wsmian Priskila. La yka fe hra firi-firi wa ko Kaisar Klaudius wbahe kat na Yahudi kadio kat yhok yehinti kat kota Roma. Mde Paulus wain wtfoi la yikan lak yik ei yfe bol. 3 La yikan lak ei yibe na hra ysor sawuan not hlos ylis ysafo yin nai ysiala bol dik. Paulus wabe fot na wasor not lis yibe tenda, ofo ou wadien yese, ysiok sisi ni.
4 Tali Sabat man, tali Sabat man, Paulus wloit wse bol sikafit na Yahudi yfe, wrana wkakniet ni man na Yahudi yidien fot na Yunani hra ysaesik yse Nago wak. Ou wrana sanini wan ei wto Yesus wabe kayi Nago wfe wet.
5 Hra oko fo Silas wadien Timotius la yka yehin propinsi Makedonia, mde Paulus wsor oli dait bol tenda ha, ou wrana ta-ta sawuan giet Nago wfem man na Yahudi wto: “Yesus ou le ma Mesias, raja wafle hra Nago wlouk helwain wabe wkosia kat na tkoin faf fehin satian.” 6 Kayi de na Yahudi ekei ytrere yhar kat ou, ydair ysadir sgia yidien ou. Mde Paulus wbawas kat wfe not trik msmiot ei, mde wto man ei wto: “Mko, basak nan nfe hen kafir om molio kat man na mna nan nsa age. Tet tbawas kat tet tna yehin nan nfe satian ei, fe hra nan naha kat wale Yesus. Hra oko fo, tet tahinti kat na Yahudi nan, tain trana Nago wfe giet mabe Yesus man deri na sa wat-wat ei yik le mke.”
7 Mde Paulus whok wahinti kat bol sikafit ei yi, wkatdin wse Titius Yustus wfe bol hra mak bol sikafit mklik mtato anam. Titius Yustus oko wabe dait na Yahudi ha, ou wabe na sa wat hra wsaesik wale man Nago, mahin wten firi wkaso mse Yesus wak. 8 Mde Paulus wrana Yesus wkedi wak ana kawuak de Krispus, na Yahudi wafle waslonti bol sikafit na Yahudi yfe, wadien fot wsmian, wfe wet ei, na kadio kat yik bol ou wa eke yten ykaso kadio kat yse Tuhan Yesus wak. Mde fot le na Korintus marok hra yoso Paulus wrana giet mabot om man ei, ei ynok fot yse Yesus wak, ofo yhnak ykan man nai ysrik kat kla fe ei.
9 Amuk mre fo Paulus wasamik ni, whot fo Tuhan Yesus wyen hata wkan man ou wrana wto: “Naliaksi amot! Nbren kat deri! Nrana ta-ta wata tet tfe giet om. Nsatmor dait kat mala!
10 Fe hra tet tkomot, tsitodo kawuak nen. Bo na mre yka ysiok sgia dait nen, fe hra tet le ma tkain na marok yik kota oko hra bo yloit yse tet tak.” 11 Mde oko fo, Paulus waheit wase kawuak wak Korintus oko, wrana wkakniet Nago wfe giet om man na ekei kayi de der mres mok mtamre.
12 Hra oko fo Galio wabe gubernur wak propinsi Akhaya, mde na Yahudi ysidik ybakaisin, ylalo Paulus. Ei yslon waka, yotik wse wi sahin hra mkerek sadir fe nai. 13 Mde ei yorin fali man Galio yto: “Na ko wwien kein nai, wkakniet sawuan ni ysgia. Ou wbalalan sanini se bo nai ysaesik sele yse Nago wak, mtatol dait madien mam mfe ojin Taurat. [Fe hra ou wgebra wto Yesus sok ma wabe Mesias, Nago wfe wet ou!]”
14 Paulus wto wrana fot ni mre, mahin Galio wlelek oli wse na Yahudi, ofo whar kat ei wto: “Hyee, na Yahudi nan nka nse tet tak, nrana sgia, nadon na kou fe me? Ou wsiok sgia dait ni mre. Ou wska dait na. Yo, wto wsiok sgia nai, ofo tet toso kmiet sok nan. Mahin mdain! 15 Nan nadon deri nto na oko wrana dait ni yitatol yidien nan nfe ojin nan ni. Bo na Yahudi nan nhoyok buon fe deri ni rana wat mre afe nai ykedi wat mre yehin nan nfe ojin om. Tet taha, tkerek sadir fe dait ni mde le ke! Yo, nan mna nan nein wata, nsadir trar fe na oko.” 16 Mde ou wwain kat ei yhok yehinti kat wi makerek sadir om. 17 Mde na ekei ysidik, yba sa wat ro kat na wat mreu wkedi le Sostenes, na wafle hra wslonti bol sikafit na Yahudi yfe okom. Nai yba ro kat ou wak mayiye wi mahon bol kerek sadir magiet, mahin Galio wsamne deri, wliokeit wata nai yba na okou.
Paulus Wsalit Oli Wse Antiokhia
18:18-23
18 Hra oko fo, Paulus wfafti ni man Nago, wto wkok dait wsagien kayi de wsiok ni mre yin Nago yfot. Sba fo, Paulus waheit wase mworos kat wak Korintus kayi de hene magiet mabe ou wain, ofo whros ou wfe jemaat ekei, wto warin kapal wfoto wse propinsi Siria. Oko fo wanak Akwila wadien Priskila la ykomot ou yein sisi. Yhok yik kma sfie Kengkrea ale fo, Paulus wbahe nai ykok kat wsam melek kat, mtatol kayi mde hra Nago wbahe man na hra yfafti ni ydain wale. Mfot fo, yikan tolik ei yorin kapal yein.a 19 Yhok yik Efesus fo, Paulus wahinti kat wanak Priskila madien Akwila la yiheit yese yik oko. Ha ou wmres deri wloit wse bol sikafit na Yahudi yfe, wsadir sas sisi man na hra yik ekei mabe Yesus.
20 Mayi fe mabe wto wain, ei ywaini ou waheit wase amuk mre oli yik oko, mahin ou waha. 21 Ou wkami deri ei wto: “Hau, tet tain wata la. Mde hra Nago whnak, ofo bo tet taka oli tse ko.” Ou wrana sba ni ekei ofo ou warin kapal wahinti kat Efesus, wfoto wse propinsi Siria. 22 Ou whok wais wak kma sfie Kaisarea ofo wain whri wse Yerusalem. Wak oko fo wkami fien jemaat yik ekei, ofo wain oli wsiolok wse Antiokhia.
23 Ou wase kaf kat mok satrio kat wak oko, ofo wain kein kdie, wain kohli kadio kat propinsi Galatia madien Frigia, whnak hron fe Yesus wfe wedla wedli yik wat-wat wi ekei.
Apolos Wak Efesus
18:24-28
24 Hra oko fo, na Yahudi wat mreu wkedi wabe Apolos whok waka wak Efesus. Ou eke wahin kota Aleksandria fobi Mesir. Ou wsablit lis, wrana ni mbot, wsaeti wkanas kat ni yehin Nago wfe katik fari ykohok ei.
25 Apolos oko nai ykakniet warok wale man ou mabe Yesus wabe fan mse Nago wak. Mde ou wkashok wkakniet ni wkatrein mewer kat mabe Yesus. Mahin ni mre ysalolo sonat, fe hra ou wnok kaf kat ni mharfe deri Yohanes wsrik kat kla fe nai, [ha wnok dait latiot fe Yesus waigi, wsidik wron oli, ofo Nago wolio kat Wawua Makohok msisik mse na kadio hra yten ykaso yse Yesus wak.] 26 Whok wak Efesus, ofo wloit wse bol sikafit na Yahudi yfe wbren kat wrana wkakniet ni mabe Yesus. Mahin Priskila madien Akwila la yik fot oko, yoso kmiet ni hra ou wkakniet ei yrok ybot wale, mahin mata ou wnok rorwain dait latiot. Wrana ni mfot fo, la yhakan ou waka wse bol hra la yese om, mde la yrana tahak kat homo-homo ni warok mabe Yesus, kayi de ou wnok tarnik mde sie ma Yesus wabe Fan Toron mse Nago wak.
27 Apolos waisi wto wfoto wse propinsi Akhaya, mde jemaat Efesus ykaka ou, ysroin katik fari man ou watik wse jemaat yik Korintus se bo ei ybla yotik kein ou, yoso kmiet ni hra bo ou wkakniet man ei. Whok wak ana fo, ou whot fo na marok yten ykaso wale man Yesus main fe Nago whares om. Mde Apolos waheit wkakniet Nago wfe giet, whnak hron karmiak kat man jemaat eke. 28 Na Yahudi hra yaha kat Yesus yhoyok ta-ta yidien Apolos yik wi mahon, yto Yesus wabe dait Mesias. Mahin ou whar kat wkait flie sawuan ei, wkakniet sanini ni yehin Nago wfe katik fari ykohok mabe Yesus wabe kayi Kristus afe Mesias, o le ma raja wafleu hra Nago wbatok wabe wskalofos fien na tkoin yehin ei yi satian ei yi.