Paulus Wkri Kein Timotius Wadien Sisi Ei Yein
16:1-3
16
Paulus wadien Silas la yein kayi de yhok yik kota Derbe. Sba fo la yein kein kdie yhok yik Listra. Yik oko fo la ytatiere fe Yesus wfe wedla mreu wkedi le ma Timotius. Wemem na sa Yahudi, mnok wale mse Yesus wak, ha wono na sa Yunani, wdain latiot. 2 Yesus wfe na kadio kat yik Listra yde fot yik Ikonium, ei ynok yto Timotius oko na wabot, ei ytiksi ou. 3 Paulus waisi wto Timotius wkomot la yikan lak ei yein. Mahin ou wnok na Yahudi bo yaha kat, ylok-lok sisi dait yidien wedla oko, wabe nai ybrein dait latiot ou. Mde ke fo Paulus wbrein sros kat Timotius se bo na Yahudi ybot-bot yidien ou, fe hra na sa Yahudi yik wi hra ekei nai ynok kadio kat ou ekei wono wahin na sa Yunani.
Paulus Wadien Wanak Wai Yfoto Yse Makedonia
16:4-12
4 Ei yein kein kdie yehin oko, ykohli kota yrok yik propinsi man, propinsi man, ofo ei yrana twa man jemaat man, jemaat man, ni toji kadio kat hra rasula yidien na tmak yik Yerusalem ykerek sadir fe walem. Ei yojin Yesus wfe na eke se bo ysiwain kayi ni toji eke ytatol, [ha, ni mabe nai ybrein na dla - ni okom mak wata, mabe tiktol deri na Yahudi.] 5 Mde kayi eke ei yhnak hron fe jemaat man ei se bo ei ykanas ynok yse Nago wak. Tali man, tali man, na tlein mre yoso giet mabot mabe Yesus, ofo yten ykaso, yloit kadio kat yse Yesus wak.
6 Mde Paulus wadien wanak wai ei ysin yto yein kein kdie yse propinsi Asia, mahin Nago Wawua Makohok om mtoji ei yloit dait yrana dait Nago wfe giet om mse ana ha, ei ykohli deri fe propinsi Frigia madien Galatia, yrana Nago wfe giet mak eke.
7 Ei ykohli kayi de yhok yik biyalok propinsi Misia. Yik oko fo ei ysin yto ytrik hewain yse propinsi matato hra nai yto Bitinia, mahin Yesus Wawua om maha kat, maisi fe dait. 8 Mde ke fo, ei yein kat fe deri propinsi Misia, ysiolok kayi de yhok yik kota Troas mak siwan wtefit.
9 Yese amuk fo, Paulus wasamik ni mre, whot wto na Makedonia mreu wkro wak ana, wwit lon-lon ta-ta wto: “Nai fe nai, nan nfoto nka kayi! Nkaka la na sa Makedonia mam!”
10 Paulus wrana hatot fe ni hra Nago wyen hata wan ou, ofo mam mnok mto mabot karmiak kat mam mein tamli mse Makedonia, fe mam mnok sas mto Nago wwit fien mam le mkei mibe mrana hatot giet mabot kom mak ana.”
11 Ofo mam morin kapal, mska kat mehin Troas, mfoto siwan kawuak de mhok mik Samotrake, mde tali man kdie fo mam mhok mik Neapolis.
12 Meis mik oko fo, mam mein teit mse kota Filipi, kota mafle mrem mak distrik oko, mak propinsi Makedonia. Kota Filipi oko na sa Roma yrok yti yka wale, yese yik oko. Mhok mik kota Filipi ofo mam miheit mese kawuak mik oko.
Paulus Wadien Wanak Wai Yik Filipi
16:13-18
13 Tali Sabat fo, mam mhok mehin hrede kota Filipi okom mse tlein, ofo mein mse kla wadolon ale, midihar wi hra nai ysikafit sawuan. [Fe hra mak kota oko, na Yahudi ei ykain dait latiot bol sikafit mrem.] Mhok mik kla wtefit ale fo mam mtatiere fe na dli mre hra ybalifis wale yik eke, ofo mam mleli mrana Nago wfe giet man ei.
14 Na dli mrem mahin yikan ekei hra moso homo-homo ni eke mkedi le ma Lidia. Om mabe na ti mahin kota Tiatira hra msafo sawuan not yhbua hra mat pitis warok. Om mabe dait wata na sa Yahudi, mahin om msaesik man Nago. Hra oko fo om msitodo kawuak Paulus wrana ni fe Yesus, ofo Tuhan wkohriak msablit om se bo mten mkaso mse Yesus wak. Om mres dait ha, madien fot na kadio hra yese yik om mfe bol. 15 Mam msrik kat kla fe ei, sba fo Lidia mhakan mam midien mein mese mik om mfe bol, mto: “Nan nto nnok tet tabe wale Yesus wfe wedli, ofo nan nka nese wata nik deri bol tet ta.” Om mrana kayit-yit mde le ke kayi de mam msamenie fe.
16 Tali mre fo mam mein mse wi sikafit hra mak kla wtefit ale om, ofo na dli kawor mrem mhok maka, mtatiere fe mam. Na dli kawor okom klebet wayaka wfla om, molot fe om msewet kahet ni, mrana krek fe ni hra basak yhok yin nai. Oko le ma na marok ykashok yka yse om mak, ywaini fe om mrana sewet fe krek ei, ofo yhnak pitis warok yin om mfe nai yifle hra ykain om.
17 Om eke main korwain Paulus wadien mam, msalo kahradan lis ta-ta mto: “Na hra ke yibe Nago Wakohok Walais kat wfe wedla dihan ei. Ei yka ykakniet fan mse Nago wak, se bo Ou weren kaka nan nloit nse wi maron!”
18 Tali man, tali man om msalo kahradan mwewisti ta-ta lis ni hra Paulus wrana om, kawuak de Paulus wkaso mrohok wtrere, ofo ou wlelek whar kat klebet ou wto: “Nhokti kat! Main fe Yesus Kristus wkedi om, tet tbahe nen nhok nahinti kat na dli okom!” Hra oko fo klebet wayaka ou whok sros kat wahin na dli om mak.
Na Waslonti Bol Mahirit
16:19-40
19 Mde na hra ykain na dli kawor okom yhot fo om msewet oli dait ni, om mfe fle kohok hra molot fe pitis warok ei yloit yse ei yik om mdain wale, mde ei ytrere karmiak kat. Ofo ei yslon fien Paulus wadien Silas, ykein krit yse pasar se bo nai yifle hra yslonti kota oko ykerek sadir fe ei. 20 Yhok yik nai yifle hra yslonti kota okom ei ybariomo fo ei yadon yto: “Na Yahudi lak hra ke le ma yka ykowiri-wara na marok faf fik kota ko. 21 Fe hra ei ykakniet ta-ta nai ysiok ni hra ytatol dait yidien ojin na Roma faf fi - ni hra mam maha moso kmiet ei.”
22 Mde na marok ekei ysidik ytrere sgia kat ei, ofo nai yifle eke ybahe nai ytli kat rasul la yikan lak ei yfe not trik, ofo ylouk tiyen yka, ybaknar kamyi kat ei.
23 Nai yba lis kat kayi mfot fo, nai yklat kat yse bol hirit mabri. Mde nai yifle ei ybahe man na waslonti bol hirit oko yto: “Nen nnok deri, nhirit homo-homo wedla lak ei ytodo kat!” 24 Woso fo ni hra ei ybahe fo, na waslonti bol hirit ou whirit sros kat la yikan lak ei yse bol hirit mabri ra, sit makahlia kat, wfalik ei yteit yloit yse wkoit ytayi ofo wkait ti-ti ytodo kat yidien rantai besi.
25 Yleli kayi de amri wklatiriyo ofo, Paulus wadien Silas la ysikafit ykadie heyit samne wata man Nago, ofo na hirit wat man ei yoso kmiet wata ni eke. 26 Mde yiwua fe fo, frero wafle whok ro kat, wna dan bol hirit om mrioro kayi de hrede yrohok ytdak kadio kat. Omos rantai besi ykerek ytli yehin na hirit ei yna yteit, yti kadio kat yse fobi.
27 Mde na waslonti bol hirit om wrioro wsidik ro kat wahin wi ma ese om, wsmit fo hrede bol hirit ei yhak kadio kat. Mde wteit rioro waliak kat fe ni hra ma de okom. Mde wto wkrit mnian lis ou waka wto wskalit kat na mna ou wkak wata, fe hra ou wnok wto na hirit ei ytain kadio wale. 28 Mahin ou woso ro kat fo Paulus wsalo kakas wsalo fle wto: “Woi, nskalit amot nen nala! Na hirit mam kadio la mke!”
29 Mde na waslonti bol mahirit oko wbahe nai yotik fien tamli sitin ydhen, yka fo, ou wsese wloit wse bol hirit mfe sit mabri ra, wteit rioro wti wsaesik wse Paulus wadien Silas la ybariomo.
30 Mde ou wkothok kat la yehin wi mahirit om yhok yse tlein, ofo wto: “Nai yfe na la nan, bo ni mit ma tet tsiok se bo Nago weren kaka tet?”
31 Mde la yto: “Nten nkaso deri man Tuhan Yesus se bo ou weren kaka nen nron lis kawuak, nen nadien fot nfe na kadio kat yik nfe bol.” 32 Mde ei yrana giet mabot mabe Tuhan Yesus man ou wadien fot ou wfe na marok hra yik bol ou wa. 33 Madien amuk amri hra oko fo, na waslonti bol hirit oko wware kat Paulus wadien Silas la yfe klis eke, wkomik hao. Ou wrana hatot kat wabri wa man ei, ofo rasul la yikan lak ei ysrik kat ou wadien kla - ou wadien fot ou wfe nai kadio hra yik ou wfe bol. 34 Mdain wale fo, ou wkri kein yein yse bol ou wa, ofo wlak ni eit yik la yibariomo yibe la yeit. Ou wkashok karmiak kat wabe ou wadien sisi ou wfe nai kadio kat ynok tnes mse Nago wak.
35 Tali mhak sba fo nai yifle hra yslonti kota ekei yteye ni bahe main fe yfe na sae kahat mre yein yse na waslonti bol hirit wak. Yka fo, ei yrana hatot man ou yto: “Nkothok kat na lak eke yein!” 36 Mde na waslonti bol hirit wto man Paulus wto: “Nkashok la! Na yifle hra yslonti kota ekei ybahe firi yto nen nadien Silas la nan nhok nein wata nidien hra ko, la nan nbot deri.”
37 Mahin Paulus whar kat man na sae kahat ekei wto: “Hra ei yba kafriehe buon krek mam mik mahon fe me? Na warga Roma fot le mam mke, mahin ei ykerek sadir roro wain latiot fe mam! Mde hra ko fo ei ybahe kat mam mein hlok fe me? Hau! Mdain! Na mna ei sok ma yka ywiehla fien mam mhok mehinti kat bol hirit kom!”
38 Mde na sae kahat ysalit yrana hatot man nai yifle hra yislonti kota oko. Mde ei yoso kmo fe Paulus wadien Silas la yibe fot na warga Roma, mde ei yeliek karmiak kat fe hra ynok tnes mabe ei ysiok hriok na warga Roma ei. 39 Mde ei yka tamli kat yse la yikan lak ei yik bol hirit, ofo ysadir baluwa yidien ei, ykri kat yhok yidien yein yse tlein, ofo ywaini lon-lon man ei se bo la yein homo-homo yhokti kat kota ei yi.
40 Ofo la yehinti kat bol hirit oko, la yein yse bol Lidia mfe. Yik ale fo ybalifis yidien yanak Yesus wfe na ei, yrana ni yhnak hron fe ei. Sba fo la yein.
