Sadir Trar Mak Yerusalem Mabe Yesus Wfe Wedla Yehin Na Sa Wat-wat Ei Nai Ybrein Dait Amot Yila
15:1-21
15
Hra oko fo na Yahudi mre yka yehin propinsi Yudea ysiolok yse kota Antiokhia. Yhok yik jemaat yik oko fo ei yrana yto: “Woi, na sa wat hra yibe dait na Yahudi toto mam, man hra nnok tmol sawuan mse Yesus wak. Na dla nan nto nai ybrein dait nkan om mde hra mam mke, mde hra ojin Musa wrana fem, ofo Nago wwien fien dait nan, weren kaka dait nan nse Ou wak.”a
2 Mahin Barnabas wadien Paulus la yhar kat ykanas kat fe ni hra ei yrana ekei, kayi de jemaat ekei ytrie helwain Paulus wadien Barnabas yidien fot na wat mre yehin jemaat oko yibe yhri yse Yerusalem, yse rasulb yidien na tmak man hra yese yik ra, se bo ybalifis ysadir trar fe nai ybrein kat yidlai afe mdain. 3 Ofo jemaat Antiokhia ekei yidien twa ei kayi de yhok yehinti kat kota oko, mde ei yein kat fe propinsi Fenisia madien propinsi Samaria, ytfoi yanak man hra ynok sisi mse Yesus wak. Ei yrana hatot man ei fe na sa wat-wat hra kamuolo ynok dait latiot Nago, mde madien kaman firi wa ko ei yket wale, ynok tnes yse Yesus wak. Ni okom mhnak kolot kaso fe yanak man ei ykashok karmiak kat.
4 Ei yhok yik Yerusalem mde rasul yidien na tmak yidien fot jemaat kadio kat ylia kein ei ybot deri, ofo Paulus wadien Barnabas la yrana hatot fe ni kadio kat hra Nago wsiok wale yein fe ei yin na sa wat marok ei.
5 Mde na safuk mre yehin na Farisi hra ynok wale yse Yesus wak yka yto: “Na hra yibe dait na Yahudi - nai ybrein dait na dla eke fe me? Yeisi ma nai ybrein kayi ei, ysiwain kayi Musa wfe ojin kadio kat ei.”
6 Mde rasul yidien na tmak ei ysalifis ysadir trar fe ni okom. 7 Ei ysadir sas lis kayi de, ofo Petrus wsidik wkro, wrana ni fe ei wto: “Table wa nan, nan nnok tet tabe kaman Nago wlouk helwain wale tet tahin nan nik se bo, main fe tet tgiet kom, na sa wat-wat ei yoso fot Nago wfe giet mabot mabe Yesus, mde ei ynok tmol wale yse Yesus wak yde fot le faf fke.c 8 Oko fo Nago hra wnok na kadio kat ei yibri ekei, Ou le whnak sros kat wale Wawua Makohok om man na sa wat eke mde fot le whnak wale man faf fke. Ni okom mhnak kyat fe faf mabe hra Nago wwien fien wale ei.d 9 Ou wkoriet dait ei ywat yehin faf fik ha, ou wware fot ei yibri om mde fot le faf fke, fe hra ei ynok tmol mse ou wak. 10 Mto mde ke fo, nan nwewis kerek Nago wabe? Hra nan nto nbayidi buon agi matian man ei ykafe fe me? Hra nan nhorot na ekei ysiwain ojin kadio kat hra fate kokos wai yidien fot faf fke fkaluwa fsiok oli dait? 11 Nto de sie? Ni mit ma molot fe Nago weren kaka faf? Fe hra faf fsiok ni yibot-bot yin ou, afe! Hau! Mdain! Nago weren kaka faf fe hra deri ou whares man faf. Mde fot le oko Nago wolio kat wale wfe hares man na sa wat-wat ekei, weren kaka wale ei, yde fot le faf ke.
12 Mde Paulus wadien Barnabas la ysidik yrana hatot fe ni owuok-awak warok hra kaman firi Nago wsiok yin na sa wat-wat main fe ei. Nai yoso kmo ni eke, de na marok eke ysatmor kadio kat. 13 Paulus wadien Barnabas la yrana kayi ni yfot fo, Yakobus wrana ya ni wto: “Hei table wa nan! Nan noso la tet trana ni kei!
14 Simon Petrus oko wrana wale man faf mabe kaman wa ko Nago wbakoko fe na sa wat-wat ekei, ofo wlouk helwain wale na mre yehin ei yik se bo yibe Ou wfe nai, se bo na marok ei ytalan fe ou wkedi. 15 Ni kadio kat ekei ytatol kayi yidien ni hra nabi ysroin krek wale, yto:
16 Basak sba Tuhan tet taka oli,
tsiok wain oli bol dik Daud wfem hra mti wale.
Wanik deri mrik wale ha,
bo tet tsiok hao oli mhron kawuak.
17 Se bo na tkoin kahlia man hra yiheit sonat yik fobi ko ydihar kayi de ytatiere fe Tuhan tet,
Mde na sa wat-wat marok kadio man hra ysamenie fe tet tkedi om, bo tet tyo kayi ybalifis yse tet tak.
Tuhan tet le ma trana krek man nan mabe basak tsiok kadio kat kayi ni eke –
18 ni hra tet tsin fe wale yidien masayen kamuolo kat.”e
19 Mto mde ke fo tet tkait krek man nan mabe fanak na sa wat-wat hra ylelek wale yse Nago wak hra ke, bo faf fsiok ei ykahiowain amot yila! 20 Ha, nan nka faf fsroin deri wata katik fari man ei frana ftoji fto ei yleli ni eit hra nai ysanfe wale yin patung nago wat-wat man ei, yo, yleli fot erwas ykan fokot hra madien sonat hen kbuon mak mabri om fe hra nai ykaitti wdiorom kayi de wkak. Yoma, ei yleli fot hen om, ei yoko dait, yeit dait. Faf ftoji fot ei ysiok dait sebe, yemir sak-sak dait amot yila.f 21 Fe hra ni toji eke yhok firi dait ha, yidien wale kamuolo. Kamuolo anggait Nago wtoji wale man na tkoin kadio kat. Mde tali Sabat man, tali Sabat man, nai yrana siar Nago wfe ojin hra Musa wsroin wale ekei. Nai yrana siar wale yik kota kadio kat, mahin kamuolo kayi de hra ko, nai yrana ta-ta kawuak ojin kom madien tali Sabat yik na Yahudi yfe bol sikafit kadio kat.
Katik Fari Man Yesus Wfe Wedla Wedli Yehin Na Sa Wat-Wat
15:22-34
22 Mde rasul ei yidien na tmak ei yidien fot kadio kat jemaat ekei ykerek sadir mabe ylouk helwain na mre yehin ei yik yibe ykomot Paulus wadien Barnabas ysalit oli yse Antiokhia. Mde ei ylouk helwain wedla lak hra yibe wale nai yifle hra yslonti yanak man ei, o le ma Yudas hra nai ywit fot wabe Barsabas, wadien fot Silas. 23 Ei yteye fot katik fari man wedla lak eke yotik hra mrana mto:
Mahin nan nible rasul mam, na tmak mam mik Yerusalem ko, man Yesus wfe wedla wedli na sa wat-wat man hra yibe dait na Yahudi, hra yese yik kota Antiokhia, yik propinsi Siria, afe propinsi Kilikia,
Tali wabot wan nan.
24 Mam moso wale mabe na mre yhok yehin mam mik, yka yse nan nik, ykakniet sak-sak ni hra ytatol dait, yhnak kahiowain fe nan. [Fe hra na eke ybahe dienen yto na dla sa wat-wat nan nto nbrein dait nkan mde le hra na dla Yahudi mam, ofo Nago wwien fien dait nan. Noso amot ei yila, fe hra ei ygebra deri.] Mam mbahe dait ei. 25 O le ma mam msamenie fe wale mto mlouk helwain tnes na mre yehin mam mik, yka yse nan nik yidien sisi Barnabas wadien Paulus, mam manak yilolon lak 26 hra na wat yto yska wale, mahin la ybren kat deri, yrana wata giet mabot mabe faf fi Tuhan Yesus Kristus. 27 Mde mam mbahe wale Yudas wadien Silas yka yse nan nik, yrana fe fot ni hra mam msroin ke yin nan. 28 Fe hra mam midien fot Nago Wawua Makohok om mam msamenie fe wale mto mhnak dait ni bahe mitian mre man nan, ha mam mbahe deri ni le mkei: 29 Nan neit amot erwas man hra nai ysanfe wale yin patung nago man ei yila. Nan neit amot hen. Nan neit amot erwas man hra nai yerek buohok yila. Nan nsiok sak-sak dait sebe. Nan nemir kat amot yila. Nto ntiek nehin ni yisgia eke kadio kat, ofo nan niheit nbot deri.
Ni deri le mke. Nago watsiofo faf kadio.
30 Mde jemaat Yerusalem ykami wedla yikan hat ei, mahin fo ysiolok yse Antiokhia. Yhok yik ale fo, ywit fien jemaat ei ybalifis, ofo yhnak katik fari okom man ei. 31 Ei ysmit lien sba katik fari okom mde ykashok fem, mabe mhnak hron fe ei. 32 Yudas wadien Silas la yibe fot nabi, mde la yrana sawuan ojin man fot jemaat ekei, mhnak kanas fe ei yibri. 33 La yese mitian kat yidien jemaat ekei kayi de yto ysalit oli yse Yerusalem, mde jemaat ei ykami, ykait wain homo-homo yto: “Nago watsiofo la nan, wadien rorwain nan kayi de nan nhok nidien bot deri nik oli ra.” 34 [Mahin nafleni Silas oko waisi wto waheit kawuak wak oko ha, wanak Yudas ou wmres deri wsalit oli.]
Paulus Wadien Barnabas La Yhoyok Frit
15:35-41
35 Paulus wadien Barnabas la yiheit yese yik Antiokhia. Ei yidien sisi na wat marok om ykakniet giet Nago wfem man jemaat ekei. 36 Man bri satrio kat ofo Paulus wrana man Barnabas wto: “Naka tanak, la faf fein ftfoi oli fible yik kota propinsi wat-wat kadio kat man hra kaman la faf frana wale Tuhan wfe giet om, se bo faf fsmit lien fhot ei yde sie.” 37 Barnabas wsamenie fe, mahin ou waisi wto wkri kein fot Yohanes hra nai ywit fot yto Markus, ou wadien sisi ei yein.
38 Mahin Paulus whar kat wto wala, wabe kaman Markus oko wadien sisi wale ei, mahin wahinti kat ei yik propinsi Pamfilia, waha wsiok sisi ni wadien ei.g 39 Barnabas whorot lis, mahin Paulus ou waha kat, molot fe la yhoyok frit kayi ti-ti la yhriak, yein siar wat-wat. Mde Barnabas wkri kein Markus la yorin kapal yfoto yse rowe Siprus. 40 Ha, Paulus wlouk helwain Silas, mde jemaat yik Antiokhia ysikafit fali ei, yhnak la yse Nago wak se bo ou whares watsiofo kawuak ei. 41 Ofo la yein ykohli propinsi Siria madien Kilikia, yhnak hron fe Yesus wfe nai yik jemaat wat-wat ana.
