Yik Ikonium
14:1-7
14
Yhok yik Ikonium fo, Paulus wadien Barnabas la ysiok ni yde hra ei ysiok lokdi – la ytrik yse bol sikafit na Yahudi yfe, ofo yrana ykakniet ni mbot karmiak kat, kayi de na Yahudi yidien fot na Yunani yrok yten ykaso mse Yesus wak, [ysamenie fe Yesus wabe Nago wfe Na Waron ou.] 2 Mahin na Yahudi man hra yaha kat giet mabot mabe Yesus, ei yrana siorok rasula yikan lak ei yin na sa wat-wat ei, na hra yibe dait na Yahudi, kayi de na eke ytrere karmiak kat, yhar kat fot rasul lak ei yidien fot na hra ynok firi kmo mse Yesus wak, kayi de nai yoso dait kat ei. 3 O le ma Paulus wadien Barnabas la yese mitian kat yik kota oko. La ybren kat yrana samne giet mabot mabe Tuhan Yesus wfe hares om. Ofo Yesus whnak rasul ei ysiok ni owuok heit-hat kayi de na marok ysamenie fe giet mabot om. 4 Na hra yik kota ekei yfla flalie, mta mti mse rasul ei yik, mta mti mse na Yahudi hra yaha kat Yesus.
5 Mde na Yahudi yidien fot na hra yibe dait Yahudi ei ybalifis yidien yfe nai yifle, ysin ysiok sgia rasul la yikan lak ei, yto yba amak fe ei kayi de ykak. 6 Mahin rasul lak ekei yoso ni okom ofo la ysidik ytain yehinti kat Ikonium, ykadin yse kota wat kdie man hra yik propinsi Likaonia - o le ma Listra madien Derbe yidien fot krotia wat-wat man hra ykohli kota eke. 7 Yik ana fo la yrana ykakniet kawuak giet mabot mabe Yesus yin na marok.
Yik Listra Madien Derbe
14:8-20
8 Yhok yik kota Listra fo, la yrana giet mabot om man na marok ei yoso. Mde na wakarat mreu wleli fot wak oko wadien sisi na marok. Ou wkarat wale wadien kamuolo wemem msois, ou wain dait. 9 Na wakarat okou woso fo Paulus wrana ni, ofo Paulus wsmit torot ou, whana fe hra na wakarat oko wsablit om main mse Yesus wak, wnok wto Yesus sok ma bo weren ou.
10 Mde Paulus wsalo kaf kat wbahe wto: “Nsidik kat, nkosia nteit ekei, nahin nkro trik!” Ofo na oko wkaprsat wsidik wkro trik, ofo wain sas-sas wse ta, wse ta.
11 Mde na marok om yhot ro kat ni ekei, mde ei ynok sele yto rasul lak ei yibe ei yfe nago Yunani wat-wat man ei. Ei ysalo fle yidien ysalo ei yi Likaonia yto: “Ahe! Faf fi nago lak angke yeis kmo yehin wi mayehet ago, yka yse faf fik, ybahlia wale ykan ysilok yde le na tkoin faf fke!” 12 Barnabas ei ywit wabe ei yfe nago wafleu Zeus, fe hra ou wrana semfe dait ni. Ha, Paulus ei ywit wabe nago Hermes, fe hra ou le wkomot Zeus wrana wanik ni yibe ou. 13 Bol kohok Zeus wfe mataren deri fan ta mse kota, mataren mse na marok ei yik. Mde na imam hra wdihan Zeus ou watik sapi yidla yidien fot ni hriet wkoit ykanwak yka, watik yse na marok ei yik kota mfe hrede magiet ei. Whok wak ana fo imam okou wadien fot na marok ei yto ylouk wkoit ykanwak ei yka yibe hriet, ykoliok yse rasul ei ydioro ago. Yo, sapi ei yto ykolok yka, ofo ysaesik ysanfe yin rasul la yikan lak ei.
14 Paulus wadien Barnabas la yoso ni hra ei ysin fe ekei, mde ykodihak yfe not trik yke se bo nai ynok ei yaha karmiak kat ni ekei, ofo ysese yskafla flalie yik na marok okom, ysalo fle yhar kat yto:
15 “Woi! Mala! Hra nan nto nsaesik yin la mam mibe? Na tkoin deri mam, mde fot le nan nke! Mam mibe dait nan nfe nago ei! Mam mka mrana Nago wfe giet mabot man nan se bo nan nhokti kat nsaesik oli dait nin klebet yisgia ekei ha, nsalit nlelek oli nse Nago Na Waron ou wak. Ou eke le ma wsiok wale yik, fobi katak, siwan, yidien fot ni kadio kat hra yiron. 16 Wadien masayen kamuolo kat Nago wliokeit na sa marok ei ykan bren kat ou, yein wat-wat fan ei yi. 17 Wanik deri na tkoin yehinti kat wale ou, ni hra ou wsiok yirok-rak eke ykakniet fe ou whares sonat wan na tkoin faf. Nan fot le nhot amo ou wfe hares man nan. Fe hra ou whnak sawuan tiktol tolo melin wadien tolo kyen se bo ni fori yik nfe biele ykan ta-ta, ofo ni eit mlek-lak mban man nan, kayi de nan nkesit, nibri ykashok.” 18 Rasul lak ei yrana wata mde ke, mahin na marok ei ysanini yto yhnak wata ni sanfe man ei. Oko fo la yhar kat ykanas karmiak kat kayi de nai ysanfe dait ni mre man ei.
19 Mde na Yahudi mre yehin kota Antiokhia hra mak propinsi Pisidia yidien fot na Yahudi mre yehin kota Ikonium yhok yka, yrana siorok ni yibe rasul ei yin na marok Listra kayi de ei ytrere karmiak kat. Mde na marok ei yba amak fe Paulus kayi de yto bosi wkak wale, mde ykein krit kat ou wse tlein, wahinti kat kota okom, mde yehinti kat ou yibe ynok yto wkak wale.
20 Mahin Yesus wfe wedla wedli hra ynok firi mse Ou wak ei yka ykro lalokti Paulus wak bri aiti kayi de ou wsidik wahin, ofo yein sisi ysalit oli deri yse kota mabri ra. Tali sba fo Paulus wadien sisi Barnabas la yein kein yse Derbe.
La Ysalit Oli Yse Kota Antiokhia Hra Mak Propinsi Siria
14:21-28
21 Yhok yik Derbe, ofo Paulus wadien Barnabas la yrana giet mabot mabe Yesus yik kota oko kayi de na marok ynok yse Yesus wak, yibe wedla wedli yin Ou. Mfot fo rasul lak ei ysalit yein sas oli yse kota hra kaman firi ei yrana wale giet mabot om - o le ma Listra, Ikonium, yidien fot Antiokhia Pisidia.
22 Yik kadio kat kota ekei la yhnak hron fe wedla wedli ei, yojin homo-homo ei se bo ynok kawuak mse Yesus wak, yto: “Nnok krek mabe nai yidien sgia kayi faf, sba fo faf floit tnes fse kerajaan Nago wfem. Nai ysiok ni ysgia-sga yrok yin wata faf, ha, faf fhron kein wata, se fein soro fan mse Nago wak.” 23 Yik adit jemaat warok ekei, yik jemaat man om, ofo rasul lak ei ysikafit, yleli ni eit, ofo yebet na mrei yibe na tmak yslonti jemaat man hra okom. Mde la ysikafit fali yhnak ei yse Tuhan, hra ei yten ykaso wale mse Ou wak. La ywaini se bo Ou whnak hron fe ei yiheit ykanas kawuak. Yik jemaat warok man ei, la ysiok kadio kat msadiak mde kayi le ke. 24 Mfot fo, ei yein kohli propinsi Pisidia kayi de yhok yik propinsi Pamfilia. 25 Yhok yik kota Perga, ofo la yrana ykakniet giet mabot mabe Yesus. Mfot fo ei yein kein oli, ysiolok yse kota Atalia hra mak kla siwan wtefit ale.
26 Yik oko fo, la yorin kma rar maflem, mde yein yfoto siwan katak, ysalit oli yse kota Antiokhia Siria, o le ma wi hra kaman ei yfe jemaat malalie yhnak la yikan lak yse Nago wak, se bo Ou whnak hares man ei yibe la yein batara, yrana siar giet Nago wfem.
27 Fe hra la ysiok kadio kat ni eke ydain wale, ofo la ywit fien jemaat kadio kat yka ybalifis yibe la yrana hatot ni fe ei. Ei yrana wain oli ni warok kadio hra Nago wsiok wale mais fe ei yik jemaat adit man ei. La yrana yto: “Nago wkotewe wale fan man na sa wat marok hra yibe dait na sa Yahudi se bo ei yten kmo fot ykaso mse Yesus wak!”
