Ni Rana Wain Fe Na Jemaat Ysikafit Ofo Yteye Barnabas wadien Saulus
13:1-3
13
Hra oko fo, mak jemaat Antiokhia okom, na mahot yibe guru jemaat yin ei, ykakniet giet Nago wfem man jemaat. Mahot ei yibe fot nabi, fe hra ei yoso sros ni yehin Nago wak ofo yrana yin jemaat. Yikan mahot ei le ma: Barnabas, Simeon hra nai ywit yto Wa Ogin,a mde Lukius hra wahin kota Kirene, mde Menahem hra wfori sisi wadien raja Herodes [Antipas]b, ei yidien fo Saulus. Ei le ma ykakniet ni yin jemaat Antiokhia, yidien yrana sros ni yehin Nago wak yin ei. 2 Mde tali man ou fo, yikan mahot ekei ysikafit ysaesik man Tuhan, yidien yleli ni eit, mde yoso Nago Ou Wawua Makohok om mrana ro kat man ei mto: “Nan nlouk Saulus wadien Barnabas nberiet wat yse tet tak. Tet le twiehla fien ei le mke, tto tteye la yein yse wi wat, ysiok ni hra tet tsin krek fe wale.”
3 Mde yikan mahot ekei ysikafit yidien yleli ni eit oli wata kayi de, ylak yna fe Barnabas wadien Saulus, ysikafit se bo Nago whnak fle fe ei. Ofo jemaat ei ykami ybahe yein.
Saulus Wadien Barnabas Yein Yse Rwe Siprus
13:4-12
4 Hra oko fo Nago Ou Wawua Makohok om mbahe Saulus wadien Barnabas la yein, mde yein yse kota Seleukia mak siwan mtefit ale. Ofo la yorin kapal madien rar mrem yfoto kla siwan kayi de yhok yik rowe Siprus, yik kota Salamis.
5 Yhok yik Salamis mde yein ysikafit yse na Yahudi yfe bol sikafit heit-hat ei, yrana man na Yahudi ei yibe giet Nago wfem. Yohanes hra nai ywit fot yto Markus, ou wadien sisi wabe weren fot ei.
6 Yein teit, ykohli rowe okom kawuak de, yse rowe wtato ana, yhok yik kota Pafos. Yik oko fo ytatiere fe na Yahudi mreu hra wkedi wabe Bar Yesus, hra wlan sawuan ni sihir ei, wrana ni owuok ei wto wabe fot nabi wsewet wrana sros ni yehin Nago wak, wahin wgebra deri. Wkedi om nai ysalo Yunani ywit yto sihir Elimas. 7 Ou ekei le ma wanak gubernur Sergius Paulus hra wslonti rowe kom. Gubernur oko na wnok ni, wa sablit lis. Ou waisi woso giet Nago wfem mde, wwit fien Barnabas wadien Saulus la yka, yrana giet mabot Nago wfe man sma ou wosom. 8 Mde la yein, ofo yrana giet mabot om man gubernur mahin, sihir Elimas hra wafik heit-hat ni ou whar kat la yikan lak ei, wrana ni wewis-wawas yin gubernur ou wto: “Noso kmiet amot la yikan lak ei! Nnok tmol amot mse Yesus wak. Ygebra.”
9 Mahin Saulus hra nai ywit fot yto Paulus, ou whon fe Nago Wawua Makohok om mde, wsi torot kat sihir Elimas oko ofo whar kat wto, 10 “Woi klebet wafleu wfe wet nen, nen nkhan nadien sawuan ni ybot toron kat, ngebra sawuan na, nrana sak-sak ni. Nen nto nkolet-lat fan hra Tuhan Nago wfe om, ni hra Nago wto sros kat ybot ofo nen nto ysgia.”
11 Mde Paulus wto man Elimas wto: “Noso la, kyamre fo Tuhan Nago bo wba nen, ofo nsibra kaf kat nhot oli dait tali mteit mrem.”
Mde sihir ou wsibra ro kat, mde le saun mogin mhoborti ou, mde ou wain wna sas-sas hewain-wan wsidihar na mre ysiokti wna om se ysria wain.
12 Gubernur ou whot ni kadio kat ekei de wten wkaso mse Yesus wak, wteit yrioro wkashok woso ni hra Paulus wrana wkakniet mabe Tuhan Yesus ou.
Paulus Wadien Barnabas La Yein Yse Antiokhia
13:13-49
13 Mde Paulus wadien wanak wai yehin Pafos yorin kapal madien rar yfoto yse propinsi Pamfilia, yse kma sfie kota Perga. Mahin yik Perga de, Yohanes hra nai ywit fot yto Markus, ou wahinti kat ei wain oli wse kota Yerusalem.
14 Yehin Perga Paulus wadien Barnabas yein kein yse kota Antiokhia hra mak distrik Pisidia, mde tali wat tali Sabat uwade kat fo, yloit ysikafit yse na Yahudi yfe bol sikafit mrem ofo yleli.
15 Yleli yidien sisi na ekei mde, na mreu wkro wbaca ni mahin Katik Fari Nago wfem. Ou wbaca mrei yehin Katik Fari hra Musa wsroin ei, mrei yehin fot Katik Fari hra kamuolo nabi ysroin ei. Ybaca mdain fo, na yifle hra yslonti bol sikafit okom, ybahe na yein ywaini man Paulus wadien wanak ou yto: “Nai fe na, table wa nan, nto neisi fo, nrana wat ni yibot yhnak hron fe mam.”
16 Ofo Paulus ou wsidik wkro, wna baesik ei se ysatmor mde wto: “Table na sa Israel nan, nidien tanak na sa wat nan, hra nsaesik fot mse Nago wak, nan nke noso kmiet la mse tet tak ko.”
17 Mde Paulus wrana mabe ojin na sa Israel man ei wto: “Madien sayen fo, Nago faf fi ou, Nago hra na sa Israel faf fsaesik man ou, kamuolo ou wlouk helwain wale faf fate kokos wai. Wkororo ytakein ei ysres. Ei yese der warok yik Mesir mde ou wkororo, wolot fe ei ysres kayi de ytakein ei yrok ysamsa kat. Mde Nago wadien wfe fle kohok om mfle karmiak kat ofo wsria kein yhokti kat fobi Mesir okom, yein fe samdi sabarak yse fobi wat mrem.c 18 Mde yese yik samdi sabarak der na lak yeigi (40). Nago wkororo ei. Ysiok wata ni ysgia, Nago wmro fe wata ei.d 19 Mde wkororo yein yse fobi Kanaan. Ykhan yidien na Kanaan na sa mtalak ekei kayi de, Nago wsiok ei yfot, kyamre deri yiheit. Mde Nago whnak fobi ke man wfe na Israel ei, ykain kawuak.e
20 Ni kadio ekei hra tet trana fe yke yese wale bo mal sadik der 450. Mde Nago wtik nai yfle mre yin ei, yibe yslonti ei. Nai yifle man ei man ei kayi de man ou le ma nabi Samuel.f 21 Mde na Israel faf fate kokos ei, ywaini mahin Nago yto: ‘Nhnak raja mreu wan mam,’ mde Nago whnak. Nago wkosia Saul, hra Kish wfe wet ou, wahin na sa Benyamin, wabe raja, wslonti ei kawuak de der na lak yeigi (40 tahun).g 22 Mahin fo, Nago wkodin kat Saul, ofo webet oli Daud wabe raja wan na sa Israel. Daud oko, Nago wrana wto: ‘Daud, Isai wfe wet, o le ma tet thot wale wtatol wadien tet tabri kom. Ou eke bo wsiok kadio kat ni hra tet taisi fe.’h
23 Ofo Daud wtakein, wkokos, kayi ti-ti-ti hra wtakein man ou le ma Yesus. Yesus le ma Nago webet, mde kayi le ou wkadoin krek fe wale, wabe Mesias, waka wse na sa Israel faf fke, weren kaka faf. 24 Yohanes walin. Mkdia mabe Yesus waka fo, Yohanes waka walin wrana tahak krek fe wale man na sa Israel, se bo ei yket yehinti kat ni yisgia, ysatian ei, yhnak ykan om man ou wsrik kat kla fe ei.i 25 Mahin mataren mse Yohanes oko wto wsiok ni makahlia kat ofo, ou wrana wto: ‘Nan nnok nto na sie ma tet tke? Tabe na hra Nago wkadoin fe wabe wteye waka? Mdain. Tet tabe dait na man hra nan nwade kein ou, Mesias ou, mdain. Bo ou waka wain heles. Ou wfle wewer kat tet. Tet tke tharfe dait mabe, ttli Mesias ou wfe omos sandal ei. Tet tharfe dait oko, wabe ou wfle wewer kat tet.’”j
26 Mde Paulus wrana sba kdie man ei wto: “Table wa nan, nan nibe Abraham wkokos, na sa Israel nan, noso la tet trana ni yin nan. Yo, table na sa wat nan fot, nan nsaesik wale nse Nago wak, ofo noso la tet trana ni. Nago weren kaka faf, giet okom wteye man faf le mkom. 27 Kaman na Yerusalem ei ynok rorwain dait Yesus. Na hra yese yik kota Yerusalem yidien fot nai yifle hra yslonti ei, ynok dait. Ynok rorwain dait Yesus ou wabe Mesias, ynok yto bosi na tkoin deri. Yoso nai ybaca tali Sabat man tali Sabat man ni hra nabi ysroin krek wale mabe Mesias ou, mak bol sikafit mabri. Ha ynok sele yto bosi Yesus wabe na sak-sak deri. Mde yhnak samne satian man ou se bo nai yska wkak. Yska wkak o le mtatol madien ni hra nabi yrana krek fe wale, mahin ynok rorwain dait. 28 Ha ei ytatiere fe dait ni masgiam mre man Yesus ou wsiok, wsiok dait deri ni mre mtatol wabe nai yskau mahin, mde wata kayi eke, (mahin) ywaini sanini man Pilatus ou se bo wska ou wkak. 29 Mde ei ysiok kadio kat ni man ou hra nabi ysroin krek wale ytatol yin ou ekei. Yska wkak mde, nai ytefek kat wahin wkoit badan om wan ykali ylak wse hin knawato.k
30 Mahin Nago wkosia Yesus wron wsidik oli wahinti kat wi eigi om. 31 Nai yhot wale ou wron! Na ekei hra kaman yidien sisi wale ou, kaman yehin Galilea yein kein fali kayi de yik Yerusalem, ekei yhot ou wahin wale. Yhot ta-ta ou wron oli. Ei eke le ma yiheit yrana hatot ni hra yhot ei yin na sa Israel faf.”l
32-33 Mde Paulus wrana kein oli wto: “Mam mke mrana tahak fe Giet Mabot man nan le mkom. Fe Nago wkadoin krek wale ni, man faf fate kokos ei, ofo wbatirik wale man faf le mkom. Wsiok Yesus ou wsidik wron oli. Madien hra ke ko le faf fhot wale, ha faf fate kokos yhot dait. Ni hra Nago wrana krek fe wale mabe Yesus ou, wsiok wale le mkom.
Daud wsroin mak katik fari Mazmur fasal lak om, ni hra Nago wrana de wto:
‘Nen nabe tet tfe wet nen,
hra ke ko tet trana tahak man nen
mabe nen nke nono le tet tke.’
Nago wrana mde le ke.m
34 Nago wfe wet Yesus oko, ou wkosia kat wsidik oli, waigi oli dait, wban dait, mtatol madien ayat nats wat mrei. Kamuolo nabi Yesaya wsroin, wto:
‘Nago tet tke bo tet thnak kayi yin nan,
mde le tkadoin krek wale yin nan nate kokos Daud,
basak tet teren sros kayi nan.’ ”
Nabi Yesaya wrana mde le kom.n
35 Mde nats wat mrem mrana mto:
‘Basak Nago nen nliokeit dait nfe na wakohok wlais kat tet,
taheit tban tdeya tak hin bet aiti.’ o
36 Daud le wsroin ayat okom. Kamuolo, Daud ou wase wlis, wsiok wale ni hra Nago wbahe fe wale man ou, mde waigi. Nai ykak eigi ou, wak wi hra ykak fot wale wono wai wate kokos wai. Wban hono wale wak bet aiti. Ofo nats okom mrana fe dait Daud. 37 Ha, nats okom mabe na oko hra wakohok wlais kat ou, mrana fe tiktol Yesus le wko. Nago wliokeit dait Yesus ou waheit wdeya wak bet aiti ha, wkosia wsidik oli. Wtra dait.
38 Mde tet trana man table wa nan, se nan nnok sros kayi: Faf fsiok satian, na mre ytatol dait yibe yware kat ha, main fe Yesus ou wmres deri, le Nago wbaret keben kayi, wware kat kayi faf fi satian ei, faf fi ni sgia ei ydain.
39 Fe ni wat dait. Faf foso, fsiok, ni hra Musa wsroin ei, Hukum Taurat om, mahin mdain, Nago whot dait faf felek. Ha na man sio deri wten wkaso mse Yesus wak de, Nago wware kat ou wfe ni sgia ei, se Nago whot ou wabe welek, wble wadien oli Nago.
40 Noso la giet om! Nkan bren kat amot ni hra tet trana om. Nnok deri walbat ni mre mba man nan, nde kayi hra Nago wrana krek fe walem, main fe wfe nabi ei. Nago wrana wto:
41 ‘Noso nhot la! Kaman nan noso wale, ni hra tet trana krek fe wale ofo,
nan ntbekein wale nkan bren kat.
Bo basak, nan nsatmor kat deri, nteit yrioro, ofo bo nan nkak.
Tet trana tkoin man nan, bo tet tsiok kafir mre mba man nan.
Tsiok kafir om msamsa kat mahin, nan norsfe-fam.
Walbat na mre wrana fe kafir om malin krek man nan mahin,
nan norsfe lis deri.’”p
Mde Paulus wrana kahlia kat le wto: “Ofo nan nke, norsfe amot, nten kayi nkaso man Yesus hra ke ko!”
42 Mde wadien Barnabas, la yhok woi latiot yehinti kat bol sikafit om yse tlein ofo, nai ywaini man ei yto: “Mam meisi mto, tali Sabat man ale, nan nka nrana nkakniet oli ni kom man mam.” Mde ysamenie. 43 Mde nai yhriak, ysiar yhok kadio yehin bol sikafit mabrim mde, marok yein lok sisi yidien Paulus wadien Barnabas. Mre yibe na Yahudi, mre wat yibe na hra yibe dait na sa Yahudi, mahin ylelek yibe na Yahudi.q Mde Paulus wadien Barnabas la yrana kein wata man ei, yhron kein ei se ynok kawuak toron mse Nago, hra whares wan nai main fe Yesus ou.
44 Tali Sabat man kdie fo na marok kat hra yik kota okom yyo yibe yoso giet mahin Nago wak mabe Tuhan Yesus. 45 Mahin na Yahudi hra yfle ei yhot ro kat na marok okom yyo yibe yoso man Paulus wadien Barnabas, mde ei ykaf sarok ykrek ytadrot yidien. De nai yifle eke ysadir sgia ykan yakres Paulus, yhar kat ni hra ou wrana ei.
46 Mahin Paulus wadien Barnabas la ybren kat yrana samne wata man na Yahudi ei yto: “Mam mke mrana kayi giet mahin Nago wak malin kayi man nan mahin, nan norsfe-fa nnaba kat. Ofo bo nan naha ron om a! Nan nto nharfe dait ron lis kawuak okom! Mto mde ke fo, mam mein wata, mehinti kat wata nan nik, mein sadik mse na sa wat hra yibe dait na Yahudi ei yik.
47 Yo ni ko le ma Tuhan wbahe wale man mam. Mak ayat nats mre wrana wto:
“Tet tkosia krek nen nabe nhanak nan wi mamian,
man na tlein ei, na sa wat-wat ei hra yibe dait na Yahudi,
yo tet tebet nen se bo nen nrana mak yik wolo tali wolo,
nrana giet mabe tet tskalofos teren kaka nai.”r”
48 Mde na hra yibe dait na Yahudi na tlein ei yoso ro kat ni hra la yrana de ykashok, yto: “Giet okom mabe Tuhan Yesus om mbot kat!” Mde mrei yehin na sa wat-wat ei yik yten ykaso yse Yesus wak, fe hra Nago wlouk helwain wale ei se bo yron kawuak. 49 Mde giet mabe Tuhan Yesus nai ysielwat kat main katak mak wi okom.
Mahin Na Yahudi Ywanik Yrana Siorok Paulus Wadien Barnabas
13:50-52
50 Mde na Yahudi ywanik Paulus wadien Barnabas mde yein yse nai yfle yik mabe ywanik fot ei. Yein yse yidlai na tmak hra yslonti kota okom, yein fot yse yidli hra yifle, hra ynok tmol man Nago mahin yse dait latiot Yesus wak, yrana siorok Paulus wadien Barnabas. De na Yahudi ei yrana se na tmak ysiok sgia man ei kayi de ybahe la ytainti kat fobi kom.
