Raja Herodes Wto Wadien Sgia Kat Jemaat Yik Yerusalem
12:1-19
12
Mde bo madien kayi le hra oko fo, wak Yerusalem mde, Raja Herodesa wto wadien sgia man na mrei yihen jemaat ei. Wto wsiok sgia de, raja ou wbahe nai yslon fien mrei, yslon fien na mre hra yse Yesus wak yka, wlak yin bui wsin wto wadien sgia kat ei. 2 Wslon whirit mres man ou wabe rasul Yakobus, hra rasul Yohanes wamon, mde wbahe nai yska wadien mnian lis fo wkak.
3 Wkak de, na sa Yahudi yfe nai yfle ei ykashok fe, ykashok fe Yakobus wkak, fe hra ei yaha kat fot Yesus wfe nai. Mde, Raja Herodes wnok ei ykashok mde, ou wto wslon kdie Petrus, se wska fot ou. Mde wbahe yslon yhirit fot Petrus. Minggu hra Konon Paskah le mkom (pesta na sa Yahudi yfe hra nai yeit konon roti mdain ragi).b

4 Yhirit Petrus wse bui, na sae kahat hat man hat man yleliti kawuak ou, yo na sae kahat yikan hat man, yleliti ou kayi de, na sae kahat yikan hat man ei ydanhok oli yikan hat man ei, mde ysiok de hra ke, kayi de mao hat fe. Ofo Herodes wsin wto bo Konon Paskah om mdain sba fo, ou watik wwien twa Petrus man na Yahudi ybariomo, ysarife mde, wsin wbahe nai yska fot ou.c
5 Ofo yhirit kawuak ou wak bui, ha na jemaat ei ysikafit sanini kawuak mse Nago wak man ou.

6 Mde amuk wagiet latiot hra Herodes wkadoin fe oko, wabe wto wsarife Petrus, amuk oko fo, Petrus wase sisi wadien na sae kahat lak, mres wak wtato mres wak wtato, yidien fot rantai lak yhirit, yidien na sae kahat wat man ei ykro ti yik hrede. 7 Wase mde, Tuhan wfe malaikat man ou wkro ro kat wak wi hra wase om. Ni wdhen whanak fot wi om. Malaikat ou wbatok Petrus wtabe ou wto: “Nahin tamli la!” Mde rantai ei ykapriri kat Petrus wnai yti kadio kat, yti yse fobi.

8 Mde malaikat wbahe wto: “Ntrik nfe not, nteit nfe sandal ei.” Fo wtrik, wteit. Mde wto: “Nhobor nfe not lis jubah om, fo nsidik nahin la fein.” 9 Ofo wadien malaikat la yein yhok yehin bol hirit om, malaikat ou walin ou wain heles mahin wain samne, wnok rorwain dait ni hra wsiok ei, wto bosi wasamik deri ni yke. 10 Mde la yhok, yein yewer kat wale wi maleliti mabat masayen mde, la yewer fot malak fem kayi de yik hrede madanti besi hra maisti wi hirit om ofo, hrede om mgiet mhak ro kat de, yhok yse kota om. Yein kayi yik fan mata tlein kat koit ofo, Malaikat ou wsiet ro kat wahinti kat ou.

11 Malaikat wsiet ro kat de Petrus wsalit wnok tnes oli wto: “Tet tnok tkoin le mkom, Tuhan wteye wfe malaikat ou, wkothok fien tet tahin ni hra Raja Herodes wsin sgia fe ei, yidien ni hra nai yifle Yahudi ei ysin sgia ei.”
12 Mde wnok tnes oli de, wain wse Yohanes weme Maria mfe bol, Maria hra Yohanes hra wkedi fe lak, wkedi fot Yohanes fot wkedi fot mabe Yohanes Markus. Na marok ybalifis wale yik bol okom ysikafit Man Nago le ykei. 13 Mde Petrus whok wak bol de, wbatok hrede hra mse tlein, de wedli dihan mrem mkedi le Rode maka mse hrede, 14 moso Petrus wsalo de mnok ou le wko de mkashok. Mkashok msese deri mtrik oli mse bol mabri, mkothok dait hrede okom. Mrana mto: “Petrus le wak hrede ram!”

15 Yto: “Nen nkoli aa?” Mahin mkanas kat mrana sanini mto: “Hau, Petrus le hrede ra.” Ofo yto: “Mdain, ou wfe malaikat le mke.”
16 Mahin Petrus wbatok lis kat sba hrede om mde, yka yko tgie hrede om yhot Petrus. De yrioro fe. 17 Petrus wloit de ou wna baesik ei se ysatmor, ofo wrana. Wrana wain fe Tuhan wkothok fien ou wahin bol hirit om. Mde wto: “Nein nrana hatot ni kom man Yakobus, nrana fot man faf fible adit man ei.” Yakobus oko Yakobus wat hra wkak latiot. Yakobus oko wabe na wafle wak jemaat Yerusalem. Sba oko fo Petrus wahinti kat bol okom wain wse wi wat.
18 Uwade kat ofo, rowak maflem. Na sae kahat man ei yidien na sae kahat man ei ysalo frit, ykahiowain yrana yefitwain tar-tar yto: “Ni mit ma hra mhok man Petrus, ou wak sio?” 19 Raja Herodes wbahe nai ysidihar rorwain-wain Petrus wahin, ei ytatiere fe dait. Ytatiere fe dait mde wefitwain delek fot man na sae kahat hra yleliti Petrus mde, wbahe nai yska ykak. Sba oko fo raja Herodes ou whok wahin Yudea, whok wain wse wfe bol wat mrem mak kota Kaisarea. Wak Kaisarea mde wase kat amuk mrei yik ana.
Nai Yto Ybot Yidien Raja Herodes Mde Ykait Hene
12:20-23
20 Na, Raja Herodes ou wtrere whoyok wadien nai yfle yik kota Tirus, yidien fot nai yik kota Sidon. Whoyok yidien mde, wkrek fe ni eit yse kota lak ekei. Mde kota lak ei yto ybot oli yidien ou mde, yrana ni yidien na mreu, wkedi le Blastus, ou wabe na fle mreu hra wsiok ni man raja Herodes ou. Yo yto yhnak luwa fe Blastus wabrim se wkait hene mabe yein ysadir yidien raja, se ylok-lok oli yidien ou. Mde Blastus ou wkait hene om.
21 Ofo hene okom, tali man hra ykait hene magiet okom ofo, Herodes wtrik wfe not raja ei, wleli wak ni mleli kursi fle raja om mde, wrana ni man na marok hra ybalifis yibe yoso.

22 Wrana man ei mde yoso, mde ykashok karmiak kat. De ysalo fle ykashok ska yit-yit yhdin ou yto: “Na oko wabe dait na tkoin, ha wabe Nago le wko.” De ysaesik yhdin ou.
23 Fe hra Herodes ou wkashok fe ei ytik si ou, ylia kein ou, ou wbren kat Nago. Mde Tuhan wfe malaikat mreu wbaktak tamli Herodes, wbaktak wkaini fle knien yeit wabrim ofo wkak.
Giet Nago Wfe Main Sak-sak, Barnabas Wadien Saulus Yhnak Ni De Ysalit
12:24–13:3
24 Mde na marok yoso giet Nago wfe, giet om nai yrana siar kayi de na marok yten ykaso man ou.
25 Hra oko fo, Barnabas wadien Saulus la yotik wale pitis hra nai yteye ykaka jemaat yik Yerusalem. Yhnak wale fo, mde yidien fot Yohanes Markus yikan tolik ei ysalit oli yse Antiokhia.
