Jemaat Yerusalem yhar kat Petrus, mde Ou Whron Kat Fe Mabe Ni Hra Wsiok Yin Kornelius Wadien Wfe Nai
11:1-18
11
1-3 Petrus wahin Kaisarea wain oli wse Yerusalem. Wak kota Yeusalem fo, whok wak na jemaat Yerusalem ei yik. Mde na jemaat hra yibe na sa Yahudi yhar kat ou. Yto: “Hra nen nloit nse bol na ekei yibe, nat sisi ni nadien ei yibe? Faf ke fbrein wale, ha na eke ybrein dait latiot, hra nen nain lok yibe!” Fe hra yoso nai yrana mabe ni hra ou wsiok firi Yoso mabe, na hra yibe dait wata na Yahudi, ywien fien fot wale Nago wfe giet om mabe Yesus. Ofo na tmak Yerusalem yidien jemaat yik propinsi Yudea kadio ykahiowain mabe Petrus. a
4 Mahin ou whron kat fe mabe ni hra wsiok ei, wrana wain homo-homo man jemaat Yerusalem ei, wrana mahin oli molo ni hra yoso tar-tar kaf kat wale, wto, 5 “Mde le ke. Tet tke, kaman tet tak kota Yope tsikafit, tsikafit samne mde Nago whoborti tet tadien wfe fle kohok om, mde thot ro kat ni hra Nago wyen hata, mde le tasamik ni. Thot ro kat fo, ni mre mde le not maflem mais mahin yik wbat ago. Not kom mde le nai ysiokti mkakois hat ei, yna slolo mkatik fali mais mse tet tak aiti. 6 Mde tet thot mse mabri ra fo, erwas warok baheit-hat. Erwas man hra na Yahudi faf feit fot, man hra faf fleli feit dait ykohok man faf. Mre, yteit hat hra nai yror, man fot hra yik tabra yidien man ydiele yswe fobi aiti yidien fot klen heit-hat. Ni marok man hra na Yahudi faf feit dait fot ei.
7 Mde tet toso salo mahin ago mto: ‘Petrus, ni eit le mke. Nen nahin, nkerek la mre yin nat.’
8 Tet tto: ‘Mdain Tuhan, erwas ykohok ysgia le mke, nen ntoji wale na Yahudi mam meit dait ni ke, mleli deri. Mde tet tat dait latiot ni eit mde le hra kom, tleli mabe mahin tet twet aiti, tet tat dait sonat.’b
9 Ofo salo mto oli mto: ‘Ni hra Nago tet twalis kat wale ybot, fo nen nnok ybot deri, nrana dait amot nto ysgia.’ 10 Fo mao tolik ofo Nago wbahe skayit mde le ke. Ofo not om marin fali oli ni eke yse yik ago.
11 Mtatol madien hra ko fo, wedla yikan tolik hra nai ybahe yehin Kaisarea yka yhok wale bol hra tet tase om. Yka ywiehla fien tet. 12 Mde Nago Wawua om mbahe tet tadien na dla eke mein. Mbahe tet tkahiowain dait, yo ei yibe dait na Yahudi mahin, taisi tain sisi wata. Mde tet tadien na tolik ei mein sisi, midien fot wedla mtamre hra kei mam mein sisi kadio. Fo mehin kota Yope mhok mik kota Kaisarea, ofo mloit mse bol na mre wfem, na hra wabe dait na Yahudi. Ou wkedi le Kornelius. 13 Fo na oko wrana hatot man mam. Wrana wto whot malaikat mreu wkro wak wfe bol om mabri. Malaikat wrana man ou wto: ‘Nbahe na mrei yein ywiehla fien Simon Petrus, hra wak kota Yope.’ 14 Malaikat wrana fot wto: ‘Bo Petrus waka fo ou wrana ni mre yin nen nadien nfe nai, se bo nen nadien nfe na kadio ei bo Nago weren kaka nan.’
15 Ofo tet trana kmo deri ni tadien ei mde, mais ro kat, Nago Wawua Makohok om mais maka de msisik kadio kat yikan marok om. Mde fot le hra kaman faf, Nago Wawuam msisik fot faf. 16 Ofo tet tnok tmol hra kaman Tuhan Yesus wrana fe mam, wto: ‘Yibe kaman Yohanes ou wsrik kat nai yidien deri kla mahin, amuk kyamre kdie oli fo, Nago wsrik kat nan nidien kayi Ou Wawua Makohok om.’c 17 Oko fo, Nago watsiofo wale man na tlein hra yibe dait na Yahudi msadiak sisi mde le hra kaman watsiofo man fot faf hra fnok wale mse Tuhan Yesus Kristus. Bo na mna Nago wto whares fot man na wat-wat hra yibe dait na Yahudi ei fo, se bo mde sie tet tsiok ni wewis kerek Nago? Mdain, tet taisi kein wata.” Fo Petrus ou wrana hatot fe mde le ke.
18 Mde jemaat Yerusalem ei yoso ni eke fo, yeisi fot. Yhar kat oli dait, ysatmor deri. Mde yhdin man Nago yto: “Bo mto mde le ke fo, bo faf fkashok deri man Nago, wabe whnak hares fot man na sa wat-wat hra yibe dait na Yahudi le mkom, se bo ysalit oli yehin satian hra ysiok ei, ykain fot sablit hra maron.”
Barnabas Wadien Saulus Yse Antiokhia
11:19-30
19 Mde wedla Yesus hra kaman ytain yehin na hra ysiok sgia kat ei, tali man hra Stefanus waigi ei, ytain ysiar sonat kayi de mrei yse fobi Fenisia, mre yse rwe Siprus, mre yse kota Antiokhia. Yik ana fo, yrana dait giet ma bot hra Yesus wfem man na sa wat-wat ha, ei yrana tiktol deri man yanak na sa Yahudi ei hra yese wale yik ana.d 20 Mahin yanak man ei mre yehin rwe Siprus, mre yehin fobi Kirene hra mak Afrika, ei ytain yse kota Antiokhia mde yrana giet mabot mabe Tuhan Yesus man na mna Yahudi ei, man fot na tlein hra yibe dait wata na Yahudi. 21 Mde Nago whnak kanas fei se yrana giet ma bot om, de na tlein marok hra yibe dait na Yahudi yoso fo ysamenie, ynok tmol ylelek yse Tuhan Yesus.
22 Mde na jemaat hra ynok mse Yesus wak hra yese latiot yik Yerusalem ei yoso rana wain fe ni kom, yto na hra yibe dait na Yahudi ei yten fot ykaso yse Yesus wak. Mde yteye Barnabas wain wahenek ei yik kota Antiokhia. 23 Barnabas whok wale wak ana wsmit fo, wkashok fe hra Nago whnak wale hares man ei, se ynok man ou, ysiok ni hra Nago waisi fe. Mde, Barnabas whnak hron fe ei, se bo ynok kawuak deri man Tuhan yidien yibri mowuo kat, yoso kawuak man ou. 24 Barnabas ou wabe na wabot, whon wadien Nago ou Wawua Makohok om, wten wkaso mkanas kat man Nago. Main fe Barnabas oko, na marok yka yse Tuhan wak.
25 Hra oko fo, Barnabas wain wse kota Tarsus wabe wdihar Saulus 26 mde wtatiere fe ofo wwiehla fien la yein yse Antiokhia ysiok sisi ni. Yik Antiokhia fo, der mres Barnabas wadien Saulus la ybalifis sisi yidien jemaat yrana ykakniet Nago wfe giet om man na marok ekei. Yik Antiokhia le ma nai ywak sayen na hra ynok man Yesus yibe “na Kristen.”
27 Barnabas wadien Saulus yese sonat yik Antiokhia, ofo nabi mrei ysiolok yka yehin Yerusalem. 28 Man ou wkedi le ma Agabus, mde main fe fle kohok Nago Wawua om mde, ou wsidik wkro wrana krek wto: “Bo tolo katot fleu waka wflie kat wsiok riohok fobi katak kadio kat hra Roma yslonti.” (Ofo basak kafir om mhok kayi mde le Agabus ou wrana ekei bo raja Kaisar Klaudius wslonti fobi Roma.)e 29 Agabus ou wrana krek ni okom ofo na hra ynok man Yesus yik Antiokhia ybalifis yife mres ykerek sadir mabe yhnak ni mre yse na man hra ynok yse Yesus hra yese yik fobi Yudea. Mde yhnak ni ytatol yde le hra ei yife.
