Malaikat Wbahe Kornelius Wwit Fien Petrus
10:1-8
10
Hra oko fo na mreu wase wak kota Kaisarea wkedi le Kornelius. Kornelius o le ma na wafleu, na sae kahat wafle hra wsiokti na sa kahat hra yehin fobi Italia. 2 Kornelius waliak man Nago. Wabe dait na sa Yahudi, wahin na sa wat. Mahin waliak man Nago wde le na Yahudi ei yeliek yin Nago, ou wadien wsmian fot wfe wet fot eke yeliek man Nago, yoso kmiet Nago wfe ni bahe ei. Whnak sawuan pitis man na hra ydain ni, wadien wsikafit sawuan man Nago. 3 Mde tali mre fo, Kornelius wsikafit. Wsikafit mde bo siwit, jam wkedi tolik fo, Kornelius wsikafit whot ro kat ni mahin Nago wak, whot ni mde le wasamik ni. Whot sros ro kat fo, malaikat Nago wfe hra wbahe mreu. Waka wwit man ou wto: “Kornelius!”
4 Kornelius waliak wgiele saswain malaikat oko. Waliak wgiele de wto: “Nai fe nau, nen naisi mit ma om?”
Malaikat wrana wto: “Nago waisi fe wale nen nfe sikafit yrok ei, yidien nen neren na marok hra ydain ni. Nago woso wale nen nfe sikafit ekei, whot nen nhnak ni ei, ni lak hra kei yde le sanfe ytatol kayi yin ou.” 5 Ofo malaikat wto: “Nain la nwit nfe wedla mrei, nwit ofo nbahe wedla eke yein yse kota Yope. Yein yse kota Yope ywiehla fien Simon hra nai ywak ‘Petrus’ ou. 6 Yein de ei ydihar wata Simon Petrus okou warin bol wase wak bol na wfem, wak kota Yope. Na man ou hra wkedi fot le Simon, wfe bol okom. Simon man ou hra wfe bol ou wwien fien sawuan erwas yfalek mde wsiok se ykanas oli dait, yluwa deri. Ou wfe bol om mak kla tefit.”
7 Fo malaikat oko wrana ni ydain ofo, wsalit oli wain. Wsalit wale fo, Kornelius wwit fien wfe na dla lak, wwit fien na dla lak fot yidien fot na sae kahat man ou hra wabri mse Nago wak, hra wabe fot na dla wan ou. 8 Wwit fien ei wrana kadio kat ni hra malaikat wrana ei, mde wbahe ei yikan tolik yein yse kota Yope ywiehla fien Petrus ou.
Petrus Whot Ro Kat Ni Hra Nago Wyen Hata
10:9-23a
9 Klen sawok main fe tali fle fo, yikan tolik hra Kornelius wbahe ei yik latiot fan kedi ytaren wale wata yse kota Yope. Mahin wak Yope Petrus ou warin samne wse bol msa ago wabe wto wsikafit. Bol msa okom mbakatak deri. 10 Ou wsikafit, mde wkatot kamyi kat, wbahoin wto wat ni eit. Mahin hra oko fo nai yfosik ni eit ei yeisi latiot mde, waheit wsikafit samne de Nago whoborti ou wadien wfle kohok om, whot ro kat ni de hra wasamik. 11 Whot ro kat fo, yik ago mgiet khak, fo whot ni mre mde le not maflem mais mahin yik wbat ago. Mde le nai ysiokti mkakois hat ei, yna slolo mkatik fali mais mse Petrus wak aiti.
12 Not mabri om mkatik fali madien erwas warok baheit-hat. Erwas man hra na Yahudi yeit fot, man hra yleli yeit dait ykohok man ei fot. Mre hra yteit hat, mre hra ydiele yswe fobi ei, mre klen heit-hat, ni marok man hra na Yahudi yeit dait fot ei.
13 Yeis mde, whot ni ekei ofo salo mahin ago mto: “Petrus, ni eit le mke. Nen nahin, nkerek la mre yin nat.”
14 Petrus wto: “Mdain Tuhan, erwas ykohok ysgia le mke, nen ntoji wale na Yahudi mam meit dait ni ke, mleli deri. Mde tet tat dait latiot ni eit mde le hra kom, tleli mabe mahin tet twet aiti, tet tat dait sonat.”a
15 Mahin salo mto oli mto: “Noso, Nago tet trana ni mre man nen: nrana dait amot nto ysgia, mdain, nto Nago tet twalis kat wale ni mre ybot fo, nen nnok ei ybot deri.”
16 Mde mao tolik ofo Nago wbahe skayit mde le ke se bo Petrus ou wnok sas mak wabri mabe ni hra whot ei fot, ni fot hra salo mrana wale om. Mde Nago wrana wale mao tolik ofo not mafle om marin fali oli mse yik ago.
17 Ofo Petrus ou wleli wnok sas mak wabri wto: “Ni mit ma mfe he tet thot ni ke?” Wleli wnok sas mde, wedla tolik hra Kornelius wbahe ei yhok. Nai ykakniet wale bol hra Petrus wleli om, hra na Simon hra wsiok erwas yfalek yluwa ou wfem, mde yhok yik sdiefta aiti. 18 Mde ywit yefitwain yto: “Walbat na mre wkedi mabe Simon Petrus ou wase wak ko afe?”
19 De Petrus wleli samne wak bol msa ago wnok saswain ni hra whot eke mde, Nago Wawua Makohok om mto man ou mto: “Na dla yikan tolik ei yka ydihar wain nen. 20 Nsidik nais nse aiti mde, nadien sisi nein. Yo ei yibe dait na Yahudi mahin, nain wata, nkahiowain dait. Tet le tbahe ei yka ywiehla fien nen.”b
21 Ofo Petrus wais wse aiti, wkan tali man na ekei wto: “Tet tke le ma hra nan ndihar ei. Yo nan nrana nto nan nka fe me?”
22 Fo yto: “Nai fe nau, mam mka mehin Kornelius na wafle ou wak, ou eke na sae kahat Roma yfe na wafleu. Kornelius oko wabe na wabot, waliak fot man Nago, nen nfe na Yahudi fot ysaesik kadio man ou, wbot. Malaikat kohok mreu wbahe man ou wwit fien nen, wto nen naka nse bol ou wa. Ofo mam mwaini nen naka fein sisi fse bol ou wa se bo nen nrana giet man ou, se bo woso.” 23a Ofo Petrus wrana wto: “Yo, faf fese la, klen sawok se faf fein.” Fo ou wwit fien yloit yse bol, yese amuk mres.
Petrus Whok Wain
10:23b-48
23b Tali uwade kat fo Petrus wsidik wadien sisi na tolik ei yein, yidien fot wanak mrei yehin kampung Yope hra ynok tmol man Yesus ykomot ou. Yhok yehin Yope mde, 24 yein kayi de tali oli kdie man ou fo, ei yhok yik kota Kaisarea. Kornelius wleli kein kawuak de yhok. Wwit fien wale wanak wai, wable wai yyo kadio kat yleli sisi. 25 Mde Petrus whok ofo, Kornelius wahin waka wsaesik man ou, wti wba wkmuon wse wteit olo aiti. 26 Ha Petrus whnak hron fe wkosiau wto: “Nsidik wata, mdain, na tkoin deri le tet, tde fot le nen.”
27 Wadien Kornelius la yrana ni ofo yloit yse bol mabri, whot yik ra fo, sit maflem, na mrok om mleli kein wale ou. Na kadio kat eke yibe dait na sa Yahudi, ha yibe kadio na sa wat-wat. 28 Ofo Petrus wrana man ei wto: “Yo, nai fe na nan, tali wabot wan nan. Mde, nan noso wale ojin hra na Yahudi mam mfe om. Na Yahudi mam, manak dait midien lok dait fot na sa wat-wat yde hra nan nke, hra nibe dait na Yahudi. Mahin Nago wbahe tet main fe ni hra tet thot ro kat om, se bo tet twit dait na man ou wabe wsgia, afe tto Nago waha na man ou, mdain. 29 Oko le ma hra Kornelius ou wwit fien tet taka de, tet tfalek ada dait, taha dait, ha taka wata. Nrana wata nen nwit taka fe me?”
30 Mde Kornelius wrana hatot wto: “Amuk tolik ma lalie fo, tet tleli tsikafit man Nago le mke, tali wde kayi le ke, bo jam tolik. Tsikafit samne tak bol bri ko, mde tawua fe ro kat na mre wkro wak tbariomon wtrik not yelek yfsien kat. 31 Ofo wto man tet wto: ‘Kornelius, Nago woso wale, whot wale nen nsikafit om. Wkashok wale fe nen nhares fe nhnak ni yin na hra ydain.’ 32 Ofo wto: ‘Nbahe na dla mre yein yse kota Yope ywiehla fien na mre wkedi le Simon hra yto Petrus ou. Wase wak bol na yfe, na oko hra wsiok sawuan erwas yfalek yluwa. Ou wkedi le Simon, bo ou wa mak siwan wtefit. Nwiehla fien Petrus ou waka.’ Na hra wtrik not yelek yfsien kat wrana mde le ko man tet. 33 Oko le ma tet tbahe sros wedla ke ywiehla fien nen nak ana, nai fe nau, tet thdin nen fe hra nen naka wale ke. Ofo mam mke mbahliowo kadio kat wale mik ko, mik Nago wbariomo, yibe moso mahin nen nak ni hra Nago wbahe nen nrana hatot man mam.”
34 Oko fo Petrus wrana hatot man ei wto: “Yo, nai fe na nan, madien oko fo tet tnok tnes mabe, Nago wberiet dait na man ou wto wfle wewer wahin na man ou, mdain. Waha dait na mreu fe hra wabe dait na Yahudi,c
35 ha na hra yehin wanik wata na sa wat man sio, yeliek yin ou, ysiok ni hra yibot ytatol yin ou, le ma Nago waisi fe, wwien fien ei.”
36 Ofo Petrus wrana kdie wto: “Nan nnok wale, Nago wteye giet man na sa Israel mam, giet mabot, le ma Nago wteye Yesus waka wabe knitar fe faf fidien wono, wto wbalifis oli faf fidien oli ou, fein fe wfe wet Yesus Kristus. Yesus okou wabe Tuhan, Na Wafle wslonti kadio kat na tkoin hra yik fobi katak ke. Ni eke nan nikan kadio noso nnok wale.”
37-38 De Petrus wrana kdie oli wto: “Yo nnok fot mabe Yohanes oko le waka walin wak Yudea, wrana man nai yibe yehinti kat ni hra ysiok ysgia ei, ylelek yse Nago wak mde, Yohanes ou wsrik kat kla fei. Mde nai fe na Yesus waka wahin kampung Nazaret mde wsiok sayen ni wak distrik Galilea, wain fot wsiok ni wak fobi Yudea mam mi. Yesus oko le Nago whnak fle feu, whnak Ou Wawua Makohok om man ou mkomot ou mde wsiok ni heit-hat. Wsiok adit ni yrok ybot, wain kohli wweyen nai ykaini ei ydain. Na wat fot ei yhlet fe Klebet Wafleu walmias wkaitti ei, wfla ei, fo Yesus ou wweyen ei ydain ybot oli. Nago wadien kawuak ou. (Yo ni kadio eke nan nikan kadio noso nnok wale.)
39 Rasuld mam mke mhot sros wale ni kadio eke, de mrana sros man nan. Mhot ni kadio hra Yesus wsiok wak fobi Yudea, wak fot kota Yerusalem. Wak Yerusalem nai yfle yska wkak wak wkoit skarok mahin,
40 ha Nago ou wkosia kat wahin wadien tali ykedi tolik. Wsidik de Nago wliokeit na tkoin yhot ou. 41 Na marok kadio ei yhot dait ou, mdain, yo wyen hata tiktol wkan om man deri na hra Nago wlouk helwain wale, se bo mam mke mrana kein man nai yibe ni hra mam mhot ei. Yo Yesus ou wsidik sba fo rasul mam mke meit sisi ni eit midien ou, moko sisi kla midien ou. 42 Mde ou le wbahe wale man mam mrana kein ni kei yin na marok, mam mrana fot fe hra Nago wbetok krek wale Yesus wabe basak waka wsarife na hra yron ei yidien fot man hra yeigi wale, wkohliowo se wberiet ei.”
43 De Petrus wrana oli wto: “Yo nabi kadio ei yrana krek wale wadien kamuolo mabe Yesus oko. Yrana yto, bo na man sio ma wto wnok tmol mse ou wak, wnok tmol mse ou wkedi ofo, Nago wware kat ou wfe satian ei.”
44 Petrus ou le wrana sonat wata mahin, Nago Wawua Makohok om mais ro kat mloit msisik na kadio man ei hra yoso ni hra Petrus wrana ei. 45-46 Ofo yrana ro kat ni yidien salo wat-wat, salo hra na man ei ynok dait latiot, Nago whnak fle deri se yrana, ysrar heyit man Ou. De na mtamre hra yidien sisi Petrus yka ei, hra yibe na Yahudi, yteit yrioro fe ynok tnes yto: “Yo, Nago wkohliet kat wale Wawua Makohok om man fot na marok kom, hra yibe dait wata na Yahudi.” De ytmayes kat.
Mde Petrus wrana man wanak ei wto,
47 “Mko, Nago Wawua Makohok om mais msisik kadio na marok kom, mde kayi le kamuolo faf, fo nan nka faf feisi kein oli faf fsrik kat ei yidien kla.”
48 Ofo wbahe na mre ysrik kat kla fei yidien Yesus Kristus wkedim. Ysrik kat mdain fo ywaini Petrus waheit wadien sisi ei yese sba amuk mre.