Raja Hra Nago Wlouk Helwain
2:1-12
2
a Hra na sa fobi katak kadio kat ykawu-wa,ysin sak-sak deri fe ni hra ysgia-sgia fe me?
2 Raja yik fobi katak kadio kat ybalifis ybakaisin,
ysin yto ykhan yidien SMAU wadien ou wfe raja hra ou wlouk helwain wale.
3 Ei yto: “Naka faf fkon kerek kat rantai besi hra ei yhirit yin faf fke,
ftli kat omos hra ei ykaitti yehinti kat faf!”
4 Na hra wleli wak wi mayehet ago, wasak klo ei;
Tuhan okou wtbekein ei.
5 Mde ou wtrere whar kat ei,
kayi de ei yteit rioro, yeliek kamyi kat.
6 Ou wto: “Tet thnak fle fe wale tfe Raja
wak Sion, tfe sfa wakohok walais kat ou!”
7 b Tet taisi trana fe giet msa kohok mahin SMAU wak,
Ou wrana man tet wto: “Nen nke tet tebet nabe tfe Wet.
Madien hra ke fo, tet tabe nen Nono.
8 Nwaini man tet,
mde na sa marok tet thnak yin nen nkain nslonti kawuak,
mahin tali wolo yik wolo.
9 c Na sa kadio kat ei bo nen nsiokti nidien nfe tiyen besi,
nbafla ei yblek-blak kat yde finggien.”
10 Mto mde ke fo, raja nan, nsia folo!
Nai yifle nan nik fobi ko, noso kmiet firi la ni hra tet tkait wain man nan!
11 Neliek, nsaesik nsiok ni man SMAU.
Nkashok man ou, mahin deri, nteit rioro kat fe ou.
12 Nkmois ou wfe Wet,
walbat ou wtrere, wadien sgia nan nik fan kedi,
fe ou wtrere mtamli kat mde le hra sala om mdhen mropiak.
Mabot karmiak kat man na kadio hra ytrik yalo wale yse SMAU wak, fe hra ou wsrar wawo wlowinti ei!