WASAYEN
Nago Wafik Yik Wadien Fobi
1:1 - 2:3
1
Madien kamuolo masayen kat Nago wafik yik wadien fobi kom. 2 Hra oko fo, fobi katak madien dait latiot ni mrei, msabloit mfalek latiot.a Armian wadien kla siwan katak yisti fobi katak kadio kat, tlein bet mre ykedi enie dait latiot. Nago Wawuam msiele-sala deri mak kla wasa ago.3 Mde Nago wbahe wto: “Kla siwan katak, nen nhak!” Ofo siwan om mhak ro kat.b
4 Nago whot fo siwan mahak om mbot. Mde ou wkoriet wi mahak om mwat, wi mamian om mwat. 5 Nago wwak mahak om mabe Tali, mamian om mabe Amuk. Mahin siwit kawuak de uwade, ofo tali wa sayen mres fe le wkou.
6 Mde Nago wto: “Yik, nen nkdein kerek kla mre yse ago, kla mre yse siwan aiti!”c 7 Mde ke fo Nago wsiok yik wayehet ago, wkoriet kat kla man hra yse yik ago yehinti kat man hra yiheit yik siwan aiti. 8 Ofo Nago wwak wi wayehet ago wabe Yik. Siwit kawuak de uwade, ofo tali wa lak fe le wkou.
9 Mde Nago wto: “Kla siwan hra nse yik wlale, nkalili nbalifis nife mres se bo tlein bet mre ykedi enie, yehinti kat kla!” Mde ni okom mhok kayi mde le eke. 10 Nago wwak fobi maslo okom mabe Tlein, kla hra wbalifis wafe mres wkatak ou wwak wabe Siwan. Nago whot ni ekei ybot kadio kat.
11 Mde Nago wto: “Bet, nen nadien kayi ni yfori heit-hat, ni fori man hra yidien yfuon deri, yidien fot wkoit man hra ykan ysa ei yidien yfuon yik yibri.” Mde ni ekei yhok kayi yde le eke. 12 Ni warok heit-hat yfori hania, yhok ro kat yehin bet aiti: ni fori man hra yidien yfuon deri, yidien fot wkoit man hra ykan ysa ei yidien yfuon yik yibri. Nago whot ni ekei ybot kadio kat. 13 Siwit kawuak de uwade, ofo tali wa tolik fe le wkou.
14 Mde Nago wto: “Yik, nen nadien kayi ni yihak hra yikoriet tali om mwat, amuk ou wwat. Ni hra ydhen ekei yhnak kakniet fe fot tolo man ei, tali man ei, mok man ei, der man ei. 15 Ei yibe ni yihak yse yik wayehet ago, yhanak fobi katak.” Mde ni ekei yhok kayi yde le eke. 16 Nago wsiok ni yidhen lak ei yfle. Hra mafle mewer msiokti uwade kawuak de siwit, ofo nai ywit yto talim. Hra wawet ou wsiokti amuk, nai ywit wabe mok. Ou wsiok fot twon yrok ekei. 17 Nago wlak ni yidhen kadio kat ekei yse yik ago yibe yhanak fobi katak, 18 yibe fot ykoriet tali mwat, amuk wwat, ysiokti tali man, amuk man, kawuak. Nago whot ni ekei ybot kadio. 19 Mahin siwit kawuak de uwade, ofo tali wa hat fe le wkou.
20 Mde Nago wto: “Kla siwan, nen nadien kayi ni yiron yrok-rak. Yik, nen nadien fot klen hra yhri yewer leis-las yse yik wbat ago.” 21 Mde ke fo Nago wafik erwas hra yifle yiwet kadio hra ymli ybait yskaheit-hat yik siwan wabri ale, yidien fot klen heit-hat hra yoli yhri. Ofo Nago whot ni ekei ybot kadio kat. 22 Nago whnak fle fe ei wto: “Eren, nan nkafe kein sanini wet kawuak de kla siwan whon fe nan! Yo, klen nan, nkafe fot wet yrok yik fobi ko!” 23 Kayi de ke, siwit wadien uwade, ofo tali wa mahot fe le wkou.
24 Mde Nago wto: “Fobi, nen nhok fali erwas heit-hat hra yese yik tlein: hra yiror, hra yisi kol ei, yidien fot hra yara yswe yein fe fobi aiti!” Ofo ni ekei yhok kadio kat. 25 Mde le ke Nago wafik erwas hra yisi kol heit-hat kadio kat, yidien erwas hra yiror heit-hat kadio kat, yidien fot erwas heit-hat kadio hra yara yswe yidien ykmat yse fobi aiti. Mde Nago whot ni ke ybot kadio kat.
26 Mde Nago wto: “Nan nka, faf fsiok na tkoin ysilok ysadiak yde le faf fke, se bo ei yslonti eren yik siwan ale, klen yse yik ago, yidien erwas hra yiror, erwas hra yisi kol, erwas hra yara yswe yik fobi aiti - ysmit lien ni kadio hra yiron yik fobi ko.”d
27 Ofo Nago wsiok na tkoin ei ysadiak yde kayi ou,
mde kayi ou, Nago wsiok na tkoin ei -
wadla ou wadien madli om.e
28 Mde Nago whnak fle kohok man ei wrana wto: “Nkafe kein sanini wet kawuak de yrok, mde nan nyol nrok nese nse yik wolo, tali wolo, nslonti fobi katak kadio. Tet thnak nan nfle newer erwas kadio, ofo nan niheit nsmit lien ei. Nslonti eren hra yik kla siwan ale, klen hra yhri yse yik ago, yidien erwas kadio hra yron yse tlein.”
29 Mde Nago wrana kdie oli wto: “Nhot la, tet thnak ni yfori heit-hat kadio hra yfuon yibe ni eit yin nan. Thnak fot wkoit heit-hat kadio kat hra ykan afe ysa ei yidien yfuon yik yibri yibe fot ni eit yin nan. 30 Ha, man erwas heit-hat kadio kat hra yik fobi ke, yidien klen heit-hat hra yhri yse yik ago, yidien fot ni heit-hat hra yara yse fobi aiti - man ni kadio hra yhalie yron ekei, tet thnak ni fori kadio hra ybra yibe ni eit yin ei.” Mde kayi le hra ou wrana ei.
31 Nago whot ni kadio hra ou wsiok ekei ybot karmiak kat. Mahin siwit kawuak de uwade, ofo tali wa mtamre fe le wkou.