2
Mde kayi le eke Nago wafik yik wadien fobi yidien ei yfe ni yrok ydain wale.2 Tali mtalak fe fo, Nago wsiok oli dait ni mrem, mabe ni warok ei yfot wale. Mde tali mtalak fe okou, ou wleli bhas deri wahin ni warok kadio kat hra ou wsiok.a 3 Ofo Nago whnak fle kohok man tali mtalak fe oko, fe hra wadien tali wagiet oko ou wleli bhas - ni warok kadio kat hra ou wsiok ydain wale.
Adam Wadien Hawam
2:4-7
4 Ojin trar mabe Tuhan Nago wafik yik wadien fobi ko - o le mkom.
Hra oko fo Tuhan Nago wsiok wale yik wadien fobi,
5 mahin ni mre dait ysafori hania latiot yik biele fe hra na tkoin mre yik dait latiot fobi ko yibe yogo biele, ysiok roro wain latiot bet okom. Tuhan Nago whnak dait fot latiot kyen mre yeis yik fobi ko,
6 ha, saun mbias mkait fobi, ofo lami mbasret fe fobi katak kadio kom. 7 Mde Tuhan Nago whein na tkoin ou, wsiok wahin bet, ofo wfrio whalie maron om mloit mse na tkoin ou wtawadio yitayi yibri, ofo bet om mmli mabe na tkoin hra waron.b
Na Tkoin Wak Biele Eden
2:8-25
8 Hra oko fo Tuhan Nago wsiok kein wale biele mre wak fobi Eden, wtato wse tali mhok, se bo wlak na tkoin hra ou wsiok wale wase wak oko. 9 Ofo mahin bet aiti Tuhan Nago wsiok wkoit yfori skaheit-hat yik biele oko, man hra nai yeisi yhot, ykaso ytlok fe ei, man kdie hra nai ygiet sror fe bo yeit ykan ei. Wak fot biele wabri oko, Tuhan Nago wafik kdie oli wkoit lak - man ou wabe nai yeit fo, ei yron lis kawuak fe ou, man kdie ou wabe nai yeit fo, ysablit mroro, ofo yhana tnes ni man hra yibot yidien fot ni man hra yisgia ei.c
10 Nago wsiok kla mrem mfriak mahin bet biele wabri wabe wfas biele Eden oko, ofo kla ou wdolon wasi wahin ago, wsagatan hat. 11 Kla man ou wkedi mabe Pison, hra wdolon whliwok-wak, wain fe fobi Hawila, wi hra madien emas. 12 Emas hra yehin fobi okom mbot karmiak kat. Mak fot ale nai ytatiere fe fot wkoit kadin warak hra wrnoin wrofof-fof kat, yidien fot amak kwalan krisopras yskaheit-hat hra yibot karmiak kat.d 13 Kla lak fe o le ma Gihon, hra wdolon whliwok-wak, wain fe fobi Kush kadio kat. 14 Kla tolik fe o le ma Tigris hra wdolon wkdein fobi Asyur wtato wse tali mhok. Yidien kla hat fe fo wkedi o le ma Efrat.
15 Tuhan Nago wlouk na tkoin oko, wlak wase wak biele Eden wabri, wabe wsiok ni, wsi roro wain wi lwek oko. 16 Ofo Tuhan Nago wkait wain wtoji man na tkoin ou wto: “Wkoit warok kadio kat hra yik biele wabri alke, bo nen nat samne wata ykan ei. 17 Ha, wkoit hra wa nnok ni ybot yidien hra yisgia, nnok deri nen nat dait wkan mre wala, wabe tali man hra nen nat wkan mreu, ofo bo nen naigi kayi.”
18 Mde Tuhan Nago wto: “Msgia ma na tkoin ou wmres wase deri. Bo tet tsiok oli na mrem msadiak oli madien ou, mtatol mabe mlolowain ou.”
19 Ofo Tuhan Nago wwien fien erwas tlein yidien klen kadio kat hra ou wsiok wale yehin bet ei yka, wyen hata mres man, mres man, yse na tkoin ou wak, se bo woso kmiet na tkoin ou wwak ei ykedi. Mde ni man hra na tkoin ou wwak tiktol yin erwas ekei yiheit kawuak yibe ykedi. 20 Na tkoin ou wwak ni ror ykedi kadio kat, erwas ykedi ei wat-wat, klen ykedi ei ywat-wat kadio kat.
Mahin mabe Adam, ni mre ytatol dait yibe ykomot yeren ou. 21 Mde Tuhan Nago wsiok na tkoin ou wsirobo karmiak kat ofo wase dis kat. Ou wase samne deri, mde Tuhan Nago wkothok na oko wklik man ou, ofo wlakti oli wi okom madien kan fokot. 22 Mde Tuhan Nago watik na tkoin ou wklik okom maka, mde wsiok mabe na dli mrem, ofo wtwayit oli mse na dla ou wak.
23 Mde na dla ou wto: “Esree! O le mkom!
Mkdois angke yehin tet tkdois ta kei,
mkan fokot angkei yehin tkan fokot ta kei.
Tet twak om mabe na dli,
mabe Nago wsiok om mahin na dla tet tak.”e
24 O le ma mfe he, na dla man hra wto wsmian fo, ou wahinti kat na trar la yiheit, ha, ou wain wbalifis wadien deri wsmian om, la yife mres.f
25 Na dla oko wadien wsmian la ykasien wata, mahin la yhes fe dait.