Na Tkoin La Ykain Satian
3:1-24
3
Madien hra oko fo lua ou wsiafolo karmiak kat wewer wahin erwas warok kadio hra Tuhan Nago wsiok yik tlein. Lua ou wrana man na dli om wto: “Bo Nago wkrek, wkaboti nan neit dait wkoit ykan kadio hra yik biele wabri ke, afe?”a2 Ofo na dli mada man lua mto: “Hau, mam meit kadio kat wkoit ykan hra yik biele wabri ke. 3 Ha, wkoit mres hra wak biele wabri alko la mam mleli fe hra Nago wtoji wto: “La nan neit dait, nna hewain dait fot wkan ei yila, wa bo nan neigi!”
4 Mahin lua wrana man na dli om wto: “Hyee, mdain! Bo nan neigi dait! 5 Nago wnok wale fe bo la nan neit, ofo la nan nsifuon ei yihak, ofo la nan nsiafolo nde kayi Nago, nnok fot ni yibot, nnok fot ni yisgiai.”
6 Na dli okom mhot wkoit ykan ei yibot yibe ni eit, mkaso om mtlok mbahoin wkoit ykan ei ymnel yibot karmiak kat, mnok sas mto bo wkoit wkan ou wolot fe om msiafolo, mde om mlos wkan mreu ofo mat, mhnak fot mre wan msmian hra wadien sisi om, ofo ou wat fot. Oko fo la yeit sisi. 7 Mde la ysifuon ei yhak, ynok tnes ni. La yrioro fe yhana ro kat la ykablok. Ofo la yehet wkoit ara wlas ykatak yifle ei yka, yafat yibe wsan ofo ysieren.
8 Kayi mde tali mlowin kat sba fo, la yoso fo Tuhan Nago wain-an fe biele wabri ale, wteit mroktis mak fobi, whi waka. Mde na tkoin ou wadien wsmian la ylak diaman yik wkoit yolo hra yik biele oko, se bo Tuhan Nago whot dait ei.
9 Mahin Tuhan Nago wwit na tkoin ou wto: “Nen nafe sio?”
10 Ou wto: “Tet toso nen nteit ei yhi, naka nak biele wabri ko, mde tet taliak fe tet tkasien. O le ma tet tlak diaman ei.”
11 Ou wto: “Na sie ma yrana man nen se nnok tnes fe nen nkablok kei? Walde nen nat hriok wale wkoit wkan hra tet ttoji tto nen nat dait ou, afe!”
12 Na tkoin ou wsamenie wto: “Na dli hra nen nlak mak ko madien tet, o le ma mhnak wkoit wkan ou wan tet, mde tet tat.”
13 Mde Tuhan Nago wefitwain man na dli om wto: “Nen nsiok ni mit ma msgia mde okom?”
Mde na dli om mto: “Lua angko ou le ma wgebra tet, he tet tat wkoit wkan ou.”b
14 Mde Tuhan Nago wrana man lua ou wto: “Fe hra nen nsiok ni mde ke, tet tfruo kat nen:
“Foo! Bo nsgia buon!
Nen nke nabe kayi erwas wasgia karmiak kat newer
erwas tabra yidien ni ror warok kadio kat ei!
Bo nen ndiele deri fe fobi,
nlak nkmat om mse bet aiti!
Bo tali man tali man nen nat sawuan deri kbiak,
yibe ni eit yin nen kawuak de naigi!
15 Tet thnak nen nadien na dli angkom
la nan nkhan frit kawuak,c
nen ntakein ei ykhan yidien kawuak om mtakein ei.
Basak om mtakein mreu wbatra nen nsam,
ha, nen natan ou wteit kawim!”
16 Mde ou wrana man na dli om wto:
“Foo! Basak sba nen nto nsois,
ofo tet tsiok nen nhlet nkedi mkoko msamsa kat,
nen nkliowo kayi ti-ti-ti nfasa kat, sba fo nsois!
Mde wanik deri eke, nen nbahoin nkesik sawuan nsmian ou,
ofo ou wslonti kawuak nen.”d
17 Mde ou wto oli man na tkoin ou wto: “Fe hra nen noso kmiet nsmian om mrana ni, de nat hriok wkoit wkan hra tet ttoji wale wan nen ou tto: ‘Nen nat amo wkoit ou wala!’ Mde ke fo:
“Foo! Fobi kom msgia kawuak
mabe nen noso dait tet!
Tali man tali man nen nkliowo nago biele,
nhlet nsiok dieres kawuak de nbresek kat,
sba se nat tnes ni eit. Mde kawuak eke, kayi de nen naigi.e
18 Basak bet hra nen nago biele fe om
mfori fali wiya yidien ni sla yrok ysamsa kat,
yiflie yisti kat biele kayi de biele ykan
kyamre deri yiheit yibe ni eit yin nat.
19 Bo nen nsiok kayi ni, nsebi nflok kat
sba fo nat tnes ni eit,
kayi de naigi, nsalit nabe oli bet,
fe hra tet tsiok nen nahin deri bet.
Nnok deri nen nke nahin deri kbiak,
basak fo nen nsalit oli nabe kbiak.”
20 Na tkoin ou wwak wsmian om mkedi mabe Hawa, nai yto Mron, fe hra om mabe na hra yiron ei yeme kadio kat.
21 Mde Tuhan Nago wsiok not trik yehin erwas yfalek yin na tkoin ou wadien wsmian om, ofo wsiok wanik la ytrik.
22 Tuhan Nago wrana sas wto: “Nto tkoin, na tkoin oko wbahlia wde wale faf fke, wnok fot ni yibot yidien ni yisgiai. Walbat faf fliokeit ou wna mguos wlos fien fot oli wkoit man kdie hra wabe nai yron fe ou, waka wat, ofo wron lis kawuak. Satian om mkait lis kawuak ou!”f 23 Mde Tuhan Nago wbahe kat na tkoin ou wto: “Nen nain kat! Nhokti kat nahin biele Eden ko, nain nse bet mahin tlein hra kaman tet tsiok nen, ofo nago wat biele nak ana!” 24 Wde le oko ou wwain kat na tkoin ou whok. Mde ou wlak malaikat kerub yibe yese barnia yleli fali biele Eden wtato wse tali mhok. Ou wlak skatoin fot mnian lis mres hra wdhen wkahroro, wmli frok-frak wse ta, wse ta, wabe wadien malaikat ei ydeheti na mre yein oli dait fan main mse wkoit waron ou wak.