Kain Wadien Habel
4:1-16
4
Oko fo, Adam wsmian Hawam kawuak de mkmat, msois Kain.a Mde om mto: “Tuhan weren tet tsois, tkafe wet wadlau. 2 Mde mkafe oli Habel,b hra Kain waliwet ou. Habel wabe na waror lokdi erwas kambing domba, ha Kain wabe na waago sawuan biele. 3 Ei yese kayi satrio kat. Mde Kain whnak sanfe ni mre yehin biele oko yin Tuhan. 4 Habel whnak fot ni sanfe wawor wa mniak mre yehin kambing domba yiflesa ei yin Nago. Mde Tuhan waisi kein Habel wadien ou wfe ni sanfe ei.c 5 Mahin Kain wadien ou wfe ni sanfe ei, Tuhan waisi dait. Ofo Kain wkaso msa, wtatrein karmiak kat. 6 Mde Tuhan wrana man Kain wto: “Hra nen ntrere, nsi khan fe me? 7 Bo nen nto nsiok ni yibot, ofo tet tkain nen. Yo nen nto nsiok ni yisgia, ofo satian om msaton-ton mak hrede mde le kaisin hra mbahoin yibe mkeben eye nen. Mahin deri nhron la, nkanas kat, se bo nwain kat om.” 8 Mde Kain whakan man waliwet Habel wto: “Naka, la faf fein fse biele.” La yhok yik biele, ofo Kain wba ro kat waliwet Habel ou kayi de wkak, ofo when om msik mse bet aiti.d 9 Mde Tuhan wefitwain man Kain wto: “Naliwet Habel wafe sio?” Ou wkesi keben wto: “Hee, tet tnok dait. Hra nen nto tet le ma tsmit siwain ou waa? Hmpai!” 10 Tuhan wto: “Ni mit ma hra nen nsiok ekei? Noso la! Naliwet when om mkader kohok man tet mahin fobi aiti.e 11 Foo! Ntainti kat bet kom, nain tfara! Tet twain kat nen ntiti kat, nsiok oli dait kawuak bet, fe hra bet magiet om mhak, mwien fien wale naliwet wfe hen hra nen nba ou.
12 Basak sba nen nto nago wat biele nak bet kadio fo, wi hra nago biele fe okom mkan dait, sgia! Ofo nen nabe kayi na hra wain ri-ra, nain sak-sak deri nak fobi katak.” 13 Kain wto man Tuhan wto: “Nen nhirit tet tkafe tfe satian kom mitian karmiak kat, bo tet tkafe om mde le sie? 14 Madien hra ko nen nwain kat tet tahinti kat fobi kom, thot oli dait kawuak nen. Ofo tet tadien oli nen nde sie? Bo tet tabe kawuak na hra wain sak-sak fobi katak kom. Bo na mre ytiere tet, ofo yska kayi tet.” 15 Mahin Tuhan wto man ou wto: “Hau, Mdain. Na man sio ma wska Kain nen, ofo tet ttriesi ou wkafe satian om mfle mewer mao mtalak.” Hra oko fo Tuhan wlak kyat mre man Kain se bo nai ytiere ou, ofo yba dait wkak. 16 Ofo Kain wahinti kat Tuhan wbariomo, wase wak fobi Nod, hra nai yto fobi Tfara, hra biele lwek Eden wtato wse tali mhok.
Kain Wtakein Ei
4:17-24
17 Kain wadien oli wsmian om, mde mkmat ofo msois Henokh;f sba fo Kain wala kota mrem, ofo wwak kota mkedi okom msadiak wain wet Henokh oko. 18 Henokh oko wkafe Irad,g Irad wkafe Mehuyael,h Mehuyael wkafe Metusael,i Metusael wkafe Lamekh.j 19 Lamekh ou wsmian hamis lak, mre mkedi mabe Ada,k mre mkedi mabe Zila.l 20 Ada mkafe Yabal;m o le ma wtakein na hra yese yik bol dik, yror ni ror. 21 Waliwet ou wkedi le ma Yubal.n O le ma wtakein na hra ybait sawuan kecapi yidien yfrio sool. 22 Zila mkafe fot wet, o le ma Tubal-Kaino hra wtakein na hra yba sawuan tembaga yidien besi. Tubal-Kain wahano le ma Naama.p
23 Lamekh wto man wsmian lak ei wto:
“Ada nadien Zila, la nan noso la tet,
Tet tsmian la nan, noso tet trana ni.
Tet tbatiorok wale na dla fori mreu wkak,
fe hra ou wba tet tkain klis hra mfik mhenbaf kom.
24 Na man sio ma wska Kain wabe wtriesi,
ofo Nago wtriesi oli, whnak ou wkain satian mewer kat mao mtalak kein kdie.
Yo, na man sio ma wska Lamekh tet,
ofo Nago wtriesi whnak ou wkain satian mewer kat kdie mao 77 (na tolik yeigi whri na wna yahar teit mtalak).
[Ojin trar mabe Kain wate kokos mharfe le kou.]
Set Wdanhok Habel
4:25-26
25 Mahin Adam okou wsalit wadien oli wsmian om mde mkafe wet wadla mreu. Mde om mwak wkedi le ma Set, hra nai yto Danhok, fe hra om mto: “Nago whnak wet kou wan tet wdanhok wan Habel fe hra Kain wbatiorok wale wkak. 26 Set wkafe fot wet wadlau mreu, ofo wwak ou wkedi le ma Enos, hra nai yto Feigi Kayi.
Madien hra oko fo na tkoin ywit sayen kmo Tuhan wkedi om,q ynok tmol mse ou wak.