Yakub Wrana Skatoin Ni Yin Wfe Wet
49:1-28
49
Mde Yakub wwit fien wfe wet ei wto: “Nan nka kadio kat nse tet tbariomo ko se nan noso tet trana krek ni hra basak yhok yin nan.2 Tfe wet nan nka nbahliowo nse nono Yakub tet tak,
noso ni hra nono Israel tet trana:
3 Ruben, tfe wet waflesa nen,
kamuolo tet tkanas tkashok fe nen,
nen nfle nkanas newer naliwet wai.
4 Mahin fo, hra ke nen narin nfriok deri nde kla.
Nen nfle oli dait,
fe nen nkanas newer kat ni makohok.
Hra nen nase sayi wale komo hra nono tet tfem!
Ou wamir kat wale tet!
5 Simeon wadien Lewi la yibe kaisin,
ysiok mnian lis yibe yiyaka.
6 Foo! Tet taha ttrik tse ei yfe sadir ekei,
Foo! Tet taha tbalifis tadien ei,
fe ei ytrere yska na marok,
ei ykasa, yfolo kat sak-sak sapi yteit koron.
7 Tet tfruo kat ei yibe ei ytrere mkanas!
Tet tfruo kat ei yibe ei ykaso yaka!
Mde tet tklat siar ei yese sisi oli dait yik fobi Yakub.
Tet tklat siar ei yese wat-wat yik fobi Israel.
8 Yehuda, nen nke namon wai naliwet wai yhdin nen.
Nen nslon kat kaisin ydioro ei.
Nen nke, tfe wet kadio ysaesik yin nen.
9 Yehuda, nen nkanas nde le singa wawet.
Nen natan erwas ofo naran narin fali nse wi mayehet.
Wde le singa wadlau ou wbatoko wase,
Mde singa madlim - na sie ma hra wbren kat wbait tenek om?
Mde ke fo, nai yeliek fot nen.a
10 Yehuda wslonti tiyen fle, wsiokti kawuak fobi Israel.
Tiyen kerajaan mahinti kat dait ou wate kokos,
kawuak de wti wse tiktol na wafle ou waka wslontim,
ofo na sa lolok fobi katak ei yoso ojin ou wfe.
11 Ou wsofotti wfe keledai mak wkoit anggur molo,
Ou wsofotti wfe keledai wawet mak anggur mma hra mkan marok kat.
Wto: “Naheit la, nat wata nko! Ni eit warok!
Mde ou wto wkait eye anggur, wto wsiok anggur mklam,
Ofo ou wware wfe not trik yidien anggur om,
Ou wtotik wfe jubah madien anggur mklam mhen.
12 Ou wsifuon yhen fe anggur.
Ou whek yelek fe sio.
13 Yo, Zebulon, basak ou wase wak siwan mtefit,
Ou wabe sfie fle yibe kma,
ou wbiyalok wadien Sidon.
14 Yo Isakhar, ou wde le keledai wakanas waha wain,
hra wbatoko wslili hrien hra ou watik.
15 Basak fo, wto whot wi hra ou wasem mbot karmiak kat,
wto wsmit fo fobi ou wfem mble kamyi kat,
ofo nai ybahe skayit wkafe ni,
mde ou wsamenie wabe kawor wan ei.
16 Dan, ou ekei wabe fot na sa wahin na sa Israel.
Ou wkerek sadir fe ni warok kadio yin na sa Israel.
17 Basak fo Dan wabe lua wak fan,
lua soko wak fan mtefit,
hra watan ro kat kuda wteit kawi,
mde na wa orin wti wsbiele kat.
18 Tuhan, tet twade kein nen naka nkotadet kat tet!
19 Gad, basak nen nke, kaisin yfit nen,
mahin nen nlelek nwain ei yehin ysbiele.
20 Asyer, nen nfe ni eit warok wban,
ni eit hra ybot ytatol yin na kohok yeit.
21 Naftali wde le rusa madlim hra msiobok mahin omos sofot dioro.
Om mkafe wet ybot.
22 Yusuf wsiok ni ysres yde le wkoit anggur hra mkan yrok,
yde le wkoit anggur hra mfori mataren kla msifuon,
mmai yorin ybaitfi kda.
23 Kaisin ysiok tawur nggaref yfit ou.
Ei yhana ou, ei yhat ou.
24 Mahin ou wsiokti wna mtmer fali tawur,
ou wnai ylos dait,
fe hra Nago, Na Wakanas hra wlowinti nono Yakub tet,
fe hra Nago, tfe Na Wafle hra wkororo tet,
fe hra Nago, Na Amak Sakro hra wlolowain nono Israel tet,
25 fe hra Nago hra nono wfe,
Ou le ma weren nen,
fe hra Nago hra wkain kadio kat ni warok,
Ou le whnak hares man nen,
Ou le ma hra watsiofo nen mahin yik ago,
mahin fot siwan mawain aiti,
hra watsiofo sio ykan yidien na dli ykmat.
26 Yo, nono tet tatsiofo nen nsres newer nahin sfa hra yidien kamuolo kat,
nsres newer kat ni kadio ybot yehin sfa anggait ei.
Basak ni ekei kadio kat ysres, yeis yleli yde le klen bri yik Yusuf wsadit.
Ou le hra wfle wewer wamon wai waliwet wai.
27 Benyamin wde le hoin kol wayaka.
Uwade fo ou wat erwas,
siwit fo ou whnak ni hra ou wasliak.”
28 Na sa Israel kadio kat ei le mke, ei yikan yahar teit lak. Ou le ma yono wrana yin ei, whnak fle fe hra mtatol man ei.
Yakub Waigi
49:29-33
29 Mde ou wto skatoin man ei wto: “Tet taigi le mke, tsalit oli tse tate kokos wai yik. Ofo nan nkali tet tslili wain tate kokos mik knawato mabrim mak sanwat hra Efron na sa Het wfem, 30 mak knawato mak sanwat nai yto Makhpela, mataren kota Mamre wtato ago wak fobi Kanaan, wi hra kamuolo Abraham wkain wahin Efron na sa Het mabe hin man ou. Ou wkain knawato madien fot sanwat om.b 31 Mak wi okom nai ykali tate Abraham wadien wsmian Saram, nai ykali fot tono Ishak wadien teme Ribkam. Mak oko fo, tet tkali fot tsmian maolo Lea.c 32 Sanwat okom madien knawato om tate le wkain mahin na sa Het.”
33 Yakub wto skatoin kahlia ni yfot yin wfe wet ei, ofo ou wkein wteit yorin yse komo, wkein wna, ofo wkaso wti, ou wsalit oli wse ou wfe wate kokos ei yik.d